Ka Makaainana, Volume IV, Number 21, 18 November 1895 — Page 8
HONOLULU, OAHU, POAKAHI, NOVEMABA 18, 1895.
KELA A ME KEIA.
-
E kuai kudala ia aku ana na laikini awa ma ka la 10 aenei o Dekemaba.
Aole e malamaia ana ka hoomaha Karisimasa o na kula Aupuni i keia makahiki.
Ua hopuia i ka po nei kekahi Pake no ka wehe hamana i kona hale ako a kahi umiumi, ma ka La Pule.
Poaha iho e ku mai ai ka Mariposa mai Kapalakiko mai. Ma ka la 24 aku ka Miowera mai ka Akau.
Ma ka lono hope ma nei, aia ka Ona Miliona o Kamaomao ma ka Hotele Savoe, Ladana, ma ka la 11 o Okatoba.
He ewalu ka nui o na lealea heihei e malamaia ana ma Kapiolani Paka i ka la mua o ka makahiki hou aenei.
E kukuluia aku ana he halepule no ka hoomana Metodisa, ma alanui Beritania, kokoke i ke alanui Mila.
Aia ke pii ae la ka enaena o ke ahi o ka lua o Kilauea i keia wa, pela ka mea i loheia mai ma ke Kinau o ka Poalima nei.
Ua hoopau wale ia ka lealea kinipopo i manaoia mawaena o Kamehameha a me Sana Lui i ka auwina la Poalima iho la.
Ua hoopukaia aenei he mau rula hou no ka puali makai, a ua hoolakoia aku hoi kela a me keia makai me ona buke o ia mau rula.
Ua make mai nei ma Kapalakiko ma ka la 5 o keia mahina o Misasa Mary Winter Poka, wahine a Lunakanawai W. Poka i pau o Honolulu nei.
Aole i ku mai ka mokumahu Aselouna a hiki iho la i ko makou hoi ana e pai, mai Oregona mai. O ka Poalima nei kona la e ku mai ai.
Ua aeia e lawelawe oihana loio imua o na aha hookolokolo a pau o keia Aupuni, o Porofesa John Q. Wood, o ke Kulanui o Punahou.
I kahi o keia mau la iho e hului pau ia aku ai no Kalawao, Molokai, he 22 mau ma'i hookaawale ohana mai ke kanua hoomalu aku ma Kalihi.
Eia hou no he koi poho na Kapena F. D. Waka, i keia Aupuni, no kona hoopaanao hewa ia ana ma kela hoohaunaele iho nei o Ianuari, he $5,000.
E ku mai ana he mokumahu mai Iapana mai me na waiwai Karisimasa no kekahi mau hale kuai Kepani o kakou nei. Ua hiki aku i ka 700 tona ka nui o na waiwai o luna.
I ka Poaono nei no i ku mai ai ka Auseteralia mai Kapalakiko mai, ua haule mahope o kona manawa mau. I keia Poakolu iho no, hora 4 P.M. e niau hou aku ai no kahi ana i hele mai ai.
I nehinei i komoia ai mahope iho o ka hana hou ia ana o loko a me waho o ka luakini o Kawaiahao, a ua piha kuineki o loko i kekahi anaina nui o na kanaka. Ua lilo i mea ole ka ukele o na alanui i ke kuaua nui o ia po aku a ao ae ai.
Ua hopuia a hookolokoloia imua o ka Aha Apana i ka Poalima nei o Haleole (k), no ka lapaau laikini ole a hoopaiia he lapaau laikini ole a hoopaiia he $100 a koina. Ua hoohalahala loa aku i ka Aha maluna ae.
No ka nui loa o ka ua a me ke kawa-u o ke kahua lealea ma Kahului, Maui, aole i malama ko laila poe keiki puni lealea i na hoomanao hauoli no ka la hanau o Kalakaua i ka Poaono nei.
Ua ao loa no o ka Poaha nei i hopuia ai kekahi Pake kalaiwa kaapio no ka lawe ole i kukui no kona kaa, oiai nae ua pau ka hora 5 ia manawa. I ka laweia ana a ka Halewai, ua hookuuia mai no.
E malamaia aku ana i kula po ma keia mua iho no na keiki maluna aku o 15 makahiki, ma ka halekula o alanui Papu. Aohe uku kula. E hoomaka ana mai ka hora 7 a pau i ka hora 9 p.m.
Apopo e pau aku ai kekahi mau loio i Kauai no ke kau kiure kaapuni e noho ana ma Lihue i ka Poakolu iho. He kau kui kawa keia i kauohaia e ka Lunakanawai Kaapuni o ia mokupuni.
