Ka Makaainana, Volume IV, Number 3, 15 July 1895 — Page 7
HONOLULU, OAHU, POAKAHI, IULAI 15, 1895. 7
NA PALAPALA.
[Aole maluna iho o makou ke koikoi o na hala a me na hewa no na manao i hoopukaia malalo o keia noo, aka, aia no maluna iho o na poe na lakou a kakau mai.]
-
Ua Bapetizoia no o Ioane Bapetite, Pela e Pono ai ke Malama i ka Pono a pau.
E MR. LUNAHOOPONOPONO:
Ma kou helu 14 o ka la 10 o Iune, i ike iho ai au i ka Namakawewehi opio pane i ka olelo hooholo a Kaiakainui Kelemana, no ka bapetizoia o Ioane Bapetite. A o ka olelo hooholo, ua bapetizoia no.
Ma keia olelo hooholo, ua pii koke ke kai o kuu makamaka a "Hu i kula ka olelo hooholo, a kapakahi Manuia o Keokoi ka moku." A ma keia ke noi aku nei au ia oe, e nana ae i na hua e kau ae la maluna, alaila, e i iho no oe "hookahi wai o ka like" Penei e maopopo ai:
Ua bapetizoia no o Ioane iloko o ka opu o kona makuahine, pela i hoikeia ai ma Luka 1:15. "E piha no ia i ka Uhane Hemolele mai ka opu mai o kona makuahine." Alaila, e hoomanao iho oe i ka olelo a Ioane i na poe Parisaio a me na Sadukaio ma Mataio 3:11, hapa hope, "Nana oukou e bapetizo aku i ka Uhane Hemolele a me ke Ahi" Ma keia e maopopo ai, ua hookaawale mua no ke Akua i mea nana e hoopono pono i ke alanui a pololei no ka mea e hele mai ana, ka Mea Hoolapanai i ko ke ao nei ma ke kino o ke kanaka, i hiki ai iaia ke kala i na hewa o Adamu, oiai hoi, ua make mau na keiki a kanaka ma o ko Adamu mau hewa. Nolaila i hoouna mai ai ke Akua ia Ioane e hele mai me ka mana o Elia a me ka Uhane Hemolele, oia ka ke Akua kauoha ma o ka Anela Gaberiela la, i hoikeia ma Luka 1:19. Ua maopopo ua bapetizo mua ia no o Ioane. Ua olelo no hoi o Ioane, "Nana oukou e bapetizo i ka Uhane Hemolele a me ke Ahi." Nolaila, ua ike mua no o Ioane ma keia olelo ua bapetizoia oia mamua, oia kona mea i pane ai pela.
Eia hoi ka Iesu olelo ia Ioane, oiai hoi, oia no ko laua halawai mua ana i hoikeia ma Mataio 3.15 16, oia ka la i bapetizo ai o Ioane ia Iesu, "Pela kaua e pono ai." A ma ka pauku 15, ua hiki ia kaua ke kalele maluna o ia olelo hanohano a ko kaua Haku imua o ka mea i bapetizo mua ia. Pela iho la i hiki ai ia laua ke malama i ka pono a pau. Nolaila, aole he alanui e ae e hiki ai ke malama i ka pono a pau, koe wale no kela mana i loaa ia Ioane. Ua hoakaka mai no o Ioane, "Aole e hiki i ke kanaka ke lawelawe i kekahi mea ke haawi ole ia mai ia mana mai ka Lani mai." E nana ma Ioane 3:27. Eia hoi ka Iesu: "A i hanau hou ole ia ke kanaka i ka wai a me ka Uhane Hemolele, aole oia e komo i ke Aupuni o ke Akua."
Maluna o kela mau kumu e hiki ole ai ia kaua, e kuu makamaka, ke pii ae ma kahi e a hoole me ka ike mua ole. Oiai hoi, ua pane mai oe, aole he pauku e hoike ana mai Mataio a Hoikeana ua bapetizoia o Ioane. Pela io no, aka, mai manao oe ua pau pono na mea a Iesu i hana ai iloko o ke Kauoha Hou. Aole i pau. E leha malie iho kou mau maka ma Ioane 21:25. Pela no ma ke Kauoha Kahiko, aole i pau pono.
Nolaila, e apono aku kaua ua bapetizoia no o Ioane e like me me ia i hoikeia ae nei.
N.K. PIOPOOLE.
Laie wai, Oahu, Iune 19, 1895
-
Mai Paupauaho.
