Ka Makaainana, Volume IV, Number 19, 4 November 1895 — Page 1
Ka Makaainana.
BUKE IV - Ano Hou. Honolulu, Oahu, Novemaba 4, 1895. HELU 19
MOE ME KA MALUHIA.
-
Hoi ka Lepo i ka Lepo, a o ka
Uhane i ka Mea Nana i Hana.
DR. JOHN BRODIE.
Me he uwila la ka hikiwawe o ka pahola ana ae o ka lono i kakahiaka nui poniponi o nehinei ua make keia kauka o kakou nei. Nui ke kaumaha a nui no hoi ka minamina ao nei haule emoole ana aku o ia hoa'loha oiaio o ka lahui. Ae, he hoa'loha oiaio oia, no ka mea, aole no paha e hiki koke ia kakou ke hoopoina ae, oiai, he mau la helu wale no ka i hala ae, iloko o na la a ke kolera e holapu ana a o ia hoi kekahi hoike maopopo ana no kona aloha ia kakou iloko o ia wa o ka pilikia.
Iwaho o kona wahi noho ma Waikiki kona make ana, o ia no hoi kona halemai, he wahi e hooluolu ai no kekahi poe mai ana, i ka po Poaono nei. Wahi a ko makou lohe mai me kona mai ole a me kona ano hauoli no ia la, ua olelo aku la oia i kekahi o na wahine lawelawe o ka halemai e hoi ana oia e moe, o ka hora 9 paha ia. Iaia a hala aku a aole i loihi iho, loheia aku la ke pahu ana mai, a i ka heleia ana aku e nana, o Kauka Berodi ka mea i haule pahu ai i ke komo ana aku no o ka puka o kona keena a ua alai iho la kona kino i ka puka a paa pu.
Ua kauoha koke ia kona hoahui, Kauka Mare, mai ke kulanakauhale aku nei, a iaia a hiki, ua lele loa kona aho. O na kauka e ae no hoi kekahi o kakou i kauohaia nona, aka, ua aili loa kela, ua pio ka lamaku o ke kino, ua hala loa ma ke ala hoi ole mai. Aloha no oia!
Ua hanauia oia ma Monotereala, Kanada, he 42 makahiki a oi i hala ae, iloko o Maraki 7. Oia hookahi wale no ko onei a hala aku la, a koe iho la hoi kona hoa, Kauka Mare.
Hora 2 o keia auwina la e hoolewaia ai kona kino kupapau mai Waikiki mai, a iuka o Maemae e kanuia ai, a na ka Bihopa ana o Honolulu e malama i ke anaina pule hope loa nona.
O ko makou manaolana, e nui a lehulehu na oiwi e hele i kona hoolewa, e hoike hoi i ke aloha nona no kana mau hana maikai a ku i ke aloha.
MISASA MARK PREVIER
I kahi manawa o ka auwina la Poalima nei, ma ke kahua noho o Misasa Vitoria Ward iwaho o Koula, i kuu mai ai ka luhi o Misasa Maka Piuivia, i ke 85 makahiki ma keia ola ana. Oia ka wahine a kekahi o na kaikunane o Misasa Kimo Pakaka, i make mua, a o Luka Kaiaka hoi kona inoa ponoi. Me kana hanai no oia i noho ai a hala aku la, no ka mea, ia Vitoria i hanau ai, ua lilo iaia a me kana kane ka hanai ana, a ua oleloia he makuahine maikai oia, i oi loa aku hoi i ko kahi makuahine ponoi. Aloha no!
He ewe a he kupa oia no Waikapu, Maui, na Kuupahoehoe (k) a me Kioloke (w), a he poe koikoi hoi lakou no ia wahi, oia hoi, he mamo alii no ia aina. Oia ke kaikuaana o ka Rev. L Kauhane wahine a me ko Robata Hoapili Beka ma makuhine.
Auwina la Poaono nei i hoolewaia aku ai kona kino wailua mai kahi noho aku no o kaua hanai, malalo o na lawelawe haipule ana a ka Rev. H. H. Paleka, a waiho ana iloko o ka opu koou o ka honua ma ka pa ilina o na hunona haole i hala mua iuka o Makiki. Ua laweia mai hoi ka holowaa me ke kino o kana kane i make mua iloko mai ka hale ilina o ka ohana a Pakaka mauka o Maemae, a ua kanu pu ia me ia. Ke noho nei kana hanai, a me na lala no a pau o ia ohana nui, a me na moopuna e u nona, no ka mea, ua nui no kona alohaia e lakou a pau. Minamina wale!
MISASA A. BURGESS.
Ma Kailua, Kona Akau, Hawaii, i ka hora 2 o ka wanaao Poakahi, Okatoba 21, i komo mai ai ka anela o ka make a lawe aku la i ka hanu hope loa o Charlotte Napahuekolu Burgess, i ke kanaha o kona mau makahiki me ekolu malama a me iwakalua kumamakahi la ma keia aoao mauleule, iloko o na la pokole wale no o ke kaa ma'i ana. (Hookahi pule mamua aku o kona make ana, ua hanau mai oia he kaikamahine, a ma ka hora 9 a.m. o ka Poaha, la 30, ua kiiia mai la no e ka make a haele pu aku la no laua ma kela aoao mau o keia ola ana, a haalele mai la ia'u a me ka ohana e kanikau aku no laua.) Hora 4 p.m. i malamaia ai ke anaina pule maluna o kona kino kupapau pau e ka Rev. W.M. Kalaiwaa, a kamoe aku la kana huakai hope no ka uka luuluu, ka home hoi i Hanahua, kahi ana e moe nei i ka moe kau moe hooilo.
