Ka Makaainana, Volume IV, Number 11, 9 September 1895 — Page 6
6 HONOLULU, OAHU, POAKAHI, SEPATEMABA 9, 1895.
NA PALAPALA
[Aole maluna iho o makou ke koikoi o na hala a me na hewa no na manao i hoopukaia malalo o keia poo, aka aia no maluna iho o na poe na lakou kakau mai.]
-
Ua Kapaeia ka Oiaio.
[Hoomauia.]
Ua unuhi mai ka mea kakau moolelo i na mea i wananaia ma ka Baihala, i kulike loa ai me na mea i hanaia ia la nui kamahao ma Hawaii nei. A pehea la ke Aupuni i lawe ole ai ia la i la kulaia no ke Aupuni Hawaii? Anoai o hoolilo aku ke Kama'lii Kaiulani, ke noho ae eia i poo no ka lahui, i ia la ma ke ano he la kulaia no kona au.
Ma keia mau olelo wiwo ole a Hopu, ua kapa aku na kanaka iaia o Lonomakua, kekahi akua o Hawaii nei, a olelo hoi kekahi poe he uhane aia iluna o Hopu.
Ia wa pane aku la o Hopu, "E na makamaka, aole au he akua, he mau kanaka no makou, a na ke Akua nae i koho mai ia makou e hele e ao a e hoonaauao ia oukou; aia ko Akua i ka lani, o Iesu Karisto, Oia ka Haku o na Haku. Ua kau aku na poe hewa iaia maluna o ke Kea a make a i ke kolu o ka la ua ala hou mai Oia mai ka make mai. Nana no i kahea mai i na poe ana i wae ai a kauoha aku la ia lakou e hele i na aina a pau e hai i ka Euanelio, a o na poe manaoio mai e bapetizoia lakou a e hoolaia, a o na poe manaoio ole mai, e hoahewaia lakou."
I ka lohe ana o Binamu ma i na olelo wiwo ole a Hopu, hauoli iho la lakou. Kakau koke iho la oia i leta a hoouna aku la i ka Papa Mikanele o Bosetona me keia mau olelo: "Aole e liu na la, aole hoi o hala na malama elima mai ko makou pae ana mai a e lohe no oukou i ka holomua o ka makou hana, a e ike no auanei na alii o Hawaii nei a me na kanaka i ka makou hana pono a maikai imua o lakou."
Maanei e hookuu ana kakou i ka haiolelo a Hopu, a e nana aku kakou i ke kuikahi i hanaia ai. I ka pau ana o ka haiolelo a Hopu, huli hoi aku la lakou iluna o ka moku, a ma ka la 7 o ia malama no, pae o Honolii me ke kuikahi, a ponoi ke ano:
"Liholiho, ke Alii nui o ko Hawaii Paeaina, a me ua alii a pau loa o kou Aupuni. Aloha oukou:
"O makou, o na kauwa a ke Akua, ke hoopii aku nei imua o oukou e aeia mai makou e pae iuka no ka noho loa ana mauka o ka aina, no ke a'o ana aku ia oukou, i na alii a me ka lahui, i ka naauao a me ka pono Karistiano, ke oluolu ia o oukou. O makou iho no, ka oukou mau kauwa haahaa a hoolohe, e pule no makou i ke Akua no oukou a pau. Amene.
"Kakauinoaia e makou iho i keia la 13 o Aperila. M.H. 1820. Binamu, Kakina, Hopu, Humehume, Honolii, a me Kanui."
Ua koho lakou ia Honolii a me Hopu i mau elele ma ko lakou aoao no ko kukakuka ana me Liholiho, a me na alii, no ka ae mai e noho iuka o Kailua a ma na wahi e ae o ka aina.
Aperila, la 15, hiki aku la o Honolii imua ponoi o Liholiho a me Kaahumanu, a koi aku la ia Liholiho a me Kaahumanu e ae mai ia lakou o noho iuka o ka aina no ke a'o ana aku ia lakou i na alii a me ka lahui i ka naauao.
Ma keia kukakuka ana o Honolii ma me na alii, huhu iho la o Kekauluohi ia Honolii, a kapa mai la i ka inoa o Mioi, no ka mea, o Honolii, ua maopopo ko na kulana he miki a he eleu a he kanaka manaopaa, ua ikeia oia o na kumu nana lakou i a'o he kanaka oia i mahalo nui ia no ka eleu i na haawina. Pela paha oia i kuhihewaia ai he hana mioi kana.
