Ka Makaainana, Volume IV, Number 17, 21 October 1895 — Page 3
HONOLULU, OAHU, POAKAHI, OKATOBA 21, 1895. 3
hookahi keikikane, a ua hopuia keia wahine me ke kane manuahi, a ua ahewaia imua o ka Aha Apana o Hanalei, Kauai. Ua uku i na poheo a me na ala. O ka wahine noho pono anei ia? O keia hana, na S.W. Manuakepa no ia mau mea a pau a me kona ohana, a ua loaa anei ko oukou palapala hookamakama mai ke Aupuni mai, i hana ai oukou pela? O keia kekahi hana haahaa ino loa a me ka hilahila ole Eia ka olelo a ka buke ola kino no na wahine Hawaii, aohe malama pono i ka lakou mau keiki e like me Uluwehi.
Eia hou keia olelo a'o i ka nopili poo nakeke haahaa ino loa. Eia ke mele a kela alii wahine a Kapau, "He Hinahina ka i'a pa kanaka no Waimea, he i'a kuhikuhi lima ia no Pohakomo." Eia ke mele no ka nopili, he i'a kumukuai kiekie keia ina e piha kaapahu kamano. he umi dala, a heaha hoi ke kumukuai o ka na-u a me ka niniole? Auhea oukou e na kanaka o Wanini, puka ka ino o ka aina, o keia mau i'a he walewale ka na-u a he awaawa ka niniole, aia a hiki i ka wa ino kaikoo, e loaa nui ai keia mau i'a malaila. O ka hana iho la ia a kanaka e hele ai piha na eke. O ke dala e loaa ma keia mau i'a, he okea, oia ka i'a a Umiamaka. Loaa mai ka olelo kaulana a kela kanaka a Kaui, "E wae wale no aole e pau ke okea o ka ma'i ona."
Eia ka ninau kanawai ia oe, Heaha ke kanaka puuwai eleele? Heaha ka ohana limakoko? E hai mai i ka haina o keia mau ninau.
S.K. MALAEHAAKOA,
(kanaka lawaia.)
Wainiha, Sepatemaba 29, '95.
-
I ka Poalua iho la i pau ai i ka weheweheia na lio laau poniniu. Aole lakou e ike hou ia ma ka Nekina.
Ki ki ka hou o na keiki wili o ke Kuokoa namu i ka Poaha a me ka Poalima nei. Wahi a laua, nui ke anuanu o ka la.
Puahiohio ka hoi o iala i kaalo iho ai a nalo ana ma ke kihi hikina o ke kuahiwi o Kaala. I ka manao o ko makou kaeaea kilo ouli, he ao opua uhai eepa.
Aole i hemo ka Belegika ma na lono hope loa mai nei. O kona ukana ua pau i ka hueia, a ke manaolanaia aku nei e hemo ana oia me ka poino nui ole. Ua komo loa kona ihu iloko o ke kai ma kahi i ili ai ma Sunosaki, Iapana.
Ma ka hookolokoloia ana o Keoni Balaunu imua o ka Aha Apana i ka Poakahi i hala, ua hoopaiia oia he elua makahiki hoopaahao a me $200 hoopai me na koina. Na ka mea hoopiiia no i pale kona hihia, a ua hoohalahala loa aku oia i ka Aha Kaapuni. Na kona haku hana, T.B. Mare i ku hope nona ma ke ano bona a hiki i ka wa e noho ai ka Aha.
Mau Olelo Hoalohaloha.
NA KA AHAHUI IMIPONO KARISTIANO.
IA MISASA SERA J. KALAMA;
Me ka welina: Me ka mahiehie o ke aloha a makee i kamakamakaia maluna iho o ko makou mau puuwai pakahi i keia la, mamuli o ka pahola ana mai he lono e ulono ana ka manawa i ke kaumaha, luuluu, eehia, manaonao, lihaliha, a mokumokuahua o ka naau, e i ana, ua hala, ua nalo, ua akoia ka liko, ke ola, ka hanu hope loa o John Kalama, ma Makawao, Mokupuni o Maui, ma ka hora 4 o ka wanaao o ka la 20 o Sepatemaba, makahiki o ko kakou Haku M.H. 1895.
