Ka Makaainana, Volume II, Number 16, 15 October 1894 — Page 3

Ka Makaainana.

 

lani a me Rusia keia noi, aka, ua hoike pili oihana ia ae ma Tokio aohe i oiaio ia lono.

            Ua malama malu loa ia kahi a ka pualikaua elua o Iapana o 30,000 koa e pae aku ai. Aia ka pualikaua Kepani ma Korea ke nee awiwi la no ka akau. Aohe mau akeakea ana i manaoia ma kekahi aoao aku o ka palena o Kina.

            Mamuli no o ke kaua, ua emi mai ke dala sileva ma Iapana, oiai, aia me ia metala keokeo e ukuia ai ka hapanui o na hoolilo kaua. No kahi wa i hala ae i hana ai kahi hana dala imiperiala i ka po a me ke ao.

            Ua loheia ma Nu Ioka mai Sanahae mai, Sepatemaba 27, e pani koke ia mai ana ko Li Hana Kana wahi ma ke ano Kuhina Nui e Wu Ta Kana (Wu Ta Chang), he Kiaaina mamua no Hupu.

            O ka hapanui o na aliimoku Iapana, ua hoonaauaoia lakou ma ke kula ao kaua moana o Anapolisa, Amerika H@puia, a ua oi ae hoi @a kiekie a hanohano i loaa ia lakou ma na moku o ko lakou Aupuni mamua ae o na poe Amerika o ke ao like nui ana.

            Huikalaia na Poe Moremona.

            Mamuli hoi o ke kukala akea ana o ka Peresidena o ka Hoomana o na Poe Hoanao o na La Hope ua pau ka hilinai ana o ia hoomana i ka mare lehulehu a me na launa hewa ana, me ke kue hoi i ke kanawai o ke Aupuni o Amerika Huipuia, no laila, ua hoolahaia ae ma Wasinetona, Sepatemaba 27, ke huikala piha a ka Peresidena e kala loa ana i ke kue ana o na hoahanau o ia hoomana i na kanawai o ka aina, mamuli paha hoi o kona manao ana ua komo iloko o lakou ka manao e noho pono a e lilo hoi i mau makaainana maikai ma keia mua aku.

            Na Hunahuna Laulaha.

            Ua lonoia ae e haalele ana o Dupue, Kuhina Nui o Farani.

            E hoomaka hou ia mai ana ka hana ana i @e alawai-oki o Panama i keia mau la.

            Aia ke kamailioia la no kekahi ulele hakaka hou ae mawaena o Kobeta a Kiliraine me keia mua iho.

            Aia ke houpuupuia la e ulu ae ana he paonioni kuee mawaena o Mekiko a me Guatemala, e pili ana no kekahi hoopaapaa palena.

            Ke nohoalii la ka maluhia ia Rio de Ianerio a ke hoolalaia la na kue oolea ana aku i na kipi ma Rio Garana do Sule, ma ka hema o Berazila.

            Ua hoea ae ma Nu Ioka, Sepatemaba 28, o Mrs. W.K. Vanabila a me na keiki, a me kona ae ole e hui kamailio pu me kekahi poe kakau nupepa, ua haalele iho oia i ka uwapo a hoi loa no ko laua wahi ma Nupota. Aohe oia i oiuolu hou me kana kane, a e noho kaawale ana laua.

            Mamuli o kekahi hoaoia ana mai nei e pepehi ia Peresidena Igilesiasa o Coseta Rica, i manao wale ia na na poe kokua i ka manao e hoohuiia na Repubalika a pau o Amerika Waena malalo o hookahi poo, ua kukala kanawai koa ae la ka Peresidena.

            Ua kikoo ae ka Pope i ke kahunapule pilikino o ke Kouna o Parisa e hiki aku i Roma, no ka haawi ana mai iaia i kekahi mau ao ana e pili ana i na poe roialisa Farani. Iloko o na anaina kahunapule, ua manaoia keia hana oia no paha ka puupuu hope e make loa ai o na manaolana o na poe pili alii.

            Ua noi ae na alii Makika a me na poe ona waiwai koikoi o Bulufila no ka hoohui aku o ka Peresidena o Kolomobia i ko lakou mahele aina me kona Aupuni, oiai, aohe o lakou lihi hoihoi ia Nicaragua. Ua hele kino maoli aku no keia poe a Catage nia, noi aku la i ko laila Kiaaina e hoike aku i ko lakou manao i ka Perosidena.

