Ka Makaainana, Volume III, Number 10, 13 May 1895 — Page 7
HONOLULU, OAHU, POAKAHI, MEI 13, 1895. 7
NA AINA MAMAO.
-
Na Lono Huikau mai na Wahi
Like Ole mai o ke Ao nei.
-
Aohe Ae Nicaragua ia Beritania Nui.
Iloko o na poai Pelekane i maopopo lea o Ladana, o Aperila 26 nei, i oleloia ae ai aole i hoololi a hoano e ia ae kela palapala koi hope loa a Beritania Nui ia Nicaragua, aole no hoi i uweaoleloia aku o Adimerala Kiwinikona e hooloihi aku i ka manawa i aeia ai no Nicaragua e uku ai i kela koi poho o $75,000 maloko mai o ka manawa i koiia, a ma kahi hoi o na lono maopopo lea ole ua manaoioia ua lawe ae la ka Adimerala a noho aku la ma Corinito. Ua hilinaiia no hoi malaila aole loa ke Aupuni o Nicaragua e ae aku ana i na koi a Beritania Nui aia no a hookokono maoli ia aku no e hana ae pela i hiki ai hoi ke loaa wahi kahua e paa iho ai i ka oihana mai ka onou okoa ia aku e haalele mai.
Nee ke Aupuni a Panikuia ke Awa.
Aperila 27 i loheia aku ai ma Wasinetona ka wa ka mahope iho o ka pae ana aku o na koa Beritania ma Corinito, ua haalele iho na luna oihana a me ka lehulehu ia wahi, me ka welo ae o ka hae Pelekane malaila, a me ka hana maalea pu no hoi o na poe Nicaragua o ke kukala ana ae ua panikuia ia awa. Ua nee aku na luna oihana a aia ke Aupuni ma Sana Huana dele Sua, he awa uweaolelo Nicaragua, aneane paha e 125 mile ma ka hema aku o Corinito. Me he la ua manao na poe Nicaragua e puhi ahi ae i na alahaka, ina paha hoi e hoomauia aku ana keia hookikina ana e uku mai, a i ole ia ke makaukau paha e ki poka aku ia uka o ka aina.
I kahi la ae, Aperila 28, ua lonoia ae ma ke Keena o ko na Aina E ma Wasinetona ua ma kaukau loa na mokukaua Beritania e ki poka aku ia Corinito aia a uku koke ia aku kela $75,000. a i ole ia, $77,500 paha ka huina pololei loa. Eia no nae, ua manaoia no malia o ae aku no o Nicaragua e uku ae i kela koi, oiai, ua hooleia aku na kokua mai a na hoahanau repubalika e ae. Nui no hoi ka hopohopoia ina e liuliu ae ana na kanaka maoli o ia aina e amo i na pu, alaila, e nui ana na popilikia e ulu ae ana. Ua hoouna aku o Amerika Huipuia i kekahi mau mokukaua ona e kiai a e kokua ai i na poe ana o ke alawai-oki e hanaia la.
Lawe na Beritania ia Awa Corinito.
No Colona ae ka lono i ka nupepa Makawa-Ahailono o Kikako, Aperila 26 e olelo ana: Ua paniia ke awa o Corinito. Nicaragua. O na mokukaua Beritania ekolu, Roiala Ata, Satelaita a me Nene Ahiu (Waila Sawana), ua kukala ae i kekahi paniku maluhia ia o ke awa. Mahope koke iho o ka waenakonu po i hooleleia aku ai na koa a lawe ae la i ka hale dute. Nui ka pioloke maloko o ia wahi.
