Ka Makaainana, Volume I, Number 16, 16 April 1894 — Page 2

Page PDF (878.37 KB)

2. HONOLULU, OAHU, POAKAHI, APERILA 16, 1894.

HE MOOLELO
-NO-
MONE TIKERO
-KA-
UI MAALO I KE KUPULAU
A O KE
KEIKIALII HARE MATINE
-KE-
KIAHA OPAKA O NINEWA

MOKUNA XI.

E ke kupaa, auhea kou lanakila ana – E ka Hoowalewale e, e hooki i kau hana – Ahai ke akule i ke kolohe – Ke alahele iloko o na mauna – Ka hololio o ke aumoe.

            He mau la i hala ae mahope iho o ka huli hoi ana aku o ka Ui maalo i ka wa Kupulau no kona home ululaau, ua hoea aku la imua o ka pua lilia o Zubioda kekahi i keikialii ui, nona hoi na helehelena i lihi launa aku i ko ka mea nona keia moolelo, a ua hookipa ia aku la ua keikialii la me ka hanohano nui e like no me kona kulana.
            A e like no hoi me ke ano mau o na keikialii o ia au i hala ka makahehi a me ka hoohihi maoli no i na helehelena ui o ua pua lilia la, pela no keia keiki i hoike mai ai i kona mau hiohiona o ka hoohihi, a haawi mai la i kana mau olelo hookaau e punihei ai ua pua lilia la, a i kela a me keia manawa a ua keikialii la e kamailio mai ai, e minoaka mau ana ua nani la o ke kakela o Zubieda.
            O ka nani o na helehelena o ua keikialii la, kona piha maalea no hoi a me ke akamai ma na kina olelo ana, oia kekahi mea nana i hoopunihei loa aku i ua kaikamahine la, a poina iho la paha oia i ka mea ana i hoohiki ai imua o ka Hololio i ka wa Hooilo.
            I ka wa i iho ai o ka la ma kela aoao o ka honua, ua hele holoholo aku la laua iwaena o na malapua, a i ko laua wa i hookokoke aku ma ka ipuka pa o ka pa alii, ua puhi malie ae la ua keikialii la i kana ulili, a emo ole ua hoea mai la kona lio, a me na lima menemene ole o ka pakaha a me ka limanui i hopu iho ai ua keikialii la i ka pua lili o Zubieda a hookau iho la maluna o ka lio, kau ae la ia mahope a ahai aku la i ua ui la o ke kakela o Zubieda. A i ka manawa a ua kaikamahine la i hoomaka ae ai e kahea i mau kokua nona, oia no ka manawa i hopu iho ai o ua keikialii la me ke oolea ma kona poohiwi, a pane iho la:
            “E pani i kou waha i keia manawa. Aole he mea nana e hoopakele ae ia oe mai ka poho aku o ko’u lima.”
            “Owai oe e keia nahesa hoowalewale? Pela anei oe e hana mai ai ia’u me ka hilahila ole? E hookuu ae ia’u e ka mea pakaha,” wahi a ua kaikamahine la me ke kupaka ino ana ae e hemo mai na umii paa ana a ua keikialii la.
            Aka, o ia mau hoao ana a ua pua lilia la o Zubieda aole loa e hiki ke hookoia kona makemake oiai, ua kakia kuinao iho la ua keikialii la, me he la, nona ponoi ia waiwai.
            Ia laua i komo aku ai iloko o ka ululaau, ua kaohi iki mai la ua keiki la i ka holo paukiki loa ana o kona lio i ke kula o Moiliili, a pane aku la oia me keia mau olelo:
            “E oluolu mai oe e honi kaua e ka nani mae ole.”
            “U oki! Aole loa e hiki ia’u ke ae i kou makemake e ka nahesa hoowalewale.”
            “Pehea? E hoole ana anei oe i ko’u makemake?” wahi a keikialii la. ‘Ea, e ae mai oe e honi kaua!”
            “Aole!” wahi a ka pua lilia o Zubieda. “Ua hoolaa au ia na ka Ui maalo i ka wa Kupulau, a pela me kuu kino holookoa nei, aole na ka mea okoa.”
            Akaaka ae la ua keiki la me ke ano hoohenehene, a pane aku la:
            “Ua pupule anei ka pua lilia o Zubieda i punihei ai oia i kela aeahaukae o loko o na ululaau? O na holoholona ka hoa moe pu o kela wahi keiki hookane, a pehea la oe i manao nui ai iaia. Ea, e ae mai oe e honi kaua.”
            “E aho e make iho au maloko o keia ululaau mamua o ko’u ae ana aku i kou makemake.”
            Alaila, kaukau ae la ua kaikamahine la imua o ke aheahe lau makani e pa mai la i kona mau papalina, me keia mau olelo,-
            “E keia aheahe makani e pa nei, e lawe aku oe a haawi i ko’u aloha i ka mea a’u i aloha ai, a e hai pu aku oe iaia eia au iloko o ka poho lima o ka mea puuwai eleele.”
[He nui aku no koe.]

