Ka Makaainana, Volume IV, Number 14, 30 September 1895 — Page 6

Page PDF (903.71 KB)

6 HONOLULU, OAHU, POAKAHI, SEPATEMABA 30, 1895.

ANASALEMO
-KE-
Keikialii Ahonui o Italia.
-
He Nanea Walohia no Kela Au i
Hala Aku.
Helu 2.

                    Aole no i hiki mai kona kaikuaana ia po, aole no i kekahi po ae, a aole no ia po hou mai, a hala na po he iwakalua o kana kali ana. Ia wa hoomaka mai la ke kuihe o kona manao, koe no nae ke aloha e kawelewele ana no -
"E mae no na pua o ka iini,
Ke nele na kulu kehau a ke aloha."
                    Aka, aohe mea e ae ana e hana ai, o ka hooko wale no i ke kauoha a kona kaikuaana. O ka hana kupono wale no ia ana e hana ai o ke kali me ke ahonui, i ike ai oia i na maka o kona kaikuaana; hoomau aku la no ia i ke kali ana me ka haule ole o kekahi po, a hala he elua ma ama me na la keu ewalu.
                    I mea e nalonalo iki ai ka ia nei hana ana, hoololi pinepine keia i kona wahi e moe ai, no ka mea, i na wa a pau ana e kali ai, e halia wale mai ana no iaia ua hoopaaia paha kona kaikuaana no kekahi oihana kuka malu o ke aupuni i maa mau i ka hanaia ia mau la. Manao no hoi keia e hooko ana no ke kaikuaana i kana kauoha, ke kali io ia ma ua wahi mehameha la me ka hoomanawanui i na kuakaumaha o ka makau, no ka ike ole i ke kumu o nei hanahana pela.
                    O ka mea haohao loa iaia, o ia ke kanaha ana mai a ke kaikuaana maloko o ka palapala, e lawe pu me ka ipukukui. "Me he mea la," wahi a Anasalemo, "i makemake paha kuu kaikua i ka ipukukui i ike pono ai au i kona ano, ua manao paha ia e aluka mai ana na kanaka maanei i kona wa e hiki mai ai, a, aole la au e ike aku iaia." Aka, iloko o ia mau la kupilikii o ke aupuni, ua maa wale no na kanaka i ke komo i na aahu aho e, aole hoi he lele o ka oili ke hoea mai kekahi mea me ia ano aahu.
                    Pela mau no o Anasalemo i hoomau ai i ke kali ana, aka nae, ua hoomaka mai ke kuihe ana o kona manao, a kaumaha hoi ka naau no ka loihi loa o ke kali ana. Kani ae la ka hora ekahi o ka wati o Ianuariusa, olelo ae la ia, "elua ae nei malama me na la keu ewalu. E hoomau no au i ke kali ana ia oe a pau ae ka makahiki." Wehe mai la oia i ka ipukukui mai kahi noha mai o ka pa, me ka manao e hoi. Ua ano powehiwehi ka a ana o ke kukui, a olelo iho la o Anapalemo, "O oe ka paha kekahi e ka ipukukui i molowa i ke kali ana?"
                    Huli ae la oia e hoi, me na waimaka e kahe ana ma kona mau papalina, a ia no i naue ae ai ka pohaku e waihe ana malalo o kona mau wawae, a puka ae la ke kaikuaana mailalo ae o ka honua, a hui ae la laua.
                    "Ko koloka! E wiki!! Hoouhi mai iluna o'u!!! E huna mai i kuu kapa paahao!!!!" wahi a ke kaikuaana. Pane aku la o Anasalemo me ka pihoihoi a me ke kahaha o ka manao, "Ko kapa paahao," a uhi aku la oia i ke koloka i kona kaikuaana. He ano pouliuli ia wa, aka, ua ike aku la no o Anasalemo aohe mau kamaa o na wawae o kona kaikuaana a ua hohoma hoi na papalina. Lalau aku la ke kaikuaana i ka ipukukui a kiola aku'la iloko o ka wai.
                    "E waiho malaila," wahi ana i ke kaikaina. Pane aku la o Anasalemo me ka ike ole i kana mea e kamailio ai, oiai, e mau ana no kona pihoihoi. "Auwe! Ua minamina loa au i ka ipukukui, no ka mea, o kona wa keia i makemakeia ai. He elua aenei malama me na la keu ewalu o ke kokua ana mai o ka ipukukui ia'u, a oia no hoi kekahi i ike pu i ka luhi a me ka inea o ka noho ana o nei wahi mehameha. Aohe mea e ae, ua make paha ua ola paha, a o kou ola ana mai ka mea nana e hooluolu mai ia'u. A na makepono ka luhi ana, oiai, ua hookoia ka mea i makemakeia."
                    Nani wale ke kamahao o ka lohe ana i ko laua leo, a na pa o ke kulanakauhale i hoowawa ae ai i na kupinai leo e poha nahenahe ana ma na wa olu o ke kuluaumoe, aohe nae mea i ala mai, mai kona hiamoe mai. Aohe hoi he makani nui e hookuku ai i na ale, a e pii ai la hoi ke kai o kahi poe. Naue malie aku la na opio malalo o ke aka o na hale, a aohe laua i ike hou ia malaila.

