Ka Makaainana, Volume III, Number 3, 25 March 1895 — Page 7

HONOLULU, OAHU, POAKHI, MARAKI 25, 1895. 7

LAUOMI DIHAE;
— KA—
UI I MOHAIIA I KE KOKO
— KA—
NANI I ALANA IA I KA OI O KA PAHIKAUA.

Ka Mea Huna Iloko o ke Kiaha Waina;
Ka Mea Pohihihi i ka Maka o ke Kuikele.
— A O KE—
KEIKI NUMA REDINA
KE
Komo Lima Maka Popoki.

MOKUNA XVI.

Ka hooili ana a ka mea i ike ole i ka hopena—Ekolu kue i ka nui manu—Numaredina e, auhea oe?—Ka hoopai weliweli—Naueue ka aina o ke Ao Olino—Ka liuliu kaua iluna o Laeahi no ka make a me ke ola.

[Hoomauia.]

                Ia manawa i noho iho ai ua keiki la me ka uwe ana no ka poino i loaa iaia a me kona mau kaikuahine, a i ka hope loa o kana uwe ana i poha iho ai he leo ma kona kua i ka i ana mai.
            "Ua poina anei oe, e Numa redina i ka mea a'u i haawi aku ai ia oe? A heaha ka waiwai o kela komo e paa la ma kou manamana lima ina aole oe e hoohana aku iaia?"
            "Owai oe, e ka mea nona keia leo au e lohe nei?"
            "Owau ka mea e kokua nei ia oe ma kou alahele," wahi a ka mea nona ka leo kupaianaha i pane mai ai.
            Aui koke ae la o Numaredina a nana ae la i ka mea nona ua leo la a ike aku la ia ma ke kua he kanaka eleele, aole hoi i huli mai kona alo imua ona. Hoomaopopo koke iho la oia, aole kela he mea okoa, aka, o kona kaikaina no ka mea nana i hoopuehu liilii i ka mokupuni Si sili a lilo i mea ole.
            "Owai kau e kamailio nei?" i ninau mai ai o Rahe Biama i ke keikialii.
            "He malihini kipa mai iloko o keia hale," wahi ana i pane aku ai.
            He manawa ole nakeke mai ana na mea hana iloko o ua hale la, a loheia aku la ka owe mai o na lako kaua, me he la, aia he kaua nui ke hooiliia ana maloko o na paia o ua hale la a na kamahele e noho pio ana.
            Komo ae la na manao hopohopo iloko o ua poe kamahele la no ka make e hookokoke mai la imua o lakou. Aka nae, aole loa pela; no ka mea, o ia mau mea a lakou e lohe la i ka owe mai iloko o ka hale me he nakeke ana na ka mea kaua, o ko lakou mau kiai hoopakele no ia o ka hele'na mai, mai ka aina mai o Siama.
            Ae, o kela nakeke a ua poe kamahele la i lohe ai, o ka wahine holo waapa no ia o ka muliwai o Mu zine, e paio ana me ke kiai hookahi o ua hale la, ka mea i pakele mai ka make o kela hooili kaua iluna o Laeahi.
            I ka manawa o ua kilokila nei e paio ana me ke kiai, ua hanee mai la kekahi paia o ua hale la, a o ia ka nakeke a na pio i lohe ai i na minute mamua iho a lakou hoi i kuhihewa ai o ko lakou make ia, aka, aole nae pela.
            Ua paio aku ke kilokilo me ke kiai kupua o ua hale la a hiki i ka lanakila ana, a o ia kona manawa i hoomaka ai e huli me ka nana hele ana ma na rumi a pau, a i ka hope loa no hoi o na rumi i kahea aku ai oia me ka leo o ka mea i piha i ke kaumaha:
            "E Numaredina, auhea oe!"
            "Eia no au maanei e noho nei, aole e hiki ia'u ke oni ae; no ka mea, ua paa ko'u mau wawae i ka umii a na kaulahao weliweli a ke kupua o keia aina."
            "Hoomanawanui, e kuu keiki, aole ae nei oia i keia wa. Ua pau kona ola a ua ukali aku la oia i na anela o ka po ma kela ao. Eia au ke hele aku la e hoopakele ia oe a me ou mau kaikuahine," wahi a ka wahine kilokilo i pane mai ai iaia.
                I keia manawa a ka wahine e kamailio ana, o ia no ka wa o ke kanaka eleele i wehe ae ai i na kaulahao e paa la ma na wawae o kona kaikuaana, a hooku ae la iaia iluna. Pane aku la nae kona kaikuaana iaia:
            "Aole anei e loaa mai i mau mea-ai na'u a me o'u mau pokii"
            "Aia no ia oe na mea a pau, nolaila, e hoohana aku i kela mea e paa la ma kou manamana lima, a e loaa koke no ka mea-ai ia oukou i ka manawa pokole." A kuli ae la ua kanaka eleele la a hele aku la me ka ike ole ia o kana wahi i hele aku ai.