            Ua lilo aenei ka mahiko o R. Halstead, o Waialua aenei, i kana mau keiki, a na laua hoi e hoomau aku malalo o ka inoa hui o na Hoahanau Halstead.

            Ua lilo ka maka helu ekahi no kekahi hoikeike ma Europa i kekahi kii i hoouukuia o ka mokumahu Arawa no ka mokumahu oi loa aku o ka nani. Pela io no ke ikemaka aku iaia.

NA PALAPALA.

            [Aole maluna iho o makou ke koikoi o na hala a me na hewa no na manao i hoopukaia malalo o keia poo, aka, aia no maluna o na poe na lakou i kakau mai.]

He Lanakila ka Oiaio, he mea
Hoka ka Lapuwale.

MR. LUNAHOOPONOPONO:
            Ua wehe ae o Mr. David Balauwina he halawai kakoo hoohuiaina, ma ka halekuai o Pauwela, ma ka la 3 iho nei, hora 6 ahiahi. He nui no na poe kupono i ke koho balota i akoakoa mai i ua halawai la, me ke koi ana i na poe aloha aina oiaio o ua apana la e kakau mai i na inoa ma ka pepa e peepoli ana iloko o ke kuka loihi ona, me ka noke ae i ka olelo i ka opala, i ka niu, i ke kulolo, i ka hala, i ke selo, e hoohui ia Hawaii nei me Amerika. Ua manao paha e puni mai ana iaia na ala-paa o Kaueleau, i hele ka umauma a palahalaha i ke aloha aina oiaio, a aloha Moi hoi. A i ka pau ana o ka haiolelo ana, ua ike kou mea kakau me ka oiaio, aole loa hookahi o na kanaka o ua apana la i kakau ma ka pepa i haiia ae la maluna, a hoi aku ma ua po la me ka hoka nui. Nolaila, hoomanao ae la au i kela wahi lalani mele, penei:
            “Hoi luuluu la i ke one o Hanakahi,
            He pasa neo ka loaa ia’u.”

            “Hewa ka ia a Umiamaka, he okoa ko loko.” Nolaila, eo la ia Maui ma keia haawina, nolaila, ke ike mai la e Hawaii a hiki I Niihau, laweia i rula na oukou, i like me ka olelo, “O ka oiaio, oia ka lanakila, o ke kupaa ma ka pono, oia ka hana pono.” O ka hana a ka lapuwale, e palakahuki no ia.
J. LANIHAU.
Haiku, Aperila 7, 1894.

He Manao Laula.

