Ka Makaainana, Volume I, Number 4, 22 January 1894 — Page 6

Page PDF (808.53 KB)

HONOLULU, OAHU, POAKAHI, IANUARI 22, 1894.

HE MOOLELO KAAO
MONE TIKERO
-KA-
HOLOLIO I KA WA HOOILO
-KA-
UI MAALO I KE KUPULAU
A O KE
KEIKIALII HARE MATINE
-KE-
KIAHA OPAKA O NINEWA.

MOKUNA IX.
Ka hololio iloko o na Ululaau
Ka makua me ke keiki – Ke
Kupua Figinedera.

            I keia manawa a ua hololio la e holo nei iloko o ua ululaau, oia ka manawa a ua ao kaalelewa e haakokohi ana, ke halulu la ka pohaku a ke olapa la hoi ka uwila me ka pinapinai, a ke haule kawakawa mai la hoi na pakaua o ka hooilo e hoopulu ana i kona mau papalina.
            Pela iho la haawina i ike ia iloko o ia manawa a ua hololio la e hele nei, aka, aole loa oia i hookuemi ia mai i hope, ua hoomau aku la no kona lio i ka hele ana imua.
            E ka mea heluhelu, e huli ae kaua a nana aku no ka hale o ke kahunapule Uzima o Medina ma Arabia.
            Oiai ua Kahunapule la e hoomoa ana i kana mau mea ai no ka paina ahiahi, a iaia i huli ae ai a pana aku mawaho o kaipuka aniani o kona hale, ua hoopuiwa loa ia oia i ka ike ana kau i kekhai keiki opio e holo mai ana mailoko mai o ka ululaau maluna o kekahi lio keokeo me ka aahu omaomao, a malalo o kona mau wawae na kamaa buti loloa o na poe hahai holoholona o loko o na kuahiwi o Hagara.
            Aia hoi ma ka lima akau o ua mea hololio la kana pahikaua kahi i paa ia, a o kana laau ihe hoi ma kona aoao hema.
            Ua lilo iho la keia mea ana i ike ai i mea nona e makau ai, nolaila, pani wikiwiki ae la oia i na olepelepe o kona puka aniani a hoi aku la iloko o kona rumi, oiai, na kau e mai la ka lia makau iloko ona.
            A i ka wa i olapa mai ai ka uwila, ia manawa i ike hou aku ai ua kahunapule la i na mea hololio la e holo ana ma ka aoao komohana o kona hale, a oia ka wa a ua kahunapule la i nana pono aku ai i kona ano, a no ka manawa pokole wale no ua huli hoi mai la ua mea hololio la i hope a holo kaapuni ae la i ka hale o ke kahunapule.
            O Uzima, aia oia ke nana hoomau la i kela manawa i ka mea hooholo o ka lio keokeo, oiai, ua maopopo iho la iaia aohe ua mea la, he uhane lapu no ka po, aka, he kino kanaka no e like me kona, a ma kana hoomaopopo aku ua ike mua no oia iaia he mau makahiki ae nei i hala, a oia kana e noonoo la. A no kekahi manawa loihi kana nana ana aku, ua kahea aku la oia me ka leo nui, -
            “E ka mea hooholo o kela lio keokeo – owai kou inoa, a e holoana kou lio ihea iloko o keia manawa ino o ka hooilo?”
            Ia manawa i kaohi mai ai ua mea hoholo la i kona lio a huki kapakahi ae la i ke kaula kaohi me ka pane ana ae, -
            “O Mone Tikero ko’u inoa, pela ka hoike a ko’u makua hanai ia’u.”
            “O Mone Tikero! Mone Tikero!!” wahi a ua kahunapule la i puana ae ai me ka loli ano e pu ana ae o kona mau helehelena a kohu kanaka make la ka hele a keokeo.
            Noho mumule iho la oia no kekahi mau minute, me he la, ua ano hilahila paha oia no kela inoa ana i lohe aku la, oia no ka inoa ana i lohe mua loa ai maloko o na paia eehia o ka halealii o ka Moiwahine Tumerenia o Arabia, ka inoa hoi a ke kahuna lapaau Dubana i o mua loa ae ai.
            Alaila, kahea aku la oia e komo mai iloko a e paina pu laua. Ua ae koke mai la no ua hololio la, a komo mai la oia iloko o ka pa o ua kahunapule la.
            Lele iho la oia maluna iho o kona lio a komo aku la iloko o ka hale, a hookipa akula hoi kona makuakane kahunapule iaia me ka maikai, me kona manao mua ole ae o kona makuakane no keia e hookipa nei iaia.
            Ia laua ma ka aoao o ka papaaina e haupa ana hoi i na mea i hoomakaukauia mai ua hoomaka mai la ke kahunapule e ninaninau ia Mone Tikero i kona wahi i hele mai ai, a me kona wahi e homoe ai o kona poo, oiai e ike mau ia kau ana oia maluna o kona lio keokeo iloko o ka wa hooilo e holo ana iloko o na ululaau, e iho ana ma na awawa, e pii ana ma na puu, a i ka wa Kupulau hoi e ikeia ana oia maloko o na ululaau o Hagara, a pela aku.
            A oia ka ua keiki la i pane aku ai me n amino aka ana maluna o kona mau helehelena,-
            “O loko o a ululaau ko;uhome me ko’u mea nana e malama. A wahi a ua makua la o’u i hoike mai ai ia’u, he keiki au i hoolei ia iluna o ka lala laau, a ua loaa au iaia iloko o kekahi pahu uuku huinaha. A na kona opu aloha i malama iho ia’u a hiki I ko’u nui ana, a nana no hoi i a’o mai ia’u ma keia hana he hololio, a ua hoolilo au i ke kua o keia lio keokeo i home no’u a o ka maka o ka’u pahi kaua i wahi e hoomoe iho ai o ko’u poo.
            “Ua hoike pu mai no oia ia’u, o ka Moiwahine o Arabia ko’u makuahine, a o ke Kanuna lapaau Dubana ka mea nana i hooponopono a hookomo ia;u iloko o ka pahu, a na ke kahunapule Uzima i lawe ia’u a hookau iwaenao na lala laau
            “O ka manawa ana i lawe ai e hoomoe ia’u iwaena o na lala laau, he wa ia a na ao e hoopoluluhi, e haule makawale ana na pakaua o ka hooilo, a e olapa ana hoi ka uwila me ka weliweli, a he wa hoi ia na ka ino e hana mao ole ana.

