Ka Makaainana, Volume III, Number 5, 8 April 1895 — Page 8

Ka Makaainana.

 

6          HONOLULU, OAHU, POAKAHI, APERILA 9, 1895.

 

KELA A ME KEIA.

 

            Na ka hui kinipopo Sa@a Lui ke eo o kakahiaka Poano nei ma ka hui Aloha, he 21 kue ia 7 puni.

            He luina ka i hookolokoloia iluna o ka Piladelepia i ka Poakula iho la no ka hoeha ana i ke kamana.

            Ua haule ka hoopii kue a Bila Kamaki ia Niau Iaukea imua o ka Aha Kiekie i ka Poalua iho la.

            Ke waiho a mai la o Kale Kalaikona ma Kapalakiko, ua loaa i ke ehu o ke garipa a me ka fiva taifoida.

            Eono inina o ka Pilapelepia i hoi aku ma ka Alameda, no ka pau o ko lakou manawa hana maluna o ia moku.

            Aole i lele paikau mai na koa o ka Pilapelepia i kakahiaka Poalua iho la, aka, ua lele nui mai nae i kakahiaka Poaha nei.

            Ua huli hoi aku no Iapana ma ke Kina o ka Poakula iho la, o G. O. Nakaiama, ka agena limahana o na Iapana maanei. 

            Ua paneeia mai maluna o ko makou pakaukau ka buke moolelo o ke kaua kuloko o 1895 nei i noho lunahooponoponoia e Kamaki.  Mahalo!

            Kauluwela na hale Kepani o ke alanui Maunakea i ka po Poakahi iho la me na hae a me na ipukukui like ole.  Pela no mai ke ao okoa mai.

            Ua lonoia ae e wehe aha mele ana maloko o ka luakini o Kaumakapili i keia po Poaha iho, la 11, e ka Puali Puhiole Lahui no ka pomaikai o ka Puali o ke Aloha.

            Elua mau kaa kahu ole i laweia aku no ka Halewai e ka makai, i kakahiaka Poaha iho la.  No ka waiho keahema mai ke kumu aole he hoopaa me ke kaula.

            Ekolu mau waapa heihei a ka Alameda i lawe mai nei mai Kikane mai no na hui heihei waapa o kakou nei.  Ua papiliia keia mau waapa mai na laau kedera mai o Sepania.

            Ua ku mai ka Alameda i kakahiaka Poaha nei mai ka ka Hema mai.  Hora 4 iho no o ia ahiahi i holo loa aku ai no Kapalakiko me na ohua he nui mai keia awa aku.

            Po Poalua iho nei, ua laweia ae no ka Halewai kekahi mau keiki kiai o Wakinekona, i hookuu nui ia iho nei mai Kawa mai, no ka hoohiki aku malalo o keia Aupuni.  Aole lakou i ae e hoohiki.

            Ma Kaletona, Maine, iloko aku nei o Maraki 12, 1895, ua hoohuiia iho la o Rev. John Hamiletona Higina (Higgins) me Misasa Elena Have Makale, wahine a Lunakanawai Makale, i make he ekolu makahiki ae nei i hala.

            I keia la e ku mai ai ka Auseteralia, a maluna mai ona e hoi mai ai o Wile Kini i holo aku nei e hoopala maia ma ka aoao o ke Aupuni.  E hoihoi pu ia mai ana maluna o na ke kino kupapau o loio A. P. Pitasona.

            E nana ae i na hoolaha hou e puka aku nei ma ko makou helu o keia la, hookahi na ko makou puuku, he pili no kana hana e lawelawe ana, a he hookahi no ka halekuai lole nui o Kukima e ku nei ma alanui Nuuana, halepohaku o Paiko.

             Kakahiaka Poaha nei i pae mai ai he 735 poe eemoku Pukiki hou, a Kakina i kii aku nei, a eia nui i kai o Kahakaaulana.

            Paona, Maraki 30, i make ai ka bebe hou loa o 3 mahina a me na la keu a J. Kahalekauwila.  La Pule ae i nalo aku ai ma ka ilina o Koula.

            Ua noi ae ka hui kinipopo o ka Kula Kamehameha e komo iloko o ka Ahahui Nui, i ka Poakula iho nae e akaka ai ko lakou aeia.

            Ua lonoia aia ke Alii ka Moi o Beritania Nui ke waiho mai kupilikii la, a ua olelo wale ia ke hoea mai ka lono ua hala aku oia ma kela ao.

            Poalima nei i hookuuia mai ai na eemoku Pake i hoea mai ai ma ka Peru, he 600 a oi, mai ka noho hoomaluna makai o Kahakaaulana.

            Auwina la Poaha nei i malama ia ai ka aha ike mau a Kuhina a me Misasa Wiisis, a ua lehulehu no na poe i hele ae.  Na ka bana o ka Piladelepia i hoolaulea ae.

            E haalele ma@ ana o Kauka Goto ia kakou no Iapana, kona home, ma ka mokumahu Copetica o ka la 30 ae, oiai, ua paukona manawa i aelike ai me ke Aupuni.

