Ka Makaainana, Volume II, Number 20, 12 November 1894 — Page 2
2 HONOLULU, OAHU, POAKAHI, NOVEMABA 12, 1894.
LAUOMI DIHAE
---KA---
UI I MOHAI IA I KE KOKO
---KA---
NANI I ALANA IA I KA OI O KA PAHIKAUA.
Ka Mea Huna iloko o ke Kiaha Waina
Ka Mea Pohihihi i ka Maka o ke Kuikele.
----A O KE---
KEIKI NUMAREDINA
KE
Komo Lima Maka Popoki.
MOKUNA XV.
Alo hou i ke ehuehu no ka aina o Libirato---Ke kilokilo wahine iwaena o na enemi---Ka pahikaua a ka mea hookahi imua o na enemi
I ua kilokilo la i hoea aku ai i ka aina o Libirato, kani iho la kana aka a i iho la oia:
"Eia ke aupuni o Libirato iloko o ka palaualelo, aole i hoonohonohoia na kiai no ke pale ana aku i na enemi mai ka hehiku wale ana iluna o ko lakou aina. Ae, e hiki mai ana o Numaredina a pulumi aku ia oukou mai keia wahi aku, a nana e noho mana keia wahi."
Holoholo ae la oia ma o a maanei a nana ae la iluna, me he la aia no ke mau la na manao hoonaukiuki iloko ona no kona enemi, alaila, komo iho la oia i kona aahu pahaohao a hele aku la iluna o ua aina la me ke au ana o kona mau maka kolohe ma o a maanei o ka ike lihi wahi kanaka aku, he ole nae ka ikeia aku.
Iaia nae i hoomau aku ai pela ma ka hele ana imua, ua ikeia mai la oia e ke alii o ua aina la, ke kupua Romio, oiai oia i ala ae ai mai kona hiamoe ana ua honi ae la oia i ka hohono ili kanaka, a no ia mea i kahea ae ai oia me ka leo nui imua o kona mau kanaka----
"Ea, ke honi nei au i kekahi hohono ano kanaka. Me he mea la eia he kupua iluna o ko kakou aina kahi i noho ai, a no ia mea e hoouna aku ia Itu, ka elele mama e holo aku iluna o ka aina a puni e nana ai ina paha he kupua kahi iluna o ko kakou aina."
Ia manawa i nalo koke aku ai o Itu me ka emoole loa, e huli a e kiei ana ma na wahi poopoo, e holo ana ma na kula palahalaha a e pii ana ma na puu, a i ka hope loa i hoi aku ai oia a hoike aku la i kona haku me keia mau olelo:
"E ke alii, aole he kino kanaka maluna o ka aina o Libirato ma na wahi a pau a'u i hele aku nei, aka, o ka hohono ili kanaka, oia wale no ka'u e honi ana ma he la ma ke komohana mai."
I keia manawa a ua wahi elele la e kamailio ana, aia o Numaredina ma ke hookokoke loa mai la e hehi iluna o ka lepo o ua aina la, a aia hoi kahi luahine imua ponoi o ua poe kupua la me kona aahu huna kahi i ku ai me ka ike ole ia, a ke noho la oia me hoolohe malie ana i na olelo a ua poe kupua la. A i ka hope loa o na olelo a lakou i pane mai ai ua kupua la:
"E ho-a aku i ke ahi o Senira a e hoolilo i ka aina e pouli pu, aole hoi he kupua nana e ike mai. He make wale no ka hope o na poe a pau ke komo mai."
I ka pau ana no o na olelo a ua alii la oia no ka manawa i nalo iho ai kahi luahine kolohe a holo pololei aku la e hui me Numaredina ma.
"E awiwi ka nee ana imua, e Numaredina, no ka mea, e pouli ana ka aina i ka uwahi o ka lua pele o Senira. Nolaila, aole he houlolohi ana, e awiwi aku e kinai i kela luahi pele, kekahi o na mea mana a ikaika hoi o ke kupua ino."
