Ka Lei Rose o Hawaii, Volume I, Number 9, 15 June 1898 — Page 7
7
NO SAULO
KE ALII MUA O KA POE HEBERA
I KA WA KAHIKO
Iwaena o ka lahui o ka Isaraela, ua kapa ia aku o Saulo, o ka moi mua loa o ka poe Hebera, maloko o ka moolelo o ka baibala, o Abimeleka, ke keiki a Kiliona, ka lunakanawai hope loa o ka poe Hebera, ua hooikaika oia me ka iini nui e lilo oia i alii a mamuli oia hana ana, ua kapa aku na kanaka o Sekema iaia he alii. Aka aole he wahi o ka moolelo e hoike mai ana ua noho moi oia maluna o ka lahui kanaka o Hebera a ina paha ua noho moi io oia he mea lawe wale iho no oia ia kulana aole hoi ona kuleana, e noho mana, a ua kupono ole hoi e kapa ia he alii. O Saulo maoli no ka mea a ke Akua i koho mai ai i alii maluna o ka Isaraela i ka wa a na kanaka o ka Isaraela i nonoi aku ai i ke Akua, i alii, hoouna no lakou ma kahi o ko lakou hilinai ana maluna o ke Akua, elike me ka ke Akua i makemake ai ia lakou e hana, me ka paulele ana noi mamuli o ka mea mana loa a me ko lakou alii i ike ole ia.
Ua hoike mai ka moolelo o ka Baibala ia kakou, i ka nui o ko ke Akua ahonui, a me kona lokomaikai ina kanaka. Olelo aku la ka Haku ia Samuela ma ka moe, i ka i ana aku:
Ua hoole na kanaka ia'u i ka Haku; aka, ua ae aku no nae oia i ko lakou makemake i moi no lakou, i hoike no kona aloha ana i ka lahui o ka Isaraela, mamuli no ia o ke koho ana a ke Akua i kekahi kanaka kupono.
E malama mau ia hoi kona kulana alii kiekie ma ke ano he alii o na alii. O Kish (Kisa) no ka mamo oia a Beniamina, mamuli o na hoike a ka moolele, ua olelo ia, o keia kanaka o Kisa, he kanaka ikaika oia, a he ikaika kona mau lala a he kanaka waiwai a koikoi no hoi, a nana he keiki i kapaia o Saulo kona inoa, ua koho ia hoi oia i alii no ka Isaraela, elike me ko lakou makemake.
He kanaka opiopio o Saulo i koho pono ia e ke Akua. I kona wa i pii ae ai a lilo i kanaka o-o ua nui kona mahaloia no kona kanaka ui a maikai, a he ikaika hoi kona mau lala a he kilakila kona oiwi, aohe lua ma ke kilakila o kona kulana.
O ka Hoki ka holoholona maa mau i ka hooholo ia ma Judia ma kahi o na lio, o na lii a me na keiki alii oia ka lakou e ee ai. I ka wa i imi ai o Saulo i ka Hoki o kona makuakane, aole ia he mea i kamaaina ole i ka hana ia eia, i kela wa he 40 na makahiki o Saulo a ua loaa keiki oia me kana wahine, o ka hale o kona makuakane o Kisa oia no kona home, oiai hoi maloko o na rula o ka noho makuaalii ana, aia wale no ka hiki i ke keiki ke noho nona iho a he make no kona makua.
O ko Saulo wahi a noho a home maoli, aia no ia iloko o na apana aina o Beniamina, nolaila ua pau wale no keia wahi i ka hele ia a me na mauna o ka aina o ka Eparaima, o ke kulana maoli o ka aina e olelo ia nei, aole loa e hiki ke hoomaopopoia ma ka moolelo.
Ma keia hele makaikai ana o Saulo a me kana kauwa, hiki aku la laua i kekahi wahi i kapaia o soph, (Kupa) ua olelo ia eia ma keia mokuna aina kahi i noho ai ke kaula o Samuela, aia ma kekahi kulanakauhale i kapaia o Ramah, i keia wahi, i aku la o Saulo i kana kauwa, e huli hoi laua mamuli o na kumu, ano i paha o hoohuoi kona makuakane iaia no ko laua hele loihi loa.
Ia wa i pane aku ai kana kauwa, i ka pane ana aku; eia ma keia kulanakauhale nei ke kauwa a ke Akua. E hoomaopopo kakou, aole i kamaaina i ke kaula o ke Akua me Saulo, a pela no hoi me ke kauwa a Saulo, mai ka hoomaka ana mai e kaulana o Samuela ma ke ano kaula iwaena o ka Isaraela, ua hoomau aku la no ke kaua a Saulo i ka iana ia Saulo, no ka mana i loaa i ke kaula mai ke Akua mai, a paipai mai kana kauwa e hele laua i ke kaula, i mea e loaa pono ai ia laua na kuhikuhi pololei ana mai o ko laua alahele.
I aku la o Saulo i kana kauwa, heaha ka kaua e lawe ai na ke kaula? Elike me ka mea maa mau ina loina o ka noho ana o na aina hikina, he wahi mea pono ole ke kipa ana aku i kahi o ke kanaka o ke Akua me kahi makana ole; i na he wahi makana uuku o ka akahi hapa o ka Kekela, [Shekel] ua like mawaena o umikumamakolu a me umikumamalima Kekela.
E uhaele kaua, wahi a ke akuwa i kona Haku ia Saulo, ae aku la o Saulo i ke koi a kana kauwa e hele laua i kahi o ke kaula, ia laua i komo aku ai iloko o ke kulanakauhale, halawai aku la me laua na wahine he lehulehu e hele ana i ka ukukuhi wai, a ninau laua i kahi noho o ke kaula o ke kanaka o ke Akua.
I ko laua ninau ana, i mai la lakou oia ka mea nana ua maa na kaula i ka wa kahiko i kapaia he poe ike ma ka nana ana, ma o lakou hoi e ninau ai na kanaka no ke Akua.
O ke aupuni maoli o na Isaraela, he aupuni Akua. Oia hoi he aupuni i noho malalo o ka ke Akua hooponopono kanawai uhane ana, a me ka ke Akua hoopono kanawai aina a lahui ana.