Ka Malamalama Hawaii, Volume I, Number 14, 1 September 1898 — Page 10
10
Nuhou Kuwaho.
Haulepio o Manila
Ma ka moku lawekoa Alliance i loaa mai ai keia mau mea hou ano nui e like me ia malalo iho:
Ua haawi pio mai nei ke kulanakauhale o Manila ia Gen. Merritt, mahope iho o ke kipu ana a Adm. Deweu, a ua nui ka poino o na papu, aole i nui ko ke kulanakauhale, a ua make kekahi mau koa Amerika.
I ka hora 1:30, ua huki ia ka hae keokeo haawi pio e ka Alihikaua Sepania, a ia wa no hoi i hooki ia ai ke kipu ana a na Amerika. Ma keia kaua, ua kokua pu mai na kipi, a ua holomalu ke Kiaaina Augusti maluna o ka mokukaua Geremania Keserin Augusta no kona pakele.
Ua hoike ae na nupepa Geremania, aia ka aoao hema holookoa o Arabia malalo o ka koomalu ana a Beritania. E kukulu ia aku ana pela ka lono ma Wakinekona, i 100,000 pualikoa no ke aupuni.
Ua koho aku nei ka Peresidena i mau Komisina e hooponopono ai no ka haalele ana iho ia Kuba a me Pota Riko ia Maj. Gen. Jas F Wade, Rear-Adm. Samson, Maj. Gen. C Butler no Kuba.
Ia Maj. Gen. J B Brooke, Adm. W S Schley Brig. Gen. W W Gorden no Pota Riko
NO PAGO-PAGO.
Mai ka nupepa Tribune mai o Nu Ioka mai, e hoike ana. Ua manao ka Peresidena Makinele, ua loaa iaia ka mana o ka lawe ana ae ia Pago-Pago ma Samoa, ma ke ano he awa ku-moku a hoahu nanahu no Amerika.
Ka Waiwai o ka Malama Ana
I NA
Iwi Kupapau.
Iloko o ka makahiki o ka Haku 1852, i ke kau o ke kupulau e ulu wehiwehi ana na lau me ko lakou mau lau i luluu me na pua, a pela hoi me na pua o ke kula e kauluwela ana i ka nani o ko lakou mau pua.
I kekahi la e hele ana kekahi kanaka Botania (imi i ke ano o na mea ulu), e huli i na lau laau a me na hua laau iloko o na ululaau, a oiai oia e hele wale ana no, ua haohao loa ia oia i ka loaa ana aku o keia mau iwi kanaka e waiho ana no me ka maikai aohe i popopo, aka, ua hele a aiai, aole no hoi he iwi hookahi i nalowale.
Ua noho iho la oia ilalo a noonoo nui pehea la i poino ai keia kanaka, a oiai oia e noonoo nui ana no ka poino i loaa ai i ka mea nona na iwi, ua ikaika loa ka manao iloko ona e lawe i ua mau iwi nei iloko o kona rumi huli palapala (studio), ilaila oia e hana maikai ai a hoi e like me ka pili maikai ana o na iwi, nolaila, ua hoiliili iho la oia i ua mau iwi nei a haawe aku la no kona home.
I kona hiki ana, ua hana ia iho la ua mau iwi nei e like me kana i manao ai e hana a hookomo ia iloko o kekahi pahu aniani me ka maikai.
He mau mahina loihi mahope mai oiai ua kanaka nei e nanea ana iloko o kona keena heluhelu buke, a ua pili hoi kona mau maka no ke ano makahiamoe, ku ana keia kanaka opio ui, a pane mai la i ua kanaka Botania nei: