Ka Makaainana, Volume I, Number 8, 19 February 1894 — Page 3

Page PDF (859.65 KB)

HONOLULU, OAHU, POAKAHI, FEBERUARI 19, 1894. 3

LAUOMI DIHAE.
---KA---
UI I MOHAI IA I KE KOKO
---KA---
NANI I ALANA IA I KA OI O
KA PAHIKAUA.
Ka Mea Huna iloko o ke Kiaha
Waina.
ka Mea Pohihihi i ka Maka o ke
Kuikele.
---A O KE---
Keiki Alii Numaredina
KE
Komo Lima Maka Popoki.
MOKUNA VII.

Na Mea Ekolu i ke Alahele---Ke Kupua Enuhe silika o Mauleleda---Na Kiai Elua i ka Punawai hookahi---Ke Alahele i huna ia e na wai.

O ka nunui o ka enehu i ka lakou nana aku, ua like no ia me kou nui e ka mea heluhelu, a he mea weliweli loa a ku maoli no i ka makau ke ike aku.
                Iloko o keia manawa i uwe kapalili ae ai kona mau kaikuahine i ka ka mea o ka makau, me ka hoohuli hou ae i ko lakou lio e holo hou i hope, he ole nae ka makemake o ka lio e hoi hou ihope, a ke uwe ae la ua mau ui lu iluna o ka lio, me ka hahau ana iho i ke poo o kahi lio hookuli, a pakele mai upepe ka ihu o kela keiki i ka hanaino ia e kela mau kaikamahine kolohe.
                Ua haule i ke kuhihewa keia mau kaikamahine, no ka mea, aole oia e hole ole ke ole e loaa aku ke kauoha, aia a lohe kona pepeiao i kekahi kauoha mai kona kahu mai, alaila, oia hele.
                Iloko o keia mana i olelo aku ai o Numaredina i kona mau kaikuahine, "e paa olua a paa iluna o ka lio, a e hoouna ae au iaia e kaua me na enuhe."
                Hoole mai la kona mau kaikuahine, me ka uwe kapalili ana iluna o ua lio la i ka nui launa ole mai o ka makau.
                Ae, makau io aku la no, aohe e nele, a kau ka hoi ka weli ia kaua e ka mea heluhelu ia Kumuhea, kela enuhe o Molokai he lohe wale no, oki pau aku la paha keia ua ike maka maoli, he naau ili iho hoi kahi i ka ka mea o ka makau.
                Iloko o keia manawa ke hookokoke mai la na enuhe he mau anana helu wale no koe a pau mai lakou i ka ai ia, ia manawa koke no i pane ae ai o Numaredina.
                "E huli e Huneta a e paio me na enuhe o Mauleleda."
                Ia manawa no i huli koke ae ai ua lio la me ka puahi nui a peku iho la me kona mau wawae hope i na enuhe
                Iloko o ke peku hookahi ana a ua lio nei, ua pau aku la i ka make he ewalu kula palahalaha, ewalu puuko ewalu auwai, ewalu kualono, oia kahi o na enuhe i pau aku la i ka make. A i kona peku elua ana, hihia ae la kona mau wawae i na lopi silika, a olowalu mai la ko lakou mau leo ikuwa o ka inaina e kahea ana
                "Imua o ka aina o Mauleleda kakou e nee aku ai."
                Iloko o keia manawa e hoomanao iho oe e ka mea heluhelu, aia no iluna o ka lio na kaikamahine a kona mau wawae e hauhili ia la e na lopi silika, aole nae ia he mea e kanahai mai ai o ua Huneta la.
                Ia manawa i lele ae ai ua lio la iluna a aia na kaula silika ke weweo la malalo o kona mau wawae, a iloko o ia manawa i peku iho ai ua lio la a uiuina ae la ka moku ana o na lopi silika, me he mau paapaaina ana la a na pu kauopphiwi he tausani i ka manawa hookahi.
                Ia peku hookahi ana a ua lio la, ua pau aku la he elima kula lae laau, elima waoakua, elima puu one haoeoe, oia ka nui o na enuhe i make ia peku ana.
                Ia manawa i holo aku ai ka Moi Enuhesilika o Mauleleda, a nalowale aku la oia iloko o kona halealii pahaohao iloko o na kuahiwi o Mauleleda , a mehameha iho la aohe enuhe.
                A iloko o ia manawa i hoomaka aku ai lakou e hele maluna o ua aina nei, me ka makaikai pu ana aku i na pua o na ano a pau e ulu ana, a ua lilo ia he mea no lakou e hauoli ai.
                A i ka wa e kokoke aku ana e lilo ka la ia Lehua, ua hoea aku la lakou ma kapa o kekahi iloko wai, kahi a na pua lilia e luhe ana i ka ili o ka wai, no lakou hoi ke ala e mapu mai ana i ka ihu o na kamahele.
                A ma kapa o ua lokowai la i hoomaha iho ai ua poe kamahele la a hoaumoe nui iho la ma ia wahi. Aloha no dat.
                Iwaenakonu o ka po i puoho ae ai na kaikamahine a ike aku la laua i kekahi mau ai keiki kanaka maikai elua no ka aina hemolele mai, e noho ana ma ke kahi kapa mai o ka lokowai, a na ka malamalama o ka mahina i hoike mai i ka nani o ko laua mau papalina nohea e punihei ai ka manao kaikamahine, a oia ka ka mea kakau i hoomanao ae ai i keia mau wahi lalani,---
                "He nohea oe i kuu maka,
                He milimili na kuu lima.”
                 Iloko o keia manawa i pane aku ai o Murisedela i kona kokoolua.
                "Ea nani hoi na keiki kanaka maikai?"
                Pane mai la kona hoa'loha iaia i ka i ana mai:
                "Ae hoi, ka kaua ia e nana ae a o ka mea kupaianaha loa a'u i nana aku la, i ko'u ike mua ana aku nei no, o ko'u piha e ae nei no ia i ke aloha, me he mea la ka hoi ua ike mua au a hooipoipo hoi me laua."
                Pane aku la o Muri sedela i ka i ana aku.
                "Owau hoi kekahi i haule pu aku la ke aloha, a e hewa auanei laua ma kaua e hele aku e launa pu me laua."
                Pane aku la kona kookoolua me ka i ana mai.
                "Aohe kaua e hewa ke hele e launa pu aku me laua, e nana iho nae oe ina ua hiamoe o kunane, alawa iho la o Murisedela, a ike iho la ua pauhia loa o Numaredina me Niolopua."
                Iloko o keia mana i haalele iho ai laua ia Numaredina, a u haele aku la e hui me na kiai e noho ana ma kapa o ka lokowai pahaohao.
                Iloko no hoi o ia manawa aia no o Numaredina ke hiamoe la, me ka ike ole ae eia o kuahine ma ke hoohai nei i kela mau keiki i mea e nui hou aku ai o kona luhi.
                I ka hiki ana aku o ua mau ui la ma ka aoao o na kiai o ua lokowai la, a ua apo mai la laua i ka laua mau ipo a ka nani nohea ai.
                Ia manawa i lilo aku ai o Murisedela i ke kiai o ka aoao akau a o Rahe Biama hoi i ke kiai o ka aoao hema, a noho iho la lakou ma ka aoao o ua lokowai la.
                E hoomanawanui iho e na makamaka heluhelu, i keia pule ae, ala ka hiamoe o Numaredina, a kiko no hoi ka moa i na hua o kana punana.
                E haawi ana makou he 25 keneta uku makana, i ka mea e loaa mua ai o ka haina pololei o ka nane a S. W. K. Kauluwehi, o Kuaiula, Kalihi-uka, i hoopukaia hoi ma ko makou helu mua o keia makahiki.