[Aole i pau.]
-

                    Ma ka halekuai Waiona Kalepa e loaa ai ke SAKE maikai i paipai ole ia me ka wai, i like ole me ko kahi mau wahi aku ka paipaiia. He hapaha (25 keneta) ke kumukuai no ka omole hookahi. E kii nui ae!
                    Mamua iki iho o ka hora 10 o kakahiaka Poaha iho la i hamu ae ai ke ahi i ka hale o kekahi Pake ma Kikihale aenei, a pakele mai lilo i puu lehu. Ua hiki koko aku na kaa kinaiahi malaila a pio ke ahi me ka nui ole o kahi i poino. Laukanaka no hoi ia wahi ia la a ua huikau pu aku me ko makou mau limahana iloko o ia huikau. O ke Duke ka i kokua pu i ka auamo ana i na iliwai.

NA MOKUPUNI.
-
Na Lono Kuwaho mai Kela a me
keia Apana o kela Aupuni.
-
Kokua i na Oiwi Pilikia.

"Noha mai la ka ua o Pueo i ka makani,
Lilo mai la na Kalihi a elua o Puukoa i Hanalei,
Lilo i ka wai ke one puahala o Mahamoku,
I ke pahele kua ia e na ohia o Kupakoili."
                    Imua e ka apana o Hanalei ma na hana maikai. E like me na piha lono o ke kaumaha i pa iho i ko kakou mau pepeiao no ka pilikia o na makamaka ma Honolulu, ua hoala ae na puuwai aloha o ka apana o Hanalei i keia hana maikai, a mamuli o ke alakai ana o ka luna nui o ko Kilauea Sugar Co., oia o Misita G.W. Ewart, a me ke kokua ana a na puuwai hamama, ua loaa mai keia mau hunahuna malalo iho, penei:

NA LOAA

Mai ka ahamele, ................................................$25 00
Lulu o na limahana Kepani a me kanaka .............30 65
Geo. R. Ewart........................................................13 60
Mrs. Ewart .............................................................10 00
G o. R. Ewart Jr......................................................5 00
E. Moller ................................................................5 00
Frank Scott .............................................................5 00
G.W. Mahikoa ........................................................5 00
H.R. Smyihe ...........................................................5 00
C. Alan ...................................................................5 00
John Weddick, M.D. ...............................................5 00
H.C. Sheldon, M D...................................................3 00
I. Mitamura...............................................................3 00
Frank Beifelmann.....................................................3 00
A.D. Ewart................................................................2 00
A.F. Ewart................................................................2 00
F. Wagesend.............................................................2 00
W.A. Smith...............................................................2 00
P. Pearson.................................................................2 00
S. Bertelmann...........................................................2 00
Chas. Kahee.............................................................2 00
Chas Tictomb...........................................................2 00
John Bush.................................................................2 00
J.C. Davis.................................................................2 00
E.A. Strout...............................................................2 00
Daniel Lovell...........................................................1 50
W. Hudoy.................................................................1 00
A. Bryant..................................................................1 00
Mrs. K. Kahee...........................................................1 00
Henry Peter................................................................1 00
J Kakina.....................................................................1 00
J W. Loa.....................................................................1 00
Louis Tictomb............................................................1 00
Manuel Mozozo .........................................................1 00
George Jap..................................................................1 00
Manuel Cosmo............................................................1 00
E.H. Ewart..................................................................1 00
$162 75
                    O keia ae la na mea i loaa mai na puuwai hamama mai o ka apana o Hana oi, no ke kokua ana i na hana maikai imua o na hoa iloko o ka pilikia, me ka manaolana e loaa pono aku ana keia i ka puuku o ia hana ma Honolulu.
CHAS. KAHEE.
Kilauea, Sepatemaba 19, 1895.