MR. LUNAHOOPONOPONO:
Oiai, o ke poomanao maluna ae, he mea ia ua maopopo pono ia kakou a pau, aohe pohihihi. Nolaila, ke hoike nei au i kuu manao imua o kuu lahui aloha, oiai, ke uiha mai nei paha lakou no ke kali ana i ka mea a kakou i kali hoomanawanui ai i na makahiki elua a oi i hala ae nei, a malia o i iho oukou, "Ua lawa ae la no ka hoomanawanui ana."
E akahele, e o'u mau hoa, e waiho ia mau manao nonohua a e kapae loa ma kulakula, a e hookomo iho iloko o ko oukou mau puuwai i keia mau huaolelo. "I nui ke aho," a e hoomanao pu no hoi i kela mau olelo a ko kakou Haku, "O ka mea hoomanawanui a hiki i ka hopena, e loaa iaia ke ola." A malia o hiki io mai ia manawa, o ke ola no ia.
Nolaila, e hoomanawanui, e ka io o kuu io a me ka iwi o kuu iwi, ua aneane e hiki mai ia la nui me ka hauoli, aole mea e kanalua ai. Mai puni aku i na apu koheoheo a lakou nei ma ae ke apuhi mai, ua like no ia me ka pakika o ka waha o ka wahine hookamakama, kohu meli e kulu ana, a o na daimonio ke puni ia lakou. A e hoomanaoia no hoi, e like me ka hoomanawanui o ko kakou Lani Moi e noho mai la iloko o ka inea, pela no kakou e pono ai.
Heaha la ka hewa ke noho kakou iloko o ka nele a me ka ilihune, oiai, he poe kakou ua maa mai no mai na kupuna i hala e aku. Ua oi aku no e noho kakou me ka nele a pahaneri na wahi apana poho maluna o ko kakou mau wahi awelu lole, mamua o ka ae ana e hoohiki aku malalo o keia Aupuni i makemake ole ia, a i lokahi ole ia hoi. Mai puni aku i na apuhi a ke Kuokoa, aka, e hoike i ke aloha i ka aina a me ka Moi, o ia ka mea oi aku; a e hoomanao pu hoi i ka Makua ma ka Lani, oiai, he kokua kokoke Oia i ka wa popilikia. A nolaila hoi, e pelu ko kakiu mau kuli ilalo, a e noi aku i ka Makua Lani e aloha mai ia kakou, a pela auanei e loaa ai ka lanakila ia kakou e like me ko na au Moi i hala aku.
Ano, e hoopau i na manao kanalua, no ka mea, ua kokoke mai ka hora e hookoia ai ko kakou mau iini, a e hoopauia ai hoi ko kakou noho'na pilihua. A ke noi nei au ia kakou a pau, a i hoea mai ia la, alaila, mai hookomo mai i na manao hauoli a lealea, aka, e hoonani aku i ke Akua no ka loaa ana mai o ia lanakila, pela auanei kakou e pono ai imua Ona.
HAENA.
Hanalei. Kauai.
-
Pane ia J. Kanui.
E MR. LUNAHOOPONOPONO:
Ua heluhelu au i ka pane a J. Kanui ia Mea Heluhelu, o ka Poakahi aku nei, a ua ike iho au i kana hoike ana ae, ua kakau aku au iaia ma ka palapala e noi aku ana i $5, a ua haawi mai oia. Ma kela wahi ana i olelo ae la "ua haawi mai oia," ke hoole loa aku nei au, aole he oiaio o ia, he hoopunipuni loa oia, a akahi no au a hoomaopopo i kela inoa i kapa mau ia aku iaia o Kale Kanui, mamuli o ko Kanui hoopunipuni a wahahee, a ua kapaia kana moopuna wahine ma ia inoa o Kale Kanui, oia hoi, Hoopunipuni Kanui.
E ae auua palapala aku au iaia e haawi mai i $5, me kuu manao e noonoo iho ana ka opu nui kalohe ona, ka naau apuka a wahahee o ua o Kanui, aia he aie kona ia'u no kuu luhi o ka hana ana i ka Leialii, kela nupepa ana i hoopoino ai i ke dala a kekahi o kona mau hoa'loha, a'u no hoi i uhailoloa ai iaia me ka bila a ka Halepai Buletina, oiai, ua kaohiia ka papapai e ua Buletina la no ke kaa ole o ka uku pai.