            He la hoomanao ka Poaha iho la no na poe make o na Pake a ia la i hoohiwahiwa nui ae ai i na ilina o Pauoa me Manoa me na puaa moa a me na meaai o na ano e ae.

            Luhiehu ka Piladelepia i na hae like ole i ke ao a me ka po Poakolu iho la, no ka aha hookipa ike a ka Adimerala i kona K@hi@a, a ua lehulehu no na poe i hiki aku e laulea pu.

            Ua loaa mai nei ka lono ia makou ua make o S. Kekumano, l@aui o S. Lui Kekumano, ma Napoopoo, Kona Hema, Hawaii, i ka Poalua, la 2 nei, i ke 48 ona makahiki.  Aloha no ia makamaka.

            Ua palapala mai nei o S. Fujii kanikela kenerala no Iapana maanei mamua aku nei, aole pana oia e huli hoi hou mai ana no Hawaii nei, no ka mea, aia oia ke lawelawe oihana la iloko o ke Keena o ko na Aina E.

            Iluna makou o ka Piladelepia i ka auwina la Poaono nei e makaikai ai, ma ke kau akea ia ana o ka moku e ka oluolu o ka Adimerala, o ka pomaikai o ka lehulehu.  A pela ana no ka i kahi la hou aku o keia mua iho.

            Ua hoihoi hou ia aku nei na hihia hoopii auhau e kue ana ia Henry West a me E. Kekoa o Hilo, o ka olelo hooholo lokahi ia a ka Aha Kiekie, a imua o ka Lunakanawai Kaapuni o ka Apana Hookolokolo Eha, ma Hawaii.

            Poaha iho la, la 4, ma Kalaupapa, Molokai, ua haalele mai la i keia ola ana o Lilia Kahalaopuna Kahoohiki i ka 14 o kona mau makahiki ma keia ao.  Na ka ma’i hookaawale ohana i lawe aku iaia a noho ma kela aina.  Ua haalele iho oia he mau makua, na kupuna a me na pokii e paiauma aku nona mahope nei.  Aloha wale oia!

            Poalima iho e hoomaha ai na kula Aupuni a puni ka Paeaina holookoa no elua pule.

            I ka po Poaono nei i haawi ae ai na kaikamahine kula hanai o Kawaiahao he ahamele maloko o ka halepaikau o Haimoeipo.  Ua piha no i na poe i hiki ae e lohe i na leo mele.  No ka pomaikai o ke kula na loaa o ia po, ke laweia ae na hoolilo.

            I mua mai nei o ka Ahaolelo o Kaleponi, mamuli o kekahi koho ana a elua-hapakolu ua hoauheeia kekahi olelo hooholo hoohuiaina me Hawaii nei. Pela pu no ka hoi imua o ka Ahahui Kalepa o Kapalakiko a ua like no ke koho ana me kela la.

            Ua ku mai a holo no i ke awakea ae ka mokumahu Warimu i ka Poalua iho la.  Ia auwina la iho no hoi, hora 3 i hookomo mai ai ke Kina mai Kapalakiko mai, iloko o 7 la holo, a i ka auwina la Poakolu mai i holo loa aku ai no Iapana a me Kina.

            Aperila 1 nei ka la hanau o ke Keikialii Bisimaka o Geremania, ke kuhikuhi puione.  Ua hoomanao ae ke Kanikela Hakafila me kekahi papaaina ia po iho maloko o ke Kalahu Pakipika a ua hiki ae malaila napoe i konoia a ua malamaia a ua hauoli ana a hiki i ka ora 3 o ka wanaao.  Awakea o ia la, ma ke alo iho o ko Hakafila Ma halekuai, Halekauwila, na hoolaulea ae ka bana o ke Aupuni.

            Ahiahi Poaha nei, ua loaa mai la ka lono i ka oihana makai no kekahi elemakule ua make ma ka huina o na alanui Moiwahine a me Hema.  Ua hiki aku o Kapena Sekota malaila a hoihoi mai la i ke kino no ka Halewai.  Wahi a ka oleloia, ua hele aku oia e uwao i ka hakaka mawaena o ke kaikamahine me ke kane haole, kulaiia mai no elua manawa, a ailiili ke aho a make loa.

            He ahahui hoohuiaina ko lalo o Moanalua i kukuluia i ke ahiahi Poalua iho la.  Ua kohoia na luna penei:  C Makalua, peresidena; J Kapali, hope; J K Malao, puuku; Pita Davisi, kakauolelo; Rev D Kapali, Hoohuli, Pomai, Pipi a me J K Malao no komite hooko.  E halawai hou ana paha lakou i ka la apopo no ka noonoo ana i ke kumukanawai a me na rula.  E ahu ana ka pala!

