Ka Makaainana, Volume I, Number 12, 19 March 1894 — Page 2

Page PDF (863.12 KB)

2 HONOLULU, OAHU, POAKAHI, MARAKI 19, 1894.

LAUOMIDIHAE.
-KA-
UI I MOHAI IA I KE KOKO
-KA-
NANI LALANA IA I KA OI O
KA PAHIKAUA.

Ka Mea Huna iloko o ke Kiaha
Waina

Ka Mea Pohihihi i ka Maka o ke
Kuikele.
-A O KE-
KEIKI NUMAREDINA
KE
Komo Lima Maka Popoki.

MOKUNA VII.

Na Mea Ekolu i ke Alahele- Ke
            Kupua Enuhesilika o
            Mauleleda – Na Kiai Elua
            i ka Punawai hookahi – Ke
            Alahele i huna ia e na wai.

            Ia manawa i hoomau aku ai lakou i ka hele ana imua a hiki i ka hele ana imua a hiki i ko lakou hoea ana aku i ka halealii hoano o ua alii nei o na enuhe nona ka huini e pii koiuiu ana i ka lewa.  A maloko o kona mau paia i hooluana iho ai lakou me ke au ana ae o ko lakou maka ma o a maanei e nana ana i ka nani o ua halealii nei, a iloko o ko lakou nanea nui i pa e mai ai kekahi leo i ka i ana mai,-
            “E aha ana la ke Keikialii Numaredina e noho nei.  E ku ae a hele aku e imi i ka mea Pohihihi i ka maka o ke Kuikele. No ka mea, aia oia ke kali mai la ia oe o kou hoea aku ilaila, a e makaikai iho no oe i ke kihapai-pua o Numere, a a nona ka nani i oi aku mamua o ka malamala alohilohi o ka la.”
            “Ka mea Pohihihi i ka Maka o ke Kuikele!”  wahi a Numaredina i pane ae ai imua o kona kaikuahine.
            “Ae, e kuu kaikuahine, oia ka kela leo kamahao i pane mai la.  – Ka mea Huna iloko o ke Kiaha Waina – auhea la oia?”
            “Aia iluna- ma kahi a na hoku e imoimo mai la i ka lewa a malalo iho.  E wiki e Numaredina.  E huli mua i ke alahele i hunaia e na wai,” wahi hou a ka leo kamahao i pane mai ai.
            “E hiki anei ia o eke kuhikuhi mai i ke alanui e hiki aku ai au i ua alahele la a ke kamahao nui wale i hunaia e na wai?”  wahi a Numaredina i pane aku i ka mea nona ka leo kamahao.
            “E hele aku oe ma ka aoao hikina o ka halealii, a maloko o kekahi rumi, aia maloko olaila he aniani uuku nona ke kiekie he 5 iniha a pela no me ka laula.  Aia i ua wahi aniani la na kuhikuhi e ike ai oe i ke alahele i hunaia e na wai.
            Ku koke ae la o Numaredina me kona mau kaikuahine iluna a hele aku la ma ka aoao hikina o ua halealii la, a maloko o ke kahi rumi i komo aku ai lakou, a maluna o kekahi pakaukau poepoe i ike aku ai lakou i kekahi wahi aniani uuku e waiho mai ana, a nona hoi ka malamalama e pahola ana a puni o loko o ua wahi rumi nei.
            Kii aku la o Numaredina i ua wahi aniani la a paa ae la me kona lima, a iaia e noke ana i ka milikana ma o a maanei, ia wa no i poha ae ai he leo mailoko ae o ua wahi pahu la i ka pane ana ae,-
            “Heaha kou makemake o Numaredina e hiki ai ia’u ke hana aku?”
            “E hiki anei ia o eke hoike mai ke alahele i hunaia e na wai?”