            Ma kahi hoi o ka oluolu ae o ke omaimai o ke Za o Rusia, ua oi loa ae la ke ino. Ke ano paupauaho mai la ka hanu ana a ua lilo hoi i hana nui okoa nana. Ua manao na kauka e hoouna iaia i Karaimea e hooluolu ai, aka nae, ua nui ka hopohopoia. O kekahi o na kauka kaulana loa o Berelina no na mai maloko ka i kikooia aku nona.

            Mamuli hoi o ke ano omaimai o ke Dukese Nui o Hese, ua oleloia e hoopaneeia aku ana paha ka mare o Kama`liiwahine Alekisi o Hese, kaikuahine o ke Duke Nui, me ka hooilina alii o Rusia i keia wa a iloko ae o Feberuari. E pili ana hoi no keia ae la, ua olelo pu ia ae ua haule loa aku la ua Kama`liiwahine la i ka hoomana Helene.

 

            He kapena o E.F. Imihofa i keia wa no na kiai o ka Halemai Pupule, a o kana wahine (Haina) no hoi ka mea ma ka aoao o na wahine.

            No ka pepehi ana o Philip Davis i ka ona o ka hale inu rama Pakipika, maloko no o ia hale inu rama, i ka auwina la Poaono i hala, Sepatemaba 29, ua hoopaiia oia e uku i $20 me na koina imua o ka Aha Apana i ka Poalua, la 2 nei.

            Ua lohe mai makou ua wae lokahi ia o Hon. G.N. Wilikoki a me Hon. W.H. Laiki i mau senatoa, a o A. McBryde a me A. Knudsen, Jr. i mau lunamakaainana no ka mokupuni i Kauai, no ke kau koho balota ma ka Poakahi, la 29 o keia mahina.

 

Na Hoolilo no ka Imi Limahana.

            E hoomanao ko makou poe heluhelu ua hoike aku makou mamua loa aku nei no kekahi hoopii a H. Hakatila Ma kue i kekahi mau hai kalepa e ae a me kekahi mau ona mahiko, no ka mea e pili ana i na lilo o ka hoao ana e kii i mau limahana Pukiki hou ma Madeira. Nolaila, i ka Poakahi, la 1 nei, ua waiho ae o Hanale Kamika, luna nana, i kana hoike no keia mea. Ma ka hoike helu a ke aoao hoopii he $4,735.42 ka nui o ko P.A. Diasa mau lilo o ka hele ana ma keia huakai. Hoolaweia ae hoi he $3,000 i ukuia e ka Ahahui Hoohana a Hoolawa o na Poe Mahiai, a hui pu me $121 ukupanee, ua koe iho ke koi no $1,614.42 me ka ukupanee o 6 pa-keneta mai Mei 28, 1892. O ko Diasa uku, he $200 o ka malama no umi malama a me ekolu la. Ma ka hoomao popo a ka luna, ua loihi wale aku no kona noho ana ma Madeira mamua ae o ka mea kupono mahope o ke ko ole ana o kana huakai, nolaila, ua manao oia e hoemiia mai keia koena e ka huina o $84255. Mamuli o keia ua hoe iho he $771.87 e uku like ia ai e na poe a pau o na aoao a i elua, me 6 pa-keneta pakui aku i kela a me keia: H. Hakafila Ma, $183.78; Kakela & Kuke, $160.82; W.G. Iwini Ma, $153.15; T.H. Kewiki Ma, $82.70; A. Iana, $76.56; H.A. Wilimana, $61.25; C. Burua Ma, $53.60. Ua hoohalikeia keia mau huina ae la me ka nui o na limahana i makemakeia a i kauohaia ai e kela  a me keia. O ke kumu nui no hoi o keia hoopii, no ka hiki ole loa ia lakou ke ae iho i ka guina dala a kela a me keia e uku ai, a akahi iho la no a pono.

 

            Ma ke Kalaudine o ke ahiahi Poalua, la 2 nei, i heo aku ai o Kapena Makai Poo L. Anaru i pau e noho Makai Nui aku no Maui. Hora 8 a oi ae paha o kakahiaka Poakahi aku i kamailio ai oia imua o na makai kumau i akoakoa ae ma ke kua o ka Halewai i kona minamina i ka haalele koke is Honolulu nei, aka, ua oi loa aku kona ponopono ma Maui, oiai, oia koua wahi kamaaina loa. Oia no kahi pono nona e uhai bipi ai. Ua hiki no!

