Ka Makaainana, Volume IV, Number 11, 9 September 1895 — Page 5
HONOLULU, OAHU, POAKAHI, SEPATEMABA 9, 1895 5
OLA NO KA LAHUI.
-
Na Hana Kokua Aloha no na
Oiwi Hune a Nele.
-
Mamuli hoi o na holapu ana a ka ma'i kolera e noke nei, ua ulu ae la hoi ka manao aloha iloko o kekahi poe no ke kokua ana i na oiwi nele a hune maopopo loa, i ulu ae hoi mamuli o ka hookapuia o ka lawaia ana a me ka loaa nui ole o kahi hana ma na uwapo, a pela aku. Ua haawi ae o Misita F W. Makapolena a me Misita G. Fairchild, o Kealia, Kauai, ia laua iho imua o kekahi halawai ana o ka Papa Ola i ka Poalua iho la e hele aku iwaena o na poe puuwai aloha iwaena o ko kakou poe kalepa, kuonoono, a pela aku e noi ai no na kokua dala ana. Aole no i poho ko laua manaolana, no ka mea, i ka hoomaka ana i ka Poalima nei, ua nui no na kokua i loaa, mai ka $500 pakahi ka kahi poe, a he $200 hoi ka kahi, a $100 ka kahi, a pela aku ka emi ana iho o na haawi kokua ana, a i ke ahiahi Poaono nei, ua loaa he $7,550. Nui no.
O ka mea nui i noonooia, pehea la e ko ai ka makemake o na poe na lakou kela mau dala, a pehea la e akaka ai na poe hune io Nolaila, ua haawiia i na wahine alakai iwaena oka lahui, a ua ku koke ae he ahahui no neia hana maikai. Ma ka oluolo o ka hui o Kakela & Kuke, ua haawiia aku ka hale uinihepa mauka iho o ko lakou halekuai, ma alanui Betela, i hale kiko waena no ka hana a na wahine, a ilaila e hanaia ai na mea ai me ka hoomoa pono ia o ka bipi, wai, poi, a pela aku, a mai laila aku e haawiia ai no ka hoolawa ana i na poe a pau e hele aku ana me ka uku ole. No ka Hui Bipi o Wala ka bipi, a mai na halekuai mea ai alakai like ole maikaberena, ko, ti, a pela aku, ma ke ano manawalea.
Ua eleu koke ia ae ka hookaukau ana i ka hale a molehulehu no hoi ka Poaono nei, paa kapuahi uinihepa i ka uhauia e E.B. Tomasi, a paa ka halekuke mahope ia Hanale Bakalamana. Oiai no nae hoi e lawelaweia ana keia mau hana ae la, e hoomoaia ana no na io bipi mawaho ae iloko o na ipuhao nunui malalo o ka lawelawe ana a Misita A. Hebeta, a me Misasa Kikilia Anola, a ua lehulehu no na poe i hoolakoia me na mea e pono ai o na opu. Hele no hoi a hora 6 paha o ke ahiahi, pau ka mea hope loa i hele aku i mea ai nana i ka hoolaweia, a o ka hopena ia o na hana me ke koe nui no o na mea-ai. I nehinei hoi, ekolu manawa i hoolawaia ai, he kope me ka berena a palaoa paha i kakahiaka, poi me bipi i ke awakea, a he ti no hoi me na mea e ae e pono ai ko ke
-
[Hoomauia ma ka aoao 8]
[Hoomauia mai ka aoao 1]
-
Holapu a ke Kolera.
hanini malu o kona lole, a moa ka lole.
Sepatemaba 2 – Kahakauila (k), 17 makahiki, hoikeia ae i ka hora 7:30 p.m., ua make mamua iho o ka hora 7 No Kawa
Sepatemaba 3 - Lono (k), 30 makahiki, hoikeia ae i ka hora 6:20 a.m., no Auwaiolimu, makai iho o ka luakini Moremona. Ua make oia i ka hora 11 o ka po mamua iho.
Davida Pau, 35 makahiki, no Kalihi. Hoikeia i ka hora 6:05 a.m. Ua make mua no i ka hora 7 o ke ahiahi mamua iho.
Keluka (w), 33 makahiki, no Kikihale. Hoikeia hora 7:40 a.m.
Kahiio (w), 43 makahiki, hoikeia hora 9 a.m., no Kapuukolo, kekahi o na poe i hookaawaleia no ka hoomalu ana ma Kakaako. Make i ka hora 11:05 o ke aumoe.