Ua ae koke aku la o Numaredina a hele awiwi aku la lakou no kahiko ua luahi pele la, a aia hoi kona ulawena ke hoomaka ae la e pii iluna a o kona punohu uwahi hoi ke nee ae la e uhi i ka aina holookoa. O ka manawa no ia o Numa redina i o aku ai i kana pahikaua imua a olapa aku la ka uwila, kui iho la ka hekili, naueue ae la ua aina la a haule mai la hoi na pakaua eloelo mai ka lani mai a pio iho la ua luahi pele la.
I ka ike ana mai o ke kupua i keia pio ano e ana o ka luahi pele o Senira, ua lele ino ae la oia iluna iloko o kona halealii, a me ka leo hooweliweli o ka inaina i pane ae ai:
"Owai keia kupua iluna o ka aina Libirato, a pehea la i ike ole ai na kiai i keia mea? Ano, e lawe mai i ka'u pahikaua a me kuu pauku laau i hele aku ai au e paio me keia kupueu nana i hoopahua i kela kiai ikaika a hoopono o kuu aina!"
Laweia mai la kana mau mea kaua e like me kana i kauoha aku ai, a paa ae la ma kona mau lima pepeekua. A ke nana aku i kona ano he kau ka weli, i na maka no oe, aole hiki ke aa aku e paio pu. Aka, i ke koa iini i ka mea huna iloko o ke kiaha waina, he mea ole ia; imua a make a ola.
Aia no hoi lakou a pau ke ku mai la ma kahi aole i mamao loa mai ua kupua la e hele aku nei. O kahi ilio a Numaredina, aia no ia ke nana mai la malalo o na wawae o kona haku me ka hiaa nui, oiai hoi ka lio e noke wale ana no kona mau wawae i ka helu i ka lepo.
Aole i puehu loa.
Paonioni no na Pono Hale.
Auwina la Poakahi, Okatoba 29, ma alanui Ema, ma Ewa ae o Ema Kuea, ua ulu ae la he paee mawaena o kekahi kane a me kana ipo, a ua lohe mai makou o V. V. Akepoka ka me Alamaira. Ua hoopuiwaia ko ia wahi poe i ka leo holina, a o Lutanela Holi ka i hiki aku mai ka Halewai. Aohe ino aku a koe mai o o ka laua hana, me he la mai ka malie mai a kuu loa i ke akea, a ua hiu aku ke kane i kona mau pono a me na lako hale a pau a koe olohelohe iho la ka papahele me kekahi mau mea kakaikahi. Eia laua ke noho kaawale nei, no ka mea, ua mahae ae la no hoi paha ka pili ana i Waialua. Ua lohe mai makou ua hele aku ka ua wahine ia e ike, e hui a e kuka pu me kekahi mau loio, aohe nae hoi i akaka ka hopena o ia mea.
Hooponopono i ka Hale Leta.
Poalua Okatoba 30, iho la i weheia ae ai he pukaaniani haawi leta hou no na Hawaii, aia ma ka aoao Waikiki mauka loa o ka Hale Leta. Makai iho hoi ko na wahine haole, he kulana hou loa keia malalo o ka lawelawe ana a Miss Mele Lo, a pela iho no hoi ko na Pukiki a me na Kepani, a i ka la 1 nei ka weheia ana. He mau hoololi hou keia. Aia no hoi i ka puka haawi leta o na wahine e loaa ai na pooleta ma keia mua aku ma ke kuai. Ma ka aoao hoi ma Ewa, ua hanaia iho nei i keena kaokoa no ka Luna Leta Nui. Iloko aku hoi, he pahu nui ka i hanaia iho nei, aia iwaena aku kahi i ku ai, me na pani uwea o mua, no ka wae ana i na nupepa me ka hoailonaia me na inoa o na hale leta like ole a lehulehu hoi, a ke pau ka wae ana, he wehe wale no i ke pani a haule ana iloko o ke eke i hoopaa mua ia malalo ae. Nani kela, maalahi a holo na hana me ka eleu pu.
