Ka Makaainana, Volume III, Number 2, 18 March 1895 — Page 5

Ka Makaainana.

HONOLULU, OAHU, POAKAHI, MARAKI 18, 1895                 5

 

"MALOO NA IWI I KA LA."

 

            No ka mea hoi, ua loihi na la o ka makou hoohuai mau ana aku i na hua ulu malalo o ke poo—"Huai ka Ulu o Lele;" a no ka mea hoi, ua hala aku hoi ia wa, a ua pau ae la hoi ka huai ana aku; a no ka mea hoi, ua haule iho nei kekahi hua a ua ikeia kona hakonakona; nolaila, ea, ke hoololi nei makou i kela poo mua, oiai, ua oiaio loa no ua "maloo na iwi o Hua i ka la."

 

            Ae, mamuli o ka maloo ana, ua lilo ae la ia i mea e nakeke ai, a ua hele a olohelohe ma kahi olelo ana.  Eia nae, aole loa ia he mea no kakou e maloo ai a nakeke aku na au, ina no i mau ka manaolana ana iloko o kakou.

            O na huaelo hoi na lakou i kanu na pohuli, ua pau nui ae i kapaeia ma kae o ka umu enaena a lakou i ho-a ai a eia ke hele nui nei i ka "loa a me ka laula o Kapaa," aka hoi, no na oha hoi i pili wale aku no ma ke ano koo aku i na huli, na moe aku la i ka umu a aia nui i ke puhi kahi e noho nei.  Pahaohao no hoi na hana o keia au kupaianaha.

            Mai o mai nei ka hoike ua kau palapala aku nei ka o Keoni Kolopana ia Kakina, e olelo aku ana eia oia ke hooikaika nei no ka hoohuiaina, me ke noi pu aku hoi i ua hoa ohumu a haihai olelo la ona o Ianuari 14, 1893, e hoouna awiwi mai, no ka mea, eia oia ke kakali ahonui nei.  Ka huaelo no hoi keia i poino ai kakou mamua, eia no la, Hilahila!

 

            Iloko o na la i hala iho la, ua lu hele ia ae kekahi mau apana pepa liilii paiia, i mea hoohulihuli ae i ko ka lahui oiwi manao e hoohiki a e hoohui aku.  A nawai hoi keia mamo i huaelo ke la?  Nawai hoi.  Malia, na hilinai ole ia.  Oia aku la, eia la ke ulawena mai nei.

 

            Loheia mai ia makou ka i hamau iho nei, mamuli o ka paa pio ana, ua keke ae na niho o kekahi poe no makou, mai na kane a me na wahine, a o ka oi loa aku no ka o ke keke loa, oia no na kane o ka aoao oiwi e noho nei ma na oihana Aupuni a me ka lakou mau wahine.  O ke ano maoli no ia, aia a pilikia, alaila, hooi loa aku ia pilikia; a ina hoi e haule, pekuia iho la; a ina hoi i kupono e alohaia aku, o ka nele loa iho la ia i na hoa'loha.

 

            Ua manao loa nae paha hoi ia ano poe ua oi loa ae ko lakou nani, maikai, hanohano a hemolele.  Noonoo ole iho no hoi la he au ko na mea a pau a he wa no hoi ko na holoholona a pau.  E ahona no ka hoi na ilio a me kahi ano holoholona e ae, he ike i ke aloha i na kahu a me na haku; a ole loa iho la hoi keia poe oiwi, he kanaka a he kanaka, eia nae, ua nele loa me keia haawina hiwahiwa i loaa i na holoholona.  Oia iho la no hoi paha, ua hi-ki!

 

            Hilinai kuhihewa ana kakou i ke kuewa Nodahofa mamua aku nei, ano la, ua oili mai nei kona ano io maoli.  Ma kekahi helu mai nei o ka nupepa Ahailono o Nu Ioka, ua hoike ae oia no ka pono e liia o Wilikoki, Keoni Kamaki a me Akepoka, a i ole ia, e kipaku i na haole, a me na hapa-haole e like la me Wilikoki a me Nolena.  Manao nae hoi oia e hauoli loa ia no ina e liia o Wilikoki.  O ke Aliiaimoku kekahi mea ana i manao ai he kupono loa e kipakuia.  Ahu no hoi ka ua pala i noi muhee.