O ka la 28 o Novemaba nei, he La Kuokoa ia no Hawaii nei, e lilo ana nae ia la i la hoalohaloha a hoomaikai i ke Akua no ke Aupuni Repubalika e ku nei, no ka haawiia ana mai o na pomaikai he nui ia lakou.
Imua o Lunakanawai Waitina i ka Poalima iho la, i hooiaioia ai ka palapala kanaha a Kama'lii Poomaikelani i make, a ua hookohuia ka Moiwahine Kanemake Kapiolani i lunahooponopono waiwai malalo o $10,000 bona.
Ua hoihoiia mai ma ke Kinau o ke ahiahi Poalima iho la na pio kalaiaina elua i koe aku ai i Hilo, oia o John Lilikoi a me Keoni Waise, malalo o ke kiai ana a kekahi makai. Eia laua ma ka Halepaahao o Kawa e noho nei.
Ua lonoia ae o ke kumu ka i ulolohi loa ai o ka haawi ana mai o ka Aha Kaapuni i ka hoopai maluna o Eduada Wudewada, no ka manaoia e ae ana oia e mare me Mele Aki mamua o kona ae ana e hoi no Kawa e hana oolea ai.
O ka hihia ki pu o Keoni Balaunu i hoikeia aku ai e ma. kou mamua aku nei, i ka noho ana imua o ke kiure i ka Poaha iho la, ua haawi mai ke kiure i ka lakou olelo hooholo e hookuu ana i ka mea i hoopiiia, he 9 ma ka hookuu kue ia 3.
Ua hoaoia mai nei ma ka la 16 o Okatoba ka holo o ka mokukaua Inidiana o Amerika Huipuia, a ua ikeia ua hiki iaia ke holo i 15 nota i ka hora me ka holopono o na enegini. Eia o Amerika ma ke ala o ka hookelakela ma na aumokukaua i keia wa.
Ua hooholo iho nei ka Ahahui Opio Hawaii e malamaia i halawai heluhelu moolelo no hookahi manawa i kela a me keia mahina. Nolaila, i keia po Poaha iho e haiolelo ana kekahi haole no ka mea e pili ana i ke "Ola a me na hana a Ata Wele sele, Duke o Welinetona."
Mai Waialua mai ka lono telepona o ka po nei i loaa mai ia makou, ua hopuia e ka Hope Makai Nui he elua mau kanaka no ka hewa aihue i ka bipi a ka haole ma Waimea, oia hoi o Manini Robata a me Kumauna. Ua hookuuia ae laua malalo o ka bona.
Ma ka hoopii a na ona o ka nupepa Buletina i ka lunahooponopono o ke Kuokoa namu, no ka lawe wale i ka inoa - The Independent, - ua haawi ka Aha Kiekie i ka pono no ka aoao i hoopiiia. Hoka loa na mea hoopii a aole no hoi onioni hou ana ae.
Ma ka hora 11 o ka po Poaha iho la i ku mai ai ka Monowai mai na Panalaau Hema mai, a ma ka hora 12 o ka awakea Poalima mai i holo loa aku ai no Kapalakiko me ka unu pu aku i kekahi mau ohua mai keia awa aku, me na ukana a me na eke leta.
Ua haawi ae kekahi mau Kepani kuonoono o Honolulu nei he paina hoolaulea iwaho o Sana Susi. Waikiki, i ka auwina la Poalima nei no Kanikela Iapana i pau, Shimizu, a me kana ka kauolelo, Goro Narita. Malaila pu ae ke Kanikela-Kenerala hou mai o Iapana maanei a me kana kakauolelo.
Ma Kanaana Home, Waimea, Hawaii, ma ka la 30 o Sepatemaba, 1895, ua hoea mai la he malihini hou, he kaikamahine ohaha maikai mai loko mai o na puhaka o Samuela Spencer Mahuka a me Alice K. Mahuka, he muo a he liko hooulu hou no ke Aupuni Repubalika o Hawaii, a he lei hiehie no na kupuna.
ULALAEHO!
He 24 ka nui o na poe inoa a ka Lunakanawai Kiekie i ohi ae nei a waiho imua o ka Ilamuku, a nana hoi e wae ae i eono mau inoa kupono ana i manao mai waena ae o ia he luna, i poe na lakou e noonoo no ka wehe ana i a anui mai alanui Moi aku ma ka lihi kahawai a puka i ke alanui Vineada, a mai ke alanui Beritania aku a hiki i Aala, alaila, huli makai a puka i ke alanui Moi.
O ke kuaua koikoi o ka Poaha nei, ua hooma-u mai ia i ka ikiiki welawela o na la i hala iho la. Ua mau mai no ia kuaua a ao ae ka Poalima, a i ka auwina la iho mao ae la a po ia la. Poaono nei hoi, ua kalae maikai loa ae la ke aouli, a i ke aumoe iho ua haule hou mai la ke kuaua me ka ikaika a ao ae nehinei. Pela no i ka po nei a me nei kakahiaka. O ke ano iho la no ia o ko ka Moi Ka akaua la hanau.
