Ka Malamalama Hawaii, Volume I, Number 13, 15 August 1898 — Page 10
10
Ka Huki ia Ana
O KA
Hae Hawaii Ilalo
A ME KA PII ANA O
KA HAE AMERIKA ILUNA
I ka hora 12 ponoi o keia la, ua lilo aku la o Hawaii he panalaau Teritori no Amerika i keia la 12 o Augate, 1898. Ua pau ka welo ana o ka Hae Hawaii maluna o na pahu hae o ko kakou mau hale aupuni—ua pau, ua hala, ua isapoka ia, aka, e nana aku ia mua na ke au no o ka manawa e hoike mai. I ka hiki ana i ka hora 12 ponoi o ke awakea, ua kuu malie loa ia iho la ka Hae nani aloha o Hawaii mai luna iho o ka puoa nui o ka hale o ka Mana Hooko me ke ku i ke aloha, ke anoano a me ka ilihia, ia wa no i ki ia mai la na pu aloha he 21 e na batari pukaa o ka mokukaua Piledelepia ma ka aoao ma Ewa o ka pa o ka Mana Hooko; ia wa hookahi no hoi, ua ki mai la na mokukaua Piledelepia a me Mohikana i ko laua mau pu aloha he 21, a uu ia iho la na hae Hawaii maluna iho o ko laua mau kia. I ka pau ana o ke kani ana o na leo nakolokolo o na pukuniahi o na batari a me na mokukaua; ua uu malie loa ia iho la ka Hae aloha nani o Hawaii ilalo me ke ku i ke anoano ilihia, aohe waimaka paa ole i ka ike ana aku i ka hanu hope o Hawaii, oia ko kakou hae aloha e iho iho ana ilalo, ia wa no hoi i hookani ia mai ai ka mele Lahui Hawaii ponoi e ka bana o ke aupuni me ke anoano a ku no hoi i ka ilihia, ua lawelawe ia ka huki ana i ka hae ilalo me ka malie loa a me ka eehia no hoi.
I ka pau ana o na oihana o ka lawelawe ia ana o ka hukiia ana o ka Hae Hawaii ilalo me ka ilihia nui me ke aloha pu no hoi. Ua hamau loa na mea a pau, me he mea la, ua kau iho na haawina kaumaha a me ke aloha paumako maluna o na mea a pau; he minute hookahi paha, ua ki hou mai la na batari pu-kaa o na koa marina i na pu he 21, a pela no hoi me na mokukaua. I ka pau ana o na kipu no ka Hae Amerika, ua ua huki ia ka hae Amerika iluna, a hookani ia mai la ka mele lahui Amerika "Star Spanglebauner," a pii ae la ka hae Amerika iluna o ka pahu hae o ka puoa nui oluna o na hale o ka Mana Hooko, a haawi ae la na pualikoa a pau a me ke anaina e kuku ana i na leo huro me ka hauoli nui. Mahope iki iho o ka hora 10 a. m., ua komo e mai la na poe i loaa na kikiki, i mea e loaa ai na noho i hoomakaukauia no lakou ma ka lanai oluna a me ka lanai o lalo pono o ke alo. Mamua iho o ke alo o ke alapii makai e pii aku ai iluna o ka hale o ka Mana Hooko, ua kukulu ia kekahi holopapa.
NA HOOHIWAHIWA MA KAHI UU-HAE.
Mahope iki iho o ka hora 10 a. m., ua komo e mai no kekahi poe makaikai, ka poe nae i loaa mua na kikiki, a lawe ae la lakou i ko lakou mau wahi iluna o na noho ma na lanai o luna a me lalo o ka hale o ka mana hooko, a pela hoi ma kela a me keia aoao o ka holopapa i hoonaniia me na hae Amerika. Ua hoohamamaia na puka pa ma na alanui Likeke a me Palace. I ka hora 11 me 15 minute, ua lohe ia akula ka leo o ka bana mahope mai o ka hale mana hooko, a hoea mai la na koa Piki National Guard i alakaiia e na makai a hiki ma ka puka nui ma ka aoao makai i kapaia ka puka alii; mahope aku o lakou na koa pualu i alakaiia e ka puali puhiohe P. G. Mai laila aku lakou i maki ai a hiki i kai o ka uapo no ka ukali ana mai i na koa