 

            Waikahe no hoi ke ano o na lono lauahea o na la i hala iho la.  A hoea mai nae hoi ka Mariposa, aohe mau hooiaio ana i loaa mai no ka hopuhopuia a hoopiiia o na Senatoa Amerika, no ke kipeia e ka ahahui kepaa nui o Nu Ioka ma ka ninau o Hawaii nei, a akaka ole no hoi ka oiaio no ka hopuia o C. R. Bihopa, Kakina a me Polena.  Ahulau maopopo no hoi ka ma'i lawe olelo wale iwaena o kakou.  O Honolulu no ia hoi keia, nunu aku a nunu mai.

 

            Pau elua kanawai i ka hana a hooholoia e ka Ahaolelo Kuikawa i keia mau la.  Hookahi no ka huikala ana i na poe a pau loa ma ko ke Aupuni aoao mai na hoopii kue ia mai no na hana i lawelaweia oiai ke kanawai koa.  O kekahi hoi, ua pili ia no ka oihana hoolaha nupepa, ma ka hoopuka ana i na manao hoeueu kipi, a ke ahewaia, e pau ka hoopukaia ana aku o ia nupepa no ka manawa aole e oi aku mamua o na makahiki eha, a aole loa hoi e hiki i ka mea e ahewaia ana ke hoopuka a hoolaha nupepa hou aku maloko mai o ka manawa i kaupalenaia malalo o ka inoa mua a inoa e ae paha o ia nupepa.

 

            Elua no hoi mau kanawai noi dala i hooholoia no ke kinai ana i ke ala hoohaunaele ana iho nei.  O ka mua, he $50,000, a ua pau ia; a o ka hope iho nei, he $25,000.  Ea, pakela ai no ka hoi.  Oia nae hoi, ola keia mau la pololi o kahi poe kuewa wale mai.

 

            Kamahao hoi ko ke kuokoa lawe nui ole ia o ka lahui, oiai, iaia hookahi wale iho nei no ke kahua hoolaha nupepa.  He hoike maopopo loa hoi paha ia no ko ka lahui hoihoi ole, a ua hoomanawanui no a hemo mai la makou.  E hoike mai i ke kupaa o ke aloha oiaio ma ka lawe nui ana aku i Ka Makaainana nei, me ka "pe" pu mai i na Dala Elua no keia makahiki, i ko ai hoi ka olelo ana i ka "hele no a ka wai, a hele pu no me ka a-la."  Oia, e alu like mai!

 

            Ua lohe mai makou he wahi ano e paha kekahi mawaena no Kuhina Wilisi a me na luna hooko o keia Repubalika, pela ke koho a manao wale ia aku, no ka mea, ma ka ke Kuhina aha hoolaulea o ka auwina la Poaha iho la, ua kono kapakahi ia aku kekahi kuhina a me na wahine a kekahi mau kuhina, a nolaila, aohe luna hooko i hele aku, ole loa no hoi na wahine.  Ia po iho hoi, he aha launa me ka Adimerala Amerika ma kahi noho o W. O. Kamika.  Ua hiki aku ka Adimerala, aole hoi o Kuhina Wilisi ma.

 

Mau Limahana Hou.

 

            Paoha iho la, ua hookomo mai la iloko nei o Kou ka mokumahu Geremania Kuokoa, he 17 la holo mai Kobe, Iapana, a moku ma kahi kokoke i ka uwapo o Burua Ma.  Ua haalele aku oia ia Kobe ma ka la 26 o Feberuari a holo loa mai la no keia awa me ke kipa ole ma Iokohama.  Ua lawe mai oia he 761 mau limahana malalo o ka aelike, a aia lakou i kai o Kahakaaulana kahi i hoomaluia ai no ekolu a eha paha la.  Aole he mea ma'i o luna o ka moku i ke ku ana mai.

 

Koi Poho no ke Kipakuia.

