Ka Makaainana, Volume IV, Number 21, 18 November 1895 — Page 2
2 HONOLULU, OAHU, POAKAHI, NOVEMABA 18, 1895.
NA PALAPALA
[Aole maluna iho o makou ke koikoi o na hala a me na hewa no na manao i hoopukaia malalo o keia poo, aka aia no maluna iho o na poe na lakou i kakau mai.]
-
Ua Kapaeia ka Oiaio.
[Hoomauia.]
He ninau nui keia a ka mea heluhelu e ninau iho ai, - Pehea la, a heaha la na kumu nui e pau nei keia lahui i ka make, a no na kumu hea mai la? Ua hiki paha ia'u ke hoike ae e like me ka mea hiki ia'u. Ma ko'u noonoo ana, ua ulu mai keia mau poino maluna o ka lahui mamuli o na alakai lalau ana a na mikanele, a i ole ia, o ia maoli no paha ko lakou noonoo e hoohana maoli ana i ulu ae a nui na ma'i ino, i kumu e pau ai keia lahui i ka make, a lilo ia lakou a i ka lakou mau mamo aku na aina o na kanaka Hawaii, iloko o na makahiki a na mikanele i hiki mai ai a lilo ae la ia lakou ke poo o ka mana hooko o ke Aupuni, ma ke ano he mau alakai lahui a me ke ano hooponopono i na rula o ke ola kino o ka lahui a me na rula hooponopono no ke ola ana o na uhane ma ke Aupuni lani. He mea maikai no ka olelo a ke Akua a me ka Eeuanelio i hoopae ia mai i Hawaii nei, aka, ina i hanaia me ke akahele a me ke akahai e na mikanele, ina aole e hookui ino ke au hou me ke au kahiko. Ma ia hookui ino ana o ke au hou me ke au kahiko i nui mai ai ka nahae o ke au mua i ke au hou, a pela kakou e ike nei i ka nui o na poino makolukolu o ko kakou noho lahui ana. Eia iho na papa hoonohonoho malalo iho a ka mea heluhelu e noonoo iho ai.
Na hana o ke au kahiko a me na hana o ke au hou, o na rula maa mau o ke au kahiko e pulamaia ai, o ia na rula o ko lakou ola kino a me na rula o ka noho maemae ana. Aia a malamaia na rula hoomaemae e ke kane a me ka wahine, o ia ke kumu e pii ai ke ola maikai o ka ohana a mau ohana paha. Na ke kane e kukulu i ekolu hale, hookahi hale ai-kapu, hookahi hale ai-noa, a hookahi hale hoomaemae haumia o ka wahine I ka wa haumia o ka wahine, alaila, hoi oia i ka hale i hookaawaleia no kona haumia malalo o ke kiai ana o na rula hoomaemae kino, aole e ae ke kane a mea e ae paha e komo i ka poli o kela wahine. No keaha mai? Aole e ae mai na rula i kau paa ia no ke kiai ana i na rula o ko lakou ola kino, aole no hoi e ae mai na kanawai o ke ola kino i ke kanaka e kue aku i na hoomalu ana a ke kanawai, o lilo i mea poino nona.
Aia a pau ka haumia ma ka hoomaemae ana i ke kino me ka wai o ka niu palolo, alaila, komo i ka hale ai-noa, ai i na mea i hoomakaukauia i kupono no ka launa ohana ana a mahope hoi i ka hale ai-kapu, hui pu ke kane me ka wahine me na kino maemae me ke ola kino maikai a hoohua mai i ua hua maemae o ko laua puhaka. He mau rula hooulu a hoola lahui keia mai ka hookumu ana a ke Akua i ke kanaka i kinohi. I mai hoi o Iesu ma kana olelo, "E noho hemolele oukou e like me ka hemolele o ko oukou Makua iloko o ka lani." Heaha la ke ano o na huaolelo e noho hemolele oukou e like me ko iala noho hemolele ana. Akahi, o ka haalele i na hewa a pau; alua, o ka noho maemae, aole e hoopa i na mea haumia. He mau kanawai oolea loa keia i kau paa ia e ke Akua ma ka Mauna o Sinai, he make ka uku hoopai no na hewa i oleloia ae la maluna.
