Ka Makaainana, Volume IV, Number 6, 5 August 1895 — Page 6
6 HONOLULU, OAHU, POAKAHI, AUGATE 5, 1895.
NA AINA MAMAO.
-
Na Lono Huikau mai kela a me
keia Wahi o ke Ao Nei.
-
Tureke ma Amenia a me Masedonia.
No Konakinopela, Tureke, mai ka lono o Iulai 21, e hoike ana ua hookohu aku ke Suletana ia Seika Pasa [Shakir Pasha] i mea nana e hoomalu aku i na hooponopono ana ma Amenia. Ua manaoia he haawi pio ana aku keia i ka makemake o na mana, a ke koikoi nui la no hoi no kekahi hoike moakaka loa no na ano hooponopono a hoomaemae ana a tureke i manao ai e hooko.
Ua hoolahaia ae ma Ladana, Iulai 21, ua ulu ae he hakaka hahana loa me na kipi ma Diju ma, ma ka palena o Bulegaria me Masedonia. He 1,000 poe kipi i lele kamoko aku e kaua i kekahi mau pualikoa Tureke a ua hoauheeia na koa me ka poino nui. Nui no hoi ka poino o na kipi. Kupilikii loa ke kulana malaila.
Aia o Tureke ke hoopuuluulu la he pualikoa nui o 20,000 kanaka ma Masedonia, pela ka lono mai Konakinopela i loaa ae ma Ladana, Iulai 23. Ua ulele hou ae no na kipi me na koa ma Usekupa, a he 13 i make a me 30 i oha. Nui ka hoopahaohao o neia mau hana, no ka mea, hoolahaia ae i kahi la, a i kahi la mai hoi, hoole pili oihana ia ae, e like no me ke ano mau o na luna oihana Tureke.
Ke manao la ko Suletana o Tureke e hoouna ae i Galilea Be, ka mea hoolauna o na luna oihana kuwaho kiekie, i Roma no ke noi aku i ko ka Pope komo uwao mai ma na ninau i ulu ae e pili ana no Amenia mawaena o Tureke a me na mana.
Liuliu Hou o Iapana e Kaua.
O ka aie lahui hoi o Kina, ua oleloia ua loaa no ke dala mai ia Rusia mai, ma ke Sileva wale no nae. Mamuli paha hoi o keia, ke koi paakiki loa la o Rusia i ko Iapana, haalele loa aku ia Kina, a oi loa aku hoi, i ka Puali o Liao Tuna. Ua ae no o Iapana i keia koi, ina nae hoi o Kina e uku ae i ke poho no ia haalele a hookuu ana aku ona, i $37,500,000, a me he la, o keia koi hou ka mea e ulu io mai ai o kekahi paonioni kaua hou ana mawaena aku o Rusia a me Iapana. Aia o Iapana ke hooikaika loa la o hoomakaukau no kekahi hooili kaua oi aku o ka nui mamua ae o ke kaua i pau ae la, a ua pau nui aku na pualikoa i huli hoi ae mai ke kahua kaua i ka hoounaia i ka akau no ka lawe mai ia Korea i ko ka Bea Keokeo wa e hoike ae ai i ke koke a aiai o kona mau niho malaila a ma Manakuria paha. Ma ka hoomaopopo aku nae hoi, me he la e huli aku ana na mana Europa hou i hoohui ae ia lakou iho no ke kiai i na hana ma Asia, malalo o ka noho poo ana a Enelani me Italia, ma ka aoao e kakoo aku ana mahope o Iapana.
Koi Hookikina o Rusia ia Iapana.
Iulai 11 aku nei i koi aku ai o Kama'lii Lobanofa Rosetoyosiki (Lobanoff Rostovoki), Kuhina o ko na Aina E o Rusia, ia Nisi Tokujiro, Kuhina Iapana i Rusia, e hoike maopopo aku iloko la o ka manawa hea i manao ai o Iapana e haalele iho i ka puali o Liao-Tuna. Ua pane aku ke Kuhina e paa no o Iapana ia wahi a hiki i ka wa e hookaa pau ia ai o ke koi poho kaua e ke Aupuni o Kina a me ka uku pu ia aku hoi no ka hookuuia aku o Liao-Tuna. Aohe i ae mai o Kama'lii Lobanofa i keia pane, a ua kauoha koke aku i ka Emebasedoa Rukini ma Tokio e koi aku i ke Aupuni e hoomaopopo mai i ka la no ka unuhiia aku o na pualikoa a pau mai ka aina nui aku o Kina. Ke kaliia aku nei keia me na manao kupikipikio, a o keia ana no paha hoi na kumu e ala io ai o ke kaua mawaena o ka Aina o ka La Hiki a me ko ka Bea Keokeo aina.