A mai Corinito aku no hoi i ka nupepa Honua o Nu Ioka, Aperila 26, ua oleloia ae: Ke paikau mau la ka papukaua. Aohe na Pelekane i lele aku iuka. Ua kauia na pukuniahi ma na wahi kupono no ka liuliu ana no ka lele aku o kekahi pualikoa Pelekane a e hoomaopopoia hoi ke ola a me ka waiwai o na oiwi a me ko na haole pu. Ua ano emi iki mai ka pioloke. Ia la no hoi o Generala Ravasa, i kaulana ma ka Aekai Makika, i hoea aku ai me 800 koa. I ka wa i loheia ai o na kahea paikau i keia kakahiaka, me ka ukaliia ma ka hookuuia ana iho o na waapa mai na mokukaua Beritania, ua manaoioia e na mea a pau o ka wa ia e hoohana io ia mai ai. Na paniia na hale kalepa a puuluulu aku la ka lehulehu ma ka aeone. Eia nae, ua ike wale aku no na poe makaikai i kekahi hookahakaha eleu ana o na moku malalo o ka hoomalu ana a Adimerala Kiwinikona Ua lonoia ae nae hoi i keia wa e loaa aku ana he hooponopono koke ana a o ka haalele aku koe o na moku.
O ka Hoolaulea ka i oleloia.
Ua manaoia e na luina oihana o ke Keena o ko na Aina E ma Wasinetona, Aperila 29, e uku ana no o Nicaragua i kela koi. Aia ke kumuhana o ka hoolaulea ae a me ka haalele loa iho o na Pelekane ia Corinito ke noonoo nui ia la e na luna oihana mawaena o Wasinetona, Ladana a me na luna poo oihana ma Managua, Nicaragua. O na kumu ano nui, peneia iho ia: O ka mua, e uku aku o Nicaragua i $75,000 ma Ladana iloko o elua pule; elua, e haalele iho na pualikoa Beritania ia Corinito me ke kali ole a pau ia mau pule elua; a o ke kolu, i komisina uwao hui no ka noonoo ana i ke kupono a nui hewahewa loa paha o kela koi dala a Beritania Nui, e hoonohoia no ia komisina e like me ka mea e hololea ana ia Amerika Huipuia a me Nicaragua. Ua manaoioia e aeia ana na kumu mamua ae e Peresidena Zelaia a me kona Aha Kuhina, me ka hoomaopopoia ae no hoi na ko Nicaragua aoao ae no keia manao hooponopono.
Makaukau Loa e Uku Koke.
Aia a nui na hoolauwili a hoololoiahili ana, alaila, ae o Nicaragua e uku i L15 500 ma Ladana iloko o 15 la mahope iho o ka haalele ana aku o na mokukaua Pelekane, a ua hoikeia ae keia lono ma Managua, Aperila 30, no ko ke Aupuni hooholo ana e ae aku i kela hooponopono ana. Aohe i akaka loa mai ko Beritania aoao ina io paha e ae ana oia e unuhi aku i kona mau mokukaua. Nui nae ka eena a me ka welawela o ka manao iwaena o ka lehulehu o Nicaragua, a he hana nui hoi ia ma ko ke Aupuni aoao e hoomalu a e malama ai i ka maluhia. Ua haawi ae o Nicaragua i na hooia lehulehu i kupono loa no ka hookaa ana i kela koi iloko o ka manawa hou ana i noi ai, ke haalele io aku hoi na mokukaua, a ua manaolana e ae aku ana no o Beritania, a o ka mea nui e oleloia la i keia wa, ua like no ia me he la na hookaaia a ua pau loa. O keia ae la ka lono hope loa ma Ladana o Mei 1 nei.
Hookahi no repubalika i hooia ae e haawi aku i na kokua ana a kona mau pualikoa ia Nicaragua, oia o Honodurasa, aohe nae hoi i aeia aku. Eia nae, e hauoli na na aupuni hoahanau a pau o Amerika Waena e hoahui aku no ke kue ana ia Beritania Nui. Ke hooikaika la na kuhina o na repubalika o Amerika Waena a pau e noho la ma Ladana a me Wasinetona e pau koke ae keia ano e a e loaa hou ka nohona maluhia. No Amerika Huipuia hoi, aohe ona wahi mea a eueu aku e kokua ia Nicaragua a e kue ae hoi ua Aeko la i ka Liona.
Laulea ole no o Kina me Iapana.
Ma ka la 8 nei i manaoia ai e apono ai o Kina i ke kuikahi o ka maluhia me Iapana, eia nae, ua lonoia ae ma Ladana i ka la 1 nei aia no o Kina ke houlolohi la. Ua huli hoi aku o Li Hana Kana no Pekina, a ua ike i ka Emeperoa, aka, aohe i hoikeia ae na mea i hooholoia, ua malama malu loa ia. Aohe no hoi kukala pili oihana i hoolahaia ae no ka hopena o na kukakuka ana.