Mamua aku a mahope mai o ka pae ana mai o na mikanele, e noho ana no ka lahui malalo o na hooponopono ana o na rula, e kiai makaala ana i ko lakou ola kino. Pela iho la i ulu mahiehie ai ka lahui i ke kulana ola maikai, oiai, e pulama ana i na rula kiai i kela a i keia poo ohana. Mamuli o na rula a na makua i kau aku ai i ka lakou mau kaikamahine, pela no hoi na keikikane a lakou, e hoolilo ana na makua i ka lakou mau keiki i momi maemae no ke kakoo ana i ka inoa maikai o ko lakou mau kupuna, a me ka hanohano o ko lakou aina hanau Ua hapaiia ke kulana o ka hiehie a me ka hanohano lua ole.
He ui, he hiehie, he nani, he hemolele, a he onaona na maka o na kaikamahine, a pela no hoi na keikikane oia au, mamuli no ia o na rula e kaupale ana i ka noho huikau ana o na kaikamahine me na keikikane, oiai, aole e ae mai na rula e kiai ana i ko lakou ola kino e hana lakou i na hana a na poe i oo kupono no ia hana, aia no a wini kakala a ula ka lepe o ka moa kane, alaila, kau i ka haka o Nualolo.
[Aole i pau,]
-
Pane ia Namakawewehi Opio.
[Hoopau ana.]
"A piha ae la lakou a pau i ka Uhane Hemolele, a hoomaka lakou e olelo aku me na olelo e, e like me ka haawi ana mai o ka Uhane ia lakou e olelo." Oihana 2:,4.
Ua bapetizoia ko Samaria poe i ka Uhane Hemolele ma ka pule a Petero laua me Ioane, me ke kau ana me na lima maluna iho o lakou a loaa iho la ia lakou ka Uhane Hemolele. Oihana 8:15,17. Ua bapetizoia o Korenesio me kona ohana a pau i ka Uhane Hemolele, penei: "A i ko'u hoomaka ana e olelo aku, haule mai la ka Uhane Hemolele iluna iho o lakou e like me kakou i kinohi.' Oihana 11:15. O keia ka Petero hoakaka no Korenesio me kona ohana imua o kona mau hoa lawehana.
Nolaila, e kuu hoa, o keia mau hoakaka a'u imua ou, o ia no na ano maoli o ka bapetizo i ka Uhane Hemolele, o ia ka Petero i hooiaio ai ma Oihana 11:16. Hoomanao iho la au i ka olelo a ka Haku ana i olelo mai ai, "Bapetizo no o Ioane me ka wai, aka, e bapetizo auanei Au ia oukou i ka Uhane Hemolele."
Ina o ko ke Akua manao ia no Ioane, he mea aha ia ia oe? Aole anei he mea hiki ole i kanaka, ua hiki no ia mau me ai ke Akua, no ka mea, aole he mea hiki ole i ke Akua ke hana. Luka 1:37. E like no me ka ke Akua olelo ma Ieremia 1:5, "Mamua aku o Ko'u hana ana ia oe iloko o ka opu, ike aku no au ia oe, a mamua aku o kou puka ana mawaho mai o ka opu, hoolaa aku au ia oe a hoolilo no Au ia oe i kaula no na lahuikanaka."
O Ioane no hoi, oia ka hiki hope o ke kauoha kahiko, a oia no hoi ka hikimua iloko o ke Kauoha Hou, oia ka hoakaka a Maraki 4:5 "Aia hoi, e hoouna aku au ia Elia ke kaula i o oukou la," a pela aku, a pela no hoi ka Iesu hoakaka ma Mataio 11:14, "Ina e hiki ia oukou ke hoomaopopo oia nei no ua Elia la ka mea e hele mai ana." Oia ka na haumana i ike iho ai o Ioane Bapetizo kana i olelo mai ai ia lakou, Mataio 17:13.
Nolaila, aole no hoi he mea i loaa ka mana mamua iho o Ioane e bapetizo me ka wai, aka hoi, aia he mea mamua iho ona ua loaa iaia ka mana ma ke kauoha a ke Akua iaia, oia no na mea i hoikeia mamua ae nei.
E ka hoa, pane mai nei oe no kela hoakaka a'u ma Ioane 3:5, "a i hanau hou ole ia ke kanaka i ka wai a me ka Uhane Hemolele, aole ia e komo i ke Aupuni o ke Akua?" He ninau nui ka ia, wahi au. Ua haiia no kona haina, aole e komo ke kanaka ke hanau hou ole ia i ka wai a me ka Uhane Hemolele i ke Aupuni o ka lani. Mataio 5:3,10. E kuu makamaka, aole a'u haina no ko Ioane bapetizoia iloko o ka wai, o ka'u haina ua bapetizoia o Ioane me ka Uhane Hemolele me ka mana no luna mai ma o ka Anela Gaberiela la.
