Ka Malamalama Hawaii, Volume I, Number 12, 1 August 1898 — Page 3
3
Ka Ninau Hawaii
ADIMARALA MILA
MALALO O KA
Hooko Kauoha Piha
Ka Hae-hoku Amerika
E HUKI IA MALUNA O
Ke Panalaau o Hawaii
Adimarala Mila,
Ua hookohu ia e ke Aupuni o Amerika Huipuia no ka huki ana i ka Hae-hoku o ka Repubalika maluna o ke Panalaau o Hawaii; a ia
Peresidena Dole,
ka huki ana i ka Hae lahui o Hawaii aina ilalo, e like me ka ae ole o kona lahui ponoi iloko o na makahiki elima i hala hope ae nei.
O ke kulana hanohano o ka huki ana i ka hae-hoku Amerika maluna o ka mokupuni panalaau o ko Hawaii Paeaina Aupuni Repubalika, mahope iho hoi o ke kukala akea ia ana o ka hoohuiaina me Amerika Huipuia, ua waiho ia aku ia mau hooponopono no ka hooko kauoha ia Adimarala Joseph N. Mila, a ma ona la e kali ia aku a ka hopena noho'na aupuni kuokoa me hoohuiaina no ka paeaina o Hawaii.
E holo aku ana oia no Honolulu malalo o ka hooko kauoha piha mai ke keena kaua mai o Wakinekona, ma ka la 20 a mahope mai paha o Iulai maluna o ka mokukaua Piledelepia, a hoouna aku iaia ma kona ala moana no ka Pakipika.
O ka mokukaua Amerika Mohikana, aia no oia iloko o ke awa o Honolulu kahi i kali kauoha ai, ke awa hoi a na mokukaua Amerika e kipa mau aku nei ma ke alahele kuwaena no Pilipine.
He mea kanalua ole no ke kauoha ka haawi ia aku no ka mokumahu Kulanakauhale o Puebla, e lawe loa i na pualikoa kuikawa no ka paeaina o Pilipine, a o ka mokumahu Peru hoi malalo o ke kauoha hoomaha ma ke awa o Honolulu, no ke kali a mahope iho o ka hukiia ana o ka hae Amerika.
Malalo o keia hooko kauoha a malama maluhia, e lau kanaka ana ke kulanakauhale o Honolulu i ka puali Rigemana Ekahi o Nu Ioka e kali nei no ko lakou holo aku i ka paeaina o Hawaii a hooko i ke kauoha. Pela pu hoi me kekahi pualikoa kuikawa me elua batari o na pualikoa pukaa, e holo like aku ana lakou no ia kahua hookahi, malalo o ka hoomalu me ke ku kiai ana a ka mokukaua Piledelepia iloko o ke awa o Honolulu.
Ma ka Poalima o ka pule i hala, i loaa mai ai ia Adimarala Mila ke kauoha piha mai Wakinekona mai , oia ke aliikoa alakai me hooko kauoha ma ka ninau hoohuiaina ia Hawaii e lilo i panalaau
E nana ma ka aoao 7.