Ka Makaainana, Volume I, Number 4, 22 January 1894 — Page 8

HONOLULU, OAHU, POAKAHI, IANUARI 22, 1894.

Ua Hala ma Kela Ao.

            Hora 3 o ka wanaao. Poaha i hala iho ia, ma kona wahi noho ma Koula, ua haalele mai la i keia ola ana ka aho a me ka hanu hope loa o Debora Maunakilika Mahoe, ka wahine a S. K. Mahoe a kaikuahine hoi o ka Mea Hanohano P. P. Kanoa, i ke 50 a keu o na makahiki ma keia ao mauleule. Mahope iho o ka hora 3 o ka auwina la Poalima nei i maneleia mai ai kona kino wailua, me ke kai wawae o ka huakai hoolewa, a waiho ana i kahi e moe loa ai ma ka ilina o Kawaiahao, a hookahi ka waiho pu ana me na makua i hala mua. Aloha no oia. Lehulehu na makamaka a me na hoaloha i kipa ike aku, a ua luhiehu no hoi na hookupu pua a me na lau nahele uliuli o kakou nei. Ua haalele iho oia i kana kane, he keiki hanai a me ka ohana a pau e paiauma aku nona ma keia ao.

Ki Pu me Hoeha ma Ewa.

            Ua poeleele ke ahiahi Poaha i hala iho la, loaa ae ai i ka Halewai he lono mai ia Hope Makai Nui Kauhi o kekahi ki pu ma Waikele. Mamuli o ia lono, ua holo aku ka Hope Ilamuku me Kapena Makai Waipa a me ka makai Pake no ia wahi, ma ke kaamahu holoholo pu o ia ahiahi, hora 7:30. Ma Manana i hui mai ai o Kauhi me lakou, a pau nei aku o ke kahua o ke ki pu. O ke kumu o keia hana, mamuli no ia o ka haawi ana o kekahi kiu. Pake ia elua o kona mau hoalahui no ka piliwaiwai, i ka pule i hala, a ua ahewaia a hoopaiia. I ke ahiahi o ke ki pu, ua hele ka ua kiu la a koi dala aku i ua mau mea la, a i ko laua hoole ana mai i kana koi, ua ki aku ua kiu la i kana pu panapana, ekolu poka o ke ki ana, hookahi i ku puka pu i ka uha o kekahi, o kekahi hoi ua ku ma ka lima, maluna aku o ka muku, a ua hala loa hoi ke koluo a poka. Ma ia hope iho, ua alu aku na mea elua i ka makai. Hookahi o laua i hopu he pauku paipu a uhau ma ke poo, a ua loaa he eha kukonukonu. I ke awakea Poalima nei i lawe nui ia mai ai lakou ekolu, ma ke kaamahu mai, a paa nui ana iloko o ka Halewai.
            He Pake ma’i lepera ka C. R. Bihopa i lawe mai ai i kekahiaka Poaha iho la mai Kauai mai, a aia i ka Halemai o Kalihi e noho nei.
            Ua haawi ae o Mr. T. H. Kewiki i kana paina makahiki mau i kona mau paahana, i ka auwina la Poaono nei ma kona wahi noho mauka o Maemae. Ilaila ka Puali Puhiohe Lahui kahi i hoolaulea ai.
            Ua make mai nei ma Parisa, Dekemaba 25, o Makuahine M. Anegela, ke poo o na wahine Virigine o ka Puuwai Laahia ma Hawaii nei. He pule mesa ko keia kakahiaka, hora 7, ma ka luakini Katolika Roma o Malieokamalu.
            Ma ka Mikahala o ka Poaha nei i loheia mai ai no ka olohani ana o 200 Iapana o ka Mahiko o Koloa, Kauai, mamuli o ka hoehaia ana o kekahi Iapana e kekahi luna haole. Aia aku nei ilaila kekahi o na luna nana paahana o ke Aupuni o Iapana e nana a e nieniele pono ai no na mea i hanaia mai nei.

KELA A ME KEIA.

