Ka Makaainana, Volume IV, Number 19, 4 November 1895 — Page 3
HONOLULU, OAHU, POAKAHI, NOVEMABA 4, 1895. 3
Alanasaila ka Nani
-KA-
HAKU BARONA WAHINE.
-
Ka Naita Huna o ke Kapakila Ulaula - Ke Aka Kino Wailua Kamahao - Ka mea Hoopahaohao o ka Po - Na Lei Daimana Ekolu - Ka mea Huna Pohihihi lua ole o ka Lua Waiwai o Hamelota.
-
Ela Bene
KA HAKU BARONA OPIO;
-A ME-
Ane Bela
KA MANU HULU OMAOMAO O SEKOTIA.
-
Mokuna I. - Helu 4.
NA LEI DAIMANA EKOLU.
Aia ma kekahi wahi kuaaina loa o ka aina laula o Sekotia, e noho ana kekahi kanaka me kana wahine a no laua kekahi wahi pupupu hale kuaaina loa ma kapa o kekahi lokowai. O ka inoa o ke kane o Bene, a o ka wahine hoi, o Mele, a na laua i hanau mai kekahi keiki nona ka inoa o Ela Bene, ka mea nana i uwehe i ka puka o ka Lua Huna Waiwai Nui, a nona hoi kekahi hapa iloko o keia moolelo.
I ka ehiku o na makahiki o Ela Bene, ua hookomoia oia i ke kula o na keiki ilihune, a he wahi keiki oi loa aku oia o ka paakiki launa ole, a na ia mea i hoolilo ae iaia he wahi keiki hoohenehene nui ia e na keiki kula o kona halekula e noho ana, a ua kapa mau aku lakou iaia he wahi debolo no ke kula o Enadamena i hale kula o na debolo.
He mau makahiki loihi ma ia hope mai, o ia mau no ke ano paakiki o Bene opio, a ua lilo ia i mea hoonaukiuki loa i kana kumu, a i na wa a pau e olelo mai ana ke kumu, aole pono iaia ke heluhelu, na kekahi ae. Ua mau ia haawina ia Bene opio. A i kekahi la, ua hooi loa ka ukiuki o ke kumu, no ia mea, ua haawi aku oia he rula oolea loa no Bene opio penei. "I kou hele hou ana mai i ke kula no ka la e hiki mai ana, e hooikaika loa oe e hoopaa i kau mau haawina, a ina aole e paa, e hahauia no oe i na kaula he kanalima, a me ka hoopaa pu ia iloko o ka rumi pouli o ka halekula Ua maopopo anei ia oe keia hoopai e Bene?" "E hoao no au e hoopaa," wahi a Bene opio i pane aku ai.
I ka wa i pau ai o ke kula o ia la, ua hoi aku la o Bene opio no ka hale o kona mau wahi makua me ka noonoo nui loa no keia hoopai e loaa ana iaia no ka la e hiki mai ana, a ia hora no, ua hooholo koke oia e hoopaa i kana mau haawina kula i na hora a pau o ke ao a me ka po, a hooholo hou iho la oia i hookahi hora o ke ao a pela hoi ka po, oia kona wa e hoomaha ai, a o na hora e ae a pau he wa huli haawina ia nona. Me ia manao iloko ona, ua hooko aku oia ma ia hope mai.
Nolaila, i ka hiki ana mai i kekahi la ae, ua hele aku la o Bene opio i ke kula, a o na haawina kula a me kela rula a ke kumu i kau ai nona, o ia ka mea e kau mai la imua ona i na minute a pau. I ka hoomaka ana o kona papa kula no na haawina a pau o ia la, ua lanakila o Bene opio maluna o na haawina a pau loa, a o ia ka wa a ke kumu i haawi mai ai i na mahalo he nui a wahi a ke kumu - "I kekahi la e hiki mai ana, e lilo ai oe e kuu Bene opio i kanaka pookela kaulana a hanohano ma na kaiaulu o ke aupuni o Sekotia nei.
Ua hoohauoli nui ia o Bene opio no keia mau mapuna olelo hoolana manao mai kana kumu mai, a na ia mea i kono ikaika mai i kona puuwai opio e hoao mau ana oia mau ana oia ma na haawina ao a pau a e lilo oia i kanaka naauao a kaulana iloko o ka aina laula o Sekotia.
