Ka Makaainana, Volume IV, Number 3, 15 July 1895 — Page 6

6 HONOLULU, OAHU, POAKAHI, IULAI 15, 1895.

NA AINA MAMAO
-
Na Lono Huikau mai kela a me
keia Wahi o ke Ao Nei.
-
Weheia ke Alawai-oki o Kiela.

                     Iune 20 i weheia ai keia alawai hou o Geremania, e hoohui ana ia Kiela kahi hoolulu o na aumokukaua o Geremania, a me ke Kai Balatica, iloko o ka hanohano nui. Ua hoakoakoa mua ae na mokukaua o na aupuni e ae a pau malaila, a i ko kai huakai nui ana, aohe hiwahiwa aku a koe mai. He hana nui keia i hanaia e Geremania a ua lilo hoi i mea oiaio loa no loko o ka moolelo o keia au o ia aupuni. Ma ka la 21 ae i hoomoeia ai e Emeperoa Uilama ka pohaku hope loa o ia hana nui, a ua heaia o ke Alawai wai o Kaisa Uilama I.

Liuliu Rusia e Kaua ia Iapana.

                     Ua lono laulaha loa ia aia ka e Rusia ke hoopuuluulu la i kekahi pualikaua nui o 80,000 kanaka ma Valadivosetoka, Siberia, ma ka aekai Pakipika nei, a aia hoi kona mau mokukaua iloko o ia awa e ku makaukau la no ke kimopo mai ia Iapana. Ma kekahi aoao ae hoi, aohe hilinaiia, o keia lono, no ka mea, ua makaala loa ia ko kiai a hakilo ana iaia, a ua hiki ole paha hoi iaia ke hoala ae i kahi hana malaila me ka ike a hoomaopopo koke ia aku o kona manao. Ina aia io keia pualikaua nui o Rusia malaila, alaila, wahi a ka oleloia, aia paha ia iloko o ka ohu kahi i pee ai. Aohe e hiki ia Rusia ke hana me ka malu, no kona kiai loa ia no, pela na manao o na poe loea kalaiaina. O kekahi no hoi, aohe no ka ona hunu maoli no Iapana, aka, ia Kina no, no ka mea e pili ana i kona aie lahui kuwaho hou e manao la e hana, i mea hoi e kaa ai o kela koi poho a Iapana no ke kaua ana mai nei o laua.

Kulana Alihikaua Nui o Enelani.

                     O ka hoahanau hanauna hapanea o ka Moi o Enelani, oia ke Duke o Camebarige, ka Alihikaua Nui o ka Pualikaua, mamuli o kona aoo loa, ua manaoia e waiho aku ana oia a i Okatoba 1 e pau ai. Wahi a na olelo wale ia, e kala kahiko no i kupono ai oia e pau, aka, i hoomauia e hoopumehana ia kulana no ia keiki a laua, ko Duke o Alabani. Eia nae hoi, ua make aku ia Duke, nolaila, ke lilo la keia kulana i mea noonoo nui ia. O ka moho a ka Aha Kuhina i pau, o Ilamuku Kana Haku Wuluse, ka mea a ke Kuhina Kaua i pau, Misita Camabela Banemana, i manao ai nona ia kulana. A eia hoi, i ke Kuhina Kaua hou, o Kenerala Haku Robata, i kaulana ma na hooili kaua ana ma Inia, ka mea ana i manao ai e hoopiha aku ia noho oihana kiekie iloko o ka pualikaua. E hooholo a e haawiia aku ana paha i haawina uku hoomau no ke Duke aoo o Camebarige, ke pau io ae hoi oia.

Haule Imua o na Poe Kipi.

                     He lono ma Nu Ioka, Iune 30, mai Maracaibo, Venezuela, e olelo ana ua lawe ae na kipi ia Merida i ka Poakahi aku, la 24. Ua lonoia ua ki pu ia o Konela Goza, ke alakai o na koa Aupuni malaila, me elima o kona mau aliikoa. A ua oleloia he keiki hanauna na Rohasa Paulo ke alakai o na kipi. O na koa Aupuni i hoounaia aku ai mai Valenecia e kokua ia Merida, ua ala kue aku i ko lakou mau alii, a ua make elua, pela ka oleloia. Aia lakou ke nee le imua no Merida me ka manao ka e haawi aku i na kokua ana i na kipi. O ka hapanui hoi o na kipi, wahi no a ka oleloia, he poe i holo mahuka aku mai Columebia a me Cuba.