Ua hoopukaia ae e ka Aha Apana i ka Poalima iho la he 26 mau palapala hopu no na Pake limahana i laweia mai ai e ke Kopatika a hoomaluia ma Kahakaaulana, i hoole nui aole e kakauinoa malalo o kekahi palapala aelike kepa me na mahiko, a ua haawiia aku ma ka lima o Kapena Paka. Na ke Kapena Poo i kii aku ia lakou me na makai a laweia mai a hoopaa ma Kalakaua Hale, a i kakahiaka Poaono ae i hooloheia ai ko lakou hewa imua o ka Aha a ua pau nui i ka hoopaiia he $100 pakahi, no ke komo mai i ka aina nei me ke kuleana ole, a lawe loa ia no Kawa.
Ua lohe mai makou mai kekahi poe mai he mau leta ka lakou mai na keiki puhiohe o ka Bana Lahui, ua lilo ia lakou ka eo o ka hookuka ana mai nei ma ka mokuaina o Tekasa me ka bana helu ekahi o laila, oia ka Sousa Bana, ma ke puhi ana a me na leo himeni. A lilo ia lakou ka makana he medala gula i kinohinohiia me na pohaku kumukui nui.
Ua huli hoi mai ma ka Auseteralia o ka Poaono iho la ka Bihopa o Panopolisa a me kekahi mau kahunapule hou o ia hoomana Katolika, a me kekahi poe e ae iho a makou no i hoike mua aku ai. I ka hoea ana aku i ka pa o Roma, ua hookipa ohaoha ia aku la oia e na hoahanau a pau o kona ekalesia. Ua hoouluwehiwehiia ka pa o Roma me na lau nahele o ka wao no kona hanohano.
Ua hoopiiia iho nei o Alana Hutinesona e W.C. Kini, no kekahi huina dala i aelikeia mawaena o laua, no ka mea e pili ana i ke kia hoomanao o Kalakaua, oia hoi, ina e lilo ka hanaia ana o ua kia hoomanao la i ka mea hoopiiia e uku no oia ia Kini he $200. A oiai, ua lilo iaia ka hana ana i ua kia hoomanao la, aole nae i hookoia ka aelike. Imua o ka Aha Apana ua ko ka mea hoopii he $217.55. Ua hoohalahala hou ka mea hoopiiia.
I kekahi mau la aku nei i hala, ua hele hou aku la no kela wahine i noi ai i dala ia Rev. A. Makinikoki e noi dala ia Kuna, ona o ka hale inu rama Uniona, oia o Elikapeka Kapahi, aole o Waikulani e like me ka makou i hoike mua aku ai, a ua kipakuia mai mamuli o ka hoomaopopo ana o Kuna i na mea i hoolahaia mamua aku nei no kekahi wahine. A no ia nele ana, ua hele aku la no ua wahine la a noi dala ia Ilamuku Balaunu a loaa mai la. Ea, pau ole no ka hoi na hana epa.
I kakahiaka Poalima nei, ua hele aku la o Nawaheihei no Kawa me ona mea-ai na kona hoaloha iloko o ka halepaahao. I ka hoea ana aku i ka puka komo o waho, ua haawi aku la oia he puolo palaoa i ke kiai puka a hoomakaia mai la e lolelole, e like no hoi me ka mea maa mau. Ua hoohikilele koke ia ae la ka makai iaia e lole ana i ka ike ana iho he wahi tini opiuma uuku iloko o kekahi omoomo palaoa, a no ia mea ua hopu koke ia iho la o Nawaheihei a hoopaaia no ka malama opiuma. Me he la ua maa mau loa oia i ka lawe ana, i keia mea iloko o ka halepaahao ma ke ano malu me ka ike ole o na kiai, a akahi iho la no a loaa pono.
-
Paiki-Noho Nalowale.
Ua nalowale mawena o Kaalawai a me Pawaa i ka Poaono, la 9 nei, he mau Paiki-Noho Ili-Ulaula me ka Uhi Ili Hinuhinu Eleele. O ka mea e loaa ai, e loaa no he uku makana kupono, ke hoihoi ae ma ke keena o
F.J. TESTA,
nov 11 327 Alanui Moi.
-
Hulu Hipa! Hulu Hipa!!
E loaa no na eke Hulu Hipa maikai, e lawa pono ai o elua kapa apana, makai o Koholaloa, no ke kumukuai oluolu, ke ninau ae hoi no ia mea ia
L M TOUSSAINT (Lui Palani).
nov 18-4pl