Ka Makaainana, Volume IV, Number 15, 7 October 1895 — Page 3
HONOLULU, OAHU, POAKAHI, OKATOBA 7, 1895. 3
ANASALEMO
-KE-
Keikialii Ahonui o Italia.
-
He Nanea Walohia no Kela Au i
Hala Aku.
Helu 3.
Ma ka wanaao ae kau aku la na keiki maluna o kekahi moku e holo ana, a hoike mai la laua i ko laua aloha hope i ka aina hanau ma ka hookahe waimaka ana. Halialia wale mai la no na puu, ua kuahiwi, a me na kula mauu uliuli o ka aina makani o Italia. Ku mai la na keiki iluna o ka oneki, o ke kaikaina e mau ana no kona ohaha, a o ke kaikuaana hoi, ua lilo aku ka nani o kona mau papalina, a ua ho-ooleaia hoi na lima, aka nae, ua haule aku ke kapa pio, a ua kahiko mai oia i na aahu o kona kulana mau.
"Ano," wahi a Anasalemo, "ua hui hou kaua. Ke noi aku nei au ia oe, e hai mai oe i kou moolelo. No keaha la oe i makemake ai ia'u e kali loihi loa, a pehea oe i hoea mai ai mai lalo mai o ka honua?"
Pane aku la ke kaikuaana, "Ae, e pau aku ana ia mea i ka haiia ia oe, no ka mea, aohe oe i poina i ka lawe pu ana me oe i ka ipukukui." Ia laua e papa leo pu nei iluna o ka oneki o ka moku, ke ike powehiwehi loa ia aku la na kapa kahakai keokeo o Italia, a me kona mau kualono uliuli, a e ake aku ana hoi ka naau o na opio e ike aku i ka aina a ka moku e holo aku nei. Ua pau ko laua alo ana i ua kehau huihui o ka aina makani o Italia, e hoohewahewa ana hoi na mauna, na awawa, na kualono, na kula mauu uliuli lipolipo, a me na alanui hookikeekee o Italia ia laua, a pela pu no hoi me laua i ko laua aina hanau. Aloha wale!
Ia laua i huli aku ai ilalo o ke keena, ua hoomaka aku la ke kaikuaana e hoike i kona moolelo piha me na hopuna olelo aloha imua o Anasalemo, kona pokii aloha, penei:
"Ua hana au i kekahi mea a'u i ike ole ai, he mea e kue ana i ke Aupuni; a i ka po o kuu holo malu ana, ua hoopuni koke ia au, a hana aku la au me ka hooikaika ana i mea e pakele mai ai, aka, aole e hiki, ua hopu ko ke ia au a hoopaaia i ka halepaa paahao.
"Iloko au o kekahi rumi pouli ilalo o ka honua i waihoia ai a ola kuu eha, a haawiia au na kuu enemi e malama. Na ua enemi la no o'u i lawe ia'u iloko o kekahi rumi pouli ilalo o ka honua. He wahi paa loa ua wahi la, i hoopuniia hoi me ka pa manoanoa a i kuu hiki ana ilaila, lohe aku la no au i ka olelo ana a kuu enemi, e i ana, -Aole e hiki iaia ke hemo aku mai keia wahi aku, aia wale no a ikaika na niho ona i ka nalinali a puka ka pa.
"Ina la nae-a-pau, e hele mau mai ana ua kanaka la e makai mau ia'u, maloko mai o kekahi wahi hakahaka o ka puka e kiei mai ai, a maloko mai no hoi o ua wahi hakahaka la e haawiia mai ai ka'u wahi ai. A makahiamoe au, maloko mai no o kahi hakahaka e haawiia mai ai ko'u wahi moena lahilahi, ua hele a nahaehae, a elua mau wahi kihei weluwelu.
"Aohe mea e ae o loko o ua rumi nei, he pahu wale no e waiho ana ma ka paia, ua hoopihaia me na pohaku nunui. A hookahi nae hoi pohaku i hoikeia mai ia'u me ka oleloia mai, ina wau e hoao e mahuka, alaila, e hikiiia kuu a-i i ke kaula, a hoopaaia kekahi piko i ka pohaku, alaila, laweia au e kiola iloko o ka wai. Maloko mai no hoi o ua wahi puka la kahi maamaama iki e uwiuwiki mai ai; aka nae, i ke ao, aohe mea a'u e hana ai, oiai, e haka pono mai ana na maka o kuu enemi ia'u i na wa apau. Mai ka hora umikumamalua o ke awakea a hiki i ka hora ekolu o ka wanaao, o na hora moe ia o na poe kiai halepaahao.