 

            Ua komo a aia iloko o ka Aha Hookolokolo Kiekie o Vitoria, Beritania Kolumebia, ka hoopii koi poho no $50,000 a na poe haole ekolu i kipaku mua loa ia ai e ke Aupuni, oia a Mula (Muller), Geremania, Karanesetona (Cranstoune), Amerika, a me Ioanesetona (Johnston), Beretania.  He hoopii keia e kue ana i ka Hui Mokumahu Kanada-Auseteralia, oiai, ma ka Warimu ko lakou kipakuia ana, a i Feberuari 28 ka hoomaka ana o ka hana.  Ua hoopukaia na palapala kaohi i ke kapena o ka mokumahu, a ua haawi hoi na agena he bona no $150,000, a pela iho la i holo hou mai ai ke kapena a me kona moku.  O ke kumu paha o keia hoopii, ua kuleana ole ko lakou laweia ana mai nei aku.

 

            Ua ku mai i kakahiaka La Pule nei ka mokukaua Beriania Nymphe (Nimipe), mai Sanatiago, Kili, A. H., iloko o 13 la holo.

 

MANAO BERITANIA.

Ahewa Oolea ia Elua Aupuni a me ka Nele hoi o ka Pono.

 

            Malalo iho e ike ai ko makou poe makamaka heluhelu i ka makamua loa o na manao oolea mai ka aoao Beritania mai, e pili ana no ke ala kipi ana iho nei a ka lahui, i hoopukaia ma ke ano manaopepa a manao-alakai no ka nupepa Telegarapa o Ladana, a i hoolahaia i ke kakahiaka o Feberuari 26 i hala aku la, e olelo ana:

            "E lilo no ka nanaina i mea e hookunaua a e hoohilahila ai hoi i ke ao malamalama.  Ua komo hamama aku o Peresidena Harisona iloko o na epa ana a na powa kopaa, a ua aa ole hoi o Mr. Kalivilana e holoi ae i kona mau lima mai ka ekaeka lapuwale a me ka lokoino a kona hoa Peresidena i hana ai ma Honolulu.

            "Ua wahapaa aku na mokukaua Amerika me na paemoku me he popoki a iole la a ua alo iki wale ae no hoi i mea e hiki ai i na poe powa hoala hoohaunoele ke pakele, ina i hahana loa na mea i hanaia no lakou e poino ai.  No ka mea, aole kapono (kaulike) he hana pono na kekahi mea, a aole loa hoi o Liliuokalani i waiwai a i ikaika kupono paha e hiki ai ke loaa aku ke aloha makamaka ana nona, nolaila, ua hookuu aku o Enelani a me Amerika i keia hewa (karaima) inoino loa e lawelaweia i ka manawa ao malamalama.

            "No na poe a pau loa ke kuleana, koe wale no ka lahuikanaka emi a nawaliwali o na paemoku, e hoohamau i keia mea a e ae aku hoi i na poe piepiele e kukulu ae i aupuni hookamani a oiaio ole, a e hoohaukae aku hoi i ka hae Amerika ma ke amo ana ae maluna iho ona i keia repubalika kamehai.

            "Aole o makou manao ikio e keakea aku ana kekahi mana, aia wale no paho a o Iapana ke loaa iaia he manawa kaawale, eia nae, he mea mamina ka nanaina no ke kulana hoopono Karistiano e mihi iho ai, a he haawina mulemulea hoi no ka mea a na lahui nawaliwali e manoa iho ai e loaa aku ana ia lakou, ke pukeia ae ua pomaikai o na mana naauao."

 

            Hora 10 a. m. keia la e halaai ka Aha Koa, alaila, hoopanee aku no ka manawa.  I keia ahiahi iho hoi e halawai ai ka Ahaolelo Kuikawa.  Ea, nui paha ke koikoi o kulana la.

            Auwina la Poahiku, la 10 nei, ua pepehiia ae he ewalu poe Pake e elua mau luina mau luina manuwa Maleka ma alanui Hotele.  Ua manuheu ole na luina, a poholehole hoi na helehelena o kekahi poe Pake.

            Auwina la o nehinei, ua halawai kekahi haole me ka ulia iaia e holoholo waapa ana iloko nei o ke awa, ma ka palahuli ana o ka waapa a auau wahi kai oia me kona paa lole piha.  Ua ikeia mai e luna o ka Piladelepia, a na kona waapa mahu i holo mai e hoopakele.  I ka huli ana ka, ua hoao ae ua haole la e kau, aka, huli hou no, a ua hoao no a paa ma hope oiai no ka waapa ilalo.