Ka Makaainana, Volume IV, Number 24, 9 December 1895 — Page 8
HONOLULU, OAHU, POAKAHI, DEKEMABA 9, 1895.
KELA A ME KEIA.
-
I na hora a pau o keia la e ku mai ka Auseteralia.
E alawa iho i ka makou mau hoolaha hou e oili aku la.
Eia he elua mau hui keaka i o kakou nei i aeia wa, he Kepani a he keaka lio no Auseterralia mai.
Ma alanui Ema, i ka Poalima nei, mai ka puhaka mai o Misasa Kale Wilikoi, he kaikamahine.
Aia makai o Kahakaaulana e hoomaluia nei na ohua Pake a me Kepani a ka mokumahu Pekina i halihali mai ai.
E nana ae i ka Makapolena Ma hoolaha ma keia helu e pili ana i na Waina Kaleponi ma na kumukuai i hoemi loa ia.
E wehe ana na haumana o ke kula hanai kaikamahine o Sana Anaru he ahamele ma ka po o ka la 21 maloko no o ka halekula.
Ua hookuuia mai o R.W. Wilikoki, kekahi o na pio kalaiaina, e ike i kona ohana me ke kiai pu ia no e ka makai i ka La Pule i hala.
E hoomanao i ka buke mele hula a ko makou Puuku. He hapaha (25 keneta) wale no ke kumukuai. E kuka pu ae no me ia no na mea i koe.
Ua aumoe o ka Poaha nei i hookomo mai ai ke Kulanakauhale o Pekina mai Kina me Iapana. Ahiahi o ka Poalima i au loa aku ai ia no Kapalakiko.
E ninau mau no ka Makapolena Ma mau ano Waina, a e loaa no ia oe ka mea maikai loa.
Ua hoounaia aku ma ka Miowera o ka Poakahi i hala, e Hanale Kamika, na oleloike a pau e pili ana i kela hihia koi poho a Cranstoun me Muller, na pio kalaiaina i kipakuia ai.
Iluna o ka mokukaua Beninetona i kakahiaka Poaha iho la o Peresidena Dole a me kona mau ukali, a ua haawiia mai na ki pu aloha ana iaia i ka holo ana aku a me ka hoi ana mai.
He aha hoolaulea ka ke Kuhina a me Misasa Wilisi i haawi ae ai i ka po Poaha nei no Kanikela Mila a me kana wahine. Ua nui a lehulehu na poe i hiki ae ma ka home o ke Kuhina e hauoli pu ai.
O Kulia, ke kalaiwa ka basa o ka Hui Alahao Hawaii, i hopuia ai no ka oleloino ana ia Samu Mese, ua hookolokolo a hoopaiia imua o ka Aha Apana i ka Poakolu iho la he $1 me $3.30 koina.
He 12 na la holo o ka mokumahu Kahului mai Kapalakiko mai a ku ianei i ka Poakolu nei ma kona alahele no Kikane me ka piha ukana. Ma ka po Poaha mai i au hou aku ai oia no kahi i hoikeia ae la mahope iho o ka uhao lanahu ana.
Ua lawe holoholo ia aku maluna o na kaa basa nunui i ka Poaha nei na keiki a na poe ma'i e noho nei ma Kapiolani Home, Kalihi, no luna o Ualakaa e ka oluolu o J.D. Makawe, a ua paholaia mai imua o lakou he papaaina i luluu me na mea ai mama.
He paa mare opio Hawaii ka i hoohuiia ae ma ka hale noho o Rev. T.D. Garvia i ka po Poaha iho la, oia o Kaiwi Melena (w) o Molokai a me Mahina Hekekia o Kona, Hawaii.
E hele i kahi o Makapolena Ma no na Waina maikai. Oluolu ka lakou kuai ana a piha pono no hoi ke ana.
Ua loaa mai he lono no ka hoopae malu ia ana aku o 200 tini opiuma ma Laupahoehoe ma kela huakai aku nei a ke Kinau. Ua loaa aku no i ka mea nona ia waiwai. Ola!
He paani kinipopo ko ka auwina la Poaono nei mawaena o na hui Puuwai a me Maile Ua lilo ka eo i ka inoa mua. E hoomau aku ana keia mau lealea, ma keia mua iho, i na Poaono a pau.
Elua mau pukuniahi nunui hou loa o ke Aupuni i hoea mai ma ka mokupea Aloha i ka pule i hala. Ua hoaoia iho nei ua mau ohule la a ua ikeia ka maikai e hiki ai ke kue aku i na enemi a pau e hoao ana e kipi i ka Repubalika.
I ka wa a ka mokumahu Pekina i haalele aku ai i ke awa o Iokohama, a holo mai nei no keia awa, e ku ana malaila he ekolu mokukaua Rukini, elua Amerika, a me ekolu Farani. Hookahi adimerala Rukini a me hookahi Farani.
