Ka Makaainana, Volume III, Number 13, 3 June 1895 — Page 7
HONOLULU, OAHU, POAKAHI, IUNE 3, 1895.
PUALIPUHIOHE LAHUI.
Mai ko Makou Mea Kakau e Lualai i Kaleponi.
Ua haalele aku makou i na kaiaulu aloha ou e Hawaii i ka hora 4 o ke ahiahi Poakolu, Mei 8, me na puili aloha ana me na makamaka a me na hoa'loha a meka honi hoomau ana iho i ka'u wahine, a pela pu no hoi me ko'u mau hoa, aia hoi na waimaka ke hoopulu la i ko makou mau papalina. Kau iho la maluna o ka halelana au i ke kai a no Kaleponi ka ihu, kahi nona keia hooheno ana---
"Makemake au e ike ia Kaleponi, Ka aina o ka lanakila, a me ka home o ka wiwoole."
Oiai ka moku e kuemi hope ana, ke ike aku la no au i na maka aloha o ka'u wahine, na makamaka a me na hoa'loha, a he oiaio, o keia na minute nana i hoohalulu iho ko makou mau puuwai ma o na haawe la a ke aloha e kihaehae ana i ko makou mau puuwai. Hala hope ae la ka hale ipukukui a ke kaulono la no ko makou mau lena ike i ka uluwehi o ke taona. O keia ke kuakoko hope loa o ka hanu ola iloko o makou, a kulu iho la ko makou mau waimaka kekahi maluna o kekahi, a nona hoi neia hooheno,---
"E hoonalonalo ae ana i ke aloha pee maloko,
Hai ka waimaka hanini mawaho, I ike aku no au i ka uwe ana iho."
Pela iho la makou iloko o ia mau minute a hiki i ko makou ku ana iwaho o ka nuku o ke awa no ekolu hapaha hora, eia ka o wehe ana i kekahi kaula i hihiaia i na epaepa. Kani ka hora 5 haalele i ka nuku o Mamala me ka uluwehi o ke kaona, me he moena pawehe la ke kulanakauhale o Honolulu i ka makou ike aku. Hora 7 ponoi o ia ahiahi hala hope ae la ka Lae o Makapuu au i ke kai me he manu la, a haawi ae la makou i ko makou aloha hope me keia mau lalani mele.---
"Na ke Akua e malama mai ia oe,
Kou mau kualono aloha e,
Kou mau kahakai olinolino no,
Me kou mau malapua o."
Pau ia, ua hoi aku la kela a me keia no kona wahi moe me ka hoomaopopo ana i kona puolo iho, a iloko o ia wa i kani mai ai ka bele o ka aina ahiahi, a ua eleu aku la makou ma ka aoao o na pakaukau i luluu i na ono a pau, a hoonuu iho la i na mea i hoomakaukauia me ka holokake a ka pahi me ke o a he haole ka hoaolelo ia wa. Ano hemahema no i keia ano ai, aole no e like aku me ka makou ai kamahao he "pohaku," aka, no ka la hookahi keia hemahema a pau koke no. Aohe malamaia o ke koena meaai, he kiolaia ke pau ka ai ana; he maemae ma meaai. Ia pau ana ae o ka paina ana, hoi aku la e hiamoe, aole nae he loaa o ka moe pono ana oiai ke aloha o ka aina, ka lahui a me ka ohana e lauwili ana iloko o ka puuwai, me he kahawai la e halukuluku ana i ke kiowai, pela wale iho la no a ao ia po. Pela mai no na la e ae. I ke Sabati, ua malama iho makou he anaina hoomana i ke Akua me ka himeni "E Iesu ka Mohai no'u," pule, heluhelu Baibala ma Luka 15:11--24, himeni "E pili i ou la wau," manao paipai ma Luka 15:18, himeni hookuu "Kuu aina hanau au, Aole au e kaena aku ana, aka, o ka oiaio no ka'u e hoike aku o ka uhane o ke Akua me makou ia wa.