Aha Kuhina Hou o Beritania Nui.

                     Ae, ua lilo ko Haku Rosebere au hooponopono aupuni i mea no ke au i hala, a ua hoi hou ae hoi o Haku Saulebure ma ka hoeuli i Iune 25 aku nei. Eia iho na hoa o ka Aha Kuhina Hou i hoomaopopoia. Makuisa o Saulebure, Kuhina Nui a Kuhina o ko na Aina E; ke Duke o Devonasia, Peresidena o ka Ahakuka; A.J. Balafoa, Haku Mua o ka Waiho na Waiwai; Hon. Iosepa Kamalena, Kuhina no na Panalaau, Sa Mikaela Hika-Bika, Kuhina Waiwai; Mea Hanohano G.J. Gosena, Haku Mua o ka Papa Adimerala; Makuisa o Lanedaone, Kuhina Kaua.
                     Ua manaoioia ua loaa mua aku na hooia ana i ka Makuisa o Saulebure, mamua ae hoi o kona ae ana e wae i Aha Kuhina hou, e haawi aku no ka Aha Kuhina mua i na kokua ana i ka Aha Kuhina hou ma ka hooholo ana i na kohokoho haawina dala, i hiki ai hoi i ka Ahaolelo ke hookuuia i Iulai 10 nei.
                     O kekahi mau lala o ka Aha Kuhina i pau a me kahi mau luna oihana kiekie malalo aku, ua pau nui i ka hooaliiia a hoohanohanoia o ka Moi me na inoa alii a me na hoailona kea hoohanohano, a ua lilo nei hana i mea kue loa na kekahi mau nupepa o Ladana no ke kupono ole, no ka mea, he poe kue ko lakou hapanui i ka Hale o na Haku. elua mau mea i lilo i mau Eala a elima hoi i poe Barona.

Na Hunahuna Laulaha.

                     La 3 nei e wehe ai ke Kama'lii o Wale i ke alahukimoku hou ma Soutahametona, Enelani.
                     Ke hooikaika la ka hui Farani hou e hooholomua la i ka hana ana i ke alawai oki o Panama, e hoolilo aku i ke alakai oki i kekahi ahahui Amerika.
                     Ua hooholo mai nei ka Hale Makaainana o Enelani i bila kanawai e hoomana ana i ke kukuluia ae o kekahi kia hoomanao no Oliva Karomewela.
                     Ua make mai nei o Adimarala Saladana do Gama, ke alakai o ua kipi o Berazila ma Rio Garane do Sula, ma ke kaawe maoli paha a hooweliweli hoomainoino ia paha, aole i akaka loa.
                     He ahi nui ka i holapu mai la i ka aoao hema o ke kulanakauhale o Kapalakiko i ka po a ao ae Poalima, Iune 25, i nui loa paha hoi kahi i ka nele i ka wai. Ua kohoia ka poino aia ma kahi e $1,000,000.
                     Ke mau la no ka noke o ke kaua kipi ma Cuba, aohe wahi mea a emi iho. Wahi a na lono, ke pii mau la ka holomua o ka hana ma ka aoao o na kipi, a ma ka aoao hoi o na koa Sepania, ke aai la ka mai fiva iwaena o lakou a ke make la kahi poe.
                     E hooliloia aku ana na moku o ka oihana kaua moana o Mekiko i poe moku kiai aekai no ka hoopae malu ia aku o na waiwai me ke kue i ke kanawai dute, a e hoolakoia aku ana hoi me na pono kaua i hiki ai hoi ke hoohanaia aku iloko o ka wa kaua.
                     E hoao hou ana o Hanale M. Kanale, ke kaahele Aferika kaulana, e holo balota hou ma Enelani no ka noho lunamakaainana o Lamabeta ma ke kau koho akea hou no ka Ahaolelo. Ma ke kau mua iho nei, ua hoauheeia oia e kekahi me ao ka aoao Radicala, oiai nae hoi oia he Liberala Uniona.
                     O ka Hale Ahaolelo o Kili, ua pau mai nei i ke ahi, a ua kohoia ke poho ma kahi o $1,000,000 ma ke gula o Amerika Huipuia, me ka noonoo ole ae hoi no na palapala pili moolelo i pau-pu aku a i hiki ole hoi ke paniia aku. Iloko o 1857 keia hale i hoomakaia ai ka hanaia, ana aole nae hoi i hoolaaia a hiki i 1876.
                     Iune 25, maloko o ka Luakini o San Rafaela, Ladana, Enelani, i mareia ai o Kamakii Emanuela Filibeto, Duke o Aoseta a keiki hanauna a ka Moi Humebeta o Italia, ia Kama'liiwahine Helene o Oleana, kaikamahine elua a ke Kounese o Parisa a kaikuahine hoi o ke Duke o Oleana, o ka ohana alii o Farani. Hiwahiwa ka mare ana o keia mau alii opio, a nani a nui palena ole no hoi na makana makamae o na ano a pau, no keia hui ana ae la paha hoi o keia mau alii opio o Italia a me Farani.
                     Aohe hoomaopopo aku o na Mana i ka hookohuia ana aku o Keka Pasa [Chakir Pasha] i luna nana no na apana ma Asia Uuku. A pela no hoi me Sa Pilipo Kere [Sir Philip Carey], ka Emebesedoa Beritania, aohe oia i lawelawe aku i kekahi keehina e pili ana ia Amenia mai ka pau ana o Haku Rosebere.