I ka puni ana o ka makahiki mua o ia kau, ua holomua loa o Bene opio ma na mea ao a pau, a e hoohauoli nui ia ana hoi kana kumu, a o kona mau hoa kula, o na olelo hoohenehene o na la i hala aku ua oki pu ia ia mau olelo, oiai ke pii aku nei o Bene opio i na anuu like ole o ke kula.
Ma ia hope mai, ua puka laelae aku o Bene opio mai ke kula aku, me na hoomaikai he nui o kana kumu a me kona mau hoa kula, a ua hookomo aku kana kumu iaia iloko o ke kula alii o Sekotia. Maloko o keia kula he ehiku keena kula. O na keiki alii a me na keiki a na poo kiekie a hanohano, o ia wale no ke aeia e komo; a o na keiki ilihune a haahaa, aole loa ia o aeia e komo. Aka, ua komo laelae aku la o Bene opio a ua lilo oia i mea hookahaha nui loa ia iwaena o kona mau hoa kula, a ua holo puni ae la ke kaulana nui o Bene iloko o ke kula nui o Eneroma, a ua lawe hele ia aku la ka inoa o Bene ma na palena a pau o ke kulanakauhale alii o Edinebolo, a iloko pu o ia wa e holo puni ana ke kaulana o Aue Bela ma na wahi a pau no ka lua ole o ka ui, ka naauao, i hui pu ia hoi me ke kilakila nui o kona oiwi kino, a o ka mea i kapaia, ka "Manu Hulu Omaomao o Sekotia."
[Aole i pau,]
-
Moeuhane Pahaohao.
MR. LUNAHOOPONONO:
Aloha oe - E oluolu oe, e hookomo iho ma kekahi wahi kaawale o kau pepa i keia moeuhane ano e a pahaohao nui wale, a ua lilo hoi i mea hoonaluea i ko'u noonoo i ke ao a me ka po. Ua ninau au i kekahi poe ike a ua weheweheia mai me ka lawa ole o ko'u manao i ka lakou mau wehewehe. Nolaila, ke nonoi nei au i ka oluolu o ke Kilokilo Dimerata o Honolulu, e hoike mai i kana wehewehe piha no keia moe, a ke nonoi pu ia aku nei no hoi ka oluolu o na poe ike wehewehe moe a puni ka Paeaina, e wehe mai i na mea pohihihi o ka po.
Penei ka moe: Ma ka po o ka la 22 o keia mahina, Okatoba, 1895, o ia paha ka po o Kukolu ma ka helu Hawaii, ua moe iho la au, a i ke ao ana o ke kakahiaka Poakolu (hora 5 a 6 paha) a mamua o ko'u puoho ana, hoomaopopo iho la au i ko'u ano, e pule ana au, a penei ka'u pule ana - "E hana aku ana au i na hana kupaianaha iloko o na la he kanaha a me na po he kanaha. A mahope aku o laila, e uhi aku ana au i ka aina i ka wai iloko o na la hookahi haneri a me iwakalua."
Ke hoomaopopo la au o na olelo a pau e puka nei mai ko'u waha aku, na ke Akua ia, a me he kaula la au Nona e wanana ana. Aohe au i ike i kekahi mea e ae malaila. A i ko'u puoho ana ike iho la au he moeuhane ka, a puka aku la au iwaho, ua ao, e like me ia a'u i hoike ae nei mamua. O keia ae la ka moe pahaohao.
R P. HANAPI.
Hanalei, Kauai, Okatoba 25, '95
-
Poakolu iho e ku mai ai ke Kopatika mai Kina a me Iapana.
Eia ke kukuluia nei mauka o Aala-uka, kokoke i alanui Liliha, na lio laau pininiu i ku iho nei ma ka Nekina mamua, a me he la e niniu poahi aku ana ma keia mua iho.
Ua ku mai i ka auwina la Poakahi i hala ka mokumahu Kina mai Kapalakiko mai, a mahope iho o ka hora 10 kakahiaka Poakolu iho la i kikihi loa aku ai no na kai o Kina a me Iapana.
