Ka Makaainana, Volume IV, Number 4, 22 July 1895 — Page 2
2 HONOLULU, OAHU, POAKAHI, IULAI 22, 1895.
LAUOMI DIHAE
—KA—
UI I MOHAIIA I KE KOKO
— KA—
NANI I ALANA IA I KA OI
O KA PAHIKAUA.
Ka Mea Huna Iloko o ke Kiaha Waina;
Ka Mea Pohihihi i ka Maka o ke Kuikele.
— A O KE—
KEIKI NUMA REDINA
KE
Komo Lima Maka Popoki.
MOKUNA XVIII
Ka Aha hookolokolo a na kupua— Kau ka weli i na kiai o ke Kihapaipua o Numere—Huai puka nui ia na pihaa moewai o kahawai—Ke kilokilo wahine e oloio ana iwaena o na kiai.
Kulou iho la ia no keia mau olelo a kona haku, a i ka hope loa, lele aku la ia no ka aina hikina a ma na mauna Urala a me Pirene e hoomaha iho ai iloko o ke kau a me ka hooilo. A pau ae la ka ikeia ana o lakou ma ke Ao Olino no ka manawa pau ole.
Maanei e nana aku kakou i ke alahele huli hoi, a na kamahele me ka lakou mea i iimi mai ai, a me na olelo kaukau a ke kupua no ke aloha i kana mea i luhi ai.
I ka wa i pau ae ai na manao hoopoluluhi kaumaha maluna o ua kiai la o ka Po, ea ae la kona poo iluna a lele aku la no na Mauna Urala me ka haalele ana iho i kona haku aloha o na la i hala ae, e noho ana me ka manao pono ole.
Iaia i hala aku ai no kona wahi hou e noho ai, huli ae la ke kupua a nana i ka halealii o kana hanai a kahea aku la i ua kaikamahine la e hele mai iwaho e hoolohe ai i kana olelo hope imua ona.
Hele mai la ua kaikamahine la me na kaina wawae o ke kaumaha, a ma kahi he mau anana ka mamao mai kahi a ua kupua la e noho ana, a pane mai la "Heaha ka makemake o kuu haku i kahea ae nei?"
Aole i pane koke mai ke kupua no keia mau olelo a kana hanai, aka, o kona mau maka ka i nana mai me ka huhu nui, a he manawa loihi mahope mai akahi no ia a hoopuka mai i ka huaolelo.
"E nana aku kou mau maka i ka waiho ana o ka aina i keia wa no ka manawa hope loa. Nou wale no i pau ai ka nani o ke Kihapaipua o Numere."
Nana aku la o Lauomidihae me na helehelena ano e maluna o kona makua no kekahi manawa loihi, alaila, pane aku la oia:
"E hele au mamuli o ka mea a'u i aloha ai, a haalele iho ia oe e noho hookahi iluna o ka aina au i luhi ai me kou mau kanaka. Aole loa lakou e hookauwa hou mai na'u ma kela mua aku."
"E hele, e hele aku oe no kahi au i makemake ai," wahi a ua kupua la i pane mai ai i kana hanai iloko o ia manawa.
Huli koke ae la no kaikamahine la a kahea aku la i kona mau hoahele e haele lakou a e haalele iho i ka nani o ke Ao Olino mahope o lakou.
Eia lakou ke hele nei i keia manawa iluna o na aa pele, ke pii la iluna o na puu, e iho ana ma na awawa, a ke nana mai la hoi lakou mahope nei me na manao aloha i kahi a lakou i hiki malihini ai, a hu ae la ke aloha no ia aina.
Nawai hoi e ole ke aloha, no ka mea, ua ike kumaka maoli no i ka nani o ka aina i na la mamua aku, ka moani aala o na pua like ole, ka uluwehiwehi o ka aina i na laau like ole, a me ka nani oluolu maoli no a ka maka ke nana aku. Aole he mea e hoohalahala ae ai. Ae io no hoi, nani maoli aku la.
Ia lakou e hele nei o na lima o na wawae iho la kahi e hele ai maluna o na aa pele, a e kaniuhu mau ana hoi ua poe la no ka nui o ka luhi. A o ia ka Lauomidihae i pane ae ai me ka nana ana aku i kahi ana i noho ai o na la i hala:
"I ka wa o'u e noho ana i ka poli o kuu makua, aole loa au i hanaia e like me keia, aka, i nei wa ke ike nei au o na lima o na wawae pu kekahi ka mea i hana ole ia e a'u i ke alo o ko'u makua. E hoi hou au i ke alo o ko'u makua, a e hoike aku iaia ua hana hewa loa aku au imua ona. Ae, e hoi hou no aui"
Huli ae la ia a hoi aku la, a aole i liuliu loa aku kona hele ana, huli mai la ia a nana ia Numaredina me kona mau kaikuahine e noho ana iluna o na puu aa pele, hu mai la ke aloha iloko ona no kana ipo.
Nolaila, hoi hou mai la oia a loaa kana aloha, lele aku la e honi me ka olelo pu aku:
"Ua hewa, ua hewa loa au imua o kou alo e kuu aloha, a aole loa au e haalele hou ia oe e hele hookahi aku maluna o keia aina."
[Aole i pau.]
E lawe i KA MAKAAINANA i ike i na mea hou.
WAIHO NOHOALII.
O ke Aliiaimoku a Lawe ai Oia i ka Hoohiki.
[Koena mai ka Helu 3.]