            Ua manaoia e holo aku ana o Bihopa Gulekana no Europa i na la hope o Aperila ae nei.
            Ua hoao kekahi haole, o Kapena Hila, e holo mahuka aku ma ke ano aihue me ka mokumahu Waimanalo i Feberuari 22 i hala. Ua ae oia i kona hewa imua o ka Aha Apana i ka Poakahi, la 11 nei, a ua waihoia aku kona hihia no keia kau kiure ae. Eia oia mawaho e hele nei me ka bona ole, oiai, ua aeia oia e haalele mai i keia aina, nolaila, aia no me ia kona pakele.

Kaauhelemoa.

                He wahi kaulana keia e waiho nei a hiki i keia la ma ke kukulu akau-hikina o ke awawa o Palolo, a e pohaiia ana e ka ohu o na pali i ka hapanui o ka manawa a puni ka makahiki. Ma ka moolelo kahiko o Hawaii nei, ua oleloia, he moho moa kupua hoohakaka ko ia wahi, a ua oleloia oia, he moa-kanaka a he kanaka-moa. He oia mau no hoi kona kulana lanakila imua o kona mau hoa paio a pau e ku aku ana imua o kona alo; aka, he manawa ma ia hope mai, ua hoea aku la he moho moa mai Molokai mai (?), he wahi moa kupua pananaiki wale no oia, a nana i hoopuhili i ka ikaika o Kaauhelemoa ma o kona komo kino maoli ana iloko o ke kino o Kaauhelemoa, a hoomaka iho la e nalinali me kona nuku, a i ka puka ana ae iwaho, ua ku apilikia o Kaauhelemoa, a lele aku la oia ma keia wahi i hoikeia ae la a lu ae la i kona mau hulu ma o a maanei, a ke ulu nei malaila kekahi mea ulu i ano like loa me ka hulu o ka moa a hiki i keia la, i loaa ole hoi ma na wahi e ae o Hawaii nei. He kiowai nui malaila, a ke ulu nei he mau ano kalo like ole malaila a hiki i keia la.
            I keia hoala kaua hope loa ana iho nei a Wilikoki ma, ua loaa aku la oia me kona mau hoa ma keia wahi i ka poe auhee e noho ana, a o ke kalo no hoi ka ai, a o ka bipi no hoi o ke kuahiwi ka ia i hoehuia i ka poka.
            He kulana kilakila ko keia wahi i ka wa malaelae, a he mau hiohiona hoanoano i ka wa e kahikoia mai ana e ka ohu. He keha kau iluna me he mau mala lewalewa la i kauia i ka lewaalani e lei mau ana i na huna wai olino o ke anuenue.
IAKA.

            He kaikamahine hapa-Pake ka i hele aku i ka lawaia limu i kahakai o Honokaa, Hawaii, i kahi mau la o kela mau pule aku nei, a poiia e ka nalu a lilo. Ua kiiia aku oia maluna o ka waa a hoihoiia mai i kula a aole i liuliu mahope iho make loa aku la.
            Ma ka Poalima, Feberuari 22, ua a'e ia iho la he wahi keiki Pukiki e ke kaa holoholo lealea, e kalaiwa ia ana e elua mau opio ako lauoho, a ua eha loa. E ku ana kela keiki uuku ma ka pili pa i ke kahua kinipopo hou i ka wa a ka lio me ke kaa e holonui mai ana a hookui me ia, pii aku la na huila ma ke poo a moku ka papalina.
            Poakolu, la 13 nei, imua o ka Aha Apana, i ahewa a hoopaiia ai o Aloi, Pake, no ke komo kolohe ana iloko o ka hale o kekahi Kepani ma alanui Maunakea aenei i ka po o Dekemaba 26 i hala, a makou no hoi i hoike mua aku ai. No eha malama oia e noho hou ai ia Kawa, he kamaaina no no ia home. Hookahi no paha malama i hemo mua ai a paa ai i ka hopu hou ia no keia hewa.

