Ka Makaainana, Volume IV, Number 18, 28 October 1895 — Page 6
6 HONOLULU, OAHU, POAKAHI, OKA TOBA 28, 1895.
NA HOOMAIKAI
No na Hana Kokua Iho Nei i na Oiwi Nele.
Na ko Kamoiliili Poe.
I ka Mea Mahaloia, Peresidena MRS. S. C. ALLEN, a me na hoa hanohano o ka Ahahui Manawalea Hawaii i na poe nele, a me ko oukou mau komite ko makou hoomaikai palena ole;
Aloha: O makou, o na Hawaii i nele, e noho ana ma Kamoiliili, Apana o Honolulu, Mokupuni o Oahu, ke pahola aku nei makou i ko makou mau hoomaikai palena ole i ko oukou ahahui hanohono, mamuli o ko oukou haawi ana mai i na kokua manawalea ana ia makou i na mea e oluolu ai, iloko o keia mau la nele a hoohaikiia ana e na rula o ka Papa Ola ma o ka laha ana o ka ma'i i kapaia he kolera.
A mamuli o keia hana maikai i hanaia e ko oukou ahahui, ua kaa ae nei ma ko oukou aoao ka helu ekahi o ke kulana Karistiano oiaio, oia hoi, ko oukou lawe ana a hooko i ka mea i oleloia e ko kakou Haku, oia hoi, "E manawalea aku i na poe ilihune."
HOOHOLOIA—A mamuli no o keia hana maikai a oukou, ua lilo ia he kia hoomanao poina ole na makou a me ka makou mau mamo mahope aku o makou, iloko o na kau a kau, e silaia iloko o ko makou mau puuwai. A ke pule ae nei makou i ke Akua Kiekie Loa e pahola mai Oia i na hoomaikai ana a me ka hooili pu iho i na haawina o ka pomaikai a me ka hoonipaa ana i ke ku ana o ko oukou Ahahui Hawaii Manawalea no ka wa mau loa.
HOOHOLO HOU IA— E hoounaia i kope o keia olelo hooholo i na nupepa Hawaii o keia kulanakauhale.
O makou iho no, ma o ko makou komite la,
S. KAMAI, JOHN KAILIANU, G. B. ELAMA.
Kamoiliili, Okatoba 11, 1895
Mai ke Awawa o Nuuanu.
E ikeia ma keia, o makou o na komite i kohoia ma ka aoao o na makaainana e noho ana ma ka apana helu 16 o ke awawa o Nuuanu, Honolulu, Mokupuni o Oahu, a e heluheluia penei:
Ke haawi aku nei makou i ko makou mahalo nui loa ia oukou na poo o ka Ahahui Manawalea Hawaii, oia hoi, ma o ko makou ikemaka ana i na hana maikai a ku i ke aloha i loaa mai ia makou, mai ko oukou hanohano mai.
A mamuli no hoi o ko oukou nana ana a makaala ana hoi i ke ola o ka lahui Hawaii, oiai hoi ka aina iloko o ka hune, ka nele, a me ke kupilikii o na makaainana mai o a o, ke noho nei makou na makaainana me ka hoomanawanui iloko o ka nele, a me ka pilikia maoli no. Me keia mau wahi mea hoolana manao uuku, ke haawi aku nei makou i ko makou aloha a nui, ma o ko makou komite la.
J. KAHAHAWAI, Lunahoomalu. J. P. KALA, Kakauolelo. J. KUPAA, J. NAPUALII, S. KEAHIALOA.
Honolulu, Okato ba 12, 1895.
No Kai Mai o Kakaako.