A o ka'u mea i ike ai i ua Kanui hoopunipuni nei, oia kona loaa ana aku ia'u e hamama ana ka waha iloko o ka paku makika, e pee ana, me hookahi kamaa i hemo a koe hookahi. A oiai, ua lohe iho ua o Kanui i kana luahine, "ke huliia nei oe e Mika no ke dala o ka pepa." A i ka luahine a Kanui i oili mai ai iwaho, ike koke mai la oia, a hooho ae la, "Eia no ua o Mika la ke hele kii hou mai nei," oia no ko Kanui wa i lele aku ai a pee iloko o ka paku. A oia ko'u wa i hele akuwai me ka manao ole ae i ka bela a me ka nani o ka uhi bela e halii ana, a hoala aku la i ke poo o ke kanaka kolohe, "E ala ae, a e hele e hookaa i ka uku o na poe pai nupepa."
O keia ka'u mea i ike ai no Kanui ana i hoolaha hewa ai ua haawi dala mai oia ia'u. Aole! aole loa no!! MIKA.
Honolulu, Oahu.
Hoalohaloha.
E ka makamaka maikai iloko o ka ehaeha.
W.H. CUMMINGS;
Aloha oe: - Oiai, ma ka oluolu o ke Kahikole Kiekie Loa, i ka lawe ana aku i ka hanu hope loa o Mrs Clarissa Cummings, kau wahine i aloha nui ia; nolaila,
E hooholoia: O makou o na lala o ke Kula Sabati o Kalihi a me Moanalua, ke komo pu aku nei me oe ma ka u pu ana me ka ohana pu hoi no kou iwi aoao i uhukiia aku, a me ka manao ehaeha a lihaliha pu hoi nona a no kaua mau hana maikai; oiai,
E hooholoia. He makuahine oia no na hua ohaha o ko olua kihapai, a pela hoi makou i manaolana ai e lilo o Mrs. Calrissa Cummings i makuahine no na opio e hapai pu ana i keia hana nani a maikai ma Kalihi nei. A no ka nui o kana mau hana maikai, aole loa makou e hoopoina nona. Nolaila,
E hooholoia: Ke noi ae nei makou i ka Makua Mana Loa, e haawi mai ia oe i ka maha, ka noho'na oluolu ana a me ka iini nui aku no ke ola hou, a Nana auanei e holoi ae i na waimaka.
O makou no me ka haahaa ma o ko makou komite la,
J.S. KEAWE,
C.G. KAULIA,
J.K. KAMAKEA.
Kalihi-waena, Iune 23, 1895.
-
HALEKUAI KUIKE OAHU
-
"KE OLA O HAWAII."
Oiai hoi, ua pau ae la ke kuahana ana, ua weheia hoi ka halekuai maluna ae i Iulai 1 nei, nolaila, ua makaukau loa e hooko a e hoolawa aku i na iini o na poo a pau. E ko no ka makemake o na wahine ke kipa mai malaila, a e pono no hoi ke kipa mua mai mamua o ka hele ana i na halekuai e ae. Malaila no e loaa ai.
Na Makalena, na Kalakoa, na Keokeo Halua me Vitoria, na Papale, na Kakini, na Hainaka, na Waiala, a pela aku a nui a lehulehu wale.
E ike mai ia kakou hoakanaka.
M.E. SILVA,
iul 8-tf Luna Nui.
-
Hoololi Hoahui.
Mai keia la aku e pau ai ko CHAN KEE noho ana iloko o ka Hui o KWAN TONG HING & COMPANY, e lawelawe, ana i ka oihana kalepa waiwai laulaha ma 315, Alanui Nuuanu, iloko o Honolulu. ma ka Mokupuni o Oahu, a ua komo aku hoi o CHAN MUN KAH iloko o ua hui la ma kahi o ka hoahui i waiho aku la, a o CHAN YOUNG o ka hoahui i waiho aku la, a o CHAN YOUNG a me CHAN MUN KAH na lala o ka hui i keia manawa.
(Kakauinoaia) CHAN KEE,
" CHAN YOUNG,
" CHAN MUN KAH.
Hanaia Iune 29, 1895.
iul 8-3 pl
-
Na Mea Kanu no ke Kuai.
Aia ma ke keena o ko makou Puuku e loaa ai kekahi mau mea-kanu i hoouluia no ke kumukuai oluolu. E ninau ponoi ae no iaia. iun 3-jul 1
-
Laau Ma'i Lepera.
Eia ia Kauka Ogawa (Kepani) he
Laau Lapaau Ma'i Lepera
maikai loa mai Iapana mai nei. aohe no e hewa ke hoao ae.
Uku haahaa loa no elua malama, ma ka $10 no kanakolu la.
Keena, - Alanui Hotele, kokoke i kahawai loa, Kikihale. iun 10-1 ml*