Ka Lei Rose o Hawaii, Volume I, Number 10, 30 June 1898 — Page 9
9
me Iapana ia Amerika me ke kanalua ole, no ke kaua ana aku ia Geremania, Sepania, Auseteria, Farani a me Rusia:
O keia ka mea e maopopo nei ia makou, e like me na manao kalai aupuni o na nupepa. O keia no hoi ka wa a kakou e olelo ae ai, e komo holookoa aku ana ko ke ao nei i ke kaua nui weliweli loa i ike ole ia mumua, mai ka hookumu ia ana o ka honua a hiki i keia au o ka honua e nee nei. Aka, ina no hoi e lilo mai ana keia mau hoohana a Geremania ia Amerika i mea hiki ke hooponopono ia me ka maikai, alaila, e mahalo ia ka inoa o IEHOVA SABAOTA—ke Akua o na Kaua—ka mea Nona ka hoonani ia ma na Lani kiekie loa—he malu Kona ma ka honua, a he aloha i na kanaka.
He Pono e Loaa na Agena a Komisina Kalepa
No na Kanaka Hawaii
Helu 2
He mea pono e kukulu ia ka Oihana Komisina Kalepa Hawaii ma ke kikowaena o ke aupuni ma Honolulu nei, a e kapaia ua oihana la—ka Oihana Akena Kalepa Hawaii, a e lawelawe ia e kekahi kanaka a mau kanaka e ae, a e kukulu ia hoi keia hana ma kekahi wahi iloko nei o ke kulanakauhale, a e hoolaha ia hoi ka manawa a me kahi e kukulu ia ai ka hana.
Maloko o na nupepa mamuli o ke noi ana aku i na makamaka a me na hoaloha, me ka poe mahiai a pau o ka aina mai Hawaii a Kauai, e hoao mai ia kakou iho na kanaka Hawaii ma keia hana i lawelawe ole ia e na kanaka Hawaii mai kinohi mai.
E na makamaka, aole makou e koi aku ana e hookomo mai ia oukou ma ke ano he mau lala no keia hana, e like me ke ano o na hui kalepa, aka, o ka mea i makemake ia, o ko kakou oluolu wale mai no e hoao a e hilinai hoi maluna o keia mau agena me ka manao paulele e hana ia ana ka mea pono, mamuli o ko kakou hoouna ana mai i ko kakou mau waiwai e like me na mea i hoakaka ia maluna ae, a e like hoi me keia mau waiwai:
1—Ka nanahu 6—ka maia
2—ka pia lole 7—ka ia maloo
3—ka uwala 8—ka paka puhi
4—ke kulina 9—ka awa
5—ke kofe 10—ke ko oki
11—na mea ulu Hawaii,
a me na waiwai e ae a pau o kela me keia ano.
He mau mea dala wale no keia a pau ke hoohana ia ma ia ano, koe wale iho no aole kakou i hoao e hoohana ma keia ano. Aka, pehea la e hiki ai e lilo keia mau mea i kumu e loaa ai ke dala, a lilo hoi i kumu waiwai no kakou na kanaka Hawaii. He ninau pololei keia, a he mea pono e pane ia .
Eia ka makou e pane aku ai, aohe e hiki, no ka mea, aohe kakou i hoao e lawelawe i keia hana, aka, ke hoao nei nae kakou e kukulu ae i ua hana la mamuli o ka makou hoao ana aku e hoeueu paipai, a e wehewehe aku imua o kakou i ka pono o ia hana ke hoohana ia, no ka pono me ka pomaikai o na kanaka kalepa liilii a mahiai a pau o ka aina mai Hawaii a Kauai.
Ina e loaa ana ia kakou he mau agena kalepa ma ke kulanakauhale nei o Honolulu, no ka kakou mau waiwai mai na mea ulu a me na waiwai e ae, no na kanaka Hawaii i kukulu ia ma ke kikowaena nei o ko kakou kahua nui o ka oihana kalepa, oia o Honolulu nei.
Aole i pau.