Ka Makaainana, Volume I, Number 19, 7 May 1894 — Na Anoai o ka Ua Loku. [ARTICLE]

Na Anoai o ka Ua Loku.

Mr. Lunahooponopono: Ma kela mau mahina aku nei, he papaa la loa makou nei, a i keia wa, ke hana mau mai nei ka iho makawalu ana o na pakaua o Kulanihakoi, a ke piha hauoli nei na kupa o ka aina i ka uliuli lipolipo mai o na lau kalina uala o ua ae one kaulana nei o Mahamoku, nona ka pua rose. Eia hou keia, ma ko'u kilo pono ana aku i na hana o na Papa Nana Koho Balota o ka Apana o Hanalei nei, ua ike iho la au ua haalele mai o S. P. Kaleikini i kona noho lala ana no ia papa, o ke kumu, no ka like ole o kona noonoo maikai ma keia mau hana a keia Aupuni manawa. Nolaila, nui ko'u mahalo iaia no kona kupaa no ke aloha i kona aina hanau a me kona Moiwahine. He keiki opio oia, o kona noonoo nae he kanaka makua. A hala ae ia, i holo aku kuu hana ma Kilauea, ua haalele hou no kekahi lala o ko laila papa, oia o George Mahikoa, he keiki opio no keia nona na makahiki ma kahi o ke kanakolu, a he kanaka lawelawe hoi malalo o na haole, nona ka uku la mawaena o ka ekolu a me elima olokau o ka la. Nui kela. Auwe ka mea minamina ole i kela uku nui o ka la a hoopili aku la hoi malalo o na haole, aole nae. Nui ka mahalo no olua, e na opio Hawaii, no ko olua naauao a me ke kanalua ole, a ma na ano a pau o laua, he like loa ko laua mau Seta kekahi a me kekahi. Aole o keia makakila wale

kai mahalo no olua, aka, o ka poe noonoo naauao hoopono pu kekahi. Nolaila, o ka'u e kalekale ae nei i na Lani, e hoomau i ko olua kulana, a ma ka hua o ka laau e ikeia ai ka pono a me ka hewa. Eia hou no keia. He wa ilihune loa mai nei keia o na one kaulana nei i ka i-a ole. He mau mahina nui keia o ka i-a o kela ano a me keia ano, a me ke Kinau ai pua hala, eia nae, he neo ia la. Ka i nohoi o ke puhiia ana iho nei o na mea hoomanamana, he mea la hoi ia e ola ai ka aina, eia ka he make loa. E. Kuapuhi. Hanalei, Kauai, Apr. 19 1894.