Ka Makaainana, Volume III, Number 10, 13 May 1895 — Page 3
HONOLULU, OAHU, POAKAHI, MEI 13, 1895. 3
ENAENA KA OIAIO
-
Mau Hoakaka no "Ka Mana Misionari ma Hawaii."
[Hoomauia mai ka helu 9 mai]
"Me ka oeoe ooi ia hoi e ka like ole o kana kumu hoohalike i hana ai, ua hoolaha akea ae ka mikanele hookahi i koe e noho la, he agena i ikeia a ke ukuia nei o ka Papa Amerika, i na manao hakuepa lapuwale loa e kue ana ia Makua Damiena. Ua olelo ae oia he pelapela ka o Makua Damiena. E nui ana la hoi ka maikai a na mikanele e hana ai iwaena o ka lahui i hookaumahaia a i hoohaahaaia kulana ina lakou e hookaawale aku ana ia lakou iho mai na poe i ekaeka! a hooakahele anei hoi na Aposetole aole e hoopa aku i na lima lepo a noho anai aku paha i na aahu ekaeka o ka lakou poe mua loa i hoohulihuli nui ai?
"Ua kuhi aku oia i ka makua maikai no na hana hoohaumia. Aka, aia ka haumia iloko o ka waha o ka mikanele Kalavina, aole loa hoi iloko o ke ola ana o ka mikanele Katolika, a malalo hoi o ka hooweliweli ana o ka huaiia ae a me ka hoopai kanawai ia ua emio pee iho la oia mai kana i olelo hoahewa ai. Eia nae, mahope iho o kona hoohaahaa ana iaia iho iloko o na maka o kela a me keia kanaka hoopono, ke noho la no oia, ina hoi na pololei ka mea i hoikeia mai ia'u, he agena i uku maikai ia, i hoonohoia iloko o ka hale maikai, i malama pono loa ia no ka Papa Amerika ma Hawaii. Oia nae hoi, he hoohuiaina pumehana welawela loa oia.
"A ano, o keia poe kanaka no ka i kue mai me na haneri a me na tausani me ka inaina o ke ano haipule, o kue ana hoi i na Mokuaina o ka Hema no ko lakou kaili kaokoa loa ana ae i na pono kulana makaainana o na negero o ka Hema, he poe hoi ma ka olelo mihi maoli ana no a ko lakou poe kanaka maikai loa ua emi loa iho ke kulana noho pono, e like hoi me ka mea a na mikanele Hawaii, a hiki mai hoi i keia wa iho la, i kaena nui ai o ia ka loina hookahi o ka lakou poo i hoohulihuli ai, na piha loa ia hoi lakou me ka hauoli, me ke ano kakana a kahakahania ku i ka awaawa, no ka mea i kapaia o ka repubalika Hawaii.
"He repubalika io no paha hoi, i hiki ole i kekahi kanaka ke koho balota aia a ua loaa iaia ka waiwai i like aku me ka mea e paaia ana ma Burukeline o $5,000, a i hiki ole hoi i kekahi kanaka ke koho no kekahi Senatoa i loaa ole iaia ka $3,000 ma ka waiwai io, a i like hoi me $20,000 ma Burukeline.
"Aka, me keia hoohaikiia no o ka pono koho, ua makau ko kakou poe mikanele repubalika ke hilinai aku i ko lakou poe koho repubalika. Nolaila, aole no lakou i makemake e ae aku i ka lahui, malalo o kekahi ano o na kaupalena ana, e koho aku i ka Peresidena, aka, i ka hoomalu ana aku hoi keia i ka Ahaelele Hana Kumukanawai, ua hookohu (hoonoho) aku lakou ia Misita Kole i Peresidena, e paa i ka oihana no eono makahiki, a e like aku no hoi ka loihi iki aku me ka hiki lea ole i ka Aha Senate a me ka Aha Lahui ke aelike aku no kekahi hope, a ia wa no hoi na kaupalenaia aku ka makemake i na poe o kupono loa ana i ka makemake o kekahi hapanui o ka Aha Senate, e kohoia aku ana hoi o aneane paha e 200 o na poe kanaka waiwai loa o na paemoku.
"Aole no hoi lakou i hooki iho maanei. Ua hooholo lakou i na kanawai e hoopai koikoi loa ana i kekahi mea i aa ae e kamailio ano pono ole no kekahi o ko lakou poe kiekie loa. A kekahi mea, ina paha he oiwi a he Amerika paha, e aa ana e olelo ae aole keia aupuni repubalika he ano repubalika, a i ole ia, ua kupono ole paha noi kekahi o na keiki a na mikanele e manao ana e hoomalu aku i na poe Karisitiano pegana o Hawaii no kona kulana oihana, e ku no oia i kekahi manawa hoopaahao loihi ia a me kekahi hoopai dala kaumaha ana.
[Aole i pau.]
-
Elua mau Pake i hoopaiia imua o ka Aha Apana i ka Poakahi i hala, he $100 pakahi no ka malama opiuma.