-

                     Nui ka mahalo o na makua mea keiki i ka hoike o ke kula o Hana'i, Kauai, ma ka la 3 iho nei. Ua hooikaika maoli no ke kumu e ao i na opio i loaa ka naauao ia lakou, aole hoi pela i na kumukula mamua aku.
                     Ma ka Mikahala o ka Poalua iho la i kau aku ai ko makou wiliki a mea hapala iniki a komikomi pepa, no ka mokupuni kaili la o ke kihapai o Kauai, a ua hala pu aku me ia ke Generala a Konela o ke alanui Liliha no ka hoohala ana i kekahi mau la welawela o Honolulu malaila, a e hala ana paha he mau pule ia laua mamua o ka hoi ana mai. E uhaiia ka olua huakai e ka oluolu mamua o ko olua alahele a hiki i ko olua huli hoi ana mai E ike wale aku ana i ka pahapaha o Polihale, ke ono kani o Nohili, a pela aku, hoomanao mai na maua kahi, ae no hoi paha. E lei pu hoi kakou i na hala o Mapuana ke loaa mai. Mai poina, ea, i ka hoomanao mai i kahi na ke aloha a kaua, ea!

-
L.D. TIMMONS,
[TIMONA].

                     Aia ma kona halekuai, kekahi o na keena kokoke ma Ewa loa o kela hale loihi mauka ae o ke kahua kahiko o Kaukeano, ma Alanui Beritania, e loaa ai na
Paihi o na Kane,
Na Papale,
Na Aahu Kane.
a me kela a me keia mau pono i pili wale no i kane
                     Aohe e hewa ke kipa ae a e nana a makaikai.

iune 24 1ml*
-
KALAHIKI.
HALEKUAI LAHUI.

                     Helu -, Alanui Moi, keena hana mua o ka Hawaii Holomua.
                     E weheia ana ka halekuai maluna ae i ka POAONO, MEI 11, 1895, a malaila e loaa ai na waiwai a me na lole hou loa o na ano a pau, no na kumukuai emi loa mamua o na wahi e ae.
                     Aohe hewa ke kipa mua mai a e ikemaka mamua o ka hele ana i na halekuai e ae.
M. PALAU.
mei 6-3ml Luna Hoohana.

-
J K KAHOOKANO

                     LOIO a he Kokua ma ke Kanawai.
                     KEENA HANA: Alanui Kaahumanu,
Honolulu. jan 8, '94-1mk

-
F.J. TESTA, (Hoke).
MEA OHI A KOI AIE.

Mea Huli Moolelo Aina a Waiwai e ae paha.
Mea Unuhi a Mahele Olelo Hawaii a Enelani paha.
Mea Hana Palapala Kanawai o na Ano a pau.
Mea Kuai Mikini Humuhumu Lole.
Mea Hoolimalima a Hoolilo Aina.
Mea Kuai Waiwai no ka Uku Komisina Haahaa.
Ua makaukau mau oia o lawelawe i na hana a pau e haawiia mai ana iaia. He kuike ka rula.
                     E loaa no oia ma keia keena. apr 8-1mk