Ka Makaainana, Volume IV, Number 27, 30 December 1895 — Page 7
HONOLULU, OAHU, POAKAHI, DEKEMABA 30, 1895. 7
HAKI & KAKELA.
-
Kukai Olelo a na Lawaia me ka
Peresidena o Amerika Huila.
Ua apoia mai ko kakou Kuhina Noho hou ma Wasinetona, oia o Haki, i ka la 4 nei, e Peresidena Kalivilana. Penei iho na olelo a ko kakou Kuhina i hai aku ai iaia i waiho aku ai i kona palapala hookohu a me na palapala pili oihana e ae:
E MISITA PERESIDENA: - Ua loaa ia'u ka hanohano e haawi lima aku ia oe i kekahi palapala i kakauia e ka Peresidena o ka Repubalika o Hawaii, e hoouna mai ana ia'u i ou nei ma ke kulana Elele Kiekie a Kuhina Mana Nui no Hawaii.
"Ua kauohaia mai hoi au e hoike aku ia oe i na manao o ka mahalo hohonu a me ka pili aloha i hiipoiia ae e ke Aupuni Hawaii a me ka lahui i na kahua lawelawe hoohana o kou aina, a e hooia aku hoi ia oe i na manao maikai i hookipaia e lakou no ka hoomauia aku o kou holomua ponoi iho.
"A ua ao hou ia mai no hoi au e imi aku ma na ano a pau e hiki ana ia'u ke hooko aku no ka hoomauia a me ka unuhi kokoke ana mai i na launa ana, i hoohui loihi loa ia ai hoi ka launa makamaka a aloha pumehana ana mawaena o Amerika Huipuia a me Hawaii. Ma ka hooko ana hoi i nei hana, e hoao no au ma na hana a pau e lawelawe aku ma ke ano e hiki ai hoi ke aponoia e kou Aupuni."
Ua hookunana a hoouluhuaia ka Peresidena e nei mau wahawai aku, a pane mai ai oia i na olelo mahope iho i ano kuluma mau i ka hoopuka pili oihana ia:
"E MISITA KUHINA: - O na hoike manao oluolu au i hoike mai nei ma ka aoao o kou Aupuni a me ka lahui, he keu maoli a ka oluolu launa ole mai a ua loaa hoi he pane pumehana ana iloko o ka hooulu manao ana o ko'u poe hoalahui a me ko lakou Aupuni. E hooiaia aku no hoi paha oe, e Misita Kuhina, e ka hooia manao kupaa ana a'u a me ko'u poe hoa hana pu ma ka hooponopono aupuni ana e pane aku ai i na hoao ana a pau ma kou aoao e hooholomua aku i ka launa ana e mau nei mawaena o na aina a elua; a nou ponoi iho hoi, hoi, ke olelo e aku nei no au mamua ae aole no hoi paha e emi iho ana na launa laulea pilikino ana ma kou ola ana no ka lehulehu a hou ponoi iho mamua ae o ka launa ana i loaa mau iho nei i kou mua ae."
Pau ae la hoi o Haki, ua ku aku o Kakela, me ka maopopo ole loa hoi o kana huakai aku nei i Wasinetona a hiki mai i nei wa, no ka mea, ua uhi paa pu ia e ka noe a me ka ohu. Ua waiho aku oia i kona palapala kahea, ma ia hoi oia i kauohaia aku nei e hoi mai, a ua u-u aku i nei haiolelo iho.
"E MISITA PERESIDENA: - Ma ka haawi ana aku hoi i ko'u mau palapala kahea, ke nana hope aenei au, me ka hauoli, i na hana o ko'u noho pokole ana ma ke kulanakauhale poo o Amerika Huipuia nei, ma ke ano elele no ka Repubalika Hawaii.
"O ke ano pumehana hoi o ko'u hookipaia ana, me ka hoomauia o ka oluolu i haawiia mai ia'u oiai au e noho ana maanei, he hooia hou ana hoi ia o kela ano makamaka, mai na la mua loa mai hoi, a Amerika Huipuia i hoike ai ia Hawaii. O keia manao, ma kona hoakaka ana ae, ka i hana nui loa aku no ka hoonaauao ana a me ka hooholamua maopopo ana o kela aina mamao, ua hoomaopopoia me ka apono ana a ua panaiia mai no hoi e ko'u Aupuni mai mua loa mai, aka, ua manao au ua hiki no ia'u ke olelo ae, aole loa i oi ae ke oolea mamua ae o nei wa ano.
"Ma ka haawi ana aku hoi i ke aloha ia oe, a me ka hoike manao ana aku hoi nou a me keia Aupuni nui i kekahi hoomauia ana mai o kela holomua i lilo i mea ano nui iloko o ka wa i hala ae, ke olelo mua e ae nei no au no ko'u hope i kela mau launa oluolu like ana hoi i mau mai iloko o ko'u noho pokole ana"
A mamuli paha hoi o ko ka Peresidena hauoli i ka haalele aku o nei elele Hawaii, ua pane mai oia.
