Ka Makaainana, Volume IV, Number 8, 19 August 1895 — Page 8

8 HONOLULU, OAHU, POAKAHI, AU GATE 19, 1895.

[Hoomauia mai ka aoao 5.]

pelukua, a pela hoi i pakele nui ai. Nolaila, ina o ko Beretania Nui manao ia ma ko Akepoka hihia, alaila, he aha hoi ka manao ma na hihia e ae.

He keu no hoi paha a ka apiki, pau na poe alakai mawaho nei, e laa o Samu Nolena, Hanale Bakalamana, Kale Kalaka, Kale Warena, Keoki Taonasena, Kapena Davisi, a me kahi poe e iho, aka, o na poe hoi a lakou i kono ai e komo pu aku ma kela hana alakai lala i o Ianuari i hala ke noho ae i ke puhi. Ina paha o ia poe ke paa nei, alaila, aohe a makou olelo ana, ua pono loa no.

Imua o ka Aha Apana i ka Poalima nei, ma ka hihia o kekahi hookele kaa hali ohua nui o ka Hui Alahao Hawaii, mahope koke iho o ko ke Aupuni kukulu ana ae i kona hoike hookahi, oia ka makaikiu haole malihini, ua manao kahi loio Aupuni ua lawa ia ike e ahewa ai. Ua noi ae hoi o Loio Numana o ka hui e hookuuia ka mea i hoopiiia, aka, aole pela ko ka Aha manao. Ia wa kahi loio Aupuni malihini, de la Vena, i olelo mai ai aohe ona makamake e lawe mai i na hoike kanaka maoli, no ka mea, o hoike hoopunipuni no auanei.

Pii ko Numana kai no keia mau olelo hoowahawaha Hawaii, a e pono no. Ka i no hoi i pono ka hapanui o na hihia i na hoike kanaka maoli. I keia wahi kolea nae, he poe lapuwale a hoopunipuni. Ua ikeia no la hoi ko lakou hoowahawaha mau no i na oiwi.

O ka lono ia e lauahea nei ua loaa ka o Kole laua me Alapaki i ka mai lolokaa a ano e mai o ka noonoo. Pela paha la, aohe i maopopo ia makou. Na keia mua iho no hoi paha e hoike ae.

Hanau Kupanaha.

Ma ka la 1 o Au gate, 1895, ua hanau ma ke awawa o Waipio, Hamakua, o Pua wahine a Keomino, a penei ka hanau ana: Ua hemo mua hookahi keiki, he kaikamahine, a hala paha hookahi ho ra a oi, hemo hou mai hookahi kaikamahine, a hala hou he hora a oi, hemo hou mai hookahi kaikamahine, a mahope o ia manawa i olelo mai ai ua wahine nei, aole au e ola ana, no ka mea, ke hele mai nei au a paupauaho. Aia no nae iloko o ka opu, he hookahi keiki e oni ana no, a e paa ana no ka iewe iloko, aole i liuliu a make loa aku la ka makuahine, a o na kaikamahine ekolu ke ola nei a ke hanaiia nei e ka ohana, a ke manao nei ka mea kakau e ola ana lakou. Nolaila, he mea kupanaha keia ka hapai ana o kela wahine eha keiki, eia nae, pilikia ka makuahine a me hookahi keiki i koe iloko o ka opu. Aka, e hoonani aku i ke Akua o Kana mau hana. Me ke kane a me ka ohana luuluu ke aloha.
WAILELEOHIILAWE.

KELA A ME KEIA.