Ua paewa iki ka makou hoike e pili ana no ka halawai o ka Aha Sinoda ma kela helu aku nei, e pili ana no na lala hou i kohoia o ka Papa Kahu Waiwai. O ka inoa mua i hoikeia aku ka i hewa, a o ka pololei o ka Rev. W. Horsfall ka i kahoia a me S Meheula.
Ma ka lokomaikai o ka luna nui o kela hui keaka Kepani e ku nei ma ka huina o na alanui Kalepa me Rikeke, ua loaa pa kahi mai la i na limahana oniu hua kepau o ka Halepai Makaainana na palapala ae e komo e nana i na lealea me ka auhau ole ia. Nui ka mahalo.
I ke awakea Poaono nei, ma kahi kokoke i ka uwapo o Haaliliamanu, ua a'e aku la na huila o ke kaapio o S. Naukana maluna o kekahi kaikamahine Pake ma na kuli, ole nae i ano kukonukonu loa ka ehu. Ua hopuia o Naukana no ka holo nui, a hookuuia mai malalo o $100 bona.
Hele i o Makapolena Ma no na Waina maikai loa, a lakou hoi e haawi nei no na kumukuai haahaa loa.
Ua lilo aku i ke kuai kudala ia e ke kakauolelo nui o ke Keena Kalaiaina kekahi apana aina Aupuni ma Pauoa, i ke awakea Poalua iho la. He apana keia i hooliloia ma ke ano pa hoopaa holoholona hele hewa i ka wa mamua, a ua lilo aku ia M.A. Goese a me M. Caldeira no $1,060. He 6 10 o ka eka ka nui.
Mahope iho o ka hora 8 o ka po Poalima nei, ua hoounaia aku la o Eleu malalo o ka Kapena Makale hookele ana e hanu mahope o ka meheu o na poe hoopae malu i ka opiuma a puni o Oahu nei. Ua lawe pu aku o ia he hookahi pukuniahi a me na poe kipololei paha ma ia huakai. Ua hala loa aku no hoi no Maui, Molokai, a me Lanai, e hakilo ai, malia ua pae ae la malaila.
Poaha iho e ku mai ai ka Alameda mai na Panalaau Hema a holo loa aku no ka Ipuka Gula.
Nui ka maikai o na hana ke aka a na Kepani i ka po Poalima nei, a me he la o keia paha ka hui keaka mua loa i ikeia ka maikai a me ka nani maoli no o na hana. Eleu a mikoi maoli no na kiina o na hana kamahao. O ia like ana no ka maemae me ko ka po Poaono nei.
-
Na Waina Kaleponi
HOEMIIA KUMUKUAI
-MA KAHI O-
MAKAPOLENA MA,
Alanui Kaahumanu.
-
Ke hoolilo aku nei makou i na WAINA MADEIRA, POTA, ANAGELICA a me TOKE, ma na
Kumukuai Emi Loa.
A no ka Maemae a me ka Mikomiko, o keia ae la na Waina maikai loa i haawiia ma keia mau Paemoku.
Ano no hoi o Mr. E.C. Makapolena i huli hoi mai nei mai Kaleponi a ua loa aku nei hoi na launa a me na kukai ana me ka Halekuai Waina i ike lea ia o KOHLER & VAN BERGEN, no laua hoi na inoa i ikeia a puni o Amerika Huipuia no ka laua mau
Waina Maemae Maoli No.
Eia wale no ke kuai ana o keia mau waina ma keia Paeaina ma ko makou halekuai ma Alanui Kaahumanu, a ma ka HALE INU WAIONA O KAOPUAUA, kihi hikina o na Alanui Beritania me Nuuanu, a ma ka NEKINA, kihi hema o na Alanui Hotele me Nuuanu.
E HOOMANAO O NA
WAINA MAEMAE WALE NO
Ka makou e kuai nei a me ka haawi aku i ke ana piha.
Macfarlane & Co.,
Alanui Kaahumanu, makai iho o ko bihopa Ma Banako.
dek 9-mp
-
Kuai Hoopau Nui!
NO KE KAU KARISIMASA.
Iloko o keia mau la e nee nei a pau na la kulaia hoohauoli Karisimasa a me Makahiki Hou, e kuai hoemi loa ia aku ana na waiwai o ka halekuai o
H.W. SCHMIDT & SONS
(KAMIKA ME NA KEIKI),
I loaa ai hoi he wahi no na waiwai hou e hiki mai ana. E oi loa aku ana ka emi i ko na hale e ae, aia ka pono o ke kaawale aku, a na ka hiki mua no ke eo. O ka wa pono keia, aohe wa e aku, e loaa ai me ka oluolu loa o na
Kihei Huluhulu, na Kihei Uhi Moe, na ano a pau, Na Huluhulu o na waihooluu a ano like ole,
Na lole Pio Tela, na Palaka o Kane, na Aahu, na Kamaa, a pela aku, he nui loa hoi ke helupapa aku.
H W Schmidt & Sons,
Alanui Papu, ma Ewa ae o W G Iwini Ma.
dek 9-4mnw
-
KU KIMA
Helu 411, Alanui Nuuanu. Helu 59 maluna.
