Ka Makaainana, Volume III, Number 13, 3 June 1895 — Page 2
2 HONOLULU, OAHU, POAKAHI, IUNE 3, 1895.
NA MOKUPUNI.
Mau Lono Huikau mai na Apana Kuwaho mai o keia Aupuni.
Kamahele i ka Mokupuni o Kaululaau, Lanai.
[Hoopau ana.]
Huli ke alo no ka aina mauna, hiki ma Koele i ka hora 12 ponoi. He nani a oluolu keia wahi e nohoia nei e Misita Kikaha; hora 1 P.M. hiki i ka home o ka Lunakanawai, S. Kahoohalahala. Ua loaa mai oia i ke alanui e iho ana no Kaunolu, no ka hana a ka Haku ma ke Sabati ae, o na wale no ma ka hale, o kana wahine ua hele oia, huli akula no ko'u mau hoa i ka ai a me ka ia noho iho la makou paina, pau ka paina ana no Palawai ka ihu. Hoomaha a hora 5 P.M. huli hoi no Kaunolu. He mau wahi maikai maoli no keia e like me Makawao. He kakaikahi na hale e ku ana i o a i anei, pela pu no hoi me kahakai. Ahiahi no hoi hoea hou i ka hale.
Sabati, la 21, no ka luakini o Kahalapalaoa, hora 11 A.M., he hoike Kula Sabati malalo o ka noho Kahukula Sabati ana a A Kealakaa. Eono no haumana. Hoomaka na hana me ka pule a ke kamahele. He 3 kane 3 wahine a na ke kahu na ninau ana, ia Misesa Paa Makai Kealakai na himeni. Maikai o na haawina o ka hapaha i hala a me na himeni i meleia mai, ua haawina a me na manao paipai, a hookuuia me ka pule.
Noho ke anaina pule i ka hora 12, he 15 minute Na ke komite o ka Aha Lunakahiko i hoonoho ia no ia ekalesia i malama, oia no ke kahu o ka ekalesia o Olowalu mamua. Ma Halelu 24 a ma na pauku hope kana poolelo. Pau ia, hoomaha iki ke anaina. Halawai hou, a hookohuia o A Kealakaa opio i Lunakahiko hou no ia ekalesia. He kanaka opio oia a eleu ma ka hana. Malamaia ka paha ahaaina a ka Haku, a pau ia hana, hookuuia ka pule.
Kau ma na lio no ka huli hoi no kauhale, kipa iki ma ka hale o S. Kenui a paina ilaila, nee aku no ka ike ana i ka home poopoo pohaku o Kaululaau, na kauia no ka inoa "Keena o Kaululaau," o ka Lunakanawai ko'u pailaka. Kakahiaka nui Poakahi hoi kela no ka aina mauna me ke aloha nui no.
Poalua hora 1 P.M. , Aperila 23, kau ma ka waapa no Lahaina. Hora 3 me 30 minute hehi hou i ka aeone o Hauola. Haawi aku au i ko'u aloha hope i ko'u mau hoa aukai, Kealakaa, Kaapuiki, kapena waapa, ke Kahukula Sabati o Kanai, a me na hoa e ae. Kau ma ka lio, hoi no Olowalu a ike hou i ko'u ohana.
KAMAHELE.
Mapua, Olowalu, Maui. Aperila 25, 1895.
Mau Anoai Mea Hou no Kau.
Ma Naalehu, Kau, Poakolu, Mei 22, ua malama o Misita a me Misasa Enoka Kekahuna a me na kupuna o ka mea nona ka la hanau, oia o Kelemana a me Malia Kelemana, he wahi papaaina uuku i hoolakoia i na mea ai e pono ai ke kino , e laa ka poi, uala a me na ono o ke kai, oia ka opihi, limu, aama, manini, kunihi io kaulana o Kamilo. Hora 12 awakea, oia ka wa i paneeia mai ai na mea ai o kela a me keia i hoomakaukauia no ka nuu iho a lawa ka makemake. Mahope iho o ka manawa i makaukau ai na mea a pau, ua waiho mai o Enoka Kekahuna he mau manao hoolana imua o ka ohana a me na makamaka i akoakoa mai, a mahope iho o ka pau ana o kana mau manao hoolana ua noi aku oia i ka oluolu o na Lani e kokua mai i ka mea nona ka la hanau, ka makana nani a ke Akua i haawi mai ai e hoohua aku a laupai ka aina mailoko aku o ko laua mau puhaka. I ka hookuu ana o ka leo noi i ka oluolu o ua lani, oia ka wa i hahao ai kela a me keia a piha ka lua o ka inaina (opu). He nui na poe i konoia, aku, he uuku na poe i hiki mai aohe no he mau mea ano nui i hanaia ma keia la e pili ana i ka mea nona ka la hanau, oia o Naweli Enoka. Ma aila ae o Rev. J. Kauhane, P.H. Kahula, a me kona ohana. He wahi lealea olioli mai a Moeawa mai, ke kupuna o ka huia a me na ano a pau. Ke haawi nei au i ko'u mahalo i ka mea nona ka la hanau , na makua, na kupuna, ka ohana, a me na makamaka i naue mai, i ka ai ana iho i kahi mea uuku i hoolakoia e na makua a me na kupuna, oiai ka wa pilikia a hune o ka aina, aka, eia ka mea i palapalaia, "he uuku kahi luau me ke aloha pu," oi loa aku ka la e kanikau ai mamua o ka la e hanau ai, aole oia wale, eia no keia oi, o ka la pilikia mamua o ka la e hauoli ai. E mahaloia ka mea nona ka la i hanau ai a me ka ohana pu.
