Ka Makaainana, Volume IV, Number 5, 29 July 1895 — Page 3
HONOLULU OAHU POAKAHI, IULAI 29, 1895 3
kapaia ka Na'i Aupuni. Pela i maopopo ai he alii o Kamehameha i kaheia mai o ke Akua, e hoomakaukau i ke alanui no Iehova, e hana hoi i ke kuamoo a pololei no kona euanelio.
A make o Kamehameha I. i ka M.H. 1819, lilo ka hooponopono o ke aupuni ia Liholiho a me na alii iho. Na Liholiho i hoopau na hana ai kapu o ke au kahiko a komo lanakila ka euanelio i Hawaii nei i ka M H 1820, me ke keakea ole aku o na alii a me na makaainana, no ka mea, ua hoopalupalu mai ke Akua i ka naau o na alii a me ka lahui.
E huli aku kakou a nana i na hana a na keiki Hawaii e noho ao ana ma na kula kahunapule o Amerika. I ka hui pu ana o Opukahaia me Hopu a me na keiki mua, ua hooholo like iho la e komo i ke kula kahunapule A eia iho na halekula o lakou i aoia ai a loaa na palapala hoomaikai no 110 makahiki, oia o Nu Havena, Tirinifada, Honsa Gosena, Litifila, Avnehesola, Konawala, Anedovera, Mahinaai Hema (South Farm). Ma ke kula o Konawala i noho like ai lakou elima a mahope komo i Mahinaai Hema. A ma ka halekula o Anedovera i hui like ai lakou me Binamu a me Kakina, a pela i kamaaina e ai mamua o ka holo ana mai ianei a na noho like iho la ilaila e ao pu ai. O Opukahaia nae ka i laweia ae i keiki na ke kula mikanele o Mahinaai Hema, aka, ua noi aku lakou elima iloko o ha ahahui kula kahunapule o Mahinaai Hema e hoounaia i poe misionari i Hawaii nei. Mamuli o kela noi a lakou i wehe mua loa ia ai ka puka o Hawaii nei no ka euanelio.
[Aole i pau]
-
Na Hana Imua o ka Hui Aloha Aina a na Wahine o Lahaina, Maui.
E MR. LUNAHOOPONOPONO:
Ma ka la 10 o Iulai ua kaheaia ka Hui Aloha Aina a na wahine o Lahaina e akoakoa mai no ka halawai ana, a ma ka la 11 i noho ai, mamuli o ke noi a kekahi mau lala o ka hui no kekahi kumu manao; oia hoi, e noonooia i wahi paina, a i ole ia, i wahi makana e ae paha na na pio kalaiaina o Hilo i hoi mai nei ma ke Kinau. Ua heluhelu mai ke kakauolelo i ka palapala noi a ua wehewehe iki mai la ka Lunahoomalu, a pau kana, ua ku mai la o Misasa Apo a noi mai la e hapaiia ua manao la i kumuhana, a e oluolu ka mea nona ka manao e ku a e hoakaka mai. Ua ku mai la ke komite Misasa C B Cockett a wehewehe mai la penei: "He wahi manao i loaa mai ia'u, oia hoi keia, ina he mea hiki ka lawe ana ae i kekahi mau dala o ka waihona o ka hui, e waiho nei ma ka lima o ka puuku, no ka hoolilo ana aku i wahi mea paina, a i ole, i wahi makana e ae paha, no ka hoike ana aku i ko kakou aloha no na pio aloha aina." Ua ku mai la ka elele o ka hui, Misasa Makalua, a kue aku la i ka manao o ke komite; "too late," wahi a ka haole, "a aole no au e ae e laweia kekahi dala o ka waihona." Ia manawa ua kokua mai la ua lala a pau o ka hui, a eia ka mea apiki, ua kue koke mai la na lala a pau i kakauinoa malalo o keia kumu manao, no lakou na inoa, Misi Alice Aiona, Misasa Kahele Henau, Misasa Kamalu Hoopii, Misasa Mary Kahoowaha, Misi Alice K. Shaw, Misi Kaula Shaw, a o ka noa hope, aole oia i hiki mai.