"E MISITA KUHINA: - Ma ka lawe ana mai hoi i na palapala kahea, a ma ia hoi i hoike mai nei ka Peresidena o Hawaii i kou kaheaia e hoi aku mai ka huakai hana au i hoopiha iho nei ma keia kapitala iloko o na malama kakaikahi i hala ae, ua hauoli au ma ka hoomaopopo ana ua ike iho oe i ka oluolu maikai o kou noho pokole ana maanei, a o ka hookipa ana hoi i haawiia aku ia oe ponoi iho a me kau mau hooikaika ana e hooholomua aku i ka launa makamaka a manao maikai ana ma na kukai a kou Aupuni i ko Amerika Huipuia, ua loaa ia oe na mea a pau au e hiki ai ke iini. Ke hilinai nei au o kou noho pokole ana maanei, ma kona mau hui a launa pili oihana a pili laulea ana aole loa ia e pio ana ma ka lilo ana ae hoi i mea e hoomanaoia ai me ke ano oluolu."
Pela iho la i pakele maalahi ai ka Peresidena mai ka hooulu huaia, a pau mai hoi kahi a noho pani hou aku kahi. Lea no kulou ana a ua mau lawaia la.
-
Ke haawi aku nei o Makapolena Ma i na Waina Kaleponi ma na kumukuai haahaa. Ua maemae loa hoi ka lakou mau ano waina a aole hoi i paipaiia e like me na ano waina lehulehu e ae e kuaiia nei ma keia makeke.
Hele i o Makapolena Ma no na Waina maikai loa, a lakou hoi e haawi nei no na kumukuai haahaa loa.
Piha hauoli ko makou mau keiki hana ma ka La Karisimasa iho la.
Iluna o ka Balatimoa i ka Poaha iho la, a ua haawiia mai na ki pu aloha ana nona e like me kona kulana.
He 17 makahiki a keu o Ema Lahapa Kiliona a hala aku la i kela ao, aole hoi he 15 e like me ka makou i hoike ai ma ka helu i hala. Ma Kauluwela kahi i hanauia ai.
E ninau mau no ka Makapolena Ma mau ano Wiana, a e loaa no ia oe ka mea maikai loa.
-
HALEKUAI LAHUI KALAHIKI.
Helu 405, Alanui Moi, ma Waikiki aku o Alanui Nuuanu, ma ka aoao mauka, ke keena mua o ka "Hawaii Holomua."
Ma ia halekuai o na oiwi e loaa ai na anoi a me na paihi o na ano hou loa, e laa
Na Kalakoa, Na Keokeo,
Na Makalena, Na Kinamu,
Na Huluhulu, Na Lihilihi,
Na Kamaa o na Kane, Wahine me Keiki, a pela aku.
Oluolu no ke kuai ana. Aohe hewa ke kipa mai e ikemaka, a aohe no hoi he kunukunuia no ka hoikeike ana i na mea kuai.
M. PALAU, Luna Nui.
ok 14-tf
-
Waihona Buke Hawaii.
E loaa no na buke ma ka olelo makuahine no ke kuai ma ke keena o ko makou Puuku. Penei iho kekahi o ia mau buke:
Laieikawai - - - $1 00
Gaberiela Lenoa - - - 75
R.W. Wilikoki - - - - 50
Hookahuli Aupuni o 1895 – 50
a pela aku, a pela aku.
O na buke e ae no hoi kekahi, e laa na buke kanawai, a me kahi mau ano e ae, ke ninau pololei ia mai ia
F.J. TEST (Hoke),
ok 28-tf 327 Alanui Moi.
-
Kuai Hoopau Nui!
NO KE KAU KARISIMASA.
Iloko o keia mau la e nee nei a pau na la kulaia hoohauoli Karisimasa a me Makahiki Hou, e kuai hoemi loa ia aku ana na waiwai o ka halekuai o
H.W. SCHMIDT & SONS
(KAMIKA ME NA KEIKI),
I loaa ai hoi he wahi no na waiwai hou e hiki mai ana. E oi loa aku ana ka emi i ko na hale e ae, aia ka pono o ke kaawale aku, a na ka hiki mua no ke eo. O ka wa pono keia, aohe wa e aku, e loaa ai me ka oluolu loa o na
Kihei Huluhulu, na Kihei Uhi Moe, na ano a pau, Na Huluhulu o na waihooluu a ano like ole,
Na lole Pio Tela, na Palaka o Kane, na Aahu, na Kamaa, a pela aku, he nui loa hoi ke helupapa aku.
H W Schmidt & Sons,
Alanui Papu, ma Ewa ae o W G Iwini Ma.
dek 9-4mnw
-
HUI HANA KOPA HONOLULU.