Eia ma Naalehu, he hale kuai poi, ipu, i'a, a e noho malamaia nei e kekahi mea i ike i ka hana pono, oia o Misasa Lokinehama Kaulia, o keia no ka hale kuai poi laki ma keia wahi, he ane ane e iwakalua poe lawe mau i ka ai mai keia hale aku, a o Misasa Lokinehama Kaulia oia ka mea nana o malama a kuai aku, a oia ka mea nana e kii a ohi mai na okeni (dala) i kela a me keia Poalima o na pule a pau.
He mahalo ko'u no keia wahine no kona mikiala maka hana, a hui pu iho me ka oluolu, oia ka mea nana i koi aku i na kanaka e naue mai, aku, he nui no na mea a'u i manao ai e hoike aku ia oe, aka, kani e ka hora 11 o ka po.
J.M. NAIWIELUA.
Naalehu, Kau, Mei 25, 1895.
He mau heihei ko ka la 4 o Iulai ma Kahalui, pela ka manao o ko Maui Ahahui Heihei, he ehiku ka nui.
NA PALAPALA.
[Aole maluna iho o makou ke koi koi o na hala a me na hewa no na manao i hoopukaia malalo o keia poo, aka, aia no maluna iho o na poe na lakou a kakau mai.]
He Lili, a i ole, he Kuhalahala.
[Hoopau ana.]
Mamuli o keia mau hana lauwili me ke apuka ia makou, nolaila, ua haalele makou i kana mau alakai hewa. A no ia mea ua unuhi mai makou i ka hana i waihoia aku ai ma kona lima e hana, me ka nana ole i ka nui o na dala i ai uhauha wale ia e ua luna hooponopono la.
Ma keia mea, ua hoike maopopo mai kou kukulumanao i kou lili, a i ole, he kuhalahala paha no ko makou lawe ana mai i ka buke au i olelo ai, ua lawe makou i ka awelu buke a makou a ka halepai o ka Buletina a ua hoopunipuniia ka na halepai e makou, a me kekahi olelo pilikino a ka lapuwale haalele loa, no ko makou hele makilo ka ma na Poaono a pau. Ea, ke olelo nei oe i ka mea i hana ole ia e makou. Ina makou i manao e hana pela, aia he puu dala na ku ke ahua e kala kahiko i au wale ka li. Ke hoolilo nei makou he puu dala nui no ka pono o ka lehulehu a puni ka Paeaina no ka wa e hiki mai ana, a e lilo auanei oe i mea makilo ia makou ma ia la.
O elo mai nei oe, ua pau ka hilinai o ka lahui ia makou. Ke ninau nei makou ia oe, ma ko kumu hea a heaha na hana i waihoia mai ia makou i hana ole ia? Ehia dala i waihoia mai ole ia? Ehia dala i waihoia mai ia makou a poho? Aole loa. O ka mea maopopo, o ka lehulehu ka i poho ia oe a me kou mau haku hana nana i hanai ia oe i ko dala a makou.
Eia oe ke koi hou mai nei ia makou o hui pu hou aku me oe no kau nupepa e manao nei e hoala, a na makou e hoolawa aku ia oe.
Ke manao nei makou ua lawa ka lehulehu i na nupepa KA MAKAAINANA, a me ka nupepa Ke Aloha Aina, na nupepa i hookumuia no laua ponoi iho me ka hoopilikia ole i ke dala o ka lehulehu. Ua olelo ae oe, i hookumuia no laua ponoi iho me ka hoopilikia ole i ke dala o ka lehulehu. Ua olelo ae oe, ua nonoi mai KA MAKAAINANA ia makou e kokua aku iaia. Ke haohao nei makou ia mau olelo, oiai, aohe leta i loaa mai mai kona puuku, aole no hoi kekahi komite o ia nupepa i hoolaunaia mai me makou a hiki i keia wa. A ina he mea kahi o ia ano, ina ua noho ka halawai o ka Hui Kalaiaina a noonoo no ka mea pono e hana aku ai. Aka, aole loa he mea o ia ano i ikeia, a Mea Heluhelu e puhi nei i ka makani me he upa makani la, a aole he pomaikai loaa. He manao lili maoli no paha i na elemakule, a i ole, he kuhalahala maoli no paha.