"Iloko o ia mau la pilikia o'u ua komohia ke aloha iloko o ke kahi kanaka no'u, a olelo mai la ua kanaka nei ia'u, ina ua ike au i kekahi hana e pakele ai au mai ka noho'na pilikia mai. Ae aku la no au, oiai, ke kanaka au i aoia ma na mea naauao. Eia ka mea apiki, aole e hiki ia'u ke heluhelu i ke ao, no ka mea, he huhu kuu enemi. O ka po ka wa kupono, ina e loaa ana he wahi malamalama kukui ma kahi noha o ka pa.
"No kuu hoopaipai loa aku i kukui ma kahi noha o ka pa, nana mai la ua kanaka nei i ke kukui o ka pa a me ke kukui o kahi noha; a no ka lohe ana paha i kuu olelo ana aku me ke kukui wale no e hiki ai ia'u ke hemo aku iwaho, nolaila, hooko pololei loa kela i ka'u mea i kuhikuhi aku ai e hana. Aka, aole kela i ae koke mai i ka'u mea i hai aku ai e hana. He mau la mahope mai, me kona manao kanalua, aole au e hemo ana, aka, ua mau no kona aloha pilipaa loa ia'u.
I na po a pau e hele mau ae ai kela e nana i na hao manamana a me kahi noha o ka pa a maopopo iaia, aka nao, o ka ikeia a me ka ike ole ia o ka ipukukui, aole kela i maopopo. Kau oha aku la au i ua kanaka la e lawe mai i ka palapala ia oe, a ua ae mai no oia.
I ka po mua loa no au i hiki ae ai me ke kukui, o ko'u hoomaka koke no ia i ka hana ana i mea no'u e pahele ai I ka wa nae o ka malamalama o ke kukui e pa pono mai ana ma kahi noha mai o ka pa, ua hiki ia'u ke ike aku i ka pahu e waiho ana ma ka paia a wehe ae la au i ke pani. Lawe ae la au i ka pohaku a pau iwaho, a hapai ae la au me ko'u wahi ikaika i ua pahu nei a waiho ma kahi e. Alaila, hoomaka aku la au i ka eli, ana, e hoonaele ai i ka pohaku o ka pa. Me ka eleu ka elua loa au o ka eli ana, e uwalu ana me he popoki la, me ka maalea loa no hoi; a ua hoomau no au i ka eli ana pela me hoomanawanui.
He iwakalua minute a'u e wehe ai i ka pohaku, a he iwakalua no hoi minute o'u e hoopiha hou ai a piha ka hakahaka, koe wale iho no he iwakalua minute a'u e uwalu hoomanawanui ai me o'u mau wahi manamana palupalu. O ko'u mau wahi minute hana wale iho la no ia, hala ae ana ia po, a pela hou aku no ua po, a hala ka mahina hookahi, aneane loa au e hemo mai kahi paahao mai. Elua pule mahope mai, pau ae la ko'u manao pilikia a i ka po hope loa i ke kokoke ana e puka mawaho, hooikaika loa ae la au i ka hoohiolo ana i ka lepo, a hiolo ino iho la ka lepo iluna o ka papahele o ka rumi pouli. Onou ino ae la au i kuu poo me ka hooikaika nui loa ana a hemo pu ae la ka pohaku e maiho ana iluna, a hemo ae ai au, a ike mai ai oe.
E kuu pokii, o ka hopena keia o ko'u moolelo, he hana i hanaia me ka luhi a me ke kaumaha."
Owai la o keia mau keiki ka i oi aku o ke aloha? A owai la hoi o laua i hooko pono i ke kauoha a hiki i ka HOPENA?
-
Kakahiaka nui poniponi o ka Poalua iho la i ku mai ai ka Miowera mai ka Akau mai me 983 mau tona ukana no keia awa. Mawaena o na hora 3 me 4 o ka wanaao Poakolu i niau loa aku ai ma kona alahele moana no na Panalaau Hema me ka lawe ole i na ukana a me na ohua.