He kaikamahine oia na Alexander Auld a me Loika, a o Honolulu kona aina hanau. A ma Kalaoa, Kona Akau, Hawaii, i mareia ai maua e ka Rev. G.P. Kaonohimaka i ka malama o Augate, la 23, 1873. Ua piha ia maua na makahiki he 22 a keu o ko maua noho pu ana a haalele mai la ia'u, kona hoapili o na la opio. Ua loaa ia maua he umikumamalua mau keiki, eha i laweia aku e ka make a koe ewalu e u nei me ka minamina nona, ka makuahine i hele aku i ke ala hoi ole mai.
He heahea a he hookipa oia mai na poe kiekie a na poe haahaa, waiwai a ilihune. Ua kuu aku la kona luni me ka maluhia, i ko ai na olelo a ka Baibala, "Nana no i haawi mai a Nana no i lawe aku. E hoomaikaiia ke Akua ma na lani kiekie, he malu ma ka honua, he aloha no i kanaka." A. BURGESS.
Kailua, Kona Akau, Hawaii, Okatoba 31, 1895.
-
Kau Kiure o Novemaba.
Eia iho ka papainoa o na kiure Hawaii o keia kau e noho ana ma Aliiolani Hale i ka hora 10 o keia kakahiaka. E.M. Jones, J N K Keola, H Kamana, H Kaaha, Geo E Smithies, A Puaaloa, G W Macy, M Keliaa, J K Kamealoha, Jas L Holt, Jr., C L Hopkins, Jas H Taylor, S C Dwight, L McKeague, Dan Kamakauahoa, Koakanu, Chas Spencer, E S Holt, J W Akana, A Morris, C P Kanakanui, W Ringer, A Recard, H E Cook, J Mahoney, J Paniani, J Padaken, R H Baker, T P Cummins, Sam Ladd, J S Kawewehi, J K Merseberg, A Bishaw, G W Nawaakoa, J Wallace, a me M K Keohokalole.
-
He mau puaa komohewa ka E.H. Naoho, a o ka mea nana ia puaa ka-e kii koke ae. E heluhelu ae i kana olelo hoolaha.
Mahope iho o ka nieniele pono ia ana imua o ka Aha Apana ka hihia o Kale Buluka, no ka hoao ana e apuka i kekahi huina mahuahua malalo o ka inoa o ka Hui Mokumahu o Waila Ma mamua aku nei, ua waihoia kona hihia a imua o ka Aha Kaapuni ma ke kiure e hooloheia ai. Opiopio kamalii, hoomaka e no e hana i na hana lapuwale.
Kuee ka Papa Kahu Waiwai
He hoopaapaa hahana ka na lala o ka Papa Kahu Waiwai o Kaumakapili ma ko lakou halawai i malamaia i ka po Poakolu iho la, no kekahi olelo hooholo hilinai ole i laweia mai e J W Alapai, a e koi ana e hoopauia ua Papa Kahu Waiwai kolohe la. O ka hopena, aole i nanaia mai ka olelo hooholo e ka luna hoomalu, oia ke kahunapule muhee a hiki wale no i ka ulu ana ae o na manao ulupuni iloko o kela a me keia. Kokua kahi mau lala o ka Papa i na hana pauaka a ke kahu, oiai hoi kekahi hapa aole he makemake e hookomo aku i ka Ekalesia iloko o ka aie kaa ole. Aloha no paha ka Ekalesia o Kaumakapili i ka pauakaia mai e keia poe i paa na ihu i ka uwea umii hoi pakolu.
-
Ki Pu Iaia Iho.
He mau la i hala aku ua hoao pinepine ae kekahi haole, nona ka inoa o Toma Anedesona, kalaiwa kaa o Misasa Konuwela o kaawe iaia iho. I ka po Poakahi i hala, ua hopuia oia a hoopaaia ma ka Halewai mamuli o kona hoao ana e lawe i kona ola, oiai oia malalo o ka haawina a ka ona, a i kakahiaka Poalua mai i hookuuia ae ai. O ka hora 4 paha ia o ia auwina la, ua komo aku la oia iloko o kona rumi a lawe mai la i kekahi pu raifela a hoopaa ae la mawaena o kona mau kuli, hikii iho la i ke kaula ma ke kiko a hoopaa aku la i kekahi piko o ke kaula malalo o kona mau wawae, a o ka waha o ka pu e kau pololei ana i kona waha. I ka manawa o kona mau wawae i oni ae ai, ua kani ae la ka pu a komo aku la ka poka iloko o kona waha a huai mahope a lele liilii o hope o ke poo a me luna iho. He manaonao ke ike aku i na apanapana a me na hilihili koko e waiho ana i ka papahele. Ua kanuia kona kino kupapau malalo o na lawelawe ana a Mika Uilama. He kanaka Denemaka oia.
-
Ua malama io ia ae no na hana hoolaulea no ka wehe ana i ke Kula Kiekie Hou ma Kaakopua i ka hora 3 o ka auwina la Poalima iho la, a ua piha kui o loko o ka hale i na poe makaikai. He mau haiolelo ka i malamaia a me na himeni, a pau ia ua hoomakaikaiia aku la kela a me keia ma na wahi like ole o ka halekula.