Ka Makaainana, Volume IV, Number 19, 4 November 1895 — Page 5
HONOLULU, OAHU, POAKAHI, NOVEMABA 4, 1895 5
Hawaii" no ka mea nui. Pela mau paha hoi auanei lakou nei ma ae e kuhalahala ai a hoea loa aku i kahi o lakou e kuwalawala loa ai. No keaha no la hoi ke ku nui ole ae a hele aku loa?
-
He mea kupaianaha no hoi paha ko Hikikoki, Makai Nui o Hawaii i nei wa, kauoha pinepine ia e holo mai ianei, i hiki ai hoi iala ke hoike ae i na kumu ana i hopuhopu wale ai i kekahi poe, oiai oia e noho Ilamuku ana, me ke akaka pono ole o na hewa, a i ole ia, o na hala paha o ia poe. Ua huli hoi hou aku nei no ua o Hikikoki no Hilo. Ae, ua hoike iho nei oia no ka pono o ka Hui Mokumahu Kanada-Auseteralia, a wahi a ka oleloia mai, aohe ka he waiwai o kana mau olelo. He nui no paha hoi na hoao ana e hoopalaimaka.
-
Eia nae, ua oleloia ke mihi nei ke Aupuni no nei mau hana uko a kuleana ole a Hikikoki, no ka mea, aole i maopopo mua na kumu iaia no ka hoopaa hewa a kuleana ole ana. Aia ka inaina a pau maluna o Hikikoki, a o ka loha a me ka hoka ka mea loaa ia lakou nei ma ae a pau loa. E mihi nui no a e pono, he hele ino, aohe ka he mawaewae mua i ke ala. A e hoka nui no hoi a e pono no, no ka mea, he hookiekie me ka piha haakei maoli no. A o ka loha hoi, eia ia ke kauhola nei maluna iho o Kole Ma.
-
Loihi aku nei o Kakela i o, akahi no nae hoi oia a aa e hele aku a hoea imua o Peresidena Kalivilana, a ike puanuanu ia mai la no. Ae, i ka aina nei no oia, olelo mua ia no aohe oia e hoihoiia mai ana, aole no ia mau olelo i hala. Aka, painuu aenei hoi kahi ohuku ale iki a ke Kuokoa i ka moho no a lakou o ke Kalabu Repubalika Hawaii. Ahu no hoi ka pala.
-
Eia ke oleloia nei ua hoike ae o Kanikela Hakafila, me ka hiki ole loa iaia ke alo ae a ke hoole aku hoi, i keia Aupuni no ke koi poho a Mula ma ka aoao o ke Aupuni Geremania, a he mea pono hoi e hookoia na koi la. Auwe no ka hoi e, ehaeha loa nei koo oolea o lakou nei ma ae, he ohakulai maopopo oia. O kahi pilikia nae paha hoi, ua heo aku o Kuauau, a o Hakiupu hoi koe a niau kolonahe aku me ka palanehe launa ole mai.
-
Ua lonoia eia iwaena nei o kakou he ahahui malu, i kapaia o ka A.P.A., oia hoi, American Protective Association, a i ole ia, American Protestant Association, a ke unuhiia ae, Ahahui Hoopakele Amerika, a i ole ia, Ahahui Hoolepope Amerika. Eia ka keia ahahui ke hoomalu a ke alakaiia nei e na poe alakai o ka luakini Halepapu.
-
O ke ano nui o keia ahahui, he kue loa i na poe a pau o ka hoomana Katolika Roma, nolaila, mamuli o ia mea, ua kue loa ia na hoahanau o ia hoomana mai ka noho a lawelawe ana i kekahi oihana Aupuni. Aia keia ano ahahui ma Amerika Huipuia, a ua ikeia hoi ke ino o ka akou hana malaila, a eia hoi i nei wa ke hoao nei e komo mai i o kakou nei a e hooponalo mai hoi i na launa maikai ana o na hoomana a pau.