MR. LUNAHOOPONOPONO:
            Imua o ko’u mau makamaka, oia hoi, na hoahanau o ka Ekalesia makua o Kawaiahao, mai na kanikoo palalauhala kolopupu haumakaiole a i na opuu pua ono o ka hanauna hou e nee nei i keia manawa a hoalawelawe pu no ko kakou ekalesia makua, nona ka loihi o 14 makahiki a’u i noho hoahanau ai.
            Mamuli o ka ike a hoahewa ana a ko’u lunaikehala i na hana i hanaia ma ke ano maa i na la i aui aku a me na la e nee nei imua, maloko o na paia laahia o ka luakini o Kawaiahao, ka heiau i hoolaaia no Iehova ke Akua, e na Alii o Hawaii nei, no lakou hoi na kino lepo e “moe la i ka moe kau, moe hooilo.” A ke ku nei ka luakini o Kawaiahao he kia hoomanao no ka lakou hana imua o ka hanauna hou.
            Nolaila, e na makamaka a me na hoa’loha, aole keia he pane e paneia mai ai, aole hoi keia he paio e paioia mai ai, aole loa pela; aka, e like me ka ike a kono ana a ko’u lunaikehala he pono keia hana a he hewa keia hana, pela au e hoakaka nei i ko’u manao imua o akea.
            Mamuli o na ulia hoopakalaki, a i ole o olelo ae au he lioao mai luna mai, i ole ai e wehe a hana hou ia na aha mele a ano hana lealea e ae maloko o Kona heiau ma keia mua aku. No ka mea, ma ka po Poaono i hala, Apr. 7, oiai e makaukau ana na keiki kula o Kamehameha e wehe i ka lakou aha mele, a mamua ae o ka manawa e hoomaka ai o na hana, aia hoi, me ke pahaohao nui a me na manao kupilikii o kekahi hapa o ke anaina i komo mua iloko, ua ikeia aku la na hiona weliweli o ke ahi e lapalapa ana me ka huhu nui mamua pono o ka ogana, mamuli o ka moku a haule ana o ka ipukukui e lewalewa iho ana.
            A mamuli no hoi o ka nui o na kokua a me ka paio ikaika ana o ke kanaka me ke ahi, ua pio iho la ke ahi, a o ko oukou makamaka kekahi malaila ia manawa. Aka, ua waiho iho ke ahi i na palapu o ka hoomainoino maluna o kela ogana kumukuai nui, a me ke dala nui wale no e paa hou ai. Aole hoi oia wale, aka, ua pakele o Kawaiahao luakini mai ka inaina aku o ke ahi lokoino.
            Nolaila, o kela a me keia kanaka noonoo maikai, aole loa e nele ka hoahewa o kona lunaikehala no na hana o keia ano, ka wehe aha mele ana a me na ano like maloko o ka hale o ke Akua. Aia ma ka hokua o kela a me keia hoahanau ke koikoi o keia hana. O na hoahanau, o ka ekalesia iho la no ia.
            Eia no hoi kekahi, maloko o na paia o Kawaiahao a maluna hoi o kona mau papahele i lulu ia ai he heluna dala mahuahua no ka pomaikai wale no nae o na hana kuwaho ka hapanui; a o ka luakini o Kawaiahao, e noho mau ana no oia iloko o ka ilihuna a me ka nele. O na paia puna ua hele a nakaka a popopo no hoi, a he nui wale aku na manuunuu e pili ana i keia luakini. Malia paha o olelo mai lakou nei ae, he wahi mea liilii wale no ia, aohe pilikia, a pela aku. E olelo au, me ke dala wale no e hiki ai na mea a pau, hana nui a hana liilii, ua like a like.
HOAHANAU.
Honolulu, Apr. 9, 1894.

F. J. TESTA (Hoke),
NOTARI LEHULEHU.

            KEENA HANA: Helu 15, Alanui Kaahumanu, me ka Mea Hanohano A. Rosa.
jy 8 –‘94

J. K. KAHOOKANO.

LOIO a he Notari no ka Lehulehu.
            KEENA HANA: Alanui Kaahumanu.
Honolulu. jan. 8-‘94