Ka Lei Rose o Hawaii, Volume I, Number 10, 30 June 1898 — Page 12

12

Manao Hoakaka.

                E na makamaka me na hoaloha, ka poe i hookipa a i apo aloha mai i ka nupepa ka "Lei Loke o Hawaii," ka hoa haihaiolelo o na home Hawaii, me oukou a pau ko ka "Lei Loke" aloha pumehana, ma o kona Lunahooponopono la. E oluolu mai i keia mau manao hoakaka aku imua o oukou, a oia keia malalo iho nei:
                1. Mamuli o ka piha kui ana mai nei o ka kakou wahi pepa ka "Lei Loke o Hawaii" i na olelo hoolaha, na manao waiwai, na mea hoonaauao, na moolelo, na mea pili akeakamai, na manao kalaiaina, a me na nuhou o na aina e me ko kakou iho nei, nolaila, ma ka malama ae nei o Iulai la 15, e puka aku ana ka kakou "Lei Loke" ma ke ano he nupepa ua hoonui ia ae, oia hoi, e pakui hou mai ana makou he eha ona mau aoao heluhelu i koe, a e hooloihi hou ia ae ana hoi kona kino e like me ka loa a me ka laula o ka nupepa "Ka Makaainana"
                2. E hoomanao hoi e na makamaka a me na hoaloha o ka "Lei Loke" a me kona Lunahooponopono, a hiki mai i ka la pau o ka malama o Iulai ae nei, 1898, oia ka piha ana o ka eono malama o ke ku ana o keia nupepa, i hookumu ia maluna o ke kahua o ke kaulike, a me ka naauao ma na mea a pau, aole ma ka houhou wale aku a me ka hoolaha pilikino wale ana, aole ma na mea hakukole a kuamuamu wale ana, aka, o kona mau kahua wale no e ku nei, o ka hoonaauao aku, ke kuhikuhi aku, ka hoike aku, a me ka hele pololei ana maluna o na mea ku i ka oiaio me ka naauao.
                E hoomanao pu no hoi e na hoaloha a me na makamaka o ka "Lei Loke" i ke ola o ka hapalua makahiki o ka kakou pepa, oiai, o ke dala wale no ke kumu e hiki ai na mea a pau, a malaila wale no e launa mau ai kakou i na wa a pau me ka oluolu maikai.
                Nolaila, e oluolu mai e na makamaka a me na hoaloha o ka "Lei Loke" i loaa ole aku ko lakou mau helu a pau, e hoike mai, i pau pono ai na helu mai ka helu ekahi a kona helu hope e hele nei. Nolaila, e hoomanao i ke ola o ka kakou "Lei Loke," i mea e mau ai ko kakou launa ana me ia, e like me na mea i pai ia iho mawaho o kona kino lahilahi e i ana, "O ka Lei Loke e Hawaii no ka hoa ha'iha'i-olelo no na HOME HAWAII."
L. H. — L. L. H.

                Maluna mai nei o ka mokumahu Rio Janeiro, i hoihoi ia mai ai ka lehu o Capt. Bridley o ka mokukaua Olympia i make ai. Ua puhi ia kona kino i ke ahi a o kona lehu keia e hoihoi ia nei i ka ohana.
                Ua lawe ae ke aupuni i ka hihia o W. D. Hamilton, ka haole nana i kipu ia Andrew Davis i kela mau la aku nei, ma ke ano he pepehikanaka no ka degere ekahi.
                O ka mokumahu China (Kina) ka mokumahu aloalo koa i hiki mua mai i keia awa, me na koa kuikawa he 1500 no Manila.
                O ka mokumahu Kina ka moku lawe hae o na moku lawekoa Amerika, a maluna mai ona i kau pu mai ai ke Gen. Maj. Gen. Green.