            Ua mahuka aku mailoko aku o ka pa ma’i o Kalihi i ka po Poalima iho nei, kekahi kaikamahine ma’i, a ua nalowale loa oia i keia manawa.
            Eia ianei o Rudope Sepekela, ke keiki a ka Ona Miliona, no ka nana ana i ua oihana a kona luaui maanei. E hala ana he mau la iaia maanei.
            I ka hora 5 o ke ahiahi Poalua i hala, Ianuari 16, i piha ai ka makahiki i hookahi o ka hooleleia ana mai o na koa mai ka mokukaua Amerika Bosetona mai.
            He ahaaina ka na poe Hawaii hoehuiaina i ka la 17 nei, mauka o kahi noho o G. L. Desha (Kiuikake) ma Koiuiu. Ilaila o Kawainui a me kahi poe e iho.
            Piha hauoli mau ke awa o Kou nei i keia mau po konane o ka mahina i ka hoehoene o na ohe a na keiki puhiohe aukai o luna o ka mokukaua Piladelepia.
            Mahope iho o ko Kaapuni huikalaia ana, ua hoi hou ae no oia a noho ma Kalakaua Hale, mamuli o ko ka Ilamuku ae ana, a hiki i ka wa e loaa ai o kana hana.
            Ua hopuia e Kapena Makai Kahookano a me kekahi mau makai iho, he 8 mau Pake puhi opiuma i ka po Poaono ma Kikihale ae nei, a na hului ia ae no Kalakaua Hale.
            Ua hooliloia o G. W. R. Kini, he aliikoa Pi Gi, i mea banekarupaia i ka Poalima nei. Aia la ka hoi i hea na okeni uluhaku nunui o keia mau la o ka noho lutanela ana.
            Ua hookohu ae ke Kuhina Kalaiaina ia J. S. Emekona, Robata W. Anaru a me Albert Trask i papa komisina na lakou e hooponopono na poho aina ma ka Panalaau Ma’i Lepera.
            Elua aha puhiole o ke ahiahi Poalima nei, hookahi ma kela hotele ma Waikiki, kokoke i Kaluahole, na ka Puali Puhiole Lahui, a o ka lua ma Maki Ailana, na ka Bana Pi Gi.
            Ua hoi mai o P. C. Keoni me ka pala o kana maia. Iaia i lele mai ai i ka Poaono nei, mai ka Mariposa mai, ua olelo ae la oia i ko lakou poe ma ka uwapo – “Ua pono kakou, ua pokepokeia a maloo.”
            O ka hoolimalima no mai makahiki o a aina Aupuni e waiho la mawaena o Moaula a me Keaiwa, ma Kau, Hawaii, ka i hooliloia i ke awakea Poalima nei no $250 o ka makahiki i ka Hui Mahiai Hawaii.
            Ua eha he lio ma Kalihi i hookui i ke kaamahu a Hope Ilamuku Balaunu i holo ai ilailo o Ewa i ke ahiahi Poaha nei. Ku ke kaa, a i ka nana pono ia ana, aohe wahi e manaolana ai no ka palekana hou ae, ua ki poka ia e ka Hope Ilamuku a make loa.
            Ke manaoia nei e hoopau i ka mea malama buke o ka Hale Leta, a na makemake nei ke Kuhina Waiwai ia J. W. Givini, o Wailuku mamua, e hoi mai a noho ma ia wahi, a ua lilo hoi i manao i mea kue loa ia. No ia poia, a ke ole makou e kuhihewa, ua nalowale aku kekahi puu dala o ka Papa Hoonaauao iaia i noho Agena Kula ai mamua.
            He lono telgarama ka i loaa mai ia Kauka Taruso i ka Poaono nei, e hoike mai ana i ka lono luuluu no ka make ana o kona kaikuahine hookahi Madame Moriso, ma Parisa i ka la 11 nei.
            He kipu ka Emaluka hana i ka wanaao o ka la 17 nei, he hoike hoi no kona hauoli no ia la hamo vaniki o lakou Pi Gi. Aohe oia i noonoo ae no ka hiamoe o kahi poe, hana kuli nae hoi la.
            Ua haalele aku ka Auseteralia ia Kapalakiko i ka Poaono nei, a i keia Poaono ae e ku mai ai, a maluna mai ona makou i manaolana ae e loaa mai ana ka makou pepa ponoi i kauoha aku nei.
            Na J. Paaluhi maoli no o uka o Manoa i hoike mai ia makou no kona hiu ana ae i kona hae Amerika, ma kona home, i ka la 17 neia he paina moa ka inai. Ua hiki no ia hana a ua hoohuiaina, he wa ko na poe a pau.
            Ua hoopaiia o Kolopine imua o ka Aha Apana i ka Poalua, la 16 nei, no ka hoeha ana i Holokahiki, kana wahine pili kapekapeka, he $10 me na koina. No ka aumeume wale ana no keia ae la, poohu ana ka lae. Mai limanui wale no hoi paha na kane i na wahine, no ka mea, he hopena awahua a poohu ka lae, a lilo wale ana no kahi ola i kahi e
.           Ua hooleia na kumu hoohalahala a ka Hui Kope a me Hua-ai o Kona i kakahiaka Poalima nei, e Lunakanawai Kaapuni Kupa, ma kela hoopii koi aie a T. K. R. Amalu. Oiai, ua hoohalahala loa ia aku la i ka Aha Kiekie, ua kauoha ae la ka Lunakanawai i ka ukuia aku e A. S. Hakawela, ke ganasi, o ka huina o $456.38 mai na dala ma kona lima, a me ka olele hooholo pau loa a ia Aha.
            Ua piha ka makahiki hookahi o ko Galribaladi Keoua ola ana ma keia ao i ka Poalua i hala iho la, Ianuari 16, a ua haawi ae na makua i papaaina hoomanao ma ia la ma ko laua wahi noho iwaho o Kaluahole, Waikiki. Ilaila aku he heluna nui o na hoa’loha, a ua ai a lawa me ka inu pu no hoi a kena i ka lokomaikai i paholaia mai. E ola loihi ka opio nona ka la, oia ko makou manaolana nona.
            Hora 8 o kakahiaka Poaono nei i ku mai ai ua Mariposa. Ua ikeia oia i ke alaula loa aku, aka ua kalewa iwaho no ka paa o ke awa nei i ka noe. I ka Poaono noi Ianuari 13, i haalele aku ai ia Kapalakiko, a i lohi no ke kali i na eke leta Pelekane, oiai, ua haule elua la a pae mai i Nu Ioka. Ua holo loa aku no na Panalaau mahope iho o ka hora 8 o ia poeleele na iho.
            Ua haule ka hoopii a Keawehaku (k) no ke kapae ana ae i ka hoapono ia ana o ka palapala kauoha hope loa a Akahi (w), i make kahiko, imua o Lunakanawai Kaapuni Waikina. Iloko o