I ka mea i mahalo nui ia, M RS. KULAMANU ALLEN, Peresidena, a me na Lala a pau o ka Ahahui Manawalea Hawaii;
Me ka paumako nui: Oiai, mamuli o na haawina kamahao o ke aloha kuhohonu oiaio no ka lahui, ua paholaia mai e na puuwai hamama o na kane a me na wahine hanohano o ko Hawaii Paeaina, no ke kokua a malama ana i na ohana e noho hune ana ma ke aloalii nei, i na mea e pono ai ke ola kino, mamuli o na hana hoomalule a ka ma'i kolera, no na anahulu ekolu a oi aku keia hana maikai ana. A nolaila, ua weheia ka hale halau a ke aloha a ua noa akea na piko a ka lokomaikai, e ka Ahahui Manawalea Hawaii. Nolaila,
E HOOHOLOIA— E hoonaniia ke Akua Kiekie Loa, he malu ma ka honua nei, he aloha nui i kanaka; a Nana no e haawi mai i na pomaikai a me ke ola loihi ana no ka Ahahui Manawalea Hawaii.
E HOOHOLOIA— O na hana maikai a me na hana pono a pau i hookoia maloko o ka Ahahui Manawalea Hawaii la, he mau hana pookela oi kelakela loa ia o ka nani a me ka hanohano maluna o na ohana hune o ka lahui Hawaii ma ke aloalii nei, e lilo auanei i kia hoomanao no na puuwai o ka lahui no ka wa pau ole.
E HOOHOLOIA—O na kane hanohano a pau i kokua mai me ka manao oluolu a piha lokomaikai nui wale, e paholaia me ke kaulike i na hoomaikai palena ole ia, e na ohana hune a pau e noho ana ma ka mahele 8 o ke kulanakauhale alii o Honolulu o ko Hawaii Paeaina.
E HOOHOLOIA—E paiia ma na nupepa ke kope o na olelo hooholo, mahope iho o ka loaa ana i ka Ahahui Manawalea Hawaii o keia palapala hoomaikai.
O makou iho me ka haahaa, o na lala o ke komite i koho pono ia e na makaainana e noho ana ma ka mahele 8 o Honolulu nei, L. W. P. KANEALII, E DWARD K. LILIKALANI, DAVID M. PUNINI, JR., KEMILIA KUHIA, W. H. KAILIMAI.
NA PALAPALA
[Aole maluna iho o makou e koikoi o na hala a me na hewa no na manao i hoopukaia malalo o keia poo, aka aia no maluna iho o na poe na lakou i kakau mai.]
I Mau La Hoomaikai Hou no ka Lahui mai Hawaii a Niihau.
M R. LUNAHOOPONOPONO:
Ua kakali aku nei me ka hoomanawanui o ka noho ana me ka naau luuluu a hiki wale mai nei i ka la 6 o Okatoba nei, ua oluolu iki, aole nae i laua aku ka lokomaikai o ko kakou Haku nui loa ma ka lani a ma na wahi no a pau o ka honua holookoa, ma ka hapai like ana i kela leo poloai waiwai loa i hoolaha akeaia ma ka nupepa Ke Aloha Aina, buke 1, helu 97, a i hooiaioia hoi e ka lahui e noho u nei ma ke ahiahi hoi o ka la 5, o ka la hoomalolo. Ua hoomaopopo io ia ua la 6 la o Oka toba, ua loaa ka pomaikai no ia hana a ka lahui e noho nei me ka u ana.
Nolaila, ua hooko pono mai ko kakou Haku i Kana oleloao hoopomaikai ma Mataio 5:4, "Pomaikai ka poe e u ana, no ka mea, e hooluoluia aku lakou." No ka pau ole o ka momona o kela kumuhana, nolaila, ke noi aku nei au i ka lahui e noho nei me ka u iloko o na hoomana o loko nei o ka aina me ka manao paulele aku Iaia, e hana hou no kakou. Penei e hana ai kakou: O na la 5, 6, a me 7 o Novemaba aenei, e hooliloia ia mau la i mau la hookeai piha, a o ke kumuhana, o ia no ka mihi, maloko no o na home.