I ka Poakahi i hala no ka hele ole o hoike imua o ke kauka ma ka Halemai Moiwahine, ua hoopaiia he wahine o Ane, no 30 la hoopaahao ma Kawa e ka Lunakanawai Apana.
I ka Poakahi, Aperila 29 i laweia mai ai no Honolulu e elua mau kanaka me ka makai ka ekolu o na luina mahuka o ka mokupea hao J C Galade mai Kaneohe mai. O kekahi mau luina elua i kai o Kakaako kahi i paa ai i ka hopuia i ka po Poalima aku.
Aia ma alanui Maunakea, kokoke ia alanui Beritania, he hale keaka Kepani. E ikeia no ia wahi o na hae lole waihooluu loloa e kuuwelu ana i ka makani. Na kekahi Kepani me kekahi pahu e hookani ai, a e paa ana he laau ohe loihi me kalepa e welo ana me na huapalapala, oia ka hoike a me ka hoolaha no ka hana keaka. Aole ka i holopono loa na hoohanaia ana iho nei, nolaila, ua hoopau a paniia.
Kau Kinipopo o 1895.
O ka Hoku a me Ikeoleia na hui na laua i wehe mua keia kau kinipopo i ka auwina la Poaono, la 4 nei. Aole no i ano laukanaka loa o waho i na poe makaikai, aka, ua lilo no nae i mea anoi nui ia ka laua mau paani ana. Malalo iho e ikeia ai na ai puni a laua i kela a me keia komo ana:
1 2 3 4 5 6 7 8 9
Hoku 0 | 0 | 2 | 0 | 3 | 0 | 0 | 1 | 0
Ikeoleia 1 | 4 | 0 | 1 | 0 | 0 | 0 | 0 | 1
Nui ka hoopaapaa o na poe paani o ka Hoku iloko o ka wa e paani ana, mamuli o ka Hanale Kaia olelo hooholo e pili ana i na keiki holo o na pahu, a i ka wa i ui aku ai na poe paani ia Hale Wini, ka lunakanawai, ua aponoia aku la ka Hanale Kaia mea i hana ai.
Aole i paani ae o Aiwohi, mea hopu popo o ka hui Ikeoleia, mamuli o ka eha ana o kona maka i ka popo ia kakahiaka, oiai oia e noho ana ma ke ano lunakanawai no na hui Sana Lui a me Kula Alii. Ua pehu a uli me ka hele a wai o ke koko ma kona maka. O ke keiki o ka pahu ekolu, ua ehaia kona wawae a aole oia i paani, he mea okoa ma kona wahi.
Na Aukai Kamikana ka holo ai puni mua loa i hanaia i keia kau kinipopo.
-
Maluna mai o ka Mariposa o ka la 2 nei, mai Kikane mai, i loaa mai ai ia Hale Wini he iwakalua mau manuku i mea hoolaha maanei. Ia la no i hookuu nui ia aku ai iuka o Luakaha.
Ua lawe mai ka Mikahala i ka la 23 aku nei o Aperila i kekahi mau pono o ka moku poino Pele e lana hele ana i ke kai. A ua nee ka moku he hapalua mile ka mamao mai kahi i ili ai.
Ma ka Iwalani o ko kakahi aka Poaha, la 2 nei, i laweia mai ai he lio ulaula maikai o ka nanaina no Hale Daimana, a i ke kula hanai holoholona o Wili Laiki kani i hookuuia ai Ma ka Mariposa no o ia la i hoouna loa ia aku ai no Kapalakiko.
Imua o ka Aha Apana i kakahiaka Poalima, la 3 nei, ua hookauluaia ke kau ana i ka hoopai maluna o G Apiki, no ka lawe i ka mea make, he pu panapana. Pela no hoi o Hana Naehu, hoolohe ole i ke ao a ka makua, ae i ka hewa a hookauluaia ka hoopai.
Ua lawe aihue ia aku mai ke kalaiwa o ke kaa basa o alanui Nuuanu i ke ahiahi o ka la 29 o Aperila, he $10. O ka hookomo ana aku no ia o ko kalaiwa i ke dala iloko o ka pahu a hele, a iaia i hoi aku ai ua lilo na dala. Ua hoohuoi koko ia o Daniela Paahao, oiai, oia hookahi ka mea i ike i kahi i waiho ai o ke dala, a ua hopu koke ia oia i ke kakahiaka ana ae e D Kaapa me ka ona no iuka o Nuuanu, ma kahi hoolulu o ke kaa. Ua loaa aku ma kona eke ne $2.50. He ekolu mau keiki Pake, i make ma Kahakaaulana i kekahi la o kela pule aku nei, he poe keiki no na kekahi o na poe limahana. Hookahi o lakou ekolu mahina ka nui a o kekhi eiwa mahina I ka wa i make ai ua hookomo koke ia iloko o ke ie a waiho wale ia aku la no iwaho o ka-hale a ao ka po I ka wa i loaa ai ka lohe i ka Papa Ola no keia mea, ua kauoha kokeia he ekolu mau pahu kupapau no lakou a kanuia no iloko o ia kahua hoomalu ma kahi i hookaawaleia.