Ma Honolulu iho nei kekahi keiki a Meia Harisona, o Kikako, i laweia ai kona ola e kekahi hiena, nona ka inoa e Wm. Preston Ha rrison. Oia kekahi o na ona a he mea kakau no hoi no ka nupepa Manawa o Kikako. Ua hoolaunaia a ua ike oia i ke Aliiaimoku, a ua nui kona mahalo nona. I ka makaikai aku nei oia i ka Luahine o Kilauea, a ua ike i ka enaena o kona inaina, a ua palena ole hoi kona mahalo i ka huli hoi ana mai nei. Ua hoi aku nei oia ma ka Alameda o ka Poaha nei.

 

He U no Miss Ema Kawewehi.

Ia Mr. me Mrs. S. W. Kawewehi: O makou iho na haumana o ke Kula Sabati o Helani ma o ko makou komite la, Mamuli o na lono i loaa mai nei ia makou, oiai hoi: Ma Leleo, Honolulu, Oahu, ma ka la 19 o Dekemaba, 1893, hora 11:30 a. m. ua kipa ae la ka anela o ka make, a lawe aku la i ka uhane o Miss Ema Kawewehi ka olua kaikamahine i aloha nui ai, mai keia noho u ana a i kela ao maha mau ma o
                A no ka mea hoi, ua komo pu a ua hana pu hoi makou i ka hooikaika ana e hooholomua i ka ekalesia ma Helani, me ka wiwo ole, a ua lilo i mea ole na enemi a pau o ka pono.
                A nolaila, me ko makou mau houpo i kuipalu ia a eha, me na naau hoi i hele a mokumokuahua i ke aloha! Oiai hoi kela kela kanawai kumuhonua hiki ole kei hoololiia mai a Adamu mai, oia hoi:
                "He lepo, a e hoi aku oe ilaila, a pela aunei kakou a pau."
                O kana makana hope loa, oiai ke aho e hailiili ana, ua kauoha ae la oia, e hoounaia i $3.00 no ke Kula Sabati, a ke hooia aku nei makou ua loaa pono mai, nolaila, o kana mau hana lokomaikai a pau loa; e lilo ana ia i Kiahoomanao pau oie. Nolaila: 1 hoohoia, ke komo pu aku nei makou me olua e u pu nona, me ka paumako kuhohonu.
                2. Hooholoia, ke leha ae nei ko makou mau maka i ke kolu o na lani, me ke noi ana e hoomama mai i ko olua naau mokumokuahua.
                Me ko makou manaolana poho ole, he ohua ka olua lei no ka moku o Kristo mao. A e like me ka ka baibala i olelo ai. "O ke kanaka i hanau ia e ka wahine no na la pokole oiai, a ua puni i na popilikia, aka, pomaikai ka poe make ke make iloko o ka Haku."

Komi te

J. M. Kalaiwaa,
J. W. Leleiwi,
J. K. Nahalepainiu,

Kahalua, N. Kona, H. Dec 28, 1893.

Aohe aenei e kala i hoea mai ai o Lei Iawine (Leigh Irwine) i o kakou nei ma ke ano he mea kakau no ka nupepa Examiner (Ekamina---mea nana e imi a e mili) o Kapalakiko. Ua manao oia e kikooia mai ana e hoi, oia nae, ua kauohaia mai nei e noho hou iho, a ua i hookohuia mai nei i mea kakau no ka nupepa Ahailono (Herald) o Nu Ioka, me ka ae hoi o na haku mua. He palapala pilikino ka i loaa mai nei iaia mai ka ona o ka Ahailono ma ke Kina mai nei. A mamua ae hoi o ka hoi ana aku nei o W. P. Harisona, ua hookohuia mai oia i mea kakau no kana nupepa.