Ku mai o Misasa Kauwenaole a hoike i kona manao ku i ke aloha, penei. "Heaha hoi ka hewa, ina kakou e lawe ae ana i kekahi mau dala o ka waihona o ka hui, a hoolilo aku i mau wahi makana na lakou, a ina hoi no ko lakou hookuu laula ia m-i, alaila, e paa mai kakou ia lakou a hiki i ko kakou wa e hookuu aku ai ia lakou a na kakou e nana no ko lakou uku moku; no ka mea, o ka manawa keia e hoike ai i ko kakou aloha no lakou, a ina e hiki io mai ana ka la a kakou e manao nui nei, alaila, he mea hiki no i kela lala a i keia lala o ka hui ke kokua hou no na mea o ia la a oi aku." Ua nui mai la no na kue o na lal.a o ka hoi i akoakoa mai. He nui ka hauwalaau waiwai ole iloko o kela manawa, aole hoi ke kuka me ka maikai, no ka hiki, a no ka hiki ole. Aka, i kinohi no, hoopuka ka hua kue Ua manao ke komite, he wahi mea uuku loa keia ina he lokahi a noonoo pono na lala o ka hui, o kahi paha, no ke kaa e ana o ke noi mua ma ka aoao o ka malihini, pela paha i hoopio wale ai na kamaaina i ka manao maikai. Aia iloko o ka aoao kue e hoomaopopoia ai, he makua he keiki a he mau kaikuaana, mau kaikaina, mau kaikoeke, mau moopuna a me na hoa'loha kamaaina. O keaha la ka ke kahua o ke aloha aina i ko lakou nei manao? Ka i no hoi o ia iho la, o na kokua ana aku i na pio aloha aina, na poe hoi i mauna i ko lakou oia mamuli o ke aloha i ka aina, eia nae, puliki no lakou nei i ka puu dala a hiki mai ka la nui i manaoia, o ke kahua iho la paha ia o ko lakou nei aloha aina. Ke ku mai nei ka Hui Manawalea o Honolulu, aohe nae keia hui e ku a hookomo wahi kokua aku no ia hana maikai, a na maka maka aloha aina io.
KAHIKINUIALEIMOKU
Lahaina, Maui, Iulai 10, 1895
-
Ma ka wanaao o ka Poakolu nei, ma Kepohoni, i haalele mai ai i keia ola ana o Misi Epena Luahine. Ua piha iaia ka 15 a oi makahiki. Auwina la Poana mai i nalo ai ma ka ilina o Kawaiahao.
LAUOMIDIHAE
-KA-
UI I MOHAIIA I KE KOKO
-KA-
NANI I ALANA IA I KA OI
O KA PAHIKAUA.
-
Ka Mea Huna Iloko o ke Kiaha
Waina,
Ka Mea Pohihihi i ka Maka o
ke Kuikele.
-A O KE-
KEIKI NUMAREDINA
KE
Komo Lima Maka Popoki.
-
MOKUNA XVIII
Ka Aha hookolokolo a na kupua = Kau ka weli i na kiai o ke Kihapaipua o Numere - Huai ouka nui ia na pihaa moewai o kahawai - Ke kilokilo wahine e oioio ana iwaena o na kia.
Me keia iho la i hoomau aku ai ua poe la i ka hele ana malu na o na pohaku aa pele a hoea wale no i na lae kahakai. Noho iho la lakou malaila a nana aku la iluna o na ale o ka moana e waiho ana imua o lakou, a ke kali la hoi me ke ake ana e loaa ne mea nana e kokua mai ia lakou.
Ia lakou e noho ana pela, e nanea ana i ka nana ana i na mea like ole a ka maka e ike ana, aia hoi, ikeia aku ia kekahi waapa uuku e holo mai ana ma kahi mamao loa a he hookahi wale no kanaka o luna e noho ana, a e uneune malie ana hoi oia i ka hoeuli o kona waapa A i kona hookokoke ana mai me ka huli o kona alo i kahi e akahi no a hoomapopo aku o Numaredina, o kona pokii kaikaina no ka ia.