            Aumoe, hora 11 paha, o ka Poaha, la 4 nei, ua lawe kolohe ia aku kekahi kaapio o ka bui kaa e ku nei mauka iho o ko E.O. Holo Ma halekuai. Ua hele aku he kahukaa no ke keena telepone, a iaia i huli hoi mai ai, ike ana oia i ka neeu o kona kaa a hala ana. Noke oia i ke kahea, aohe hooloheia aku. Ua hoike koke ia aku keia aihue i na makai, a i ka hora 10 o ke kakahiaka Poalima ae i loaa aku ai ma alanui Beritania, mauka iho o ka hale hana hau, ua hikiiia ka lio a paa i ka pou telepone, a me he ia malaila paha kahi i ku ai a ao a hiki i ka loaa ana. Ua hoohuoi wale ia no ke kolohe.

 

Hoike Make o Sepatemaba.

            I ka malama i hala, na hiki ka nui o na make o Honolulu nei i ka heluna o 44, oia hoi, he 24 kane me 17 wahine, i maheleheleia iwaena o na lahui like ole, penei. Hawaii 21, Pake 11, Pukiki 8, Iapana 1, Amerika 2, Beritania 0, a he 1 o na lahui e ae. Malalo o 1 makahiki he 14, malalo o 5 he 3, malalo @ 10 he 1, malalo o 20 he 1, malalo o 30 he 3, malalo o 40 he 4, malalo o 50 he 5, malalo o 60 he 7, malalo o 70 he 2, a he 1 maluna aku. Iwaena hoi o keia huina make nui, he 9 poe i lawelawe lapaau ole ia @ kekahi kauka lapaau. Peneia iho ka hoakaka no ia malama hookahi iloko o @ makahiki: 1890, 53; 1891, @ 1892, 36, 1893, 64: a i 1894 iho la he 44.

 

            Ua makemake o Italia i na poe mea dala o Geremania e hoaie akuu iaia i $120,000,000.

            Iloko o na malama eiwa hope o ka makahiki 1893, ua haule mai ko Beritania Nui loaa he $10,500,000, a he $10,000,000 no hoi ko Rusia haule iloko o ia manawa like.

            Aia ka ke walawalaauia la ma Kanada e hoohiki loa mai ana na mokumahu "Emeperesa" nani ekolu @ kakou nei, a e paniia ae ana ko lakou wahi ma Kina a me Iapana e na moku oi ae o ka nunui a me ke oolea, i hiki ai hoi ke hoopapa aku me na kai a me na makani oolea o na kai o ia mau wahi. Ma kekahi huakai ano koke mai nei o kekahi o keia mau moku, ua poi pu ke kai ia luna o ka oneki a komo i ka pukauwahi.

 

J.K. KAHOOKANO.

LOIO a he Notari no ka Lehulehu.

            KEENA HANA: Alanui Kaahumanu.

Honolulu.                    Ian. 8-'94

 

KO HONOLULU HALEKUAI KOPA.

            Eia malaila e loaa ai ke kopa maikai loa no $4.50 o 100 paona, a 17 auka o 25 paona no $1.25.

            Kopa Polu Geremania, 10 keneta no ka paona, elua auka no 25 keneta

            Kopa Palupalu, 42 paona o ke kini, $1.25.

            Lanahu Kiawe, 40 keneta no ke eke.

            Na Kapu Poi, me ke apo keleawe, 50 keneta a me 75 keneta, e like me ke ano.

            Paakai apuupuu maoli, 100 paona o ke eke no 50 keneta.

            Kukaepele Iapana, ekolu ope (30 pahu) no 10 keneta.

            Wahie kiawe, 200 paona no $1.00

            Mea Hoonoono Kope, 15 keneta no ke ope

            E loaa no na kumukuai kiekie loa no na ili bipi, kao, a pela aku, a me ka aila paa.

N. BREHAM (Berenama),

I maopopo ma ka ino@ o ke

                        Kanaka Kopa Palupalu

            Alanui Betela, mauka iho o Kakela & Kuke.              aug. @0tf