Ka Makaainana, Volume IV, Number 20, 11 November 1895 — Page 6
6 HONOLULU, OAHU, POAKAHI, NOVEMABA 11, 1895.
Alana saila ka Nani
---KA---
HAKU BARONA WAHINE.
Ka Naita Huna o ke Kapakila Ulaula-----Ke Aka Kino Wailua Kamahao----Ka mea Hoopahaohao o ka Po----Na Lei Daimana Ekolu----Ka mea Huna Pohihihi lua ole o ka Lua Waiwai o Hamelota.
Ela Bene
KA HAKU BARONA OPIO;
--- A ME ---
Ane Bela
KA MANU HULU OMAOMAO O SEKOTIA.
Mokuna I.----Helu 5.
NA LEI DAIMANA EKOLU.
Nolaila, ua hoea mai la kaua e ka mea heluhelu i kahi ono o ka waiu a me ka meli o keia nanea ilihia a kaua e heluhelu nei. A no ka nui o ke kaulana o Ane ma na mea a pau, a oi loa aku hoi ma kona kulana, ua nui loa na akenaia no Ane a ua hookaulana ae na kumu a pau a Ane aole loa he mea nana e kulai ia Ane ma na mea a pau, a ua aa ae kana mau kumu e hookuku me Bene, ka mea nona ke kaulana a lakou e lohe nei ma kela inoa moto, "ka mea oi o ka naauao nana e rula i ka naauao a e lilo hoi i pookela iloko o ka aina laula o na Hilana o Sekotia."
I ka wa i loaa aku ai keia pane i na kumu o ke kula nui o Eneroma, ua hui pu ae la na kumu a pau a noi aku la ia Bene ina paha e ae ana oia e paio me Ane, e like me keia noi. "Ua makaukau au e pane i na mea a ppu e hoea mai ana imua o ko'u alo, a ina no ke ku ana a paio ma ke kahua e koiia mai nei, ua makaukau au e hooko aku," wahi a Ela Bene.
Na Lei Daimana Ekolu---Ka Paio no ka Moto-----Ela Bene ka oi-----Ka leta i poina loa.
Ua aeia kela noi hookuku o ka paio mawaena o Ane a me Ela Bene opio, a ua holopuni aku la ia ma na wahi a pau o Sekotia a hoea loa aku la ma na kaiaulu o na Hilana o Wale, a hoea loa aku i na polena o Arabia a puni o Palesetine a me Hinedu. Ua hele mai na keikialii a me keiki a ha poe waiwai a hanohano mai na wahi like ole mai o ke honua e ike pono i ka nani o Ane, pehea la kona kaulana a lakou e lohe nei, a pela hoi kona ike ma na mea a pau. Pela no hoi o Ela Bene o ke kula nui o Eneroma. Ua hooholoia maloko o kekahi halepule nui e hui na moho elua me na kumu pakahi a laua. Iloo ia mau la o kahoomakaukau, ua lilo ia he hana nui i na mea a pau a e lawe hele ia ana ka inoa o Ela Bene e kona mau hoa kula, a he mea ia na lakou e olelo pinepine ai me ke kaena pu no Ela Bene, a pela no hoi o Ane. Ua lilo no hoi ia i mea na kona mau hoa kula a me na hoa'loha, a oi loa aku hoi ma kona ano kulana hanohano a ohana waiwai nui no ia taona. Nolaila, ke pii like nei ke kaulana o keia mau opie elua, me ka lilo i mea paio nui ia iwaena o na kanaka a pau, a me he la, ua maheleheleia ka lahui i elua mahele. O kekahi hapa, aia mahope o Ane, a o kahi hoi, aia mahope o Ela Bene, a pela wale aku no a hoea wale i ka la o ka hookoia ana o keia paio no ka inoa moho o ke ao.
