Ka Makaainana, Volume IV, Number 21, 18 November 1895 — Page 3
HONOLULU, OAHU, POAKAHI, NOVEMABA 18, 1895. 3
NA AINA MAMAO.
-
Mau Lono Huikau ma kela a me
kei Wahi Like Ole.
Alelo Loihi ia Adimerala Amerika.
No ka loihi o ke alelo, e like la paha hoi me ko Kakina, e hoopauia aku ana ko Hope Adimerala Wiliama A. Kikelana (Kirkland) noho hoomalu ana i na aumokukaua Amerika ma Europa, a o Komodoa T.O. Selefirige ana kona pani. O na kumu i hoikeia ae no kona hoouna ana i kekahi palapala mahalo ia Peresidena Faure o Farani, a me ke kamailio kue a hoino i na poe misionari ma Tureke. Ua aoia aku oia no keia mau hana, a na na hoa'loha hoi kahi o na poe misionari i hooikaika ae i ko ke Aupuni hoopau aku iaia.
Rusia ma Korea me Iapana.
Aohe i hilinaiia ua hoopilikia. ia ke ku ana o ke Aupuni o Korea mamuli o kela pepehiia ana mai nei o ka Moiwahine, ua hopohopoia nae hoi o ulu ae he paee kaua mawaena o Rusia a me Iapana, no ka mea, he kue Kepani ka Aha Kuhina hou. Ua hooi loa ia nae hoi keia kulana hopohopoia e ka lono no ka pau o na aumokukaua Rukini i ka haalele ia Valadivosetoka a holo nui i ka hema, aka, iwaena hoi o na anaina i kamaaina, he mea maa mau no ia ia Rusia, oiai, ua kokoke loa mai i ka wa anu a e pulikiia kona awakumoku Pakipika e ka hau.
Make i Haule i ka Lio.
Okatoba 18, ma Parisa, Farani, i make mai nei o John W. Mackay, Jr. (Make Opio), mamuli o ka haule ana mai luna iho o kona lio e holo ana, i ka 25 o kona mau makahiki. Mai kona haule ana a hiki i kona make loa ana ia ahiahi, aohe ona ike ae. U loaa ae lono kaumaha i kona inaui, ka ona miliona, o ia inoa like no, oiai oia e kukakuka pili oihana ana ma Kapalakiko aenei no. O ka lono telegarapa mua, ua ma'i loa ia ke keiki, a ma ia hope iho, elua mau lono hou, e hoike ana ka hope loa no ka hopena manaonao. He puni nana na lio a he makaukau hoi ma ke kau lio, nolaila, ua nui ka pa haohaoia o keia poino ana.
Ua hoikeia ae nae hoi aia he elima mau mokukaua Rukini ma Awa Ata, a aia hoi iwaho kahi i mo-ku ai o eiwa mau moku hou aku. Aia na Kepani ke haalele la i ka puali o Liaotuna, kahi o Awa Ata e waiho la. Ma ka la 8 nei e ukuia ai ke koi poho ma Iapana.
Na Hana ma Europa Hikina.
Mamua aku nei i kikooia mai ai na aumokukaua Enelani ma ke kowa o ke Dadanele, Tureke, a hoounaia aku no Kina. A ia lakou a hala aku, ua kakauinoa ae ke Suletana i ka palapala e ae ana i na hooponopono hou i koiia aku e na Mana e pili ana ia Amenia. Ua nui kona weli i na poe Musulamana, aka, ua koi hoomano aku kekahi Kuhina ona a hiki i kona ae ana. Eia nae, ua hopohopoia ka hololea o ka mea i manaoia, a ua oleloia hoi ua maikai loa aohe mokukaua Enelani ma ke Dadanele ia wa, ina la paha ua loaa he mea e mahae ai o ka noho laulea maikai ana mawaena o Enelani. Rusia a me Farani, a malia mai lawe okoa ae paha hoi o Rusia ia Amenia. Nolaila, ua hanaia ka mea pono e ko Enelani elele me ka loaa mahae ole mawaena ona a me Rusia. Aole nae hoi keia hoomalielie kuikawa ana he mea no ke Suletana e pakele ai mai kekahi ala puoho kipi kuloko ae, a oia no paha hoi ka mea i kaunuiia no ka poino aku. Me he la nae hoi ua haalele hookahi ia aku o Beritania Nui e na Mana e ae ma ka hooikaika ana aku no na hooponopono hou ia ae ma Amenia Tureke.