Aole loa makou i hoopoina ia oe, e Hawaii kuauli me kou mau luhiehu nani a me kou ea pumehana maikai, a'u no e kaena ae ai o "Hawaii no ka oi." He oiaio, ke ike nei ko makou mau maka i na luhiehu nani o keia aina malihini, hewa ka maka ke ike aku ia mau mea, aka, o ka helu hea la o kona ea ke hoohalike ae ma Hawaii uuku a ka oluolu maikai nui wale, ka Paredaiso hoi o ka Moana Pakipika, aole i ke anu maeele, aole hoi i ka wela ikiiki, aka, i ka huihui oluolu maikai a i ka pumehana waianuhea mai Hawaii a Niihau.
Ma ka po Poalima i wehe ai makou i ka makou ahapuhiohe mua loa, pela mai no i na po Poaono a me La Pule, e hoomaka ana i ka hora 8:30 a pau i ka hora 10:30. O na leo mahalo mai ke anaina mai, oia ka makou e lohe nei a e kamailio pu nei; a i hooiaio no keia e nana nupepa Kahea o na la 17, 18, 19 me 20 o Mei. O ka makou mau leo mele puhi, ua lilo i mea ohohia loa ia e ko Kaleponi nei poe no ka maikai a me ka nanaho. O na himeni Hawaii na mea oi loa aku o ka makemakeia, a o "Lei Lehua" ke mele i hana pa luaia e makou mamuli o ke ohohia loa o na haole, a pela no hoi me kekahi mau mele Hawaii e ae, eia a o "Maikai ka Makani o Kohala,' 'Pua Melekule,' 'Lei Ohaoha,' 'Kau Mea Hoinaunau,' 'Lau Vabine,' a me kekahi mau mele e ae he nui wale aku. He piha a ka launa ole mai ka hale, no ka akahi no hoi paha a lohe.
I ka La Pule, la 19, i ka auwina la, kau iho la makou maluna o na kaa uwila no ka Paka Ipuka Gula (Golden Gate Park), kahi e haawiia ai kekahi aha puhiohe e kahi puali puhiohe i hoomakaukauia no ia hana, he 6 mile paha a oi ka mamao mai ko makou hotele aku. I keia wahi hewa i ka wai na kanaka o kela a me keia ano lahui like ole, he wahi oi aku o ka makaikai nui ia. Ua nani no na mea a ka maka i ike ai.
I keia la a'u e kakau nei ia oe, e kuu milimili, eia he poloai ia makou mai Sakarameto mai e hele aku ilaila, a na ka mea nana ia palapala na lilo a pau, a o na loaa a pau e loaa ana ia makou ma ka makou wehe ana i ka aha puhiohe, e maheleia i 35 pa keneta o na loaa nana a i 65 pa keneta ia makou, ne kona lawe i na hoolilo a pau. A oiai hoi ko makou kamaaina e hele ana i keia la, aole i maopopo ka wa e hele ai. Aia a keia mua iho e hoike hou aku no au ia oe, e kuu KA MAKAAINANA aloha.
Ke haawi aku nei au i kou aloha a nui i kou lunahooponopono, kou puuku a me kou mau
limahana lawe poahi, aole owau wale, aka, o makou no a pau loa.
KE EMI NEI KA WAIHONA.
Aohe he mau loaa ma keia papa hoike, aka, o na hoolilo wale no, a eia iho.
Ka Hoike Eiwa o na Lilo:
Ohana o Makakoa 1.00
Kahaio 2.00
D. Koa 1.00
Kanaana 1.25
L. Kameakane. 1.25
R. Palau 1.50
Manuel Kuhio 1.00
D. Keaunui 1.00
J.K. Kamali 1.00
Kaanaana 1.00
Keawekalohe 1.50
Nahinalau 1.00
Inoaole 1.00
Pihana 1.50
Enoka 1.00
H.P. Kaohi 1.00
Kamaka 1.00
H. Kalei 1.00
Aberahama 1.00
Kaolowi 1.00
Geo. Makalena 1.00
Kaaihue 1.00
Kamai 2.00
S. Kalalau 1.50
Elia 1.50
D. Damiana 1.50
Kaneuu 1.00
Keanopohaku 1.50
Kauai 1.00
John Mahuka 2.00
Waianae 1.25
John Piko 2.00
G H Pahia 1.50
Kakaio 1.50
Paterika Lene 2.00
J Kaae 2.00
Keoni Waipio 1.00
Wm Kekoa 1.00
Alika Kamika 2.00
Holo 1.00
Kamaki Pule 1.00
Hanupau 1.00
Kilohana 1.00
Toma Pedro 1.50
Kema Kekipi 1.00
Kaaikike 1.00
Bipi Kane 1.00
Keoni Pio 1.00
W M Moepali 1.50
J K Beni 1.00
Kahananui 1.25
Keliikuewa 1.00
S. Kaiu 2.00
Huina. $68.50
KELA A ME KEIA LILO.