Kealakai (k), 65 makahiki, hoikeia hora 11:30 a.m, no Lunalilo Home, make i ka hora 2:33 p.m.
Paku (k), 14 makahiki, hoikeia hora 12:30 p.m., kekahi o ua poe o Kapuukolo i hookaawaleia no ka hoomalu ana makai o Kakaako.
Keawe (k), 40 makahiki, hoikeia hora 9:30 p.m., no Auwaiolimu, ua make mamua o ka hoikeia ana mai. O keia ka ma'i i loaa aku e waiho ana iluna o ke pakaukau aohe kapa he lei wale no ma kona poo. I ke komo ana aku o kekahi kiu i lohe i ka uweia, ua pau aku ka ohana i ka naholo i waho me ka haalele iho i ke kipapau,
Sepatemaba 4 - Kukaulalii (k), 63 makahiki, hoikeia hora 5:10 a.m., kekahi o na poe i hookaawaleia o Kapuukolo makai o Kakaako.
Kanakolo (Mrs. Neville), he 60 makahiki, hoikeia hora 11:55 p.m., no Waipilopilo, Kapalama. Ua make no i ka wa i hoikeia ae ai.
Sepatemaba 5 - Loisa Kapahi (w), 32 makahiki, hoikeia hora 12:30 a.m. a make no i ka hora 8 ae. No Waipilipilo, Kapalama.
Kalewo (k), 30 makahiki, hoikeia hora 6:20 a.m., no Puunui. Hoikeia mai ua make.
Kaluakini (w), makahiki, hoikeia 8:45 a.m, no Auwaiolimu, kokoke i ka luakini Moremona. Make i ka hora 1:45 p.m. o ka la 6.
Keluia (w), maluna aku paha o 50 makahiki, hoikeia hora 9 a.m., no Kapuukolo. Make hora 5:25 a.m. o ka la 6.
Pono w, 9 makahiki, hoikeia hora 8:15 a.m., no Waipilopilo, Kapalama. Make ma ka hora 4:30 a.m. o ka la 6 me ka eha nui.
Keaka w, 80 makahiki, hoikeia hora 1:30 p.m., no Kauluwela. Make no i ka hoikeia ana ae. [Aohe o makou hilinai o ua ma'i la kona mea i poino ai. O ko makou kamaaina iaia, he ma'i mau a ua aoo a palupalu loa no hoi. Iaia, paa o Enoka Johnson i ka hoomaluia, oiai, o kona kupunawahine a kahu hanai no ia. Geo. Jackson, 30 makahiki, hoikeia hora 9:30 p.m., Puuhale.
Sepatemaba 6 - Kalama k, 35 makahiki, hoikeia hora 5:10 o ia kakahiaka, ua make mua.
Kalamau w, 26 makahiki, hoikeia hora 6:30 a.m., no Waipilopilo, Kapalama.
Luukia w; 5 makahiki, Likapeka w, 4 makahiki, a me Elena w, 5 makahiki, hoikeia ae lakou a pau ma ka hora 6:30 a.m., no Waipilopilo, Kapalama.
Lahapa w, 63 makahiki, hoi keia hora 8 a.m, no ka Home lunalilo, a make ma ka hora 3:45 o ia auwina la.
Waoka w, 65 makahiki, hoikeia hora 8 a.m., no ka Home Lunali o
Sepatemaba 7 - Kala w, 9 makahiki, hoikeia hora 10:30 o ia kakahiaka, ua make mua, no Honuakaha.
Kealalaina w,. 60 makahiki, hoikeia 12:30 p.m., no Kepohoni. Make i ka hora 2:20 o ia auwina la no.
Mrs. Carroll, 50 makahiki, hoikeia hora 12:40 p.m., no alanui Likelike. Make i ka hora 11:30 p.m
Kaninau k, 48 makahiki, hoikeia 1:10 auwina la, no Kapalama kai. Aneane e make i ka hoikeia ana mai, a make loa i ko ke kauka hiki ana aku.
C.L. Dodge, 38 makahiki, hoikeia i ka hora 2:30 auwina la, no alanui Puowaina. Ai i ka i'a maloo i ka la mamua iho. Make i ka hora 11:30 p.m. Oia ka wahine haele ae, a me Kealalaina, ua lawelawe a kokua ia Peke Panee a pau loa lakou nei i ka poino.
Peke Panee w, 30 makahiki, hoikeia hora 3:15 auwina la, no alanui Puowaina. I ka la 4 aku kona ma'i ana.