-
Na Mea Hou o Kau, Hawaii.

                    Ma ka la 5 o Sepatemaba nei i ku mai ai o Malulani ma ke awa o Punaluu me 12 ohua haole, aole nae lakou i aeia e lele mai e makaikai i ka Lua o Pele, a i ke aumoe o ia po ua hoike aku ka Hope Makai Nui o Kau i ke kapena, aole e aeia na ohua e lele mai. Ia wa i hiuia ae ai ka heleuma o ka moku a nome aku la ka huila o ua kaupu nei, no. Honolulu ke awa.
                    Ma ka la 9 nei i hoomaka ai na kula Aupuni o keia apana, koe aku o Pahala, oiai, o ko laila mau kumu aia i Maui, aole e hiki ke hoi mai no ka ae ole ia o na ohua e lele mai ma na awa o Kau nei. Ua weheia ke kula o Hilea malalo o ka noho kumupoo ia ana e Misita O. Crowell, a o ke kumupoo mua, oia hoi o Misita Malakana, ua hoihoiia i kokua kumu, aia no nae oia i Oahu aole i hoi mai, no ka paa o na ohua mamuli o ka ma'i kolera. Ua weheia ke kula o Waiohinu malalo o ka noho kumupoo ana a Samuela Keliinoi, a o Misasa S Kauhane, kona hope. O ke kula hoi o Kamaoa, ua weheia malalo o ka noho kumupoo ia ana e Misi Ellen Kaapa. Aole i loaa ko laila hope kumu, aka, ua wawa wale ia ae no e hookohuia aku ana o Kele Kekuna i hope kumu. Ina io pela, alaila, ua pono no, oiai, he keiki ia i lawa ka makaukau. Nana no i lawelawe iho nei ke kula o Mawae, a ua puka pono kekahi mau haumana, a o ke kumupoo i keia wa, oia hoi o Elena Kaapa, he haumana no ia na Kele Kekuna mamua.
                    Ma ke ahiahi Poaha, la 12, ua ku hou mai ma ke awa o Punaluu ka Malulani, aohe nae ohua i laweia mai maluna ona, he ukana wale no. Aole i aeia ka ukana e hoolele mai iuka nei o ka aina a hiki wale no i ke aumoe o ka la 13, ia wa i aeia ai e hoolei mai i ka ukana, aole nae he aeia e lawe i ka ukana a pau mua i ke puhiia me ka lepo pele no 24 hora, a ma ia ahiahi no o ka la 13, ua noho kekahi halawai makaainana ma Honuapo, a ua hiki kino ae na poe koikoi a pau o ka aina e noonoo no ka ponono ka hooleleia o ka ukana o na mokumahu ma na awa o Kau, a ua hooholoia he hiki no ke hooleleia mai na ukana meaai, a e puhiia me ka uwahi lepo pele, aole nae e aeia na ohua e lele mai.
                    Ua wawa wale ia e kukuluia aku ana i keia mau la ae kekahi ahaaina nui ma Kauahaao, he mea hoomanao no ka hipuuia ana o Toma Hai, makai kula o Kau nei, me Misi Luika Kahaule o ka Ua Kanilehua o Hilo. Ke hoomakaukauia nei i keia wa ke kahi heiau nui no laua.
                    Eia no ke Alii A.K Kunuiskea ke hoolai nei i ka olu kohai o na kuahiwi o Kaiholena, me ke ola kino maikai. No Samuela Kaaukai, eia no oia ke mawehe ae nei i na maawe kaakolu o ke kanawai imua o na aha hooko kanawai, a ua kohu poka pahu o ka pa kaua o Nimereda.
W.M. SPENCER, OPIO

-

                    Mahanahana ka wela a ka la i ka pohu lai a ka makani o Honolulu Mea ole ia.

-
W.H. DANIELS,
[BILA DANIELA]

                    Agena Kuai, a Hooponopono Aina, Mea Hana Palapala Kanawai, Mea Ohi Aie a pela aku.
                    O na hana a pau e haawiia aku ana iaia, e lawelaweia no ia me ka eleu a me ka omoole.
                    Keena Hana a me Wahi Noho, aia ma Wailuku, Maui.

mei 6-mk.