Ka Makaainana, Volume IV, Number 1, 1 July 1895 — Page 8
8 HONOLULU, OAHU, POAKAHI, IULAI 1, 1895.
KELA A ME KEIA.
-
Hora 9 o kakahiaka apopo e hoike ai ke kula aupuni o Kauluwela.
E nana ae i ka hoolaha a Keo Heleluhe e puka aku nei ma ko makou helu o keia la.
Ua oni mai o W. Tela mai na poe lehulehu mai he $400 no na hana hoolele ahi kao o ka la 4 o o Iulai nei.
Iune 16 ma Kapaa, Kauai, ua uoia iho la e Rev J.M. Kealoha o Iona B Kamaki a me Misi Sera Mose.
E komo pu ana na makai iloko o na lealea heihei waapa o ka la 4 ae nei. O Hanakeoki ana paha ko lakou waapa.
Na ka hui himeni Kawaihau e haawi ana na leo mele no ka hulahula e malamaia ana ma ka Paka Kuokoa i ka la 4 aenei.
Elua mau kumu o ke Kulanai o Sana Lui i holo aku ma ka Alameda no ka hoomaha ana ma o, oia na Hoahanau Francis a me Lui.
He huila no kekahi kaapio ka i hemo ae ma alanui hotele i ke ahiahi Poakahi i hala, mamuli o ka hemo ana o ka pokake hoopaa.
Poakahi i hala i holo puiwa ae ai ka lio me ke kaa hali ukana o ka hui kuai huaai ma ke kini o na alanui Moi me Alakea. Ua okaoka ke kaa.
E holo aku ana no Enelani ma ka Warimu o na la mua o Augate ae nei ke Kiaaina Ake, ka makuakane hoi o ke Kama'lii Kaiulani.
Ua waiho aku o G O Nakaia ma i kona kulana luna nana paahana Iapana malalo o keia Aupuni, a e lawe ana i kekahi kulana malalo o kona Aupuni.
No na poe e makemake ana i na kii pena hoonuiia mai na kii hooleleaka, ina ma ka waihooluu a inika paha, e pono e ninau mua ia O.K. STILLMAN (Oliva Kilimana), oiai, he agena oia ma ia hana. E ninau ma keia keena nona.
mei 20-mp.
Ua loaa aku iloko o ka rumi o ke kupakako o ka Mikahala i ke ahiahi Poalua iho la, he 20 mau tini opiuma ia Kakina, kekahi o na haole hana o ka Hale Dute.
Ke hana a hoomaemae hou ia nei ke kii o ka Na'i Aupuni Kamehameha I. e ku nei ma ke alo o Aliiolani Hale, oia hoi, me ka uhi ahuula hou o ka wai gula.
Ua haalele aku he eha mau kumu o ke kula o Punahou i ko lakou noho ao ana ma ia kula, o lakou na inoa Misita me Misasa Dodge, a me na Misi Burua a me A W Koketa.
Moehonua a me Keliikipi ka i hoopaiia imua o ka Aha Apana i ka Poalua iho la he $100 pakahi me na koina no ke kuai waiona me ka laikini ole. Aia i Kawa laua e u noho nei.
No ka lawe aihue ana o Kaapuni i kekahi pila gita o $7 ka waiwai io a Mose Waiamau, ua hoopaiia oia e ka Lunakanawai Apana i ka Poakolu iho la he 30 la hoopaahao ma ka hana oolea. A lolo!
He palapala hoopii ia e lawe kaapuni ia nei iwaena o na poe hemolele no ka hoopau ae o ke Aupuni ia Konela Makalena, ke kumuao paikau hou, me ke noi aku e paniia ia wahi e Kapena Kokerane, o na koa malina, o ka Piladelepia iho nei.
Apopo e noho hou ae ai ka Aha Kiekie e hoolohe i na hoohalahala i koe, o ka hoopanee ana mai ka Poaha mai.
He halawai akea ke haawiia ana e ka Hui Hawaii Repubalika i ka po o ka la apopo, a o na haiolelo o ia po o Lualii Kakina, Wile Kakela, a me Wile Kamika.
I keia Poakahi a Poalua ae e hoomakaia ai ka ninaninau ana i na kumukula no na palapala o ke kulana papamua, ma ka halekula o Koleaka, e hoomaha ana i ka hora 9 A.M.
Ua make i ke kakahiaka Poalima nei o Manu Kahunaaiole mauka o Puunui i ka haneri a keu o kona mau makahiki o ke ola ana. Auwina la iho no i nalo aku ai oia.
Ua lonoia ae e uniki ana ka kekahi mau pa hulahula Europa o na opio Hawaii ma ka la 4 iho. He mau papaaina ke pahola mua ia mai ana, a mahope iho na hana lealea hulahula. Eleu no!
Kakahiaka Poalima a me Poaono nei i pau loa mai ai na mokumahu holo pili-aina i ka huli hoi mai me ka piha kopaa, a i keia ahiahi e pau nui aku ai i ka holo no ko lakou mau awa pakahi.