Nolaila, ke hooholo nei makou ma o ko makou komite la, oiai, ma kekahi manawa o ka M.H. 1883 i hala, ua kipa mai olua ma ko makou mau kaiaulu nei, hookumu iho la i keia Ahahui Imipono Karisitiano, a o kana i hana ai ua waiho iho oia he kia hoomanao e hiki ai ia makou ke hoopoina ole.
Nolaila, o makou, o na lala o ka Ahahui Imipono Karisitiano o Kona-waena, ma ka apana o Kona Akau, Mokupuni o Hawaii, me ke aloha walohia a me ka naau i poniia me ka naauaua o ke aloha oiaio, me na puuwai i kiponaia me ka ehaeha a me ke kaumaha, ke komo pu aku nei makou iloko o ke kumakena pu ana me oe. A ke nonoi nei makou i ke Kahikolu Mana Loa iloko o Kona lokomaikai nui a kiekie palena ole, Nana e hoomama mai i na luuluu me ke kumakena o ke kanikau no kau kane i nalohia. Nolaila, "Pomaikai ke kanaka ke make iloko o ka Haku. Nana no i haawi mai a Nana no i lawe aku, e hoonani ia ke Akua."
Na komite,
DANIEL P. HOOLAPA,
HOOMANAWANUI OPIO,
SAMSON KUHIA,
KAIWIPUNAKEA,
Kona-waena, Kona Akau, Hawaii, Okatoba 9, 1895.
NA KO KONA AKAU POE HOAKULA
LAHAINALUNA.
MISASA SERA KALAMA,
Aloha oe a nui loa. Na ke aheahe lau makani makou i hai mai, o kau mea aloha, he kane, o John Kalama, ua hala.
E Sera e, ua hala io anei o Kalama? Ke lawe mai nei ka makani aheahe mai ke kai mai i kou leo, me he leo la no ka hanehane me ka huaolelo, "Ao, ua hala kuu Kalama." Auwe! Walohia wale!! Minamina ino!!! Aloha wale kou hoapili o ke anu a ka Ukiu e iniki iho ana i ka ili, welenia no hoi, lokuloku a huihui wale. Aole no nae he i mai o Kalama e he anu au. A pehea no e anu ai o Kalama, he kupa no ia wao a he aloalo kuaua no ia kuahiwi, eia ka hoi ke kau oi loa aku o ke anu o Makawao, ke anu la o Kalama, anu o Sera, anu ka ohana a pau a hohola ae la ke anu a puni ka Paeaina.
O Iehova o na kaua Kona Inoa, ua lawe aku la Oia i ka uhane o Kalama, kau kane aloha nui ia, me ka palanehe loa mai ko olua kihapai home aku ma Makawao, ma ka wehe'na kaiao o ka la 20 o Sepatemaba iho nei, a waiho iho la i ke kino puanuanu i kona kumu o ka lepo. A ma ia mea, ke noho la oe me ka ukana nui he aloha, he kaumaha, he luuluu, a me ka paumako nona.
E ke kaikuahine e, o makou pu kekahi i loohiaia iho nei ia haawina hookahi, no ka mea, o ko makou hoahanau no ia o ka ohana hookahi, na ka makuahine, ke Kulanui o Lahainaluna. Na makou i pili ia wahi, na makou i holoholo ia kula panoa i ka la, na makou i alo ke anu me ke koekoe o ka ua Paupili o Lele. Ke hoomanao ae nei makou nona, a me he la o Kalama no paha ia e holoholo mai la i kela kula wela hopu i ka la, i ka piiina ikiki o Puopelu, i ka iho'na walawala o Lelekahauli, a ke komo ae la i ka olu kohai o ka malu kukui o Kaukaweli a e auau ana paha i ka wai hui o Auwaiawao.