I ka Poakolu nei i huli hoi aku ai ka Au seteralia no Kapalakiko.
                Ua hala aku nei no na pali hauliuli o Koolau ka Peresidena o ka Repu balika.
                E haawi ana ka Ahahui Hawaii Opio he ahamele ma ka la 31 o keia mahina.
                Ma ka la 4 o Sepatemaba ae nei e hoomaka ai ke Kula Kamehameha o na keikikane.
                I keia Poakolu iho ka Monowai mai na Panalaau Hema mai ma kona ala holo no Kapalakiko.
                Ua halihali mai ka mokumahu Hawaii he 9 poe i hoohuoiia no ka ma'i lepera mai Hana, Maui, i ka Poaha iho la.
                Iloko paha o hookahi pule, alaila, pau loa i ka hanaia na hemahema o ka halepule hou e ku nei ma alanui Alakea.
                Ua pau i ke kudalaia kekahi mau noho popopo o lalo o ka luakini o Kawaiahao, a ua lilo aku i kekahi Pake. E aho ia!
                Ma ka halekuai Waiona Kalepa e loaa ai ke SAKE maikai i paipai ole ia me ka wai, i like ole me ko kahi mau wahi aku ka paipaiia. He hapaha (25 keneta) ke kumukuai no ka omole hookahi. E kii nui ae!
                Ua nee ae ka halekuai o "Ke Ola o Hawaii" a ma ka helu 322, Alanui Nuuanu, mauka aku o alanui Moi nei, ma ka huli ma Waikiki mai.
                E kilohi iho ko makou poe heluhelu i na hoolaha hou e puka aku nei. Malia o loaa no he pomaikai i kahi poe ke nana pono iho.
                Ua koe iho ma ka waihona o ka Hui Waapa Leilani he $100 mawaho ae o na hoolilo o ka aha hulahula a lakou i malama ai i ka po Poakolu iho la.
                Ua hookiekieia ae o J S. Kalakiela i kakauolelo no ka Hale wai ma kahi o B. A. Zabalaua E hoomaka ana hoi ka hookohu mai ka la apopo aku.
                Ua hookohuia aku o Porofesa W. D. Alekane dero i Peresidena no ka Papa Hoonaauao ma kahi o W. R Kakela, i hookohuia aku i Kuhina Noho Hawaii.
                I ka Poalima iho la i pau nui ai i ka hookuuia na limahana Pake i hoomaluia iho nei makai o Kahakaaulana maluna mai o ka Belegika.
                Ua hoopaneeia i ka Poaha iho la ka Ahaolelo Kuikawa o ka Repubalika mahope o ka noho ana no 53 mau la. He molaolao wale no na hana i lawelaweia.
                He Kepani ka i hoopaiia imua o ka Aha Apana i ka Poalima nei e uku i $20 me na koina, no ka hoeha ana i kekahi Pake me kahi mea eha o poino ai ke ola.
                Ma ka la 1 o Sepatemaba e haalele aku ai ia Potalana, Oregona, ka mokumahu Alatamore a holo mai no Honolulu nei. E ku mai ana paha oia ma ka la 9, a mai nei aku e holo ai no Kina a me Iapana.
                Elua Pake i hoopaiia imua o ka Aha Apana i ka Poaha nei no ka malama a puhi opiuma, a kopiia e uku i $50 a me na koina pakahi.
                Ua waiho aku o Senatoa Notele i kona kulana hoa no ka Ahaolelo. Eia kekahi poe ke ake nei e loaa ia noho. O ka makemake o kahi poe o G. K. Waila. I ka Poaono mua o keia kau kiure, ua pai a pai na kiure ma kela hihia onou umoki o E Wu dewada iloko o ka huewai a Mele Akau, nolaila, ua moe aku la a no nei kau ae.
                I ka hora 6 o ke kakahiaka Poalua iho la i holo loa aku ai ka Aselouna no Iapana me 50 ohua Kepani ai keia awa aku I ke ahiahi Poakahi aku no hoi ka Pekina no Kina a me Iapana.
                O ka Poaha iho la ka la hanau o ka Emeperoa o Kina. Ua uluwehiwehi ae na moku me na hae like ole a pela pu no hoi me na pahuhae o ka aina nei. Ua ki pu ae ka Beninetona i ka hora 12 o ke awakea.
                He haole ka i eha ma kekahi kuekue wawae i ka Poaha nei, makai o ke Alahukimoku, iaia e hoao ana e kakia wehe i kekahi apana hao, ua lele a ku ma kahi i oleloia. Ua hoihoiia no kauhale maluna o kekahi kaapio.
                He $100 a keu iki, mahope iho o ka ukuia aua o ua lilo, i loaa aku no ka waihona o ka Hui Waapa Leilani mai ka lakou aha hulahula o ka po Poakolu nei. Nui no ka lealea o ia po, a na Kawaihau ka pilipili na leo mele.
                Ua huliia o luna o ke Kalaudine i ka Poalima nei mamua o kona holo ana e Makaikiu Hama, no ka manaoia ua pee paha iluna ona kekahi mau haole i hoao ai e lawe malu i kahi moku kiakahi Kaiulani, aole nae i loaa.
                He aha holoholo waapa ka D. Kawananakoa i haawi ae ai i ka po Poaha nei maloko nei o ke awa no Mi si Eva Paka, a ua piha pono na waapa i na lede a me na keonimana. Na ka hui himeni Kawaihau i hoolealea ae me na leo mele kaili puuwai.
                Ekolu mau Kepani i hopuia i kakahiaka Poakolu nei ma kekahi hale ma alanui Nuuanu no ka piliwaiwai, a ua hookuu nui ia ae no ma ka uku ana i $12 pakahi. Aole lakou i hiki ae imua o ka Aha Apana i ka Poaha nei e pane no ko lakou hihia.
                No ke ano eha loa no o kela kaikamahine Pukiki i hanainoia iho ai e kela eu Pukiki, Dominigo Fereira, nolaila, ua moe ka hookolokoloia o ke kolohe wawahi hale a ka wa a ke Aupuni e loaa ai he oni ana, o ia paha hoi, a oluolu ae ka mea i eha.
                Ua hoomaopopoia mai ia makou e noho halawai ana ka Ahakuka Malu o ka Repubalika i ka la apopo, no ka noonoo ana i ka huikala ae i na pio kalaiaina. A e manaolanaia hoi ke pau keia mahina, e pau nui mai ana no na hoa noho inea i ka hookuuia me na kumu keakea ole.
                Ua hoihoiia aku no ka Halemai Pupule i ka Poaha nei o Keo Koa, mahope o ko Kauka Berodi nana ana a me na hooia ana mai kekahi poe mai he opulepule oia, ka mea hoi nana i hou ka makai kaulio Paulo i ka pahi. O kona makuakane a me elua kaikuahine ka i loaa mua no ia ano haawina like.
                Poaono nei i hookuuia mai ai o Keoni Lene, kekahi o na pio kalaiaina ma Kawa Ua pau kona manawa a ukuia ka hoopai dala.
                Mahope iho o ka noho ana o ka Aha Apana e hoolohe i ka hihia o Misita a me Misasa J. L. Kiwini no elua la, no ke kuai waiona me ka laikini ole, ua hoopaiia laua e uku i $100 pakahi. I ka Poaono nei hoi e ku hou ae ai laua imua o ka Aha no ka elua o ko laua hihia i hopuia ai, o ia ka malama opiuma.

