Ka Lei Rose o Hawaii, Volume I, Number 9, 15 June 1898 — Page 5
5
KE KEIKI ALII
HANA A PUNI
Imi ina Mea Pohihihi.
No ko laua nei loaa ole ina ao naulu ua hele a hakumakuma, nolaila pii hou aela laua nei maluna ona ao kahi hiki ole ina ao ke pii ae, a hoomaka aku la laua nei e kaupono ina mauna o Himela, oiai laua nei e lele ana me ka mama nui ike aku la laua nei i keia moo nui deragona e lele pono mai ana ma ko laua nei wahi e lele aku nei, he ku i ka weliweli a me ka hoomaka'uka'u kona nanaina, he kino eleele nui kona, ua paa me na unahi nunui manoanoa, me na maka ua hele a uila, oia no oe o ka weli o ke kukaepele 'la, a o kona waha hoi, ua like me ka imu ahi, e oili mai ana hoi ka mahu a me ka uahi mai loko mai o kona waha a me kona puka-ihu, a o kona papa niho, ua like me ka lipilipi o na mauna awaawaa o Arerata, me kona mau alelo kino nahesa hoi, e oili mai ana mai loko mai o kona waha, e wili ana i o a ianei, me ka makaukau no ke nahu ana mai, a e ale hoi i kana mea i makemake ai e ale.
I ua moo nei i manao mai ae e lele pololei mai imua o laua nei, ia wa no i pii ae ai ua manu nei nei me ka hikiwawe loa, a iloko o ka imo ana o ka maka, ua upi ae la na eheu o ua manu nei, haule ana laua nei a kokoke i ka ilikai, a ia laua nei e kikakaha ana i ka ilikai, ike aku la laua nei he Waipuilani nui e wili ana me ka ikaika nui, e hapuku ana ina mea a pau loa e loaa ana i kona ikaika. Me keia ikaika nui o ka makani puahiohio e nee mai ana imua o laua nei iloko o ka imo ana a ka maka, ua pii ae la laua nei a hiki maluna o ka huini o ka puahiohio, a hoolai malie iho la laua nei oiai, ua naenae iho la ka manu i keia mokomolo ana me keia pilikua nui i halawai mai me laua nei, oiai laua nei e hoomaka ana, me ke kauaheahe malie ana a hiki i ka maha ana o ka manu, hoomaka hou aku la laua nei e lele me ka mama nui iloko o na makani ino o kela a me keia ano, aka, he mea ole wale no ia ia laua nei, ua like paha me ekolu po a me ekolu ao hiki ana laua nei i ka welelau akau o na mauna o Himela, a ia wa laua nei i hoomaha iki iho ai iluna o ka piko o kekahi mauna kiekie.
Oiai laua nei e hoomaha ana, nakaka ae la ka honua ma kahi a laua nei e ku ana, a oili ae la ke poo o kekahi akua maka aa a ku i ka hoomaka'uka'u. Ia wa no hoi i kuha mai ai ua akua lapu la i kekahi mea pilau polopolona loa mai mai loko mai o kona waha, aka nae, mamua o ka puka ana mai o kona kuha mai loko mai o kona waha, ua lele ae la laua nei iloko o ka lewa, iloko o ka imo ana a ka maka, lewa ana laua nei he mau haneli kapuai mai ka honua ae, a nana iho la laua nei maluna iho o ua akua lapu nei, ua pii ae la kona kino mai loko ae o ka lepo, a e ku ana oia maluna o ka ili honua, me ka manao e hoopii hikiwawe ae i ka loa o kona kino a loaa laua nei e hoolai malie iho ana maluna, ia hoao ana ae o ua Akua lapu nei e hana pela, e hiu ae ana ua manu nei i ke pa'i make poo o ua akua nei, me kekahi eheu ona a kolili ana ke poo o ua akua la me he poka la i ki ia mai ka waha aku o kekahi pu kuniahi nui he 100 tona, a puehu liilii ae la kona kino me he puu opala 'la imua o ka makani, a o ke koena iho o kona kino, ua lilo ae la ia i puulehu. A hoomau aku la no laua nei i ka hele ana ma ke kualapa o na mauna o Himela. I keia wa a laua nei e lele nei, ike aku la laua nei i keia mea liilii me he ao uliuli panopano eleele 'la, e nee mai ana imua o laua nei, a wehe ae la i ka loa a me ka laula O keia ka popilikia hope loa, hiki aku laua nei imua o kahi o ke kumulaau nona na hua gula.
Aole i pau.