            Maanei i hoomaha iki iho ai ua keiki la i kana kamailio ana, oiai, ua ike aku la oia i ka haule ana mai o na waimaka maina maka mai o Uzima a hoopulu iho la i kona mau papalina, a no ia mea i ninau aku ai ua keiki la,-
            “Heaha la kou mea i kaumaha ai e ka hoaloha maikai?”

            “E ka opio maikai, e kala mai oe ia’u ma ke noi ana aku ia oe, e huna iho oe i keia mea huna a’u e hoike ai ia oe, aole e hoopua wale aku i kekahi mea.”

            “Kea e ei au a ke noi aku nei hoi au ia oe e hoike mai I kou inoa ia’u.”

            “O Uzima ko’u inoa, a o Medina ke kulanakauhale a’u e noho nei ma kea no lawelawe oihana laa iwaena o na hipa.”
(Aole i pau.)

Ke Aiwaiwa Koolau.
He ohohia nui,
Nou a e Koolau,
Ke Aiwaiwa ,
Na pali kiekie,
Kalalau ka i luna,
Alahaka i Nualolo,
Ua kohu auhau,
Kokolo i Makuaiki,
Koolau o Mano,
Kau e ka weliweli,
Mea ole na koa,
I ke ki pololei,
Aole i hopo iho,
Keiki Koolau,
Ka aloalo ana,
I ke ehu poka,
Hoopili eheu,
Iwa e ka hoa like,
Hoi nele kahi muumuu,
Hosake ipukai,
Kai no ua lawa,
Na koa Pi Gi,
Hoohoa aku ai,
Ke kupua Kilioe,
O oe e ka oi,
Kahi o Kamaile,
Haina ka puana,
Ai manu Koolau.

