Ka Makaainana, Volume IV, Number 9, 26 August 1895 — Lanakila ka Hoopahu I'a. [ARTICLE]

Lanakila ka Hoopahu I'a.

E MR. LUNAHOOPONOPONO: Ma ka huakai kaahele a ka Lunakanawai Kaapuni o Maui, ma Kaupo, Kipahulu, Hana, a hala loa aku ma na pali Koolau o Maui nei, no ka nonoi dala no ka hale o Wailuku, ua laki no ma na huahelu makani. Owau pu no kekahi e hele pu nei ma keia huakai kaahele. Ia makou i hiki aku ai ma Kipahulu, ma kahi o Hakuole, he makai me kana keiki, Kimo Hakuole, kumukula, ua nui ka lokomaikai o na kamaaina. O na io holoholona a me na i'a o loko o ke kai, e laa ka manini, pala, kole, a me ka nenue, o ia na ono o ka papaaina. O ka poi a me ka uwala ka ai i hoomakaukauia e ka lokomaikai o na kamaaina. Hookahi pule a oi o ko makou noho pu ana, eia nae ko'u pahaohao, e ike mau ana au i na kamaaina i ka lawe mau mai i

keia mau ano i'a, oiai he mau la kaikoo me ka makani pa pukiki e pa ana ia mau la, a e loaa mau ana no nae keia mau ano i'a. A no kekahi la, ninau aku nei au i kekahi keiki a Hakuole: "Pehea la o loaa mau nei keia mau i'a ahiu?" Pane mai nei kela: "I hoopahuia me ke giana pauda." Kahaha iho nei au, no ka mea, o Hakuole ka makai o nei wahi, eia nae, laweia mai la no ka i'a hoopahu. Olelo iho la au ia'u iho, "Lanakila ka hoapahu i'a maanei," O makou o na malihini a pau e noho ana malaila me ke kahunapule o Wailuku, ua ai makou i keia i'a hoopahu. Ke manao nei la hoi au o ko makou hale wale no la hoi ka i laki i ka i'a hoopahu, eia ka auanei o ka hale no kahi o ka Mea Hanohano J.W. Kalua, oiai, he mau kamaaina okoa aku no kona. Lanakila loa ka hoopahu i'a ma Kipahulu nei, aole makauia mai o na luna Aupuni, a he koho aku no ko'u, ua lohe makou a pau i keia hana mai ka Lunakanawai mai a me ke Ka hunapule. Ua lawa keia. J. N. LANAKILA Keanae, Augate, 10, 1895.