Na Hunahuna Laulaha.
E poniia ana ke Za o Rusia i Mei 18 o keia makahiki ae.
Ua hoomalielie aku o Iapana ia Fomosa a ua maluhia iki mai.
Ua hoike pili oihana ia ae aohe o Rusia i hana kuikahi pu aku me Kina.
Ke pii weliweli la ka holapu ana a ka ma'i kolera ma Rusia Hema.
Ua hoohui mai nei o Farani i na Mokupuni o Huahine a me Bolabola a ua kaa aku malalo o na Paemoku Huiia (Society Islands).
Aole e ike koke aku ana o Amerika Huipuia i na pono aupuni o na poe kipi o Kuba. Ke mau la no ke kaua.
Menemene ko Nufounalana poe i na lono hoopae malu i na waiwai e hoohaukae ana i kekahi poe o ko laila Aha Kuhina.
Lehulehu na ala kipikipi i ulu ae ma kekahi mau kulanakauhale lehulehu o Venezuela, me ka hololea kahi a me ka ole no hoi kahi.
Ma kekahi hookahakaha ana mai nei i malamaia ma Deneva, Kolorado, he 7,500 ka nui o na kaa hehihehi wawae iloko o ka huakai.
Ua hoike ae o Kuhina Iapana Kurino ma Wasinetona ua ike ae o Iapana i ke kuokoa o Korea ma ke kuikahi o Simoneseki. Hoole nae hoi na nupepa o Nu Ioka i keia.
Kanakolu poe Moremona i haalele aku ia Piladelepia no elua makahiki ma Beritania Nui a me Europa, e hoohulihuli ai i poe hoahanau hou i ko lakou hoomana.
Ua hoike pili oihana ia ae ua hoopalauia o Kama'liiwahine Mode (Maud) o Wale i ke keiki elua (Kama'lii Kale) a ka Hooilina Leialii o Denemaka.
Ke manao la o Beritania Nui e kaua hou aku ana oia ma Asanati, Aferika, no ka mea, ua hoole mai ka Moi o ia aupuni i ka palapala kauoha hope loa i hoounaia aku iaia.
O ka mokumahu Kunu Pai me 700 koa o luna, ua ili mamuli o ke pahu ana o ka pauda o luna ma kahi kokoke i Kini Sao, Okatoba 14. Ua pakele wale mai no ka wiliki ekolu a me 200 koa.
Ua poino mai nei ke kulanakauhale o La Paza, Kaleponi Lalo, i kekahi waikahe nui. Piha he tausani poe i nele i na home a he lehulehu no hoi na poe i make mamuli o ke piholo ana.
E haawi makana aku ana o Iosepa Medila, ona o ka nupepa Kikako Tiribiune, he kii kia hoomanao o Faranakelina, e kukuluia iloko o Linekona Paka. Aia mawaena o $30,000 a me $50,000 ka lilo.
Ke hookikina la kekahi o na nupepa mana a alakai o Ladana i ko Beritania Nui lawe koke ae ia Awa Hamiletona, mawaho aku o ka aekai o Korea, i mea e hoopakele ai i kona kulana kalepa ma Kina.
Oiai ka Emeperoa a me ka Emeperese o Geremania ma ko laua ala no ka Luakini ma Meta, ua hooho mai kahi mea mai kekahi pukaaniani mai "E ola o Farani." Lehulehu na poe i hopuhopuia ma ia hope iho.
Ke mau la no na houpuupu kaua no ke kulana mawaena o Beritania Nui a me Rusia e pili ana ia Kina. A ua olelo ae hoi kekahi nupepa alakai o Ladana ina ua hana kuikahi io ae o Rusia a me Kina, aole loa e pono e aeia aku ia kuikahi e mau.