Ua hiki mai ka la e ike ia ai na moho elua, a ua kau ae o Ane a me kana mau kumukula me kona luaui ka Haku Bela Haosetine maluna o kekahi kaa i paluluia a puni me ke aniani, a e hukiia ana e na paa lio he 12 a e kalaiwa ia ana e na kalaiwa elua, a i kinohinohiia i na pua nani a me na hae like ole e pulelo ana i ka welelau makani a e niniu poahi ana ka huiia o ke kaa, a ke lawe la na lio no ke kahua lealea o Halalii, a aia na kamahele o ke alanui ke haawi mai la i na leo huro i na wa a pau a ke kaa e maalo ae ai, me ka leha ana aku i na hiona nani kilakila o ua manu hulu omaomao la, a hoea wale i ka hale pule, a iloko o ia manawa like i loheia aku ai ka leo o ka pahu, na ohe a me na mea kani like ole e kani ana me ka malie, a lohe pu ia aku la na leo huro o na mea a pau e hooho ana, a aole i liuliu ikeia aku la he hua kai nui a me ka hale auamo e hapaiia ana e na kumukula a me na haumana kula o ke kula nui o Eneroma me ka halepio ano e i kinohinohiia i na mea nani, a e ku hookahi ana o Ela Bene iloko o ka halepio i kahikoia i ka lole silika nani loa, me na medala gula a dala i makana ia mai e kana mau kumu. A o ke kulana o Bene opio e ku la, ua like ia me kekahi anela kamahao mai ka lani mai, a e paa ana oia ma kona lima akau i ke kahi buke nani waihooluu gula a me kona papale ma kona lima hema i hoopiliia ma kona poaeae;
a o kona mau kamaa e komo ana, ua molinaia me ka wai dala.
(Aole i pau.)
Luuluu Wale ka Hele'na.
Ma ka la 23 o Okatoba, ua kii mai la ka anela o ka make a lawe aku la i ka uhane, ke kukui malamalama o ka hale kino o E. S. K. Kaioe, a waiho iho la i ke kino puanuanu na makou na na keiki me ko makou mama e paiauma aku ma keia ao mauleule. Aloha ino! Ua hanauia ka mea i hala aku ma Wainiha, i ka pohaku pahee, i ka la 12 o Maraki, M. H. 1853, a ua piha iaia na makahiki he 42 me na malama keu. He keiki kupa oia no Wainiha nei, a na kona make ana i hoonele aku i ka nui ohana me ka makamaka ole nana e hookipa. Luuluu wale ! He puuwai hamama kona i na mea a pau e kipa aku ana ma kona home a he waipahe hoi ma ka noho'na kane a me wahine, a oia hoi kekahi e noho ana ma luna o ke kuonoono me ka hiipoi ana hoi i kana wahine me na keiki.
Ua hala o E. S. K. Kaioe me ke aloha nui ia e na kini makamaka me ka lehulehu a pau, mai uka a kai o Wainiha, a no ka luuluu me ke kaumaha, ke kanaenae e ae nei au i na wahi a pau a ka mea i hala aku i wale ai. Ia oe, e Maunahina i ka naele o Alakai, nou keia walohia, oiai, o kekahi o kou mau keiki kamaaina ua hala aku oia i ke ala hoi ole mai. Aloha ino! Pela pu no hoi ia oe e ka poha ku pahee o Wainiha, ua pau kou ike ana i kona mau kapuai, aole e pa hou ana maluna ou. Walohia wale! Ia oe pu kekahi e ke kai hone o Kaumaka, me na lehua o Luluupali, nou ko'u hoomanao ana me ka walohia. Ia oe pu kekahi e ka lae o Kolokolo au i ke kai, kokolo ke aloha hana e ia makou ka ohana no ka mea i hala aku. Ia oe e ka wai hui o Lumehai, aole o Kaioe e naue hou ana maluna o kou mau ae wai me kona moku nautilo (kao). Ia oe e ka hulaana o Kealahula, ka mea nona ka hooheno----"Ano kaikoo lalo o Kealahula, ua puhia ke ala ma Puahinahina," he u keia na'u ia olua. Ia oe e Kahalahala me Kalualauoho, he hoomanao keia na'u ia olua. Ia oe e Pohakuopio i ka wai o Waikoko, he u keia na'u ia olua. Ia oe e Waipa i ka wai halai o Waioli, welina keia ia olua. Ia oe hoi e ka limu ka kanaka o Manuakepa, me ke one pua rose o Mahamoku, he kaumaha luuluu keia na'u ia olua. Ia oe hoi e ke kula loa o Naue, mai haule oe i ka hope waa, aka, eia no oe i ke alo, aole au e poina ia oe. O oe pu kekahi me ko'u hoomanao ana i ka mea i hala aku. Pela pu ia oe e ka lupua o Pehelehala, o oe pu kekahi i ko'u wa o ka luuluu. Aloha wale! Ia oe hoi e ke ahi kau o Makana, ia oe ko'u welina hope. Aloha ka makua!