Powaia Kuhina Nui Mua o Bulegaria.
Ia Kuhina Nui i pau, M. Setamabulofa (Stambouloff), i ukaliia e M. Pelikofa, e u hoi wawae ana no kauhale i ke ahiahi o Iulai 15, ma Sefia, ua lele aku eha poe i ike ole ia e pepehi iaia, elua i ki aku me na pupanapana a elua i hou aku me na pahi. Ua hina koke iho la oia ilalo me ka nunulu ana. Mai ia wahi aku oia i hoihoiia ai no kona home a kauohaia na kauka, a mahope iho o ka nanaia ana, aohe i manaolanaia e ola ana oia. Ua eha oia ma na wahi like ole i oi aku i ka iwakalua. Iaia i hapai ae ai i kona mau lima no ka hoopakele ana i kona poo, ua kokoke e moku loa kona mau peahi lima ma na ami, nolaila, ua oki loa ia na lima a elua. Ua loaa eha iki no o Pelikofa. Hookahi o na hiona i paa i ka hopuia.
Ua manaoia ua komo pu na makai iloko o keia hana hilahila ole maluna o ke kalaiaina loea, ka mea nona ka oleloia ana oia ka makua o ke kuokoa ma ia aina. I kahi la ae, ua ano pohala iki ae oia, a ua kauoha koke ia kahi lunakanawai e hele ae e lawe i kana mau olelo ike. Ua hoike aku oia ua hoomaopopo no oia i kekahi mau hiena elua a me ko laua mau inoa, a o kekahi hoi o laua ua hoopaiia ma Tureke no 18 malama hoopaahao no ka lawe ana i ke ola o M. Vulekovita. Lehulehu na poe i hoike ae, iwaena o lakou he lala kahi no ka Ahaolelo, ua keakeaia ko ke Kuhina Nui kanaka lawelawe pilikino o na makai mai ka uhai ana aku mahope o na hiena limakoko. Wahi no hoi a ka lakou hoike ua hoea koke aku no ka luna makai mahope iho o ko ke Kuhina haule ana ilalo o ka honua, ua uhau aku oia i ke kanaka lawelawe ma ka a-i me kana pahikaua, a loaa he eha kukonukonu a ehaeha loa. He mau halawai ka ua poe o na aina e i malama ai, no ka noonoo ana i na mea no ka hoopakele ana ia lakou mamuli o keia ano hana hilahila ole o ka poeleele.
Na Hunahuna Laulaha.
Ke hoaano mai la o Bolivia a me Peru e hooili kaua ia laua iho.
Ua okiia he alahae-mahu a ua hoopoinoia hoi na wahi hoolulu a me na alahaka e na kipi ma Cuba.
He 50,000 poe ma na kaa hehihehi wawae i kahi huakai nui ae ma Kikako i ka La Poa Kiulai aku nei
Aia na poe Pake hoohaunaele ke hanaino la i na poe misionari ma kekahi mau wahi kuloko o Kina. Aohe keakea aku o na poo oihana i ka lakou mau hana hoopoino wale.
Iulai 27 aku noi i manaoia ai e haalele aku ana ka moku heihei Valakairi III. ia Enelani no Nu Ioka, no ka hoopapa hou ana no me ko Amerika moku heihei oi loa no kela Kiaha Amerika.
Ua kono aku ka Moi Oseka o Suedena ia M. Thorne, he Kuhina Norewai mua a he mea hoi no ka aoao Kahiko, e wae ae i Aha Kuhina hou e hoohui ana i na aoao paee a pau o Norewai a me Suedena. Iulai 21 nei oia i ae aku ai i ko ka Moi manao a e hoao ana oia.