Nua w. 40 makahiki, hoikeia hora 4 ahiahi, no Aala. Ma'i i ka la 3. Mak imua i ka hoikeia ana ae.
Pahukoa w, 45 makahiki, hoikeia hora 10 o ia po, no Waipilopilo, Kapalama. Make i ka hora 12 o ke awakea o nehinei.
Sepatemaba 8 - Poepoe w, 65 makahiki, hoikeia hora 8:30 o ke kakahiaka, no Waipilopilo, Kapalama.
John Paawa, 65 makahiki, hoikeia hora 8:30 o ke kakahi aka, no Waipilopilo, Kapalama.
Kepano k, 6 mahina, hoikeia hora 12:30 auwina la, no Waipilopilo, Kapalama. Akahi no a hoomaha ae ka ma'i.
Babela k, 25 makahiki, hoikeia hora 3:52 auwina la, no Kalia. Make mua i ke kiiia ana aku, hora 5:30 ahiahi. Ua puhi ahi ia kona hale i keia kakahiaka.
Luika w, 65 makahiki. no Kalia. make hora 11:55 o ka po.
Hookahi Pake, hoikeia hora 9 o ka po nei, koke a Pake Panee, a make, i ka hora 2:20 o keia wanaao.
Sepatemaba 9 - A hiki i ka hora 8 o keia kakahiaka, Kaneko (Kepani), 48 makakiki, hoikeia hora 6:10 kakahika nei, no Kakaako.
Mele Puaahiwa w, 21 makahiki, a me Keohaliku w, 18 makahiki hoikeia hora 7 o nei kakahiaka, mai na poe o Waipilopilo e hoomaluia la ma Kakaako.
He 62 ka huina nui loa o na ma'i a ka hora 6 a.m. nei, o ia hoi, elua i ola loa, he 12 ma ka halemai, a he 48 i make. Iwaena o keia heluna, he 57 Hawaii maoli, 1 hapa, 3 haole a 1 Pake. A ma ka hora 9 a.m. nei hoi, he ekolu poe ma'i hou i loaa, 2 Hawaii a 1 Kepani, a huina nui pau loa, he 65.
Ilina no na Make i ke Kolera.
Ma kekahi o na halawai ana o ka Papa Ola i ka Poaha nei, ua ulu ae ka ninau no kahi e kanuia ai o na poe make. Ua manao kekahi poo e puhi ahi ia, a o ka kekahi hoi, e lawe loa ia i ka moana kai lipolipo, he 20 paha mile ka mamao mai ka aina nei, alaila, kiola aku. Aka, mamuli hoi o ko Kuhina Damona ike he mea inoino ia iwaena o kakou, he mea menemene a eeu no ka ili, ua haawi mai oia i kekahi wahi ona ma Moanalua, ma Kapalaki, i ka iho'na aku o Halawa. Ua aeia kona lokomaikai e ka Papa, a o ia aku ana kahi o na poe make i ke kolera e kanuia ai. Aia na poe eli lua, he 8 paha ka nui, ilaila kahi e noho nei, ua lako i na hale, i kukulu koke ia iho nei no a paa, a me na mea e pono ai o ko lakou noho ana. He poe oiwi ko lakou hapanui.
Kue Oolea kahi mau Wahi.
Aohe ae o Kauai i kahi moku mai nei aku e ku ilaila, a ke ku makaukau loa ia poe me na pu e kue mai, ina e hoopaakikiia aku ana a hoolele aku paha i kahi mea Mai laila mai ke Kilauea i kipakuia mai ai me na Pake paahana i hemo ae mai ka hoomaluia ana ma Kahakaaulana, i kela pule aku nei. Pela no hoi me ko Maui a me Hawaii poe.
O na Koolau, Waialua, a me Waianae kahi. Ke ku la ko laila poe kiai me na pu. Maalea nae hoi ko Waianae poe, aia aku nei a nui ka palaoa a me na lako ai e ae, kue mai nei.
Eia na awawa o kakou ke kiai loa ia nei. Aohe ae ia o ko kai aku nei poe e hele, a pela no hoi me ko uka mai poe, ke ole he palapala ae mai ka Papa Ola. Lehulehu na poe e haawi wale nei i na kokua ana i ka Papa Ola, a ma ia keena wale no e loaa ai na palapala ae.
-
Ua hopuia i ka Poalima nei o C.B. Maile, Mauliawa, a me kekahi Pake no ke kuai i na i'a maloo i ka lehulehu, a ua hemo nui malalo o $50 bela pakahi.