J. KANUI.
Kaakopua, Honolulu.
Eia ke hoomakaukauia nei i keena no ka Papa Ola iloko o ke keena Ahaolelo mua ma Aliiolani Hale. E haalele ana ka Papa Ola i ka noho ana ma kela wahi pupupu hale laau kahiko ma ke kihi komohana o ka pa, no ka makau mai ka o pau i ko ahi.
Na Hoolaha Hou.
G.E. SMITHES,
[KEOKI KAMILA.]
Mea Hooponopono Hoike He'u, Mea Ohi a Koi A e, Mea Kakau Kope, a Mea Kalepa Aina.
KEENA: Helu 406, Alanui Papu, ma ka Hale Opunui.
Telepone Helu 184. mei 27 3ml
KALAHIKI.
HALEKUAI LAHUI.
Helu---, Alanui Moi, keena hana mua o ka Hawaii Holomua.
E weheia ana ka halekuai maluna ae i ka POAONO, MEI 11, 1895, a malaila e loaa ai na waiwai a me na lole hou loa o na ano a pau, no na kumukuai emi loa mamua o na wahi e ae.
Aohe hewa ke kipa mua mai a e ikemaka mamua o ka hele ana i na halekuai e ae.
M. PALAU,
mei 6----3ml Luna Hoohana.
Olelo Hoolaha.
Mai a mahope aku o keia la, na kapu loa na ano holoholona a pau e he'e ana ma una o kumumanao na aina i kapaia o IAUKA a me KULIHAI e waiho la ma Hamakua, Hawaii. E hopu no ana hoopa: ma kipi Aupuni e like ma ke kauoha a ke kanawai.
KEAMO (k).
Hamakua, Hawaii, Mei 20, 1895.
mei 27-3mw
Hoolaha Hoohui.
Ua hoohui ae o JAMES WILIS, MS. W.V RODENHURST, M.H. PERRY, JAMES MURRAY, JOHN WILLIAMS a me H.L. HOLSTEIN, no Kohala Akau lakou a pau, a me THOMAS H. RODENHURST, no Kapalakiko, Kalaponi, ia lakou iho i keia la, no ka hana mahiai kope a me na huaai e ae a no ka hanai holoholona ma Awini, Kohala, malalo o ka imua hui o AWINI RANCH CO. AWINI RANCH CO., ma o H.L. HOLSTEIN, ko lakou Loio, Kohala, Hawaii, Mei 20, 1895.
mei 27-3mw
Hoolaha Nalowale.
Ma ke alanui mai Ulakoheo aku a hala loa iuka o Alanui Liliha, he apana lole huina-ha i hana paka ia me ka noeau ka i haule a nalowale, he komo humuhumu gula ko loko i kuniia me na huakumu M.A.R. Ke loaa a hoihoiia mai ma keia keena, e loaa no he uku makana kupono.
mei 13-4pl*
Na Hoolaha Hou.
Hale Inu Waiona KALEPA.
[NO SAMU NOLENA mamua.]
Malaila e loaa ai ke SAKE maikai loa i paipai ole ia e 1 ke la me ko na wahi e ae, he hapaha [25 keneta] no ka omole,
HE $1 NO KE GALANI HOOKAHI.
Pela no hoi me ka Barani maikai loa, he $1 no ka omole, aole i paipaiia, aka, e like no me ka loaa ana mai.
E loaa no na Waiona e ae a pau loa malaila me ka oluolu loa.
S.I. SHAW, Ona Waiwai
mei 20 5mw
HALEKUAI LOLE NUI.
GOO KIM - Alanui Nuuanu
E loaa no na papale wahine ano hou loa maanei, na papale kapu, na lole kalakoa o na ano like ole, pela pu no hoi me na lole silika, na lihilihi hoonani o na ano like ole, na kamaa aulii mai ke nui a ka liilii, na koloka hoopumehana o na la puanuanu, na hulu papale keokeo, ulaula, eleele, a pela aku. Oluolu ke kumukuai.
E hanaia no na paa lilo kane no ka uku haahaa. Na papale kapu ano hou loa maanei. Na hainaka silika, mai ke nui a ka liilii. E loaa mau mai ana na lole hou ma na okumahu a pau mai na aina e mai.
KUKIMA.