E hoomanao i ka Monowai i ka Poaha iho mai Kapalakiko mai no na Panalaau Hema. O ka Miowera hoi mai na Pana laau Hema mai no Vanekouva aole hoi i ka la apopo e like me kona manawa mau.
Ke waiho mai nei o Kokua Lunakanawai Biketona o ka Aha Kiekie, a ke hoopihaia nei hoi kona wahi imua o ia Aha e na Lunakanawai Kaapuni Waitina a me Kupa i kela a me keia wa.
Ua hemoia kekahi o na huila hope o ke kaa basa o ka Hui Alahao Hawaii e holo nei ma alanui Nuuanu i ka Poaha iho la, ma kahi kokoke i ka hale kuai o Kukima a owa pu ia o hope o ke kaa, aole nae he mea e ae i poino.
Ma ka Paalima, la 28 o Iune, 1838, oia ka la i poniia ai o Vitoria i Moiwahine no Beritania Nui. Nolaila, i ka Poalima iho la, la 28 o Iune i piha ai ke 57 o na makahiki o kona lei ana i ka Leialii o Beritania Nui, a 58 hoi ma ka nohoalii.
Ua lawaia ae imua o ka Aha Apana i ka auwina la Poalima iho la o Keoni Bola a me Toma Pulu no ka hookaa ole i ka auhau waiwai a me auhau kino. Ua hele na helehelena o ka inoa mua a nanakea, he mau helehelena ma'i wale no.
Mai a mahope aku o Iulai 1, aole loa e hoounaia aku ka pepa i na poe e makemake mai ana ke ole e hookaa mua ia mai ka auhau o ka pepa. Pela pu no hoi me na luna, aole e loaa aku ana ka pepa ia lakou E hoomaopopo mai na poe lawe i keia.
Eia ke waiho nei i ka mai kekahi o na pio kalaiaina, oia o Wile Gareiga a me Lui Masela. O ka inoa mua aia oia i ka Hale mai Moiwahine kahi i waiho ai me ke kiaiia no e ka makai, a o ka lua hoi, i ke ahiahi Poalima nei oia i laweia ae ai. Aohe i maopopo ko laua pono, oiai, ua hele a kupilikii, o ka inoa mua nae hoi ka oi loa aku.
Ke kakau nui ia nei kekahi palapala noi no ka huikala ae ia Keoni Bola, kekahi o na pio kalaiaina, e na Pukiki. Mamuli o ko lakou nele i ka hana, a oiai hoi, he mea hoohana nui oia ia lakou, oia keia e hoopii nui nei.
Eia he hoopaapaa nupepa mawaena o ka Buletina Ahiahi a me ke Kuokoa namu, no ka mea e pili ana i ka inoa o ka nupepa hou. I kekahi iho paha o keia mau la e ku ae ai imua o ka Aha Kaapuni ma ke kaulike.
Pakele o Misasa Hanale Kaaka mai halawai me kekahi ulia i ka Poalua iho la, oiai oia maluna o kekahi kaapio Hawaii ma alanui Papu, ma ke alo iho o kela Hale Opunui, ua hemo ae la ka pokake o kekahi huila a kunihi ke kaa. Aole ka lio i puiwa a paa i ka hopuia e na lima kokua.
Poalima nei i hoopiiia ai o S.K. Kaeo no ka aie ia A. Iega ma kekahi nota no $267.44, a no kona hiki kino ole ana ae imua o ka Aha Apana, ua haawiia ka pono no ka mea hoopii e like me ke koi, o ke Kuhina Waiwai a me ke kakauolelo o ka Hale o na Lunamakaainana na mea i hoopaaia no ia mau dala.
Auwina la o nehinei, ma Kamakela ae nei, na kipoia iho la ka lae o kekahi kanaka, o Bila ka inoa e kekahi haole Malaka a puka pu. He wahi hoopaaia ka i ulu ae mawaena o laua e pili ana no kekahi wahine mamua iho, a uhauia ai me ke kumu uwepa. Ua paa ae ka haole i ka Halewai a i keia kakahiaka e hookolokoloia ai.
Ma ka Malulani o kakahiaka Poalima nei i hoea mai ai ka Rev. S.H. Davisi, poo o ke kula kaikamahine o Kainaliu, Kona Hema, Hawaii, a i kakahiaka o nehinei i holo loa aku ai no Kapalakiko maluna o ka mokupea S.G. Waila. He huakai imi ola a hooluolu keia ana, a e hala ana paha iaia he mau malama ma o a huli hoi hou mai.
Ua haawi ae o Lunakanawai Kaapuni Kupa i kana olelo hooholo i ka Poaha iho la ma kela hihia hoopii a Toma Kalaka kue ia Hate Panana Paka a me ke kane, no ka hooko aku i kekahi aelike. Ma ko ka Aha manao, mahope iho o kona hoakaka ana ae i ke kanawai ma ia hana e hoopau wale ia ka hoopii, a o ia ae la no la, pau.