-
A o kekahi hoi a makou e hoike aku, he 165 ka nui o na lala o ua ahahui malu la maanei, a ke halawai mau nei i na auwina la Poaono a pau ma ka hale hui malu ma Alanui Moi nei, ma Ewa iho o ko Kale Gulika pa, a o kekahi luna kiekie loa ka o ke Aupuni ka mea nana e hoomalu mau nei. Ina o ka inaina pili hoomana kekahi e okomo hou ia mai iloko o na hana pili kalaiaina, alaila, aohe nani i koe ia Hawaii nei. No nei wa hoi, ua lawa kakou me nei mau hoakaka pokole, a mahope aku no hoi ke koena.
-
Ke ole makou e kuhihewa, o ka laikiniia ae o ka opiuma kekahi mea nui e noonooia nei, i nui ai hoi na loaa, a ke ole ia, alaila, e hoopiiia ae ana paha hoi na auhau, a ma kekahi ano e ae paha hoi e hoomahuahuaia ai na loaa o ke Aupuni. E hoomanaoia o ka laikini opiuma kekahi o na kumu a na ewe hemolele i manao ai he kupono e hookahuliia ke Aupuni Moi, a malia ua makemake nui no ma ia kumu hookahi no paha o hookahulihiaia ai keia aupuni oehaa. Ina aku paha i o kikilo loa.
-
Pai e, pai no, pai la! He keu no paha a ka painuu o kahi ohuku ale iki o ke Kuokoa iaia iho. No ka uuku no paha hoi kahi o kahi kaaka. Ina no aole nana ponoi oia e paikino ae, nawai no la auanei hoi oia e pai ae a ku i kaupoku o ka lani iluna, a i ka papaku o ka honua ilalo.
-
He hoahui hou ko Kikania Lualii Kakina i nei wa. Ua apakau no hoi oia, o ka haaleleia aku la ia o kona hoahui mua, ke diabolo. Owai ana la ia hoahui hou aku ona ma nei mua aku, oiai hoi, ua kapae la oia ia Satana no Hakawela.
Kia Hoomanao o Kalakaua.
Ua hiki mai a eia i o kakou nei ke kia hoomanao poo me pauku kino o ka Moi Kalakaua i make aku iloko o ke aloha nui ia. O keia hoi ka hua o na lulu ana a na poe i hoopomaikaiia e na hooikaika ana a ia Moi naauao, a i ae kahi poe no lakou iho no ko lakou pono. He mau makahiki i hala ae ka hoomakaia ana o na lulu ana, a na ka loea hana kii lepo a pohaku, Allan Hutchinson (Alana Hakinikena) i hana iaia aku nei i Kapalakiko. Me ua kii la no oia i hoi pu mai nei. (Iaia hoi ma Kapalakiko, ua loohiaia oia i kekahi ma'i ano kupilikii, a na ka haku wahine o kona hale i noho ai i malama iaia a oluolu, a i uku kupono hoi no ia hana maikai, ua mare aku oia i ua wahine la a ua hoihoi pu mai nei no me ia ianei.)
I ka Poaono nei i halawai ai ka Ahahui Kia Hoomanao Kalakaua, a ua hooholoia e kukuluia ua kia hoomanao la ma ke poo o ke alapii e komo aku ai i Iolani Hale, a i ole ia, ma ke poo paha o ke alapii o loko e pii ai iluna, oiai, aole hoi i kupono loa no ke kukulu ana iwaho, i ke akea. A o na dala no hoi i luluia ai, he $2,000 paha, ua pau loa no i ka lilo. E waihoia ana ke kii i kekahi o keia mau la iho, ma kekahi wahi kupono no ko ka lehulehu makaikai ana.
-
La Hanau o ka Mikado.
I nehinei iho la ka la hanau o ka Mikado o Iapana, a ia la i piha ai iaia o ke 47 makahiki mai kona hanauia ana. Mamuli o ke kaa ana o ia la i ka La Pule, ua hoopaneeia na hana hoohiwahiwa a na Kepani i ka la hanau o ko lakou Emeperoa a keia la. E panikula ana na halekuai Kepani a pau, a e hookuuia ana kela a me keia e hauoli nona iho. Lehulehu na kauhale i hoowehiwehiia i nehinei. Aohe aha ike o keia la ma kahi o ke Kanikela-Kenerala. no kona omaimai hoi kahi.