            “Ke alahele i hunaia e na wai!  Auwe!  Ke alanui hoi e hoea aku ai i ke aupuni o ke kupua Habakudera o Ke Ao Olino, ke kihapai pua o Numere,” a hehe ae la ka aka a kekahi mea mai loko ae o ua wahi aniani la a ke pahaohao nui wale.
            Ia manawa i kiola aku ai o Numaredina i ua wahi aniani la iluna o ka papahele a lele aku la ua aniani la a pa i ka paia o ka hale, a ma ia wahi ana i pili aku ai e ku kekahi aniani nui o 12 kapuai ke kiekie a he 12 kapuai ka laula.
            He manawa mahope iho, ike aku la o Numaredina ma i kekahi aina nani lua ole i paa i ka pa-ku ia e kekahi pa pohaku nui a kiekie no hoi, a maloko o ua pa pohaku ei e ulu ana kekahi mala ua nani e makahehi ai oe e ka mea heluhelu ke ike aku, a e ulu ana hoi na laau huaai like ole o ka honua malaila.
            A iwaenakonu o ua malapua la e ku ana ka halealii o ua kupua la i kukulu ai no kana hanai, aia hoi maloko o ua halealii la na pohaku momi makamae o ka honua a puni, aohe mea a ka maka a e wae ae ai ma ua halealii la o Lauomidihae.
            Aole liuliu keia nana ana aku o Numaredina ma i ka malapua aia hoi, ike aku la lakou i ka maalo ana ae o ua mea Huna la iloko o ke Kiaha Waina maloko o ka malpua, me kona lauoho e luhe ana mahope o kona kua a me kona mau poohiwi, a iloko o ia manawa i hooho ae ai o Numaredina.
            “Ka Mea Pohihihi i ka maka o ke Kuikele!  Ka mea Hanu iloko o ke Kiaha Waina!!  Aia la!  aia oia ke hele ae la iwaena o ka malapua!!  Oia kela – auwe ka nani e!”
            Iloko o ia manawa i komo mai ai kekahi wahi uwahi pohina maloko o ka rumi a lakou e noho ana, a i ka mao ana ae, aole ua aniani nui la ma kona wahi i kau ai.  Aka, he wahi aniani uuku ke waiho mai ana ilalo o ka papahele, a ua nalo ae la hoi ua aina pahaohao la o Ke Ao Olino mai ko lakou ike ana aku.  (I ka pupuahulu no paha kahi aole ka he noo malie iho.)  Aloha no kahi Ala.

[Aole i pau.]

Pake Aihue Alani.

            Iloko o Sepatemaba, la 23, 1893, i hopuia ai he Pake ma ka hoopii ana a Mrs. J. Pere, no ka aihue ana he 126 alani Pake nunui, he $10 ka waiwai io.  Mahope o na hoopaneenee pinepine ia ana, ua hookolokoloia oia imua o ka Aha Apana i ka Poalua, Feb. 20, a ua ahewaia a hoopaiia no eono malama hana oolea a e uku i $5.  He Pake okoa ka mea i hopuia a nana hoi i haawi ae i ke kokoolua a oia iho la ka i hoopaiia.  I loaa ka mea mua i alualuia e kekahi kanaka hana o ka mea hoopii, a o ke kaa nae hoi ka i loaa aku i Waialae, ua nalo ka Pake iloko o ka naeleele.  A i kona loaa ana, hoike ai oia i ka mea nana i hana maoli a aihue.

Koa Pi Gi Mahuka.

            Ua holo mahuka he koa Pi Gi a i ke kakahiaka Poalima, Maraki la 9, i loaa aku ai a paa i ka Halewai.  Ekolu poe alii hookohu ole i kii ae iaia, a mamua nae hoi o kona laweia aa aku no ka Halekoa, ua paa iaia he ekolu poe i ka hopuia no ka powa ana iaia, oiai oia ua pauhia I ka hiamoe.  A I kona laweia ana aku hoi no ka Halekoa, ua hoopuka ae oia i a olelo kupono ole i kona mau hoa me ka hoao pu e holo aku, aole nae ona hemo iki aku.  He wahi haole uuku wale no oia, a iaia e kupaka ana a e kukahalake ana, ua huli ae oia a nana i kona mau hoa a olelo aku la:  “Ua haikea e no oukou; ua makau e no ka paha oukou.”  Ua lilo kana hana i mea hoakaka i na poe e kuku ana ma ke alo iho o ka Hale Leta, a ua hoomau aku no hoi oia i ka olelo ino ana a hoea i Iolani Hale, a eia paha ke paa mai la iloko o ke keena pouli, he palena me ka wai kahi o.