Ua lonoia ae he holoholo olelo ka hana a kekahi wahine e noho nei mauka o alanui Liliha, i kaulana ma kekahi olelo ana, ka ui o Niukukahi. E lawe hele ana oia i na ano olelo like ole no ka mea e pili ana i ka wahine a kekahi o ko makou mau limahana, a o ka hopena i ikeia, ua ulu ae la he hoopaapaa mawaena o laua, aole oia wale a ka he hui wale na kauhale a keia wahine i hana ai meia a ku kauhakaka ma kekahi mau wahi e ae malaila.
Sepatemaba 12, hora 5:45 p m. ma Hanalei, Kauai, i make ai o Misasa K. Mikekai i ke 70 paha a keu o kona mau makahiki o ke ola ana. Aloha wale!
-
-
Hui Mea Kahiko Hawaii.
Kuai mai a hoolilo aku i na ano mea kahiko a pau o kakou nei, na Peahi, na Eke-Lauhala a ano e ae paha, na Moena, a pela aku, ma Alanui Moi, mauka ae o ka Hale Repubalika.
HARRY SAYLOR,
aug. 12-tf. Luna Nui.
-
No ka Hoolimalima
O ka hale ma Alanui Kalepa, i hoohanaia mamua e ka Hui Hoolaha Buletina Puka La. Ua hiki loa no o lalo ke maheleheleia i mau keena oihana, a pela aku.
E ninau ma ke keena o
WM. G. IRWIN & CO.,
iune 24 Kaupalenaia.
-
HUI KAMAA O NA POE
HANA.
POE KALEPA NUI A LIILII I NA
ANO KAMAA A PAU LOA.
Helu 516, Alanui Papu, ma Kauhale Hou o Burua.
Honolulu, P.H.
iul 15-tf
-
E.M. NAKUINA.
KOMISINA O NA ALA LIILII A ME
NA PONO WAI.
Notari Lehulehu, a he Agena Haawi Palapala Ae Mare no Honolulu nei.
KEENA HANA: Helu 308, Alanui Kalepa. dk 3-1mk.
-
HALEKUAI KUIKE OAHU
-
"KE OLA O HAWAII."
Helu 322, - - - Alanui Nuuanu.
Oiai hoi, ua pau ae la ke kuahana ana, ua weheia hoi ka halekuai maluna ae i Iulai 1 nei, nolaila, ua makaukau loa e hooko a e hoolawa aku i na iini o na poo a pau. E ko no ka makemake o na wahine ke kipa mai malaila, a e pono no hoi ke kipa mua mai mamua o ka hele ana i na halekuai e ae. Malaila no e loaa ai.
Na Makalena, na Kalakoa, na Keokeo Halua me Vitoria, na Papale, na Kakini, na Hainaka, na Waiala, a pela aku a nui a lehulehu wale.
E ike mai ia kakou hoakanaka.
M.E. SILVA,
iul 8-tf Luna Nui.
-
J K KAHOOKANO
LOIO a he Kokua ma ke Kanawai.
KEENA HANA: Alanui Kaahumanu,
Honolulu. jan 8, '94-1mk
-
W.H. DANIELS,
[BILA DANIELA]
Agena Kuai, a Hooponopono Aina, Mea Hana Palapala Kanawai, Mea Ohi Aie a pela aku.
O na hana a pau e haawiia aku ana iaia, e lawelaweia no ia me ka eleu a me ka omoole.
Keena Hana a me Wahi Noho, aia ma Wailuku, Maui.
mei 6-mk.
-
F.J. TESTA, (Hoke).
MEA OHI A KOI AIE.
Mea Huli Moolelo Aina a Waiwai e ae paha.
Mea Unuhi a Mahele Olelo Hawaii a Enelani paha.
Mea Hana Palapala Kanawai o na Ano a pau.
Mea Kuai Mikini Humuhumu Lole.
Mea Hoolimalima a Hoolilo Aina.
Mea Kuai Waiwai no ka Uku Komisina Haahaa.
Ua makaukau mau oia o lawelawe i na hana a pau e haawiia mai ana iaia. He kuike ka rula.
E loaa no oia ma keia keena. apr 8-1mk