E like no hoi me ka mea i manaoia, ua hoole o Kuauau mako ke Aupuni aoao i na kumu hoopii koi poho lehulehu.
Lehulehu na poe kamaaina i huli hoi mai nei ma ka Ausetulia, a iwaena o ia poe e S. C. Alani a me kana wahine, Keoki Makapolena, Rudope Sepekela, a me kahi poe e ae.
Ua kauoha aku o Keoki Wilikoki e kukuluia i hale ma Kalawao, Molokai, no ka pomaikai o ka Ahahui Opiopio Kari stiano. E hoolaaia ana a weheia ua hale hou la i Dekemaba 25 ae.
Po Poalua, Okatoba 30, i weheia ai ke keena halawai hou o ka Ahahui Hoopakele Pake. Aia ma alanui Moi nei, mawaena o na alanui Maunakea a me Konia, ma ka aoao mauka.
O ka nui o na lauhala i hoopaaia ae ma Kalakaua Hale iloko o ka malama o Okatoba, he 328, he 194 hoi o ia heluna he poe piliwaiwai. Mai keia heluna hope ae la aneane e hookahi hapakolu o ia ua pau wale no i ka hoopaiia.
He wahine Hawaii ka kekahi Pake i lawe ae i ka Halemai Moiwahine, i Oka toba 2, ua hele a nawaliwali. Aole ka Pake i hoea hou aku, a oiai hoi, he ano pulepule ko ua wahine la, ua hoounaia oia no ka Halemai Pupule i Okatoba 18 mai. No Waimalu, Ewa, mai ua wahine la.
J. K. KAHOOKANO.
LOIO a he Kokua ma ke Kanawai.
KEENA HANA: Alanui Kaahumanu.
Honolulu. jan. 8-'94
HUI HOOPUKA HAWAII.
HOAIE DALA MALUNA O
Na Waiwai Paa a me Lewa.
KUAI A HOOLILO I NA
Kuleana Mahele Hui
a me na Bona Aupuni.
Mau Agena Waiwai Paa ma na
Ano a pau.
13 a me 15, Alanui Kaahumanu. Telepona
Mutuala, Helu 637.
ok. 22---2ml.
C. A. LONG
[KALE LONA OPIO.]
NOTARI LEHULEHU.
KEENA HANA: Helu 13 me 15, alanui
Kaahumanu
Telepona Mutuala, Helu 637
HOOLAHA I NA HOAAINA
Mai a mahope aku o keia la, o MR. E. B. FRIEL hookahi wale no ka mea i hoomanaia e lawe mai i na uku hoolimalima mai ko'u poe hoaaina mai e noho ana ma ke Ahupuaa o Wailuku, Maui.
CLAUS SPRECKELS,
Ma o kona hope ponoi la, WM. G. IRWIN
Honolulu, Okatoba 15, 1894.
[Ok 22---2 ml.]
KO HONOLULU HALEKUAI
KOPA.
Eia malaila e loaa ai ke kopa maikai loa no $4.50 o 100 paona, a 17 auka o 25 paona no $1.25.
Kopa Polu Geremania, 10 keneta no ka paona, elua auka na 25 keneta
Kopa Palupalu, 42 paona o ke kini, $1.25.
Lanahu Kiawe, 40 keneta no ke eke.
Na Kapu Poi, me ke apo keleawe, 50 keneta a me 75 keneta e like me ke ano.
Paakai apuupuu maoli, 100 paona keeke no 50 keneta.
Kukaepele Iapana, ekolu ope (30 pahu) no 10 kene ta.
Wahie kiawe, 200 paona no $1.00
Mea Hoonoono Kope, 15 keneta no ke ope
E loaa no na kumukuai kiekie loa no na ili bipi, kao, a pela aku, a me ka aila-paa. N. BREHAM (Berehama), I maopopo ma ka inoa o ke
Kanaka Kopa Palupalu.
Alanui Betela, mauka iho o Kakela & Kuke. aug.20-tf