                He mau la i hala ae i komo kolohe ia ai kahi noho o kekahi haole ma Kapamoo aenei a ua lilo aku he $49 25. Mamuli hoi o ka hana ana a ke Owau Kaapa, ua paa o Halulu i ka Poaha nei i ka hopuia no ia hewa. He Pake ka i manao mua ia i kinohi. Ua ike a hooia ae ka mea nana na dala i lilo oia no ke kolohe o ka po ana i ike a i auume pu ai. Lolo ke kolohe.
                Ua aumoe o ka po Poaono, la 10 nei, ua hopuia iho la kekahi o na kalaiwa kaa basa o ka Hui Alahao Hawaii iuka o Maemae, no ka hooili nui loa i na ohua a me ka hili ino i na lio, e kekahi makai kaulio. Imua o ka Aha Apana i ka Poalima nei, ua hookuuia ka mea i hoopiiia mamuli o ka hoike a Keoki Ferene, aole i hooiliia na ohua a oi aku mamua o ka mea kupono.
                Aia ke noho la me ka hune ma ka mokuaina o Inidiana, Amerika Huipuia, he ekolu wahine Hawaii i laweia ai e kekahi haole no Kikako a hala loa no Geremania. E kali ana paha lakou o ka loaa aku he dala e hiki ai ke huli hoi mai no Hawaii nei. Pau na hana hoikeike hoolewa kino a lakou, lilo ae paha hoi i ka ulaia, a o ka hopena iho la ia he hune, he nele, a heho ka maopopo. Malia o kaa na ke Aupuni e hoihoi nui mai

Komo Lima Haule.

Ma ke ala mai Kolea, Alanui Papu, a ka Hale Leta, a hoea i kai o Ulakoheo, a i kai loa o ka uwapo Likelike, a pelu hou no iuka o Koleaka ma Alanui Papu, ua nalowale kekahi Komo Lima Daimana me ewalu pohaku, he hookahi pohaku ua haule, i ka Poalua nei, Augate 13, 1895. E loaa no he uku makana kupono ke loaa a hoihoiia ae ma ka keena o
F. J. TESTA (HOKE).
au g 19-tf.

Olelo Hoolaha.

Eia ma keia hoolaha e ike ai oukou he Hoolaha Aina e makemake ana e kuai, aia ma Makiki, he elua apana aina no laua ka ili o 50 kapuai laula a me 100 kapuai loa no ka $340 o ka apana hookahi. E hele ma e ninau i ka mea nona ka inoa malalo iho, a i ole, ia A. V. Gear, ma ko maua keena.
S. N. K. KAKINA.
au g. 19, 4 mnw.

Hoolaha Hoolimalima.

Eia ma ke alanui Moiwahine he hale nani a me ka aina no ka hoolimalima, he $20 no ka mahina. He mau rumi nui ko loko. E ninau ia A. V. Gear, a i ole, i ka mea nona ka inoa malalo iho.
au g. 19, 4 mnw. S. N. K. KAKINA.

NO WAIANAE
O. R. & L. Co.

MA NA POAONO A ME NA LA PULE.

E haalele no na Kaamahu ia Honolulu nei ma na hora 9:15 A.M. a me 1:45 P. M.
                Ke huli hoi mai, e hoea ana i Honolulu nei ma na hora 3:11 a me 5:55 P.M.

NA PALAPALA UKU PUNI:

Papa Ekahi, - - - - - $1 75
Papa Elua, - - - - - 1 25
F. C. SMITH,
Agena Ohua a Palapala Nui.
iul 20-tf