Aloha wale o Lahainaluna ka ipukukui uwila pio ole i ka makani Kauaula, kahi a Kalama i walea ai, i kilohi ai a i hoohihi ai i ka nani, ka anapa a me ke alohilohi o kona malamalama, a ua pili ia malamalmaa ona ia Kalama, ua komo iloko, iloko lilo loa o kona puuwai a me ia malamalama no oia a hele aku la. Nolaila,
E HOOHOLOIA, o makou o na poe Lahainaluna a pau e noho ana iloko o ka apana o Kona Akau, Mokupuni o Hawaii, he mau hoa no ka papa kula hookahi me John Kalama a he mau hoa no na papa kula malalo iho i noho pu a me na pokii hou loa, a i kulike ai hoi me kela olelo kaulana i papahiia ma ka umauma o na Lahainaluna a pau, "o na manu hulu like, lele like no lakou," nolaila, ke hookomo aku nei makou ia makou pakahi a pau loa iloko me oe, e ke kaikuahine e auamo pu i na luuluu, na u, na kaumaha a me ke kumakena ana no ke aloha a me ka minamina nui no kau mea aloha he kane i hala i ka make, o John Kalama. A ia kakou e u pu ana nona, e haliu ae kakou a hooia aku i ko na Lani oiaio, oiaio loa Kau olelo "o ke ola o ke kanaka, me he mahu la i pu-a e a nalo iho." "E hoi ka lepo i ka lepo, a e hoi ka uhane me ke Akua, ka Mea nana mai."
E HOOHOLOIA, a oiai kakou a pau iloko o ke kaumaha ana, ke pa-e mai nei ka leo aloha mailoko loa mai o ka nohoalii mai o ke Keikihipa, e haliu aku kakou a hoolohe ia leo aloha, "e hele mai oukou a pau i O'u nei, e ka poe luhi a me ka poe kaumaha a Na'u oukou e hoomaha aku." A ina ua pili keia leo kahea i ko kakou mau kaumaha, alaila, e pau ana a e hoomamaia mai ana kakou a e hauoli ana kakou me Ia iloko o Kona lokomaikai.
E HOOHOLOIA, e hoounaia i hookahi kope o keia i ka wahine kanemake, Sera Kalama, a i mau kope pakahi i na nupepa olelo Hawaii a pau.
O makou no ma o ko makou komite;
J.W. KELIIKOA,
D. ALAWA,
S.K. HALUAPO,
ROBERT MAKAHALUPA.
ABBE. J. KAUHAIHAO,
Keauhou, Kona Akau, Hawaii, Okatoba 9, 1895.
-
Hui Mea Kahiko Hawaii.
Kuai mai a hoolilo aku i na ano mea kahiko a pau o kakou nei, na Peahi, na Eke-Lauhala a ano e ae paha, na Moena, a pela aku, ma Alanui Moi, mauka ae o ka Hale Repubalika.
HARRY SAYLOR,
aug. 12-tf. Luna Nui.
-
No ka Hoolimalima
O ka hale ma Alanui Kalepa, i hoohanaia mamua e ka Hui Hoolaha Buletina Puka La. Ua hiki loa no o lalo ke maheleheleia i mau keena oihana, a pela aku.
E ninau ma ke keena o
WM. G. IRWIN & CO.,
iune 24 Kaupalenaia.
-
HUI KAMAA O NA POE
HANA.
POE KALEPA NUI A LIILII I NA
ANO KAMAA A PAU LOA.
Helu 516, Alanui Papu, ma Kauhale Hou o Burua.
Honolulu, P.H.
iul 15-tf
-
W.H. DANIELS,
[BILA DANIELA]
Agena Kuai, a Hooponopono Aina, Mea Hana Palapala Kanawai, Mea Ohi Aie a pela aku.
O na hana a pau e haawiia aku ana iaia, e lawelaweia no ia me ka eleu a me ka omoole.
Keena Hana a me Wahi Noho, aia ma Wailuku, Maui.
mei 6-mk.
-
E.M. NAKUINA.
KOMISINA O NA ALA LIILII A ME
NA PONO WAI.
Notari Lehulehu, a he Agena Haawi Palapala Ae Mare no Honolulu nei.
KEENA HANA: Helu 308, Alanui Kalepa. dk 3-1mk.
-
F.J. TESTA, (Hoke).
MEA OHI A KOI AIE.
Mea Huli Moolelo Aina a Waiwai e ae paha.
Mea Unuhi a Mahele Olelo Hawaii a Enelani paha.
Mea Hana Palapala Kanawai o na Ano a pau.
Mea Kuai Mikini Humuhumu Lole.
Mea Hoolimalima a Hoolilo Aina.
Mea Kuai Waiwai no ka Uku Komisina Haahaa.
Ua makaukau mau oia o lawelawe i na hana a pau e haawiia mai ana iaia. He kuike ka rula.
E loaa no oia ma keia keena. apr 8-1mk