Oiai, ua pau ka wa kuai hoemi ma ko'u halekuai, eia nae, e hoomauia aku ana no ke kuai emi ana o na waiwai iloko o keia mau la e nee nei a pau ae na la kulaia.
O na Kalakoa, na Lole Huluhulu, na Kinamu, na Keokeo Halua, na Lole Alapia, a pela aku.
Pela no hoi me na aahu o Kane me Keiki.
Heluna nui o na Kamaa no na poe a pau.
ok 14-2mh dek 9
Olelo Hoolaha.
E ike auanei na mea a pau loa, ke papa a hookapu loa aku nei au i na poe e noho la maluna o kuu aina i ikeia no Paele k, e waiho la ma Kukuihaele, Hamakua, Hawaii, e hookaawale lakou mai keia aina aku iloko o hookahi mahina mai ka la e puka ai nei hoolaha. Ina he kumu ko lakou, e hoike mai, a i ole pela, e hookoia no na olelo o keia hoolaha. MELE WAIKULONO,
Moopuna ponoi loa a Paele k.
Mokauea, Kalihi, Oahu, Dek. 4, 1895.
dek 9-3mnw
-
DAI NIPPON
Helu -, Aoao makai o Alanui Hotele, ma Waikiki o ke kihi o Monikahaae.
Ma ka mokumahu Kulanakauhale o Pekina i loaa mai nei na
WAIWAI IAPANA HOU
NA SILIKA, NA LOLE KEPANI,
NA LAKO HOONANI, a pela wale aku,
A e weheia ana i ka Poakolu, la 11. E hoomanaoia, e kuai emi loa ia aku ana keia mau waiwai oiai ke kau kulaia, i oi aku no paha hoi ka emi i ko na halekuai Kepani e ae.
Mrs. J.P.P. COLLACO, Ona.
dek 9-8mnw
-
1896
KA MAKAAINANA
NO NEI MAKAHIKI AE.
-
UKU O KA NUPEPA
No ke Kope Hookahi - - $.10
No Hookahi Malama - - - .25
No Ekolu Malama - - - - .75
No Hookahi Makahiki - - 2.25
Ina e hookaa mua ia, penei iho ka auhau ana:
No Ekolu Malama - - - $.50
No Eono Malama - - - - 1.00
No Hookahi Makahiki - - - 2.00
UKU O NA LUNA NUPEPA.
No 5 Inoa - - - 15 ken.
No 10 Inoa - - - 20 "
Maluna aku o 10 Inoa - - 25:
-
1 - Ke hoikeia aku nei ka lohe i na poe a pau e makemake ana e lawe i keia nupepa i nei makahiki ae, e hookaa mua mai ka pono, ina no ma ka hapaha, hapalua a makahiki holookoa paha. Ke ole no ia, aohe nupepa e loaa aku ana. E ukali pu mai ke dala me na kauoha nupepa a pau. Ua koe no nae hoi me makou ke kuleana hilinai aku i na poe a makou i ike a i maopopo ai ua kupono ke hilinaiia.
2 - O na manao hoolaha, e pono e ukali pu ia mai me na inoa oiaio o na poe hoolaha manao. Ke ole ia, aole loa e hoopukaia aku. Pela no hoi me na hoolaha anoai, a pela aku. Aole i manaoia na inoa oiaio no ka hoolaha aku, aka, i mea e hiki ai ke hilinaiia.
3 - Aia no me makou ke kuleana o ka manawa e hoopukaia aku ai o na manao, oia hoi, ke loaa he wa kaawale kupono. Ina hoi he mau manao i akeia e puka koke, e laa me na hoolaha make, a pela aku, e pono no e hoouna mai i uku no ia mea, i hoihoi ai hoi ka hana ana. Ke ole no, alaila, waiho no a ko makou wa kupono me ka uku ole no ia moe ana.
4 - E hoouna pololei mai i na olelo hoolaha i ka inoa malalo iho. Pau pu no hoi me na kauoha nupepa. A iaia no hoi e hoouna mai ai i na manao a pau no ka hoolaha aku.
5 - O na hoouna dala ana a me na kikoo leta, ma ka inoa wale no ia o ko makou Puuku. Ua lawa kana palapala hookaa no makou, a o kana hookahi wale no ka mea mana, aole o ka makou a me ke kahi poe e ae.
-
HALEPAI - Aia ma Alanui Konia, ma ka aoao Ewa, a mauka ae o ke kihi akau o Alanui Moi.
KEENA HOOPUKA - Aia ma ke keena o ka Puuku, Mr. F.J. TESTA (Hoke), ma Waialeale, Helu 327, Alanui Moi, ma ka aoao mauka o kahua Halewai kahiko, a malalo iho e pili pu ana ma Ewa aku o ka hale o ka Ahahui Pake.
No na mea aku i koe, e ninau ia
W.H. KAPU,
Ona, Luna Nui a Lunahooponopono.