Ka Makaainana, Volume II, Number 7, 13 August 1894 — Page 2

Ka Makaainana.

 

HE MOOLELO KAAO

NO

MONE TIKERO

KA

HOLOLIO I KA WA HOOILO

KA

UI MAALO I KE KUPULAU

A O KE

KEIKIALII HARE MATINE

KE

KIAHA OPAKA O NINEWA

 

MOKUNA XII

 

Ke aloha o ka Ipo—

Hanini ka waimaka elo ka laau—Ka Ui Maalo i ka wa Kupulau iluna o Hagara—Ke kaoo o na poe me na medala kila no Arabia—Ka hoohui mare i ka wa Hooilo—Ike kumaka i ka nani o Mokuleia, aohe laula a koe aku.

 

Ia laua i maona ae ai, pane aku la kona kahuhanai iaia.

“E Mone Tikero, pehea la i makahehi loa ai kela kaikamahine ia oe? Oiai, he keiki oe i hanauia iloko o ua ululaau me ka wai o na pua, aole hoi oia wale, aka, he keiki oe i kiola ia me ka manao e make ana, eia nae, ua ola oe ma o ka lokomaikai la o na lani? E hai mai, e kuu keiki i ka hanai o ka’u ninau.”

“Aole i maopopo ia’u, aka, e like me kana i olelo ai na ka mea e loaa ai ke Kiaha Opaka o Ninewa e lei i ua Pua Lilia la o Zubieda. Ua manao iho au mamuli o kona manao kuhihewa ana ua loaa ia’u ua kiaha la, oia kona mea i paulele ai maluna o’u. Aole nae pela?”

“E Mone Tikero, na ka nani o kou mau helehelena i kaualako i kona puuwai e aloha ia oe, me kona naau a pau, aole e punihei wale aku i ka nani a me ke akamai olelo o kekahi poe keikialii. Ua pomaikai oe, e Mone Tikero.”

I ka pau ana o ka laua kukai olelo ana, hoomakaukau koke ae la laua i na lio o laua, a holo awiwi aku la iloko o na ululaau no kahi o ka hiena Hagara, iwaena o na leohaluku o ka hekili a me ka olapa o ka uwila. He hoike ana paha ia no na lani i ko lakou aloha i ka mea a lakou i malama ai mamua o kona haalele ana mai i kona home ululaau, kahi hoi ona i hanaiia ai mai kona mau la opio mai a hiki i kona mau la kanaka makua ana, a akahi no ke kaawale mai ko laua wahi pupupu hale aku, i noho a kamaaina i na leo o na manu.

Aole hoi oia wale na hoailona i ikeia, aka, pa mai la ka makani me ka ikaika e kiola liilii ana i na lala laau i kahi e, hakumakuma mai la na ao o ka lewa, a ia manawa i kui hou iho ai ka hekili me ka ikaika i oi palua ae i ko ka mua a haule mai la na pakaua eloelo me ka hooma u ana iho i na kamahele. Aka, he mea ole ia mau mea ia laua, a ke hoomau la no laua i ka holonui a na lio o ka hiki koke aku i kahi i makemakeia.

Ia laua i hiki aku ai i kahi o ua hapaua la, ua nana mai la oia malalo o kona malumalu hale me na manao o ka hauoli, a kahea mai la i ka malihini,--‘Ai a ke kipa, ai a ka hale, e hoomaha iho hoi a kuu ka nae, alaila, --ai a ka hele aku, ai a ma ke ala.

la wa i komo aku ai ua hiena la iloko o ke keena e waiho ana o kona mau aahu kaua, a iaia e nana pakahi ana ia lakou, hopu aku la oia i kona kapa unahi, a me kona papale kila me ka manu Vuletura maluna iho a aahu iho la. Lalau ae la i kana pahikaua pepeekue e kau ae ana maluna e ka puka a kaei ae la ma kona puhaka, a o kana laau hoi paa ae la ma kona lima hema.