E Ao Holo Moana Ana.

                Ma ka mokupea eha kia Kenilwo rth i holo ai no Nu Ioka ma ke ala ae o ka Lae Hao i ka Poalua, la 5 nei, i holo aku ai o Wile Freeth, keiki a Kapena Freeth, Kiaaina o Mokupuni Laisana. A mai Nu Ioka aku e kau aku ai oia ma kekahi o na mokumahu no Livapulu, kahi ana i manao ai mai laila aku oia e kau ai maluna o ka mokukaua ao holo moana Conway o Beritania, no elua makahiki, no ke ao ana ma ia hana. O keia no ka moku hookahi i ao ai kona makuakane i ka oihana holo moana. He 14 wale no ka nui o kona mau makahiki, a he wahi oiwi iki hoi no kakou.

            Ua hoopauia mai ko C. A. Heffernan (Hefenana) noho ana ma ke ano wiliki no ka Halewai. Ua hookiekieia ae hoi o G. Hama i alii makai kuikawa, a o Geo. Sea i kakauolelo hoopaa lawehala. Ua hooliloia o Kanae i Kapena no ka Wati Ekahi.
            O Young Hee (Iana Hi) kekahi o na Pake kuonoono o Wailuku, Maui, ua hopuia mai nei oia no ke kipe i na makai. Ua huliia aku kona hale noho a ua loaa he 65 mau tini opiuma a me 25 mau ipu ha'uha'u. O na Pake elua i hopuia ai me ia ua hookolokoloia, ahewaia a hoopaiia he $250 pakahi.
            He aneane e 4,000 tona kopaa ka nui a ka mokupea Kenilworth i lawe aku ai no Nu Ioka, ma ke ala ae o ka Lae Hao, i ka Poalua, la 5 nei. O keia ka mokupea nui mua loa nana i lawe aku kela heluna kopaa nui no ka hikina loa mai ka hui aku o Iwini Ma, a i hooiliia aku nei hoi i ka Hui Hoomaemae Kopaa o ke Komohana.

E. M. NAKUINA.
KOMI SINA O NA ALA LIILII A ME NA PONO WAI.

No tari Lehulehu, a he Agena Haawi Palapala Ae Mare no Honolulu nei. KEENA HANA: Helu 308, Alanui Kalepa. dk 3—1mk.

J. K. KAHOOKANO.

LOIO a he Kokua ma ke Kanawai. KEENA HANA: Alanui Kaahumanu, Honolulu. ian 8, '94-1mk

HEN RY WATERHOUSE,
[Hanale Walakahauki.]

KEENA: Alanui Moiwahine, Honolulu. KOMI SINA KALEPA, Agena no ka Ahahui Panihakahaka Uniona, Ladana. HOOPUKAPUKA MA NA WAIWAI PAA. Ua makaukau au e lawelawe i na ano hana a pau e haawiia mai ana na'u e hana, a ua oluolu au e noho agena aku no na poe a pau e makemake mai ana. O na kukai palapala pili oihana e lawelaweia no me ka eleu. mar 18-4mnw

KAUKA YONG KAM PUNG,
[APANA.]

KAUKA LOEA O KA AINA PUA. Helu 306 - - - Alanui Ho tele.

Ua hiki ke hoolaia na ano ma'i a pau, o na kane, wahine a me na keiki liilii. Pela me na ma'i ha-no, akepau, eha ma ka puuwai, ka ma'i korela, hebera, fiva lenalena, puupuu ulalii, koko ino, a me kekahi mau ano ma'i e ae. Ua hiki ke haawi i laau hoohanau keiki, a pela aku. He oluolu loa ka uku. E naue mai i ike pono. Oluolu na kuka ana. mar 18-1m