            Ma kahi hoi o ka hala ana o ka pule holookoa ia Adimerala Iwini a me kona mau ukali ilalo o Puuloa, ua huli hoi koke mai la no i ka Poaono, la 10 nei.

Moku Poino ma ka Moana.

            I kakahiaka Poaha, Maraki 8, i koloia mai ai ka mokukuna Ana, mai Kahului Maui, a ua ikeia ua poino ka ihu a me kahi mau wahi e ae o ka moku.  I Feberuari 13 oia i haalele aku ai ia Kapalakiko a ku ae i Kahului ma ka la 2 nei, a ua haalele aku ia laila i ka Poalua, la 6 nei, me ka piha kopaa no Kapalakiko.  Mahope koke iho o ka waenakonu po Poakolu , ua hala i na hora o ka wanaao, ua loaa iho la ka moku i ka makani ino, a iloko o ia kikiao i loaa ai na poino i hoikeia maluna.  I ka akakuu ana iho o ka ino a ike lea ia na wahi i poino, ua hooholo ke kapena e pelu hope mai no Kou nei, a oia iho la no hoi kela hoea ana mai me ka loaa wahi poino hou ole.  Ma ka Mariposa o ka la 8 nei no i hoounaia aku ai ka lono no keia poino i na ona ma Kapalakiko.

            Mai ia Bila Kanealii mai, mai Kaleponi mai i kakauia ma ka la 17 o Feberuari, keia mau mea hou penei:  Eia au i Kaleponi nei, a ke hana nei au i ka hana a’u i hele mai nei.  He ehiku o makou la ma ka moana a ku i ka Poaono, hora 5 ahiahi.  Moe makou i ka hotele nona ke kiekie he 10 hale mai lalo a luna.  Ma ka La Pule hele makou no kahi o ka hana nona ka mamao he 4 mile.  Ua ike i ka nani o ka aina.  Aohe La Pule ma keia wahi, ua like me Kikako.
            Mahope iki iho o ka hora 10 o kakahiaka Poaono, Maraki 10, ua loaa aku he 40 kini opiuma Kaleponi iloko o kekahi pahu puna ilalo o ka opu o ke kiapa C. D. Baraina, makai o ka uwapo Pakipika ma Ainahou.  I na kiai Oihana Dute no ka loaa ana, oia o J. Luahiwa a me kekahi haole.  Ua pau na ukaa i ka hueia a koe keia pahu, a e uhao kopaa ana hoi ia kakahiaka.  I hou wale ia aku no ua pahu la a loaa pono ana e hoopu mai ana iloko, a ua laweia ae a ke keena paa o ka Hale Dute kahi e waiho nei.
            E ikeia no ma ka halekuai lako gula ma ka a-i a me ke pine omau.  O ke ano pine omau kuka ia ma ka Hoikeike Hooilo kuwaena.  He moo ola no, a o kea no moo hoi keia e hiki ai ke hoololi mau i kona waihooluu i kela a me keia manawa.  Elua moo i loaa mai nei ma ka Auseteralia aku nei, Feb. 24, hookahi i make i ka alapoho ana i kekahi nalo nui.  He kopaa me ka wai ka ai, a he nalo no hoi kahi.  Piha mau ia wahi i na poe makaikai iloko o na la i hala ae, o kamalii aku no nae ka oi.

J. K. KAHOOKANO.

LOIO a he Notari no ka Lehulehu.

            KEENA HANA:  Alanui Kaahumanu.

Honolulu. Jan.8-‘9

 

F. J. TESTA (Hoke),
NOTARI LEHULEHU.

            KEENA HANA: Helu 15, Alanui Kaahumanu, me ka Mea Hanohano A. Rosa.
jy 8-‘94