Eia hou, ke hoole mai nei oe aole ka i pili no ka Ioane mau hana kela olelo ma Ioane 21:25. Pela io no, e ka hoa, e noonoo pono nae oe, aole anei o ka hana a Ioane a me ka na kaula ma mua ona, oia ka Iesu i hele mai nei e hooiaio aku? Mataio 5:17. Aole anei o ka hana a Ioane i hana ai ua ili aku ia maluna o Iesu a i kana poe haumana, o ia no ka bapetizoia me ka wai? Oihana 8:36,37,38,39. Aole anei o ka hana a Ioane i hana ai oia ka oihana kahuna o Melekisedeka a me ka oihana kahuna o Aarona, a aole anei o aua a elua ka Iesu i hooiaio ai? Mataio 3:15 Hebera 5:4,5,6. A ina he hoahanau Moremona oe a ua loaa kau buke alakai e kilohi iho oe ma ka aoao 79, mokuna 17:1,2,3. Ma keia mau oihana elua ka Iesu i kukulu ai i kona ekalesia. Aole anei aia iloko o keia mau mahele elua ka hana a Iesu i hana ai i kakauia e kana poe haumana, ka mea i hiki ia lakou a koe aku ka mea hiki ole ia lakou, o ia ka Ioane i hoakaka ai. Ioane 21:25 O ia no, o ia io na mea i koe aku.
E ka hoa, ina aole i pau kou pohihihi no keia mau hoakaka a'u ia oe, e pono no oe e hele aku imua o Ioane, a nana no e hai mai i ka mea oiaio ia oe, ua bapetizoia paha ia, aole paha.
N. K. HIAPOOLE.
Laie-wai, Oahu.
-
No ke Kue ke Kauaia.
Mai kekahi makamaka mai e noho ana ma Hana i loaa mai ai keia mea hou, penei: "Eia na poe paa oihana o Hana nei ke liuliu a ke hoomakaukau nei no ke kue i ka wa e loheia mai ai aia ke kaua ma Honolulu, a pela pu no hoi me na wahi makai a me kahi poe e ae o Kaupo, a ke halawai nui mau nei. He nui ka ino o ua aina nei i keia mau la, a pela paha i holo ai ke mele a kahiko. - Kaha aku la ka uhu o kuu aina.'"
-
I ka Poalima, la 1 nei, i bapetizoia ai ka moopuna a Mele Hipa maloko o Malieokamalu, a o ka inoa o Katy Mahinamalamalama Kekahililulu.
Eia ke hoolalaia nei e wehe i ahamele me na mea kani ma keia mua iho no ka pomaikai o na ma'i lepera ma Molokai. E noiia ana na poe hookani pila o luna o ka moku kalepa Hakaha e kokua pu mai i keia hana.
-
Waihona Buke Hawaii.
E loaa no na buke ma ka olelo makuahine no ke kuai ma ke keena o ko makou Puuku. Penei iho kekahi o ia mau buke:
Laieikawai - - - $1 00
Gaberiela Lenoa - - - 75
R.W. Wilikoki - - - - 50
Hookahuli Aupuni o 1895 - 50
a pela aku, a pela aku.
O na buke e ae no hoi kekahi, e laa na buke kanawai, a me kahi mau ano e ae, ke ninau pololei ia mai ia
F.J. TESTA (Hoke),
ok 28-tf 327 Alanui Moi.
-
HALEKUAI LAHUI KALAHIKI.
Helu 405, Alanui Moi, ma Waikiki aku o Alanui Nuuanu, ma ka aoao mauka, ke keena mua o ka "Hawaii Holomua."
Ma ia halekuai o na oiwi e loaa ai na anoi a me na paihi o na ano hou loa, e laa
Na Kalakoa, Na Keokeo,
Na Makalena, Na Kinamu,
Na Huluhulu, Na Lihilihi,
Na Kamaa o na Kane, Wahine me Keiki, a pela aku.
Oluolu no ke kuai ana. Aohe hewa ke kipa mai e ikemaka, a aohe no hoi he kunukunuia no ka hoikeike ana i na mea kuai.
M. PALAU, Luna Nui.
ok 14-tf
-
No ka Hoolimalima
O ka hale ma Alanui Kalepa, i hoohanaia mamua e ka Hui Hoolaha Buletina Puka La. Ua hiki loa no o lalo ke maheleheleia i mau keena oihana, a pela aku.
E ninau ma ke keena o
WM. G. IRWIN & CO.,
iune 24 Kaupalenaia.