-
Hoolaha no ke Kope ana o ka Pepa Hoailona a me ka Hoailona Kalepa.
-
Mamuli hoi o ka loaa ana mai ke Kuhina Kalaiaina, malalo o na kanawai o ko Hawaii Paeaina, o kekahi Palapala Hooia no ke kopeia ana o ka Pepa Hoailona a me ka Hoailona Kalepa, e like ia me ia e hoohanaia nei e makou,
Ke hoolahaia aku nei ma keia e hoopii no ka Hui Hana Kopa Honolulu iloko o na Aha Hookolokolo o ka Repubalika i na poe a hui paha a pau loa e kuai ana i ke kopa o ka Hui, a i ole ia, malalo paha o ka inoa "Kopa Honolulu" a "Kopa Hawaii" paha, koe ke kopa i hanaia e makou.
HUI HANA KOPA HONOLULU, KAUPALENAIA.
F.W. MCCHESNEY,
Peresidena.
Honolulu, Novemaba 4, 1895.
-
O ke Kopa a pau loa i hanaia e keia Hui, ua hoailonaia kela a me keia auka e like me keia malalo iho:
HONOLULU SOAP WORKS CO.
M.W. MCCHESNEY & SONS.
O kekahi Kopa e ae e kuaiia ana me ka Hoailona e ae, he Kopa ia no waho mai a ua like ole ka maikai.
dek 16-4pl
Na Waina Kaleponi
HOEMIIA KUMUKUAI
-MA KAHI O-
MAKAPOLENA MA,
Alanui Kaahumanu.
-
Ke hoolilo aku nei makou i na WAINA MADEIRA, POTA, ANAGELICA a me TOKE, ma na
Kumukuai Emi Loa,
A no ka Maemae a me ka Mikomiko, o keia ae la na Waina maikai loa i haawiia ma keia mau Paemoku.
Ano no hoi o Mr. E.C. Makapolena i huli hoi mai nei mai Kaleponi a ua loaa aku nei hoi na launa a me na kukai ana me ka Halekuai Waina i ike lea ia o KOHLER & VAN BERGEN, no laua hoi na inoa i ikeia a puni o Amerika Huipuia no ka laua mau
Waina Maemae Maoli No.
Eia wale no ke kuai ana o keia mau waina ma keia Paeaina ma ko makou halekuai ma Alanui Kaahumanu, a ma ka HALE INU WAIONA O KAOPUAUA, kihi hikina o na Alanui Beritania me Nuuanu, a ma ka NEKINA, kihi hema o na Alanui Hotele me Nuuanu.
E HOOMANAO O NA
WAINA MAEMAE WALE NO
Ka makou e kuai nei a me ka haawi aku i ke ana piha.
Macfarlane & Co.,
Alanui Kaahumanu, makai iho o ko Bihopa ma Banako.
dek 9-mp
-
HALEKUAI KUIKE OAHU
-
"KE OLA O HAWAII."
Helu 322, - - - Alanui Nuuanu.
Oiai hoi, ua pau ae la ke kuahana ana, ua weheia hoi ka halekuai maluna ae i Iulai 1 nei, nolaila, ua makaukau loa e hooko a e hoolawa aku i na iini o na poo a pau. E ko no ka makemake o na wahine ke kipa mai malaila, a e pono no hoi ke kipa mua mai mamua o ka hele ana i na halekuai e ae. Malaila no e loaa ai.
Na Makalena, na Kalakoa, na Keokeo Halua me Vitoria, na Papale, na Kakini, na Hainaka, na Waiala, a pela aku a nui a lehulehu wale.
E ike mai ia kakou hoakanaka.
M.E. SILVA,
iul 8-tf Luna Nui.
-
NO WAIANAE
O R. & L. CO.
MA NA POAONO A ME NA LA PULE.
E haalele no na Kaamahu ia Honolulu nei ma na hora 9:15 A.M. a me 1:45 P.M o na Poaono. Ke huli hoi mai, e hoea ana i Honolulu nei ma na hora 3:11 a me 5:26 P.M.
Ma na La Pule, e haalele ana ke Kaamahu ma ka hora 9:15 A.M. E hoea hou mai ana i ka hora 5:26 P.M.
NA PALAPALA UKU PUNI:
Papa Ekahi, - - - - - - - $1 75
Papa Elua, - - - - - - - - - 1 25
F.C. SMITH,
Agena Ohua a Palapala Nui.
ok 21-tf
-
AINA PA-HALE NO KE KUAI.
Aia keia pa-hale ma Kapauhi, ma Waikiki iho o ka Hale Ahahui Opiopio Pake, he 3,120 kapuai-huinaha ka ili.
No na mea a pau e pili ana, e ninau ia
F J TESTA,
nov 11-mp 327 Alanui Moi.