Puka mai la ua hapauea la me kona mau kahiko piha o ka oihana kaua, a ku ana imua o kana mau malihini, alaila, pane mai la:

“Ua makaukau, e ka Ui Maalo o Hagara. E haawi mua ae nae au i ke kauoha i ko kaua mau kanaka.”

Aole i liuliu iho mahope o ka hoike ana aku o ua hapauea la i ka hoailona maloko o kana o le, aia hoi, e ku ana imua o lakou he umi tausani o na kanaka i lako me na mea kaua, a e kao ana hoi lakou maluna o ko lakoi mau lio pakahi, a iwahoi o lakoi he kanaka poupou loihi, he ihepa hoi no na puu kinikini o Puowaina. A o ko lokou mea hoomakeaka no hoi ia ma ko makou nei heena.

Huli mai la oia a kamailio mai la imua o Mone Tikero e keia mau olelo:

“Eia lakou imua ou i keia hora. O na mea a pau au e kauoha ai ia ia lakou, e hookoia no ia me ka eleu.

(Aole i pau.)

 

He mau makahiki i hala ae, ua 250 ka nui o na kaa lawe ohua i loaa ka laikini, a i keia wa hoi he 140 wale no, a he heluna nui o ia mau kaa i ouaia e na Pake i keia wa. No ka nui mai no paha o ka pilikia ke kumu o keia a he pomaikai loa no hoi ke loaa kahi $1 o ka la. O kekahi kumu paha o ka pilikia no ka emi loa o na kaa hali ohua nunui, he 5 a he 2 ½ @neta wale no ka uku.

 

HOIKE KIHAPAI

Imua o ka Ahahui Mokupuni ma Ewa i Aperila 4, 1894

 

I ka Lunahoomalu a me na hoa o ka Ahahui Mokupuni o Oahu. Me ka mahalo:

O ka hoike kihapai o ka Ekalesia o Kaumakapili iloko o keia hapalua makahiki, mai ka Poakolu mua mai o Okatoba, 1893, a i keia Poakolu mua ae o Aperila, la 4, 1894, ke waihona aku nei imua o oukou e like me na hoakaka malalo iho nei:

AKAHI-Ke kulana o keia Ekalesia. Ke ku nei keia Ekalesia iloko o ke kulanakauhale o o Honolulu, ma kona mau palena, a malaila ka luakini nani a maikai o Kaumakapili e ku nei, kahi hoi e hoomanaia ai ka inoa o Iehova ke Akua Mana Loa, a ma keia wahi no hoi ka akoakoa ana o na luna, na hoahanau a me na poe mawaho, e lohe i ka olelo a ke Akua mai ka waha mai o ko lakou kahunapule, Rev. J. Waiamau. Iloko o keia manawa, he oia mau no ka Ekalesia o Kaumakapili ma kekahi mau mea, a i kekahi manawa hoi, aole he oia mau, aka, @ emi mai. E like me ke au o ka manawa, ina nui mai ka ua, alaila, e nui ana ka wai ma na kahawai a pela ma na auwai, aka, ina aole ua, e papaala ana a maloo ka aina, a nele na kahawai a me na auwai i ka wai ole, pela no ke kulana o ka Ekalesia o Kaumakapili iloko o keia hapalua makahiki.

ALUA-Ke kulana o na luna a me na hoahanau o keia Ekalisia iloko o keia hapalua makahiki. He oia mau no, aole i loli ae, e like no me ka’u hoike kihapai ma kela hapalua makahiki i noho ai ka Ahahui ma Waianae, o ka makahiki 1893 i hala, pela no keia, aole i pii ae a mahuahua ka heluna o na luna a me na hoahanau, a pela pu no hoi me ko lakou ikaika ma na hana pono a pau, aka, ma ka nana ana aku, ke emi mau nei ko lakou heluna me he pahu wai la ua pukaia o lalo, pela maoli no ke kulana o na luna a me na hoahanau o ka Ekalesia o Kaumakapili iloko o keia hapalua makahiki i ikeia.