Aia ma Kapuukolo aenei kekahi makuakane a me kana mau keiki liilii iloko o ka nawaliwali. Manao paha ka wahine a kela kanaka o make kela poe, nui loa paha kona pilikia oia kona kumu i hele ai a haalele i ka uhane a ke Akua i haawi lokomaikai mai ai nana. E kela wahine, e pono oe e hoi e malama i kau mau keiki o noho ae oe i ke puhi.
Kuai Hookau Nui!
NO ELUA PULE WALE NO!!
SING LOY (Sini Loi)
Ma na Helu 51 & 53, Alanui Moi, ma Ewa aku o Alanui Maunakea.
Ma ka Poaono, Novemaba 2, e hoomaka ai keia kuai ana a he paki maoli ana no ka olelo ana. Waipahe na kukai ana, a oi loa aku hoi ka hoolu ana ma na kumukuai, i ike mua ole ia malaila mamua. O na waiwai e kuaiia aku ana, o ia no
Na Silika Pake o na Ano Like ole,
Na Makalena, Na Kalakoa,
Na Eleele o na Ano a pau,
Na Keokeo o na Ano a pau.
Na kamaa a me na Papale
O Kane, Wahine, a me Keiki,
A pela aku a pela aku, a nui loa a lehulehu, e pono ai no ka ohana nui.
He mea hewa ole ke kipa mai e ikemaka i ka huikau o ka Huin-a-Kale.
okt 28-4pl
-
No ka Hoolimalima
O ka hale ma Alanui Kalepa, i hoohanaia mamua e ka Hui Hoolaha Buletina Puka La. Ua hiki loa no o lalo ke maheleheleia i mau keena oihana, a pela aku.
E ninau ma ke keena o
WM. G. IRWIN & CO.,
iune 24 Kaupalenaia.
-
Waihona Buke Hawaii.
E loaa no na buke ma ka olelo makuahine no ke kuai ma ke keena o ko makou Puuku. Penei iho kekahi o ia mau buke:
Laieikawai - - - $1 00
Gaberiela Lenoa - - - 75
R.W. Wilikoki - - - - 50
Hookahuli Aupuni o 1895 – 50
a pela aku, a pela aku.
O na buke e ae no hoi kekahi, e laa na buke kanawai, a me kahi mau ano e ae, ke ninau pololei ia mai ia
F.J. TEST (Hoke),
ok 28-tf 327 Alanui Moi.
-
Ua Makemakeia
Ma ka
HALE INU RAMA LUVERA
(o ka Hale Meli mamua,)
Helu 91, Alanui Nuuanu.
5,000 Kanaka i na La a pau, no ka inu ana i ka
BIA KAULANA O KEOMOLEWA,
Ua Hele a Huihui i ka Hau.
EDUADA & HARE.
Telepona 589. Pahu Leta 475.
okt 28-tf
-
HALEKUAI KUIKE OAHU
-
"KE OLA O HAWAII."
Helu 322, - - - Alanui Nuuanu.
Oiai hoi, ua pau ae la ke kuahana ana, ua weheia hoi ka halekuai maluna ae i Iulai 1 nei, nolaila, ua makaukau loa e hooko a e hoolawa aku i na iini o na poo a pau. E ko no ka makemake o na wahine ke kipa mai malaila, a e pono no hoi ke kipa mua mai mamua o ka hele ana i na halekuai e ae. Malaila no e loaa ai.
Na Makalena, na Kalakoa, na Keokeo Halua me Vitoria, na Papale, na Kakini, na Hainaka, na Waiala, a pela aku a nui a lehulehu wale.
E ike mai ia kakou hoakanaka.
M.E. SILVA,
iul 8-tf Luna Nui.
-
Hoolaha Hoohui.
Ke hoolahaia aku nei ma keia o BRUCE WARING, e noho ana ma Honolulu, Mokupuni o Oahu, a me CHARLES S. DESKY, e noho ana no ma Honolulu i olelo mua la, ua hoohui ae ia laua iho.
O ka hana a ka hui, o ia ke kuai mai a me ka hoolilo aku i na Waiwai Paa a me Lewa ma ko Hawaii Paeaina.
O ka inoa hui o ka hui, o ia no o BRUCE WARING AND COMPANY.
O kahi nui a ka hui e lawelawe ai i ka hana, aia no ia ma Honolulu i olelo mua ia.
Hanaia ma Honolulu,}
Sepatemaba 30, 1895.}
okt 29-3mnw