Poalua iho la, Iune 25, i malamaia ai ka hoike o ke kula hanai kaikamahine o Kainaliu, Kona Hema, Hawaii, a wahi a ka lonoia mai, ua nui no ka mahaloia e ka lehulehu i hiki aku e ikemaka. Maikai na haawina i aoia ai, a maikai pu no ka hoi me na hana humuhumu lima a hana e ae a na haumana. Elua mau kaikamahine a ko makou puuku aia ilaila. I ka la 18 ae e hoomaha ai ke kula.
Ma ka hora 11 o ke kakahiaka Poalima iho e uoia ai ma ka berita maemae o ka materemouio o Samuela Mahuka o ka Ua Kipuupuu o Waimea, a me Misi Alice Leleo Kinimaka o ka Ua Kukalahele o Honolulu, maloko o ka luakini o Sana Anaru e ka Bihopa o Honolulu. Ma ke Kinau no o ia auwina la e holo aku ai laua no ka Aina Mauna, ka home noho hoi o ke kane, a ilaila laua e hoohala ai i ko laua mau la mua o ka noho'na hauoli.
Nui ka hauoli o na luna Aupuni i ka Poaono nei, no ka mea, o ka ia ohi ia o kahi ola no ka malama i pau. Me he la no ia mai paha hoi ke kumu i puhipuhiahi o na makai i nehinei e hopuhopu i kau Pake kuai puaa o ka huina ae nei a Kale no ka uhaki kanawai.
I ka Poaono i hala, Iune 2, i pau nui mai ai i ka hookuuia na Iapana a me na Pake i hoomaluia iho nei makai o Kahakaaulana a ke Kopatika i lawe mai ai. A o na ukana o lakou i hiki aku i ka elua tona ka nui ua paa nui ia e na luna o ka Hale Dute, no ka mea, he mau waiwai dute ia lakou.
I ka Poakolu iho la, Iune 26, i piha ai ka makahiki hookahi o ke ku ana o ka Puali o ke Aloha a S K Kamakaia i kukulu ai. Ua hoomanao ae lakou ia la me ka halawai hoomaikai i ke Akua, ke kai huakai ana ma na alanui a me ka paina mea-ai mama i ka auwina la maloko o ka haleaina Pake e ku nei ma ka huina o na alanui Nuuanu a me Kalepa. Maikai na mea a pau.
Ua lohe mai makou, mauka o Niolopa i ke kakahiaka La Pule, Iune 23, ua hana hoohilahila iho la o Nameahookano (w) iaia iho ma ka uhaehae ana i kona lole a pau a hoike ae la i ka waiho molale o kona kino. Aole i maopopo ke kumu i ulu mai ai o keia mau hana maikai ole iaia o ke ano hupo, a e ele ka makai hoihoiia ai iloko o kekahi hale me ke pani nae o ka makai i kona mau maka o lele auanei ka hulu o ka manu. Me he mea la he kino papalua paha.
I ke kakahiaka Poaha iho la i haalele mai ai ka moku misionari Hokuao ia Kou nei a holo aku la no na paeaina Maikonisia, mahope iho o ka pau ana o na hana haipule maluna o kona oneki. Ua lawe pu aku oia ia Lui Mikela me kana wahine no ka hoonoho ana aku iaia ma kekahi o na paeaina Kilipaki, a me kekahi poe e ae. I kakahiaka Poalima nei i hoi hou mai ai oia mamuli o ka poina o ko kapekana mau pepa, a na ke Kanikela Mila i hooponopono mauka nei a hoonani aku ai Eia nae, ua kuhihewaia ua loaa mai oia i kahi niuhi a o ka mea ia o na mokukaua misionari la i pelu hope hou mai ai.
-
Hookapu Kai Lawaia.
Eia ke hoolahaia aku nei ma keia ua hookapuia ka lawaia ana ma ke Kai Lawaia o Kahala, koe wale no a loaa ka aeia mai e
J. HELELUHE,
Agena no ke Alii Liliuokalani.
Honolulu, Iulai 1, 1895.
iune 29 - 4 pl.
-
Laau Ma'i Lepera.
Eia ia Kauka Ogawa (Kepani) he
Laau Lapaau Ma'i Lepera
maikai loa mai Iapana mai nei. Aohe no e hewa ke hoao ae.
Uku haahaa loa no elua malama, ma ka $10 no kanakolu la.
Keena, - Alanui Hotele, kokoke i kahawai loa, Kikihale. iun 10-1ml*
-
No ka Hoolimalima
O ka hale ma Alanui Kalepa, i hoohanaia mamua e ka Hui Hoolaha Buletina Puka La. Ua hiki loa no o lalo ke maheleheleia i mau keena oihana, a pela aku.
E ninau ma ke keena o
WM. G. IRWIN & CO.,
iune 24 Kaupalenaia.
-
Na Mea Kanu no ke Kuai.
Aia ma ke keena o ko makou Puuku e loaa ai kekahi mau mea-kanu i hoouluia no ke kumukuai oluolu. E ninau ponoi ae no iaia. lan 3-jul 1