I ko'u hooki ana i ka'u kanaenae no ka mea i hala, ke haawi aku nei au i ko'u aloha piha i ka makuahine kanemake me na pokii makuakane ole o'u. Aloha ka makua, aka, na ke Akua e hoomama mai i ko kakou mau naau luuluu. "Nana no i haawi mai a Nana no i lawe aku. E hoonaniia Kona inoa."
J. K. DREW.
Waialua, Kauai, Okatoba, 24, '95.
He 87 ka nui o na hihia imua o ke kiure i keia kau.
Ua hina pu a palaha ana ilalo o Balaunu, mea kii leta ma na alanui i ka Poakahi i hala, oiai e huli hoi mai ana ma kahi kokoke i ka huina o na alanui Moi me Liliha. E hoao ana oia e komo mawaena o kekahi mau kaa, aka, kuia e kona kaa hehiwawae i ka pohaku a huli ke alo iluna. Ua ehaia oia a ua hoihoi loa ia no ka Halemai Moiwahine, aka, ua oluolu hou no a eia no ke hoomau nei ma kana hana kii leta.
C. E. Williams me Keiki.
E d. A. Williams, Luna Nui.
Helu 611, Alanui Moi, ma Ewa iho o ka
Pa o Aigupita.
He mau mea kuai lako hale o na ano a pau loa.
He mau mea Hana Pahu Kupapau a Hooponopono Hoolewa.
E hoolakoia no na Kaa Kupapau, na Kaapio a me na Kaa-ohana.
Ina no e ninau ia laua, e loaa no na Pohaku Kia Hoomanao no na He Kupapau.
O ka Ialoa kekahi hana hiki loa ia laua, aia ia malalo o ka lawelawe ponoi ana a Ed. A. Williams, F. D., he mea i puka pono mai ka Kalaka Kula o ka Ialoa Maikai ana iloko o Mei, 1894.
----NA TELEPONA----
Keena, Helu 179---Kauhale a me Kahea Po, Helu 815.
no v 2-mp.
Waihona Buke Hawaii.
E loaa no na buke ma ka olelo makuahine no ke kuai ma ke keena o ko makou Puuku. Penei iho kekahi o ia mau buke:
Laieikawai - - - $1 00
Gaberiela Lenoa - - - 75
R. W. Wilikoki - - - 50
Hookahuli Aupuni o 1895 - - - 50
a pela aku, a pela aku.
O na buke e ae no hoi kekahi, e laa na buke kanawai, a me kahi mau ano e ae,
ke ninau pololei ia mai ia
F. J. TESTA (Hoke),
ok 28-tf 327 Alanui Moi.
No ka Hoolimalima.
O ka hale ma Alanui Kalepa, i hoohanaia mamua e ka Hui Hoolaha Buletina Puka La. Ua hiki loa no o lalo ke maheleheleia i mau keena oihana, a pela aku.
E ninau ma ke keena o
WM. G. IRWIN & C.,
iune 24 Kaupalenaia.
Hoolaha Hoohui.
Ke hoolahaia aku nei ma keia o BRUCE WA RING, e noho ana ma Honolulu, Mokupuni o Oahu, a me CHARLES S. DESKY, e noho ana no ma Honolulu i olelo mua ia, ua hoohui ae ia laua iho.
O ka hana a ka hui, o ia ke kuai mai a me ka hoolilo aku i na Waiwai Paa a me Lewa ma ko Hawaii Paeaina.
O ka inoa hui o ka hui, o ia no o
BRUCE WARING AND COMPANY.
O kahi nui a ka hui e lawelawe ai i ka hana, aia no ia ma Honolulu i olelo mua ia.
Hanaia ma Honolulu,
Sepatemaba 30, 1895.
ok t 28-3mnw.
J. K. KAHOOKANO.
LOIO a he Kokua ma ke Kanawai.
KEENA HANA: Alanui Kaahumanu
Honolulu. ian 8, '94 1mk