-
KALAHIKI,
HALEKUAI LAHUI.
Helu - Alanui Moi, keena hana mua o ka Hawaii Holomua.
E weheia ana ka halekuai maluna ae i ka POAONO, MEI 11, 1895, a malaila e loaa ai na waiwai a me na lole hou loa o na ano a pau, no na kumukuai emi loa mamua o na wahi e ae.
Aohe hewa ke kipa mua mai a e ikemaka mamua o ka hele ana i na halekuai e ae.
M. PALAU,
mei 6 - 3ml Luna Hoohana.
-
Ahahui Kokua Manawalea o
Honolulu.
Ke hoikeia aku nei ka lohe i na mea a pau, o ka ahahui nona ka inoa maluna ae, ua kukuluia no ka imi ana i na kokua mai ka lehulehu mai no na ohana pilikia o na pio kalaaina i hoopaahaoia. E hoouna mai i na kokua ma ka lima o J K Kaulia, ke kakauolelo.
MRS AIMA NAWAHI,
apl 8 tf Peresidena.
-
Ahahui Kokua Manawalea.
Ke konoia aku nei na Ahahui Aloha aina a pau o na Paeaina i lilo i mau lala no ke Ahahui Kuwaena o Honolulu, e lulu iho i mau lau oliva o ke aloha no ke koku ana i noohonohune o na pio kalaia na a hoouna ia i ia.
J K KAULIA,
Kakauolelo Nui o ka A.A.A. Kuwaena.
apl 8-tf
-
E.M. NAKUINA.
KOMISINA O NA ALA LIILII A ME
NA PONO WAI.
Notari Lehulehu, a he Agena Haawi Palapala Ae Mare no Honolulu nei.
KEENA HANA: Helu 308, Alanui Kalepa. dk 3-1mk.
-
Hoolaha Hooko Moraki a me
ke Kuai.
Ke hoolahaia aku nei ma keia mamuli o kekahi mana kuai i ho keia maloko o kekahi moraki i hanaia i ka la 21 o IANUARI, M.H. 1887, e D. KAPOI, o Waihee, Mokupuni o Maui, a me J M KAMAWAE o Honuaula, Maui i olelo mua ia, ia Hawaiian Commercial and Sugar Company., he hui i hoohuiia, a kopeia ma ke keena o ka Luna Kakau Kope Aupuni maloko o ka Buke 113, ma na aoao 141 me 142, ke manao nei ka Hawaiian Commercial and Sugar Company., e hooko aku i ka moraki i ole oia no kekahi uhaki ana o na kumu i ho kakaia ma ka moraki i oleloia, oia ho i ka hookaa ole ia o ke kumupaa a me ka ukupanee ke hiki i ka manwa.
Ke hoolahaia aku nei no hoi ma keia e hoolilo ia aku ana na aina, na pono me na pomaikai a pau i hoikeia a i, hoakakaia ma ka moraki i oleloia ma ke kuai kudala akea, ma ke keena kudala o George Hons ma Wailuku, Maui, ma ka POALIMA, ka la 31 o MEI, M.H. 1895, ma ka hora 12 o ke awakea o ka la i oleloia.
Eia iho ka hoakakaia ana o ka waiwai ma ua moraki la, penei:
1 - O kela mau wahi a pau loa i hoakakaia maloko o ka Palapala Sila Nui Helu 1424, ia Kapoi i oleloia, e loaa ana he ili o 32 1-10 eka ma Honuaula, Maui.
2 - O kela mau wahi a pau loa i hoakakaia ma ka Palapala Sila Nui Helu 2199 ia Kapo i oleloia, e loaa ana he ili o 21 56-100 eka ma Honuaula, Maui.
3 - O ka pono, kuleana a pomaikai a pau loa o Kapoi i oleloia iloko o hookahi-hapalua i mahele ole ia iloko o na aina i hoakakaia ma ka Palapala Sila Nui Helu 6721 Kuleana 2655 no Palulu a i lilo mai ia Kapoi i oleloia mai ia Kalalea w ma ka palapala hoolilo i hanaia i Feberuari 15, M.H. 1877, a kopeia ma ka Buke 49, ma na aoao 350 me 351.
4 - O ka pono, kuleana a pomaikai a pau loa o J M Kamawae i oleloia iloko o kela apana aina i hoakakaia ma ka Palapala Sila Nui Helu 2620 no Keokalani, e loaa ana he ili o 53 36-100 eka ma Honuaula, Maui, a o ia no hoi ka aina i lilo mai ia Kamawae i oleloia ma o ka palapala kuai mai ia S.D.H. Kanuha, i kopeia ma ka Buke 84, aoao 326.
HAWAIIAN COMMERCIAL ANA SUGAR COMPANY.
Kuike na kumu. Ma ka aoao o ka mea kuai ka lilo no na palapala.
No na mea hou aku i koe, e ninau ia
JOHN RICHARDSON,
Loio no Hawaiian Commercial and Sugar Company, a i ole, ia
GEORGE HONS,
Luna Kudala.
Wailuku, Maui, Mei 4, 1895.
mei 6-4pl