Lilo no ka Poi 8.25
Huina lilo a Mei 25 $76.75
Eia ke koe nei ma ka waihona a Mei 25, he $650.10.
Mau Hihi no Nui.
Aia imua o ka Aha Kaapuni he elua mau hihia hoopii waiwai a koi aie ano nui e waiho nei, a me he la i ke kau ae paha hoi o Augate e hanaia ai. O ka mua, he koi aie na Misasa Ema Kipili kue i ka waiwai o Kauka Taruso i make, maluna o kekahi note no $2,937. Ua panr ar na lunahooko kauoha e kue ana i keia koi, me ka olelo ae he hana apuka, epa, a ano e ae paha. A o ka lua iho, he hoopii na Piliki Wilihema kue ia Keoni Lopikana, oiai, ua aie dala ia aku i ka mea hoopii, oiai ka mea hoopiiia e noho hana ana malalo ona, a i kahi wa mahope mai paha o ia aie ana, ua hoolilo aku oia i kona pa aina ma Apua ia elua o kana mau keiki, ma ke ano pee hoi no ka makau o hoopii koi poho ia no ke kii ana i ka wahine a kekahi mea. O ke ano nui o keia hoopii, ua hanaia kela hoolilo ana me ka manao apuka a kolohe, a ke noi nei ka mea hoopii e hooliloia kela hoolilo ana i mea ole. Ua pane ae ka mea hoopiiia ua aie io no oia, aka, aole nae hoi i hanaia ka hoolilo ana ma ke ano epa, a pela aku.
W.H. DANIELS,
[ BILA DANIELA]
Agena Kuai a Hooponopono Aina, Mea Hana Palapala Kanawai, Mea Ohi Aie a pela aku.
O na hana a pau e haawiia aku ana iaia, e lawelaweia no ia me ka eleu a me ka emoole.
Keena Hana a me Wahi Noho, aia ma Wailuku, Maui.
mei 6-mk.
J.K KAHOOKANO.
LOIO a he Kokua ma ke Kanawai. KEENA HANA: Alanui Kaahumanu, Honolulu. ian 8, '94-1mk
E.M. NAKUINA.
KOMI SINA O NA ALA LIILII A ME NA PONO WAI.
Notari Lehulehu, a he Agena Haawi Palapala Ae Mare no Honolulu nei.
KEENA HANA: Helu 308, Alanui Kalepa.
dk 3--1mk.
F.J. TESTA, (Hoke).
MEA O I A KOI AIE.
Mea Huli Moolelo Aina a Waiwai e ae paha.
Mea Unuhi a Mahele Olelo Hawaii a Enelani paha.
Mea Hana Palapala Kanawai o na Ano a pau.
Mea Kuai Mikini Humuhumu Lole.
Mea Hoolimalima a Hoolilo Aina.
Mea Kuai Waiwai no ka Uku Komisina Haahaa.
Ua makaukau mau oia e lawelawe i na hana a pau e haawi mai ana iaia. He kuike ka rula.
E loaa no oia ma ke keena. apr 8-1mk
KAUKA YONG KAM PUNG.
[APANA.]
KAUKA LOEA O KA AINA PUA.
Helu 306 - - Alanui Hotele
Ua hiki ke hoolaia na ano ma'i a pau, o na kane, wahine a me na keiki liilii. Pela me na ma'i ha-no, akepau, eha ma ka puuwai, ka ma'i korela, hebers, fiva lenalena, puupuu ulalii, koko ino, a me kekahi mau ano ma'i e ae. Ua hiki ke haawi i I au hoohanau keiki, a pela aku.
He oluolu loa ka uku. E nane mai ike pono. Oluolu na kuka ana.
mei 13-1 mhu