Alua— No'u iho a no ko'u mau hooilina, hope, ma keia me ka hookoe ole i kekahi manao, a me ke ano piha, a no ka manawa pau ole, a me ka hiki ole ke hoololi hou, ke haalele, waiho a hookuu aku nei au i ke Aupuni o ka Repubalika o Hawaii a me kona mau hope ma ke kanawai no ka manawa pau ole i na kuleana a pono o na ano a pau i ka nohoalii iho nei o Hawaii, a i ole ia, ke Aupuni Moi iho nei o Hawaii, a i ole ia, i kekahi hapa, a i ole ia, i ke Aupuni ku nei, a i ole ia, i kekahi aupuni ma keia mua aku o Hawaii, a i ole ia, malalo, a i ole ia, mamuli o kekahi kumukanawai e ku nei, a i ole ia, ke kumukanawai mua, kanawai, kulana, kuleana a koena paha o kela a me keia ano a inoa paha, ina paha ma ke ano pono waiwai a kulana a pomaikai kino paha, a ma keia no ka manawa pau ole ke hookuu, haalele, hoole a hoopau loa i na pono, na kuleana, na koi, na pomaikai, na hanohano, a me na mana o na ano a pau malalo, a i ole ia, mamuli o kekahi aupuni mua, a i ole ia, ma ke Aupuni e ku nei, kumukanawai, kanawai a mea maa mau paha o ko Hawaii Paeaina o na ano a pau, koe wale no na kuleana a me na pomaikai i pili ia'u ma ke ano like me na kanaka a pau e noho ana ma ka Repubalika Hawaii.
Akolu— Ma keia ke nonoi nei au me ka mahalo no na kanaka Hawaii a me kekahi poe e ae i alakai hewa ia iloko o ke kipi ana iho nei e kue ana i ka Repubalika o Hawaii, e loaa ia lakou na haawina aloha e hiki ai i ke Aupuni ke haawi aku ia lakou ma ke ano kaulike me ka mea kupono i ka pono o ka lehulehu, a me ka noonoo pono ana i na kanawai i uhakiia.
Aha— O ko'u makemake io nae mai keia wa aku e noho wau ma ke ano kaawale a komo ole iloko o ka lawelawe ana i na hana o ka lehulehu o ko Hawaii Paeaina, koe wale, no ka hoike aku e like pu me a'u e hoike aku nei i keia manawa, a e hoike mau aku ai i ko'u manaolana oiaio no ka pomaikai a me ka holomua o Hawaii a me kona mau kanaka malalo o ke Aupuni o ka Repubalika o Hawaii.
Alima— Ma keia ke hoike aku nei wau i ko'u hoohiki kokua i ka Repubalika o Hawaii i hooiaio pono ia.
Aono— Ua kauoha wau e hanaia na olelo mamua aenei a ua kakauinoa aku wau ia mea me ka loaa ole mai ia'u o kekahi olelo ao mai ka Peresidena mai o Hawaii, a i ole ia, mai kekahi lala a luna paha o ke Aupuni Hawaii e pili ana ia mea, a i ole ia, i kekahi paha o ia mea, a i ole ia, i kekahi hana a manao paha o'u ma ia mea.
Me ka hilinai i ke Aupuni Repubalika a me kona hoomalu mai ia'u.
Ua loaa mai ia'u ka hanohano, e Mr. Peresidena,
Me ka Mahalo,
Kau Kauwa Hoolohe,
LILIUOKALANI DOMINIS.
Ma keia la 24 o Ianuari, M. H. 1895, ua heluheluia a noonoo akahele ia ka palapala mamua ae nei e Liliuokalani Dominis imua o ko makou alo, a o Liliuokalani Dominis i oleloia, ma ia manawa a imua o makou ua hoike mai he hoakaka pololei a piha no ia o kona makemake a me kana mau hana ma ia mea. A o ia palapala ua hoakaka mai oia ia makou ua makemake oia e kakauinoa a e hooiaio imua o makou o ia no kana hana ponoi mamuli o kona manao ponoi iho, a ma ia manawa ua kakauinoa oia ma ua palapala nei imua o makou, a ua hoike mai o ia no kana hana ponoi mamuli o kona manao ponoi iho.
I hoike no ia mea ma ke kauoha o Liliuokalani Dominis i oleloia a imua o kona alo, ke kakau nei i ko makou mau inoa ma ke ano he mau hoike ikemaka, ma ka Hale Mana Hooko o ke Aupuni ma Honolulu, Mokupuni o Oahu, ma keia la 24 o Ianuari, M. H. 1895.
W. G. IRWIN, H. A. WIDEMANN, SAMUEL PARKER, J. KALUA KAHOOKANO, CHAS B. WILISON, PAUL NEUMANN.
HONOLULU, MOKUPUNI O OAHU. SS.
Ma keia la 24 o Ianuari, M. H. 1895, ua hiki kino mai imua o'u o Liliuokalani Dominis, i ikeia e a'u oia no ka i oleloia maloko a i kaukauinoa i ka palapala mamua ae nei, a ua ae mai oia imua o'u ua kakauinoa no oia mamuli o kona manao ponoi iho no na hana a me na kumu i oleloia maloko.
( SILA) W. L. STANLEY, Notari no ka Lehulehu.
(Aole i pau.)
Na Mea Kanu no ke Kuai.
Aia ma ke keena o ko makou Puuku e loaa ai kekahi mau mea-kanu i hoouluia no ke kumukuai oluolu. E ninau ponoi ae no iaia. jun 3 - jul 1