Eena ka Bea i ka Aina o ka La Hiki.
No Parisa ka lono o ka la 1 nei e hoike ana i ko Rusia kono ana aku ia Farani a me Geremania e kue lakou i kela kuikahi maluhia mawaena o Kina me Iapana, a e hoikeia aku hoi keia ia Iapana a ke hoomaopopo ole oia, alaila, o ka lawelawe oolea aku no ka hopena ma ka aoao aku o na mana ekolu e kakau ana ia palapala. Ua kaupalena ae o Rusia i ko Iapana wa hope loa e pane aku ai, oia ka la 7 iho nei. Nui ka hopohopo a me ke kualana o na manao. Aohe mea i maopopo, ua weliia na mea a pau loa. Ma ko Iapana aoao hoi, aohe o lakou hopohopo a makau ia Rusia, a ina paha he hoea io ae no ka wa e ulele ai na ai a ka ui he mea maopopo loa e liuliu aku ana no kanaka liilii e kakoo a e hoopakele i ko lakou aina me ko lakou mau ola, i ano like no paha hoi me ka lakou i nana aku ai ia Kina.
Na Hunahuna Laulaha.
Ua hoikeia ae ua oili ae he ahi pele iluna o kekahi mokupuni pohaku uuku ma ka aekai o-Menedosino, Kaleponi.
E hakaka kuikui aku ana o C beta me Fitisimona ma Nu Oleana, aole hoi ma Felorida e like la me ka mea i manao mua ia ai.
No Caracasa, Venezuela, ae ka lono i ka nupepa Honua o Nu Ioka aia ke hoolalaia la kekahi keehina no ka hoohui ae o na aina Latina-Amerika a pau a kue aku i na hookaumaha a hookauhihi wale aku no a na poe Europa.
Ke noke la no ke kipi ma Cuba me ka loaa lanakila ole i kahi a me kahi aoao mamuli o ka nui o ka ua. Ke koi la na poe kipi i kanawai dute oi ae o ka maikai mai ke Aupuni Sepania aku. Ua hoea aku o Kapena Generala Camaposo ma Cuba a aia iaia ka hoomalu a alakai ana o na pualikoa Sepania.
Ua hoike aku ke Kuhina Moana a Kai Lawaia iloko o ko Kanada Hale Ahaolelo Makaainana ua hooiaia ae i ke Aupuni e kokua mai ana ke Aupuni Makua i wahi e loaa ai o kela koi o $425,000, i hooholoia ai o ka huina kupono ia a Amerika Huipuia e uku ae ai i ke poho o na poe pepehi sila o Beritania Columebia.
He palapala no Husetona, Tekasa, ka i olelo ae aia he 1200 poe negero a keu mai Amerika Huipuia aku ke malamaia la ma Mekiko e na poe kiai me na pu, a ke hoohanaia la malaila a oi loa aku ke ino o ka noho kuapaa ana i ko na poe Rukini i kipaku ia no Siberia e hoomanawanui i na inea o ke anu, ka pololi, ka hoehaia, a pela wale aku a nui a lehulehu loa na hana hoomainoino.
-
J.K. KAHOOKANO.
LOIO a he Kokua ma ke Kanawai.
KEENA HANA: Alanui Kaahumanu,
Honolulu. jan 8, '94-1mk
-
HALEKUAI LOLE NUI.
GOO KIM - Alanui Nuuanu
E loaa no na papale wahine ano hou loa maanei, na papale kapu, na lole kalakoa o ua ano ike ole, elua pu no hoi me na lole silka, na lia 1 hi hoonani o na ano like ole, na ka naa aohi mai ke nui a ka liilii no koloka hoopumehana o na la puinaina na huli papale keokeo, ulaula, eleele, a pela aku. Oluolu ke kumu kuai.
E hanaia no na paa lilo kane no ka uku haahaaa. Na papale kapa ano hou loa maanei. Na hai laka silika, mai ke nui o ka liilii. E loaa mau mai ana na lole hou ma na no umahu a pau mai na aina e mai. KUKIMA.
apr 8-4mnw