I ka manawa e hoohana ai i keia kumuhana, e komo ae ma kahi mehameha me ka maluhia a e nana i ka rula hookeai a ka Haku ma Mataio 6:16, 17. E hoi ae me kau buke Baibala ma ua keena la, e hoomaka ana ma ke ahiahi o ka la 4, e waiho i ka ai me ka wai, a mea e ae. E huki ae mai loko ae o ka naau i ka mole o ka hewa, ke kipi i ko kakou Akua kanaka Iesu Karisto. Aole Oia e kala i o kikilo loa no, mahope pae mai Kona inoa hou e ike nui ia nei ma ka Baibala. Nona mai no keia lahui ili ulaula, wae no Ia i alii a hoonoho pu iho no i kapukapu alii no lakou, a i ka pae ana mai nei o ka inoa hou o ko kakou Akua kanaka, i iho la na alii, "e kiola kakou i ka kakou a e lawe kakou i ka lakou nei."
O keia ka mole o ka hewa o na alii a me na makaainana pu, o ia kakou. Ua kuamuamu like kakou me na olelo hailiili a hiki i keia la. Eia ka lua o ka uhaki kanawai— Maloko o ia mau kanawai he 10, ua aoia mai kakou e aloha i ke Akua, e aloha i ka hoalauna. Me keia mau mea nui elua i hanaia e ka lahui, ua haalele mai ke Akua ma keia mau mea i ka lahui me ko lakou alii e au iloko o ka moana o ka popilikia, a aole i maopopo kahi e pae ai ke Aupuni kumu a me na ohua maluna ona. A i mea e pae ai keia Aupuni kumu me kona mau ohua, e hoi a pau iloko o ka mihi, alaila, pae.
A pau ia mau la ekolu, e hoomaopopo kela a me keia i ko ke Akua leo, a hooko aku. He leo Kona aia iloko o ke aheahe malie, oia hoi, moeuhane ke akaku, ka hihio, a me ka nane. Mai walaau wale ae ka waha. E lalau i ka oo a e mahi i ka aina, a e maona no. A ma na la 25, 26, me 27, i mau la ia no ke noi o ke kumuhana, "E hiki mai ke keiki kanaka Akua me Kona Aupuni o ka maluhia." E like no ka noho ana me ko na la mua. A pau hoi ia i ka hookoia, alaila, e lawe i ka la 1 o Dekemaba, i la hui maloko o na luakini i la hoano no ke Kolukahi iloko Ona. Iloko o keia mau la ehiku, ua hana io ia Kona iini, e hele mai na poe luhi a me na poe kaumaha a Nana kakou e hoomaha mai ma ke kino a me ko ka uhane.
Ua hoaoia keia ma Ninewa, aole no i nele. Pela no hoi o Moleke dai me kana hapuu Ekekela, o Davida no hoi, Daniela me kona mau hoa, na haumana ponoi no hoi a Iesu, ke alii lokomaikai Kauikeaouli, aole loa lakou i nele. Ina aole mea e nele ai, alaila, e hoolana i ka manao ma ka heluhelu akahele ana i kela pauku 33, mokuna 6 o Mataio, "E imi e oukou i ke Aupuni o ke Akua a me Kana pono, alaila, e pau mai ua mau mea la i ka loaa ia oukou." "E hoopau i ko olua inaina a me ka huhu e na moopuna kolohe," wahi a kekahi luahine i kana mau moopuna.
Ua lawa ae nei na la no ke kamailio wale ana me ka hana ole, a ke hamau wale nei na leo. E ala, e na paahana, a e lokahi ma ka pule oiaio, a na ka Haku Lani e kokua mai.
Ko oukou hoa iloko o ka u,
E. W. PALAU.
Waikahalulu, Okt. 21, 1895.
Ua Kapaeia ka Oiaio.
[Hoomauia.]
E ninau iho ana paha ka mea heluhelu, heaha la ka waiwai o ka hoala ana mai o keia moolelo i na mea i hala kahiko? Ina pela ka ninau he waiwai no ka ninau, a e kali iho oe, he mea ino a puka aku.
Mamuli o keia mau poino i ikeia, e hiki mai ana ka hopena o keia lahui e nalo aku ai mai ka lepo aloha o Hawaii aina, nolaila, kupu iho la ka manao aloha lahui iloko o ka Moi Kalakaua a me ka Moiwahine Kapiolani, a kukulu iho la i ahahui hooulu a hoola lahui, a kapaia iho la he makla no ke Aupuni. Ua paholaia keia kumuhana a puni ka Paeaina, a