            Ua ku io mai maka Warimu ka Rev Johu Wordsworth, D. D., Bihopa o Salisebure, o ka Poalua iho la.  Aole oia i haiolelo ae maloko o Sana Anaru e like me ka makou i hoike aku ai ma kela helu, mamuli o ka holo koke ana o ka moku.  Ua lilo oia i malihini kiekie na ka Haku Bihopa o Honolulu a ua hoomakaikai hele ia aku oia ma na wahi like ole o ke kulanakauhale nei.  Ma ia moku no oia i holo aku ai no Vanekouwa.

            Ua ai iho me ke kuhihewa ke kekahi poe Kepani mauka ae nei o Kikihale, i ke awakea Poalu iho la, i ka oepuhue me ka manao kuhihewa o he i’a ulaula.  Mahope iho o ia manawa ua ano ma’i iho la lakou, ua kane ekolu, a o ka wahine hoi ka mea i ai nui ole, oia ka mea i ano ahona iki.  Hora 11 o ia la make loa na kane, a koe ka wahine.  Ua hoikeia ka lohe i ka Halewai a ua hoea aku ka Hope Ilamuku e nana pu me kekahi kauka, ua pau nae ka pono.

            E haawiia ana i keia po Poaono ae he aha hoolele kii no ka pomaikai o ka puali puhiohe o ka Panalaau Lepera, a pela no hoi ia Poaono aku, malalo o na lawelawe ana a Kapena Kokerane o na koa malina o ka Piladelepia.  Ua ae ka Adimerala no ke kokua aku o ka bana o ka moku.

            Ma ke Kianu aku nei i hoea mai ai he elua mau Kepani mai Lahaina mai, a mamuli hoi o ka hoohiki ana a kekahi i hopuia kekahi no ka aihue ana he $300 a me ka uwati pakeke dala.  Poakahi i hala i huliia ai ka hale i noho aku ai o ke kolohe a ua loaa aku ka uwati a me kekahi mahele o ke dala.

            Elua mau haole makai Olelo E i hopuia ae a paa e na makai kumau i ka po Poaono nei, no ka nooana ana e ki i ka pu panapana i na makai.  E ole nae hoi kela Maori e noho kia nei ma Kawa paa ai mawaho iho o ka Nekina.  Eia no nae ua mau haole la ke lawelawe nei i ka hana.

            Kakahiaka Poaono nei, hora 9 paha, ma ka hale haawi laau lapaau o ka Papa Ola, ma alanui Moi nei, i haule a make emoole loa ai o J Kahele, hoa haa pu o @ H Wailemi ma ka kaa kikane.  He ma’i ma ka puuwai ke kumu o keia poino.  Na ke Aupuni oia i kanu mauka o Makiki, a na Kapena Poo Paka i pule, no ka hoea koke ole aku o ka ohana.

            Ua pau i ka hopuhopuia i ka po Poakolu iho la, he 13 mau wahine Kepani hookamakama, e na makai kaulio Kodesa a me Kairera, ma alanui Maunakea a me Nuuanu a laweia no ka Halewai.  Imua o ka Aha Apana i ka Poaha nei, ua hoopaiia he 12 mau wahine ma ka $10 pakahi me na koina.  I hewa nui i ka hopu ana o kekahi ia Palani Kaimona ma alanui Nuuanu me ke kaualupe e komo maloko e hanai ai ai a hewa ae ka waha, a nana hoi i hoike aku keia ano bana ma ka Halewai.  Ua eleu no Hu no hei e ka aka.

            Eia i o kakou ne ke Keikialii Farani Iosepa o Batenabuga, ma ka Alameda mai o ka Poaha iho la.  Ua holo makaikai ae nei oia ia Austeralia a me Nukilani a hoohiki loa mai la ianei.  E makaikai ana oia i ko kakou mau kaiaulu nei mamua o kona hoohiki loa ana aku i ka home.  He kaikuaana oia no ke kane a ke kaikamahine muli a Vitoria.  He alii@ a konela o ka puali kiai kino mahele 2 o Enelani a me ka kauwa kekahi i ukali mai nei iaia.  I ka pule ae oia i ke awakea o nehinei ma ka luakini o Sana Anaru.

Ahahui Kokua Manawalea o

Honolulu.

 

            Ke hoikeia aku nei ka lohe i na mea a pau, o ka ahahui nona ka inoa maluna ae, na kukuluia no ka imi ana i na kokua mai ka lehulehu mai no na ohana pilikia o na pio kalaiaina i hoopaahaoia.  E hoouna mai i na kokua ma ka lima o J K Kauli@, ke kakauolelo.

            Mrs AIMA NAWAHI,

            Apl 8 tf                       Peresidena.

 

Ahahui Kokua Manawalea.

 

            Ke konoia aku nei na Ahahui Aloha aina a pau o ka Paeaina i l@lo i mau lala no ka Ahahui Kuwaena o Honolulu e lulu iho i mau lau olive o ke aloha no ke kokua ana i na ohana hune o na pio kalaiaina, hoouna mai ia.

            J K KAULIA

Kakauolelo Nui o ka A.A.A. Kuwaena.

            Apl 8 tf