Ka Lei Rose o Hawaii, Volume I, Number 10, 30 June 1898 — Page 10
10
Na Olelo Naauao.
1
1—E hoomaemae i kou kino i kela la me keia la. 2—E hoomaemae i kou opu i ka wa kupono e pono ai ka pahu mekini no kou ola. 3—E hoomanao i ke Akua i ka mea nona na pomaikai o ke kino me ka uhane.—Gregory.
2
He uuku ka hua makeke (mustard) i kona ulu ana, ua lilo oia he kumulaau nui mahope aku, pela hoi ka manao hana uuku o ke kanaka, ua lilo i mea nui a kaulana.—Ivan.
3
E ka mea puni hiamoe, mai hoolilo ia oe i loli, aole hoi i mole (mu) me he mea wawae ole la a lima ole, no ka mea, he hoailono ia no ka palaualelo me ka molowa, a ua kue hoi i ke kanawai o ke Akua.—Ables.
4
Mai malama i na mea waiwai ole i mea nou e huli ai i loaa nou, o loaa mai ia oe he mau mea waiwai lapuwale, aka, e kiola i na mea waiwai ole a huli aku i loaa nou mamuli o na mea waiwai maikai, alaila, e loaa ka pomaikai ia oe ma ia mau waiwai.—Boyds.
5
E kahea i kela me keia mea uhane e maalo ae ana imua o kou ipuka hale; e hanai a hookipa hoi i ka malihini; e hooluolu i ka mea maluhiluhi a nawaliwali; e hoohauoli ka mea kaumaha; e hooinu hoi i ka mea makewai; e aloha i na mea a pau, a kaaupaona i ua aloha la i ka mea waiwai a me ka mea ilihune.—Yamrha.
6
Mai hana i kau hana me ka hoomaka ole mai ke kumu mai. Aole hoi e hana i na hana ku i ke aloha me ka minamina hou iho i kau i haawi ai na ka mea ilihune, oiai o ka haawi hemolele, oia no kou haawi ana me ka minamina hou ole i kau.—Beanhaven.
7
E kuu keiki, e kui oe i ka naauao a me ka pono i lei nou, a e lilo ke ala o kona mau pomaikai i kahiko nani mau loa no kou mau la o keia ola ana.—Sunbeam.
Na Olelo Hooheno.
1
Heaha ka wai e pono ai oe ke eha?
Haina: O ka wai kailieha, a penei oe e hooheno malie ai:
Aloha oe e ka wai
Wai o Eleile
Ia wai kailieha
Eha oe la e pono ai—Kapili
2
Heaha ia ka mea i olelo ia ai, Nawai e ole ke aloha?
Haina: No ka mea, ua pili aloha maua, penei ka anoi ana:
Nawai e ole ke aloha
Ua pili aloha maua
Ua loko hala i ka puuwai
Me ka ua tirihune o uka—Nawahi
3
Heaha ka mea a kamalii i olelo ai i ke ino o ka ilio?
Haina: No ka mea, he mea ino, he nahu, uku a puni ka makahiki, a penei ka huai ana:
Ku ilio, ku ilio
Wahi a ke keiki
Mea ino nahu uku
A pau ka makahiki—H H
4
Pomaikai ka poe i olelo ia i ke kolopupu a haumakaiole, no ka mea, o ke ola ia a ke Akua.
5
Pomaikai ka poe i olelo ia i ke kani-koo a palalauhala, no ka mea, he kani ke koo, a he pala ka lau o ka hala.
6
Pomaikai ka poe puhi baka a huai mai ka uwahi ma ka pukaihu, no ka mea, ua loaa no ka pukauwahi o ka lakou mau oma kuke.
7
Pomaikai ke kanaka akiaki a holoholo olelo, no ka mea, e like ana oia me ka iole ka akiaki a pau holo iloko o ka lua.