AKOLU-O ke kulaua o ke kahu, Rev. J. Waiamau, he oia mau no kona ano a me kana mau hana, aole no i loli ae iloko o keia hapalua makahiki, a nolaila mai kekahi pilikia, poino, make, nawaliwali, hoololohe a nuha maoli no ma o kekahi o kana mau hana maikai ole i ikeia.

AHA-Ke kulana o na halehalawai a me ka halekahu o ka Ekalesia o Kaumakapili. He ekolu no mau halehalawai ponoi a me ko lakou mau kahua oia na halehalawai o Iwilei. Kapuukolo a me ke kahua nalehalawai o Holokahana, a o ka hale hoi i pau i ke ahi, a ekolu hoi mau hale halawai i makauaia mai i wahi e hoomana ai na Ekalesia elua o Kawaiahao a me Kaumakapili, a oia ka halehalawai o Kapalama, Maemae a me Pauoa. I na manawa mamua ua mau ka malama mau ia o na halawai, a ua piha pono no hoi na halehalawai me ka heluna nui o na luna a me na hoahanau e malama mau ana ma na ahiahi Sabati, a pela me na halawai Poakolu a Poaha, aka, i keia manawa, ua ku male kekahi mau halehalawai, aole no hoi he mau luna a hoahanau e malama mau ana ma keia mau halehalawai. Ua make a ua emi a nele maoli no ka hapuanui, a o ka halekahu hoi, aia ma kahi kaawale loa mai ka Luakini aku, a oia kekahi mea pilikia loa, a ke noho nei o Rev. J. Waiamau malaila me ka hoomanawanui ma ka hele mau ana mai ma keia alanui loihi loa.

ALIMA-Na Waihona o keia Ekalesia. He ekolu no mau waihona kumau o keia Ekalesia mai mua loa mai a hiki i keia manawa, koe na waihona kuikawa no ka manawa.

O KA MUA-Waihono Mahinahou. He waihona keia i hookaawaleia no na Oihana Kuwahe e e pili ana no ke kokua ana i na hana ma na aina e, a malaila e hoolliloia ai keia waihona, koe nae no kekahi mau pilikia no ka manawa. Aka, ma ka nana ana i keia waihona o ko kakou Ekalesia, aole i hanaia a hooko aku maluna o keia waihona, a pela i pilikia ai keia waihona no na maka@ki@ h@la, ua pau loa i ka hooliloia no kekahi mau waihona e aku.

ALUA-Waihona Ola Kahu. Ma keia waihona ua ikeia i keia manawa ua emi loa a nawaliwali iloko o na makahiki i hala, a pele no i ikeia ai i keia hapalua makahiki. Ma ka hoike a ko makou Papa Kahu Waiwai, ua hiki ole e oia ke kahu, Rev. J. Waiamau, iloko o kona waihona iho no kekahi mau kumu a lakou i ike ai, na hoahanau hoi. Na keia waihona i hoopilikia ka waihona Mahinahou a me ka waihona Luakini. O na loaa @o keia waihona iloke o keia hapalua makahiki he %65.55.

Aole i pau.

 

Ma alanui Pau. Kaakopua, la 1 nei, ua hanau mai he kaikamahine na ka wahine a W. Keawe, a eia laua elua ke ola maikai nei.

I ke awakea Poaha, Augate 2, i hoaoia ai e hoolilo aku ma ke kudala i ko Bila Konuwela lio heihei holo kiauau ma ke kaa, nona ka inoa o Keohi Hewada, a no ka uui oie o ke koho, ua unuhi hou ia aku. He $235 ke koho kiekie loa, a he uuku ia mau dala no ia lio.

Ahiahi Poaha, Augate 2, maloko o ka luakini Halepapu, i mareia ai e ka Rev. Mr. Penerose, o Wiliama W. Harisi, mea malama buke o ka hui o Lui a me Kuke, ia Miss Evelina Ed keta. Mahope iho ua hoolauleaia ae na hoaloha opio o laua. Ua hala aku nei laua no Kauai, i ka Poalua i hala iho la, e hoohala ai i na la mua o ko laua noho mare au@.