1877 i waihoia ae ai ua palapala kauoha la e C.R. Bihopa no ka hooponoponoia, a ua waihoia ka waiwai a pau ia Mrs. B. Pauahi Bihopa, mahope o ka make ana o J. H. Kapaa, kana kane, a mamuli hoi o na ike i waihoia imua o ka Aha ia wa, ua hiki ole ke aeia keia kumu hoopii.
            Apopo e ku mai ai ka mokumahu Warimu mai na Panalaau Beritania ma ka Akau aku nei.
            Ua ae o Lunakanawai Kaapuni Kupa, i ka Poalima nei, i ke noi a Rev. D. Kapali no kona hookohuia i lunahooponopono no ka wiawai o kana wahine i make, i kohoia ka waiwai io ma kahi o $2,400. He $200 ka bona. O na hooilina, oia no ke kane a me Kahoohuli, he makuakane ma ka aoao o ka luaui nana mai oia.
            He aha hoike aloha ka i haawiia ae ma ka Luakini o Kaukeano hou, i ke ahiahi Poakahi i hala, no Rev. E. G. Bekewita. I kahi ahiahi mai i kau aku ai ma ke Kalaudine a hala aku la no Maui, ma kahi o kona kihapai hou i Makawao. Ua haawi ae na hoahanau he makana o $800. Mahope o na hoolaulea ana, ua hookuuia na hana.

Apopo , hora 8 o kakahiaka, ma ka Luakini Katolika, Roma, e uoia ai ka hipuu polena maemae o ka noho materemonio ana mawaena o Giovanni Apianni Long, ke keikikane hiapo a Kulia Kolopana me Kale Lona, kana kane mua, a me Miss Laurita Kaualokulani Kaae, ke kaikamahine a Mr. a me Mrs. J. Kaae. He mau opio laua a elua. Ke pau ka mare, alaila, he papaaina ko kahi o na makua, a i ka hora 10 ae e kau ai laua ma ka Malulani a u holo aku no Kailua e hoohala ai a e walea ai i a la kinohi o ko laua noho mare ana.
            Elua mau keiki he Hawaii a he Pake, i komo aihue ae i kekahi halekuai Iapana ma alanui Beritania i ka auwina la Poakolu i hala iho la, a ua lawe aku he mau hainaka silika. Ua ikeia laua a alualuia. Ma ka uwapo a Kamika i paa ai ka Pake, a ua holo loa ka Hawaii a pee iloko o ka lepo wai eleele pilopilo malalo o ka Hale Keaka Pake, a i ikeia oia e kekahi keiki okoa, a mamuli o ka ulaaia ana o ka papa, ua paa oia i na makai. Aole i hookolokoloia ko laua hihia a ka la apopo e hookolokolo ai.
             Ua hoea mai ke kiapa Amerika Martha Davis i ke aumoe o ka Poalua i hala iho la, a i kakahiaka ae o ka Poakolu i hookomo loa mai ai iloko o ke awa nei, iloko o 151 la holo mai Nu Ioka. Nui ka ino i loaa mahope o ka haalele ana aku, a mahope mai ua loaa i ka malie a ka makani ole, a oia ke kumu o ka lohi loa, hala he ekolu pule a oi aku mawaho ae o ka manawa i manaoia ai no kona ku mai. Ke pau ka hue ukana ana, alaila, holo loa aku no Honokaona a no na Paemoku Pilipine paha. Ua lawe mai oia he 15,000 pahu aila honua, a pau ae la hoi ia makapehu no ka manawa. Aia no hoi maluna ona he heluna pepa nui no kekahi o na halepai o kakou nei, a e ola iki ae ana paha ka makapehu pena o na halepai nupepa a pau.

HOOLAHA HALE AINA
Helu 17, Alanui Maunakea,
[Kokoke i ka Huina a Kale.]

Paina haole $.25
Inu ti a me kope .10
Ai poi me ka pipi momona. .05
Ina he makemake ma ka 10 keneta no ka ai noi ana, ua loaa no.
 E kipa mai a e ikemaka no oukou iho,

CHOCK HONG.
Jm.22, ’94-2mnw*