Ka Lei Rose o Hawaii, Volume I, Number 10, 30 June 1898 — Page 13
13
KE KEIKI ALII
HANA A
IMI i na MEA POHIHIhI
Oiai lana nei e nee aku ana a kokoke i kahi o ua mea nui eleele nei, e nee malie mai ana imua o ko laua nei alo, ia wa no ka manu Rock i pelu mai ai kona poo malalo o na hulu o kona umauma a upoi iho la kona mau eheu me ka ikaika nui, a iloko o ka imo ana a ka maka, puehu liilii ae la ua mea eleele nui nei, me he ao lele eleele la e like me ka uliuli o ka nanahu.
A ike aku la ke kanaka kilokilo i ka helelei ana iho o na nalomeli maluna o laua nei, a ma o a maanei hoi o laua, e haule ana me he mea la he kuaua ikaika no ka hooilo. Ia wa hookahi no hoi, ua puka aku la laua nei ma kela aoao o ua kia ao eleele nalomeli kiko nei, i hoouna ia mai ai e na kiai kupua o ka laau kapu, nona na huagula ma ka piko o na mauna o Himela e kiai makaala mau ia ana.
O keia na kupua a pau a oukou e ka poe heluhelu i ike ai ma na helu mua o ka kakou nupepa "Ka Lei Loke," oia no na kia o ke kumulaau kapu, a me kona mau huagula eeha e like me na lima kuhi eha o ka ihu o ke panana—North—East—South—a me West.
Iloko o ko laua nei puka ana aku la ma kela aoao o ua kia-ao eleele nalomeli nei, ke lohe la ke kanaka kilokilo i ke oeoe a me ka nunulu o na nalo me he mau miliona la o na legiona debolo e iho ana i ka lua ahi o ka po.
Ia laua nei i kaa ai ma kela aoao, pii ae la ka manu Rock me ka ikaika nui a hahani ana laua nei malalo pono ae o na kukuna wela o ka la, ia wa i nana iho ka hana o ke kanaka kilokilo, eia laua nei i ka papa lani elima, ma keia papa i ike iho ai ua kilokilo nei i ka pinapinai ana mai o kona hanu, oiai ua pau mai ka ea kaumaha, a ua komo aku la laua nei i kahi mama loa o ka ea, oia hoi ka ea lahilahi.
I keia wahi la, hoomaka iho la ke poo o ua manu nei e kimo ilalo, he imo ana na ka maka, hookikakaha ana laua nei maluna pono iho o ua kumulaau huagula nei e uhi ia ana e ka noe, a maluna pono iho o ua kumulaau nei, e pipio ana na anuenue he umikumamalua, a o ka ua kilihune e helelei iho ana maluna o ua kumulaau kapu la, he mau kilihune ua gula no ia, o na mea a pau he anapa wale no e like me ka anapa ana o ke gula, i ka wa e hiki pono iho ai ka wela o ka la maluna o kona mau kahiko nani e ke anuenue ka ua a me ka noe.
Ia laua nei no a kuu iho ilalo, hoomaka ae la keia mau mea kamahao e nalowale, a ku mai la ua kumulaau la me ka nani nui imua o ko laua nei alo, me na hua gula he eha ko lakou nui, he hookahi me na ihu eha o ke panana. Ia wa no i hele aku ai ke kanaka kilokilo a ma kahi o ua kumulaau la e ku ana, a hana iho la oia e like me na kuhikuhi a pau a kana kumu a Makaike i ao mai ai iaia.
Mahope iho o kana hana ana i na mea a pau me ka holopono, lohe aku la laua nei i na leo hauoli no kekahi anaina nui launa ole, a laua nei i ike ole ai, e i ana—Hosana! Hosana! Ia Alahe ka Mea Mana Loa, ka mea nona na mea a pau, a o kona makemake wale no ke hana ia ma ka lani a me ka honua! Aburo!
Ia wa, kau iho la ka ilihia nui maluna o ua kilokilo nei, oiai, oia mau leo a ia nei i lohe aku ai, aole ia he mau leo no ke anaina kanaka, aka, he mau leo ia no na Anela o ka lani, e hosana ana imua o ke Akua. Nolaila, ua lilo ia mau minute i ke kanaka kilokilo, he mau minute koikoi me ka ilihia loa, he mea i loaa ole iaia mai kona hanau ana, a hiki iho la ia mau minute iloko o kona ola ana.
Ia pau ana ae o keia mau haawina ilihia o ke kaumaha maluna o ke kanaka kilokilo, hoo iho la keia i ka hua gula i loko o kekahi wahi eke weleweka silika gula, a hookomo iho la oia i ua hua gula la iloko o kona poli, a lele aku la laua nei me ka hauoli nui.
Aole i pau.