Ua koho mai nei ka Hale o ka Bihopa o ka Ekalesia Episecopala, e noho halawai ana ma Mineapolisa, e hoounaia i bihopa misionari i Alasaka, mamuli hoi o kekahi hooiaia o kona uku no ekolu makahiki e J. Piapona Mogana, ka ona banaka waiwai nui o Nu Ioka.
Ua hoohilahilaia a hoopauia o Liu, ke kiaaina o Seze Kuene, ka okana-aina o Kina i lawelaweia mai nei na hana luku i na poe misionari, mamuli o kekahi kauoha Imiperiala, ma ka Enelani koi. Oia no ka i hoopauia mamua no ia ano hana no, aka, hoihoi hou ia ae no ma ia kulana, a me he la he ano hoopalaimaka wale no.
Eha haneri poe i make ma ke ala hoohaunaele ana mai nei ma Terebizona. Nui ka poino maka mahele Amenia, pau kela a me keia i ka lukuia, a i akakuu wale mai no ka inaina piha hiena o ke aluka i ke koe wahi mea ole iho e pepehi ai a e hao powa ai. A ma na lono hope mai nei hoi, ua oleloia ua piha i ka 900 o na poe i lukuia.
Ma kekahi haiolelo ana mai nei a Edewada Atekinisona o Bosetona imua o ka Anahui o na Poe Banako ma Atelanata, Georegia, e paipai ana i ka hoopukaia ae e ke Aupuni o Amerika Huipuia o $90,000,000 ma na bona no ka uku ana a kapae loa aku hoi i na nota aie o 1890. Iaia i hoopuka iki wale ae ai no i kau wahi olelo e pili ana ia Peresidena Kalivilana, ua wawalo kupinai ae na leo hooho hauoli.
-
Pau Kuai Hoopau
I KA POAONO NEI, NOV. 16 A
Ua hoi iho la no a ke ano maa mau.
SING LOY (Sini Loi)
Ma na Helu 51 & 53, Alanui Moi, ma Ewa aku o Alanui Maunakea.
-
Aohe no nae hoi e hewa ke hoomau mai no i ke kipa ana, he oia mau no ka oluolu a me ka waipahe. O na waiwai e kuaiia aku ana, o ia no
Na Silika Pake o na Ano Like ole,
Na Makalena, Na Kalakoa,
Na Eleele o na Ano a pau,
Na Keokeo o na Ano a pau,
Na Kamaa a me na Papale
O Kane, Wahine a me Keiki,
A pela aku, a pela aku, a nui loa a lehulehu, e pono ai no o ka ohana nui.
He mea hewa ole ke kipa mai e ikemaka i ka huikau o ka Huin-a-Kale.
okt 28-4pl
-
C.E Williams me Keiki.
Ed. A. Williams, Luna Nui
Helu 611, Alanui Moi, ma Ewa iho o ka Pa o Aigupita.
-
He mau mea kuai lako hale o na ano a pau loa.
-
He mau mea Hana Pahu Kupapau a Hooponopono Hoolewa.
-
E hoolakoia no na Kaa Kupapau, na Kaapio a me na Kaa-ohana.
Ina no e ninau ia laua, e loaa no na Pohaku Kia Hoomanao no na He Kupapau.
-
O ka Ialoa kekahi hana hiki loa ia laua, aia ia malalo oka lawelawe ponoi ana a Ed. A Williams, F.D., he mea i puka pono mai ka Kalaka Kula o ka Ialoa Maikai ana iloko o Mei, 1894.
-NA TELEPONA-
Keena, Helu 179 - Kauhale a me Kahea Po,
Helu 815.
nov 2-mp.
-
E.M. NAKUINA.
KOMISINA O NA ALA LIILII A ME
NA PONO WAI.
Notari Lehulehu, a he Agena Haawi Palapala Ae Mare no Honolulu nei.
KEENA HANA: Helu 308, Alanui Kalepa. dk 3-1mk.