(Aole i pau.)
-
Ninau Kanawai no Kalawao.
MR. LUNAHOOPONOPONO:
Ma ka la 12 o Augate, ua hopuia he eha wahine i loaa i ka ma'i lepera mawaho aku o na palena a ke kanawai i hoomau ai no lakou, a ma ka la 15 o ia mahina no, ua hopu hou ia he hookahi o ia poe wahine ma ia wahi hookahi no, mamuli o ke koi a ke aloha iloko o kona puuwai e naue e ike i kana mea i manao nui ai, he kane. Ua noho ka Aha a W.A. Kukamana e hoolohe i ko lakou hihia, malalo o ke kumu hoopii he "haalele i ke kahua ma'i lepera," a hoopaiia he $5 a me $1 koina A o ka wahine he elua ana pii ana, he $10 me $5 koina kona hoopai. Ua hookomoia na kumu hoopii elua iloko o ka palapala hopu hookahi. A nolaila, ke ninau nei au i na keonimana hanohano o ke Aupuni Repubalika, "Ua pololei anei ka hookomoia ana o na kumu hoopii elua iloko o ka palapala hopu hookahi, oiai, he hookahi no kino?" Ina ua pono ka hana a ka Lunakanawai o ka mokupuni o Molokai, alaila, e kala mai ia'u ma ia mea. Aka, ina aole i pono, e pono i ke Aupuni ke ao hou aku iaia ma kekahi mea.
Aole au e olelo ae ana he ike ole kona i ke kanawai, aka, he hoopilimeaai maopopo mahope o ka Luna Nui o ka Panalaau nei. He nui loa na poe naauao o Molokai nei, a pehea la i hoonohoia ai ke kanaka poo ano kaumaha ma ia kulana. Aole keia he hana hoohaahaa i kona inoa, aka, ua makemakeia e ike pono i ka mea i hanaia ina ua hana oia e like me kona makemake. Ua kupouo no e hoonohoia o Kanewalii i lunakanawai no ia apana, i manao ae no ia e hoopai, kanono ke kua i ka holu a ke kipikua, aloha ole i na maka i ka haka pono mai.
O ke kumu o ka haalele ana o keia poe i ke kahua ma'i, no ka nui o ke aloha i ka lakou poe kane. Ua lilo i mea ole na po pouli nui a me na alanui nihinihi o ia aina hoolohe. Eia lakou ke hana nei i ko lakou hoopai me ka ehaeha.
S.K. WAIPII.
Kalaupapa, Molokai.
-
Pa-keneta Puka ia na Amerika.
E MR. LUNAHOOPONOPONO:
Mamuli o kela koi poho o $25,000 mai ke Aupuni Amerika mai, i ke Aupuni mana koa a Aupuni oligeresia hoi o Hawaii nei, ua maopopo he puka ia no ke Aupuni o Amerika. O ke kumupaa, o ia kona komo ana mai e kokua i kela poe kipi i ke Aupuni Moi o Hawaii nei, ma o kona Kuhina a me kona pualikoa kaua moana, a ku ae la ke aupuni ma ka inoa he "Aupuni Kuikawa," a loli ae he Repubalika. A mahope mai, ulu ae la ka haunaele iloko o Ianuari aku nei, a kini a lau i hapuku wale ia na poe pakaha, a ahu a ku iloko o Kawa. A oiai, aole o Amerika i ohi aku i kona kumupaa, ke waiho lolii nei no, a o ka ekolu keia o na makahiki e hele nei, nolaila, ua loaa ka puka, a o ia kela e kikoo mai la. Minamina au i ko Amerika koi ana e ohi aku i ka hua no loko ae o kana hewa nui i kokua ai. Ina na Beritania e koi mai, a o kahi mau aupuni e ae paha, i komo ole iloko o kela karaima o Ianuari, 1893, ina ua maemae.
Ma keia mea e ike ai ka lahui Hawaii, eia ke haunaku mai nei kela aupuni o ke ao nei iloko o ka hihia i kokuaia e ia, a ka Ahaolelo Senate i kokua ole ai i ka manao pololei o ka Peresidena a me ka Hale Ahaolelo Makaainana. He hana keia e hoohilahila aku ai i na poe Amerika, i kokua ole i ka manao hoopono o ko lakou Poo Nui. A o na Amelika hoopono a manao kaulike, e ike iho ana no lakou, aole he kahua maikai a maemae kahi i ku ai kela koi poho
HAWAII ILIHUNE A NAAUPO.