-
Ua hoohui aenei o Kakina a me Hakawela ia laua iho ma ka oihana loio.
E kala mai no ko makou ulolohi loa, aka, eia no nae hoi i ko makou la e oili aku ai.
Kokoke e paa loa ka hale pohaku hou o Hale Vona Holo ma alanui Moi nei. He kilakila maoli no na paia o ua hale la ke nana aku.
O ka Poaono nei ka la hoano o na Uhane a pau, he la hoomanaoia hoi e ka Ekalesia Katolika Roma. Pau ka pule ana ma ka luakini o Malieokamalu, ua moe aku kaoo o na hoahanau no ka pa ilina o Koula, e hoohiwahiwa hoi i ka he o Bihopa Halemano a me na he o na poe e ae e waiho la malaila.
Puali Puhiohe Lahui.
Maloko o ka nupepa Kuokoa namu i ike iho ai makou i kekahi manao i hoopukaia maloko o ka nupepa pili ekalesia Ka Lepa o Ziona ma Misouri o ka la 12 o Okatoba, e olelo ana i ka hele aku o ehiku lala o ka Puali Puhiohe Lahui i ke anaina haipule o ka ekalesia o Iesu Karisto o ua Poe Hoano o na La Hope i Hooponopono hou ia a kokua pu i ka papa himeni me ka lakou mau mea kani. Ua hoohauoli nui aku lakou i na alakai o ia hoomana ma o ko lakou kokua pu ana i ke anaina haipule a me ka papa himeni. A ua nui loa ko lakou mahaloia.
A maloko no o ia nupepa o ka la 19 keia mau olelo.
"O kekahi o na alakai o ka Puali Puhiohe Lahui (S.K. Kamakaia), ua babetizoia oia ma ka La Pule e Lunakahiko John Brackenbury, a ua kaulimaia oia ma ke anaina pule kakahiaka maloko o ka halepule."
Ua akoakoa pu aku no i ke anaina haipule o ia la he iwakalua mau keiki puhiohe, a he ehiku wale no nae o lakou i pii iluna o ka papa himeni e kokua ai ma ka himeni ana. Nui ko lakou mahaloia no ko lakou malama i ka ihiihi o ke anaina.
-
I ka la 28 o keia mahina a akoakoa ai ka Aha Elele o ka Ekalesia Enelahi ma Hawaii nei, ma ke kahua o ka Luakini o Sana Anaru.
Nui ka ma'i e laulaha nei i keia mau la, oia ka lia a me ke anu, i awili pu ia hoi me ka fiva. E akahele loa kupono, o poino no auanei.
He paina hauoli ka na lala wahine hoomana Moremona o Auwaiolimu i haawi ae ai i ka Poaha iho la i na poe a pau. Ua maha oia ka papaaina a me na kuhinia.
Ua lawe hele ia ae i keia kakahiaka kekahi mau moku liilii e hooheiheiia aku ana ma keia mua iho ma na alanui o ke kulanakauhalo nei e hoomaikeike ai.
Ua lohe mai mkou e hoonohoia aku ana ka he Jeo okoa ae ma kahi o ke Jeo mua i make o ke Kuokoa, a o ua Jeo hou la, he mea no ka i maa i ka huli mau i ka Poepoe o ka opihi o kahakai.
He Lakeke Huluhulu Polu Wahine ka i loaa a oia i ke keena o ko makou Puuku e waiho nei. O ka moa nona ia waiwai e pono o kii mai me ka uku i na lilo.
He la lealea ka la apopo no kamalii o Enelani, no ka mea, ina ia la i hoaoia ai o hoopahu i ko lakou Hale Ahaolelo he 200 paha makahiki i hala ae, i ke au o Iakoba I. ka Moi, a o Guy Fawkes (Gai Foka) ke alakai o na poe hoopahu. O kahi hoi e lealea ai o kamalii, o ka hanaia o kekahi kii me na aahu, i hoopihapihaia, me ka mauu maloko, a po iho, puhiia i ke ahi.