O ke kikiao makani oolea mua loa i pa aku ia Nu Ioka no kekahi mau makahiki loihi i hala ae, ua loaa aku no ia i Iulai 13 aku nei, a ua lehulehu na kauhale i poino a me na ola i make Iwaena o na kauhale i poino, o ka luakini Holani a me kekahi kahua hoolulu alahao-mahu.
Ia Sa Uilama a me Lede Hakota e u hoi ana ma ko laua kaa mai kekahi halawai koho balota ma Enelani mai nei, ua hailukuia aku laua e ka lehulehu me na okumukumu kapiki popopo a me ka opala. Ua hele o Lede Hakota a paumaele me ka ekaeka, aohe nae o kona aahu a kahe ka wai lepo maloko o kona a-i.
Wahi a ko makou kiu hanu mea hou, he keu aku o ka ekaeka o ka hana a kekahi mau iwi palupalu i hoonaauao maikaiia, he ala ka hana o ka po a ae me na ilio huluhulu me ka hana pu i na hana lapuwale, me ka i pu iho, "Aole o makou makemake e hoolahaia iloko o ka nupepa." A pehea ka e hoomau nei i ka hana ana i kela mau hana lapuwale? He maneo ea!
-
Dr. W.D. JONE,
[KAUKA IONE.]
Kauka Lapaau no na ano ma'i a pau o loko o ke kino, fiva taifoida, maka eha, niho eha, puu eha a me na ano e a pau e loaa ana i ke koko ino a me na palapu e ae. Aole ana mau okioki a kolikoli ana. Hiki loa iaia ke lapaau i na ano ma'i a pau loa, a ke loaa ole ka oluolu, aohe uku ana, ina nae hoi nana wale no e lawe awea mea i ma'i.
MANAWA HANA: Hora 9 a 11:30 A.M.; i a 6 P.M.
KEENA: Alanui Konia, ma na keena mauka loa o Birito Hale, ma ka huli ma Ewa ma ai Nui Moi aku. mei 13-3ml
-
Na Mea Kanu no ke Kuai.
Aia ma ke keena o ko makou Puuku e loaa ai kekahi mau mea-kanu i hoouluia no ke kumukuai oluolu. E ninau ponoi ae ao iaia. iun 3-jul 1
-
HUI KAMAA O NA POE
HANA.
POE KALEPA NUI A LIILII I NA
ANO KAMAA A PAU LOA.
Helu 516, Alanui Papu, ma Kauhale Hou o Burua.
Honolulu,
P.H. iul 15-tf
-
E.M. NAKUINA.
KOMISINA O NA ALA LIILII A ME
NA PONO WAI.
Notari Lehulehu, a he Agena Haawi Palapala Ae Mare no Honolulu nei.
KEENA HANA: Helu 308, Alanui Kalepa. dk 3-1mk.
-
KALAHIKI.
HALEKUAI LAHUI.
Helu -, Alanui Moi, keena hana mua o ka Hawaii Holomua.
E weheia ana ka halekuai maluna ae i ka POAONO, MEI 11, 1895, a malaila e loaa ai na waiwai a me na lole hou loa o na ano a pau, no na kumukuai emi loa mamua o na wahi e ae.
Aohe hewa ke kipa mua mai a e ikemaka mamua o ka hele ana i na halekuai e ae.
M. PALAU.
mei 6-3ml Luna Hoohana.
-
G.E. SMITHIES,
[KEOKI KAMILA.]
Mea Hooponopono Hoike Helu, Mea Ohi a Koi A e, Mea Kakau Kope, a Mea Kalepa Aina.
KEENA: Helu 406, Alanui Papu, ma ka Hale Opunui.
Telepone Helu 184. mei 27-3ml
-
F.J. TESTA, (Hoke).
MEA OHI A KOI AIE.
Mea Huli Moolelo Aina a Waiwai e ae paha.
Mea Unuhi a Mahele Olelo Hawaii a Enelani paha.
Mea Hana Palapala Kanawai o na Ano a pau.
Mea Kuai Mikini Humuhumu Lole.
Mea Hoolimalima a Hoolilo Aina.
Mea Kuai Waiwai no ka Uku Komisina Haahaa.
Ua makaukau mau oia o lawelawe i na hana a pau e haawiia mai ana iaia. He kuike ka rula.
E loaa no oia ma keia keena. apr 8-1mk