-
He eha ma ka puuwai ka ma'i i make ai o Pakele (k) i ka ahiahi Poakahi, Aug 26, ma Kepohoni, aole hoi he kolera e like me na lono i hauwawa wale ia ae.
No ke ano kahiohio wai sake a na Kepani o ko makou mau keiki wili papapai i ka po Poaono nei, ua hoike ae la laua i ka ikaika huki o ko laua mau olona ma alanui Liliha ma ka paluku ana o kahi i kahi. O ka hopena, ua alualuia aku o Kauka Talomage e ke Duke o Waolani me he puaa holo nahele la a hiki i ka weluwelu ana. Nui ka ikaika o keia mau keiki ke iho mai ka wai o ke sake.
Kuai Emi Loa! Kuai Hoopau!!
Aia ma ka Halekuai o
KU KIMA;
Helu 411, Alanui Nuuanu, ma ka aoao ma Ewa a helu 59 maluna.
-
E hoomaka ana ke kuai hoopau mai ka Poaono, Augate 31. No elua pule wale no.
Penei na waiwai e kuaiia aku ana;
Na Lole o na waihooluu like ole o na Wahine. He emi loa.
Ko na Kane mau lole maikai ano hou o na ano a pau. Oluolu ke kumukuai.
E hele nui ae e ikemaka
sept. 2-2mnw
-
Na Mea Kanu no ke Kuai.
Aia ma ke keena o ko makou Puuku e loaa ai kekahi mau mea-kanu i hoouluia no ke kumukuai oluolu. E ninau ponoi ae ao iaia. iun 3-jul 1
-
HUI KAMAA O NA POE
HANA.
POE KALEPA NUI A LIILII I NA
ANO KAMAA A PAU LOA.
Helu 516, Alanui Papu, ma Kauhale Hou o Burua.
Honolulu, P.H.
iul 15-tf
-
No ka Hoolimalima
O ka hale ma Alanui Kalepa, i hoohanaia mamua e ka Hui Hoolaha Buletina Puka La. Ua hiki loa no o lalo ke maheleheleia i mau keena oihana, a pela aku.
E ninau ma ke keena o
WM. G. IRWIN & CO.,
iune 24 Kaupalenaia.
-
F.J. TESTA, (Hoke).
MEA OHI A KOI AIE.
Mea Huli Moolelo Aina a Waiwai e ae paha.
Mea Unuhi a Mahele Olelo Hawaii a Enelani paha.
Mea Hana Palapala Kanawai o na Ano a pau.
Mea Kuai Mikini Humuhumu Lole.
Mea Hoolimalima a Hoolilo Aina.
Mea Kuai Waiwai no ka Uku Komisina Haahaa.
Ua makaukau mau oia o lawelawe i na hana a pau e haawiia mai ana iaia. He kuike ka rula.
E loaa no oia ma keia keena. apr 8-1mk
-
HALEKUAI KUIKE OAHU
-
"KE OLA O HAWAII."
Helu 322, - - - Alanui Nuuanu.
Oiai hoi, ua pau ae la ke kuahana ana, ua weheia hoi ka halekuai maluna ae i Iulai 1 nei, nolaila, ua makaukau loa e hooko a e hoolawa aku i na iini o na poo a pau. E ko no ka makemake o na wahine ke kipa mai malaila, a e pono no hoi ke kipa mua mai mamua o ka hele ana i na halekuai e ae. Malaila no e loaa ai.
Na Makalena, na Kalakoa, na Keokeo Halua me Vitoria, na Papale, na Kakini, na Hainaka, na Waiala, a pela aku a nui a lehulehu wale.
E ike mai ia kakou hoakanaka.
M.E. SILVA,
iul 8-tf Luna Nui.
-
J K KAHOOKANO
LOIO a he Kokua ma ke Kanawai.
KEENA HANA: Alanui Kaahumanu,
Honolulu. jan 8, '94-1mk
-
E.M. NAKUINA.
KOMISINA O NA ALA LIILII A ME
NA PONO WAI.
Notari Lehulehu, a he Agena Haawi Palapala Ae Mare no Honolulu nei.
KEENA HANA: Helu 308, Alanui Kalepa. dk 3-1mk.