Nolaila, huli ae ia ia me na manao hoihoi a kamailio iho la i kona mau kaikuahine a me kana aloha:
"E ahonui mai oukou, e i ae ko kakou alanui e hoi aku ai."
Ia pau ana no o kana mau olelo kau mai la ka ihu o ua waapa la i kahaone, a o ia no hoi ka manawa i oloia mai ai kahi luahine a ke kolohe nui wale imua o lakou, a pane ae la, -
"E hoomakaukau, e na keiki; eia ke alanui e hoi aku ai i kahi a kakou i hele mai ai. E kau, e Numaredina me kau aloha no ka home kakela lana i ke kai, a e ukali aku hoi kou mau hoa hele mahope ou. E wiki."
Eu like ae la ua poe la a kau nui aku la iluna o ka waapa, a o ka mea kupaianaha loa i ka Lauomidihae hoomaopopo aku, o ia no ka pane leo ole mai o ka mea e noho ana iluna o ka waapa. A ua lilo i mea kahaha loa i kona noonoo.
Kau ae la lakou a pau iluna o ka waapa a iloko o ke kuehu hookahi ana a na mapuna hoe a ua kanaka eleele la, aia ua wahi waapa la ke halahia la iluna o na ale, aole nae hoi lakou i hoopoino i na kamahele aumoana a ke ahonui wale.
Ke hoomau nei lakou i ka holo ana iloko o ia manawa a hala na la he nui, me ka hoololiloli mau ana i ko lakou alahele moana. A i ka hope loa no hei, pae aku la ko lakou wahi waa aukai iluna o ka aina o Moleka, ka Pilikua Anela.
Maluna o keia aina i hoomaha iho ai ko lakou mau kapuai wawae a hooluolu iho la maloko o ua paia o ka halealii dala o ua pilikua la.
Hala ae la he mau la o ka noho ana i ka lai o ua aina la, hoolale ae la ua poe la no ka hai ana i ka aina o Siama, ka aina o ke keikialii imi hoapili o ka po anu, e like me kela mau eu kaulana. (E imi ana paha i ka Mea Pohihihi i ka Maka o ke Kuikele kamahao.)
Ma keia wahi he alahele okoa loa ko lakou i hoi aku ai e ike me na kuhikuhi a ka luahine kilokilo. Ia lakou e nanea pela i ka noho, ku ana imua o lakou kekahi kaa nui e hukiia ana o na moo nunui eono, a maluna o ua kaa la e kau ana ke kalaiwa me kona aahu ulaula.
Ku iho la ia ma kahi a lakou nei e noho ana a kau aku la lakou iluna. Iloko o ka imo ana a ka maka, aia ua poe la iloko o kekahi luawai kahi i lele ai me ua kaa la, a no na minute pokole wale no aia lakou iloko o ka hale o ke kilokilo wahine kahi i noho ai; a e noho mai ana hoi ua wahi luahine la me ka hoihoi mamua o lakou. E a ana iloko o kona hale a puni na ihoiho kukui, a na lilo ia he mea mahaohao loa i ka manao o keia poe.
-
HALEPAI MAKAAINANA.
-
F.J. TESTA (Hoke) - - Ona
Aia ma Alanui Konia, mauka o ke kihi Akau, ma ka huli ma Ewa, o Alanui Moi.
Ua makaukau loa e hana i na ano hana paipalapala a pau loa, e laa
Na Bona,
Na Aelike,
Na Laikini,
Na Palapala Kono,
Na Likiki,
Na Bila-poo,
Na Hoolaha Pai Alanui,
A pela aku, a pela aku.
NA HANA BUKE A ME PAI NUPEPA.
Aia malaila e paiia nei na nupepa "Ka Makaainana" a me "Ke Kuokoa" namu.
E hookoia no na kauoha me ka hikiwawe a me eleu. iul 14-mhp