KA MAKAAINANA.
NO 1894.
“Iluna no ka Ua, waele e ke Pulu.”

I ola honua no, mahope ih o ka noonoo pono ia ana, ua hooholoia e like me keia malalo iho na uhao lanahu ana e hike ai ke mau aku ka holo ana o ko makou wahi wae nei iloko o keia makahiki ae, a eia malalo iho na auhau ana i manao ia ai e loaa mai no he ole a he kanaaho, penei

UKU O KA NUPEPA.

No Hookahi Kope $.10
No Hookahi Malama .25
No Ekolu Malama .75
No Eono Malama 1.25

Aka, ina e hookaa mua ia mai iloko o ka malama mua o ka hapaha makahiki a makahiki holookoa paha, alaila, peneia ka auhau ana:

No Ekolu Malama $.50
No Eono Malama 1.00
No Hookahi Makahiki 2.00

O ka iini nui nae hoi, o kela me keia hapaha makahiki (ekolu malama) ke hookaa muaia, no ka mea, he oluolu ia, he maalahi, a he hiki olo loa hoi ke pale mai no ka nele loa o ka waihona. Aole no e lawe kekahi mea i ka nupepa, ina e ike an ai ka nele maopopo aia imuao na maka kahi i ku ai.

E hooko pololei ia kau ana keia ae la maluna, a ke kauleoia aku nei hoi ko na Luna Nupepa a pau hooko pono aku me ke kuemi ole a ewaewa ole hoi i keia kauoha, maluna ae.

Aole no hoi o ke ola o ka nupepa wale no ka mea i manao hookahi ia, aka, o ka luhi pu no hoi kekahi o na poe kokua a hooikaika aku i ka holomua o keia nupepa, a ua hoomaopopoia peneia iho:

UKU O NA LUNA NUPEPA.

5 Inoa .10
10 Inoa .20
Maluna aku o ka 10 Inoa .25

E hoomaopopoia o ka uku pakeneta ae la ia malunao kela a me keia dala hokahi e loaa ana, a e hoomaopopoia no hoi he nupepea loaa wale ka na Luna a pau, oia hoi na pe e loaa ana he elima inoa keu aku mawaho ae ona ponoi iho.

E hoolawe ae no hoi na Luna i ko lakou uku mai ka huina dala e loaa ana ia lakou no ka lakou poe lawe i hookaa, a o ka lawe pu ae no i ka uku o ke kikoo leta. E hoolohe i keia i pohihihi ole.

Aole no i pili keia ae la i ko Honolulu nei mau Luna, aka, e loaa no ia lakou e like me ka mea i kuluma.

O na kauoha nupepa, na hoolaha a pela aku, e kakauia ae i ka Ona a Luna Nui; a oiai, oia hookahi no hoi ka Lunahooponopono, iaia no e hoounaia mai ai na palapala a me na manao no ka hoolaha aku. Aohe e hoopukaia kekahi manao ke ole e hoikeia ka inoa oiaio.

O na hoouna a kikoo dala ana a pau, me ka Puuku hookahi wale no ia, oia o Mr. F. J. TESTA, aole i kekahi mea aku. Aole palapala hookaa e mana, o kana wale no a nolaila, iaia no e hoouna pololei ia mai ai na dala a pau.

KEENA HANA: Helu – Alanui Moi, ma Kapuukolo, maluna mai o ka Uwapo a Haaliliamanu, ma ka huli Waikiki ma ka aoao makai.

KEENA PUUKU: Helu 15, Alanui Kaahumanu, ma ke keena oihana loio o ka Mea Hanohano A. Rosa.
W. H. KAPU,
Ona, Luna Nui a Lunahooponopono.