Ka Malamalama Hawaii, Volume I, Number 11, 15 July 1898 — Page 12
12
Lilo o Hawaii
I APANA AINA
No ke Aupuni Manu Aeko
o Amerika.
Honolulu, H. I., U. S. A. ,
July 13, 1998,
3.30 P.M.
I ka wa i hiki mai ai ka mokuahi lawe leta Coptic mawaho ae o Waikiki, ua kau ia mai ka hoailona ua hui na mokupuni o Hawaii a lilo he panalaau no Amerika mamuli o ka hooholo ana a ka Aha Senate. Ua piha ku'i ka uwapo mokuahi a me na alanui i na kanaka e nune ana i keia lono, a ma ka hora 4:45. ki ia na pu aloha, hora 4:20 kani na oeoe a pau.
NO KE KOHO ANA.
O ka olelo hooholo e hoohui aku ana i na paemoku o Hawaii nei me Amerika, ua hooholo ia iloko o ka Aha Senate i keia auwina la, he 42 ma ka hoohui a he 21 ma ka hoole.
I ka wa a ka Hope Peresidena i hoike mai ai no ke koho ana i ka mea io he 2 hapakolu o ka hale i kupono no ke apono ana i kuikahi, ua apono ia. O na Senate me na hoa Lunamakaainana i komo ole mai i ke koho ana, ua haawi mai lakou i na leo huro, nana i hoowawalo ae i na paia o ka hale mai luna a lalo.
Apopo paha e kakauinoa ai ka Peresidena, a e hoouna ia aku i Elele nana e lawe aku i ka olelo0 hooholo a me na hana i manao ia no ka Repubalika o Hawaii , a ia Peresidena Dole hoi me ka ahaolelo Hawaii,
O John W. Foster ana pana ka Elele e hoouna ia aku ana, a na ka mokukaua e hali mai i ua Elele la, no ke kau i ka hae Amerika maluna ae o ka hale aupuni o Hawaii.
Ua manao ia, e loaa aku ana i ka Peresidena ke kuikahi, a kau inoa mai oia i ka la apopo, a e hoouna koke ia aku ka Elele o na mea pili i ka Repubalika o Hawaii, a ia Peresidena Dole me ka ahaolelo o ka paeaina.
O John W. Foster ana paha ka Elele e holo mai ana maluna o ka mokukaua Pilodelepia me ka olelo kauoha a ka Aha Senate. Ua lohe wale ia mai, eia na Komisina e hoouna ia aku ana e hooponopono i na kanawai no ke aupuni hou, oia o W. O. Smith, a i ole ia o Wm. A. Kinney o Honolulu, John Rikikini o Maui M. M. Ester o Kaleponi, N. W. McIvor, Kanikela mua o Iapana.
Ua manao ia , e koho ana ka Peresidena i kekahi poe kupono nana e hooponopono i na mokupuni, a hiki i ka wa e kau mai ai na kanawai hou. E ku ana no ke aupuni malalo o na kanawai e ku nei, aohe he mau mea hoololi iloko o na keena oihana nui o ke aupuni, a hiki i ka wa a na Komisina e hoike mai ai i na kanawai hou me ke kulana hookele o ke aupuni.
Ua manao ia , he mea pono paha ke hoouna ia mai ona Regimana koa a me na pukaa o na pu nunui e like me ko Kapalakiko.
Eia ke lonolono ia mai nei e hoi mai ana ka Moiwahine Liliuokalani o Hawaii Nui o Keawe.
O ka mokukaua monita "Monadnock" ka elua o na moku i ku mai i ke awa o Kou nei ma ko laua ano. He mokukaua monita keia i ke kaua kipi kuloko o ke aupuni Amerika, a mahope mai kapili hou ia ma ke ano kulana monita o keia wa. He 174 ka nui o na kanaka, he 4 mau pu nui, 10 iniha pakahi ke akea o ka waha, he 7 mile a oi ka ikaika lele o ka poka.