Ka Makaainana, Volume V, Number 8, 24 February 1896 — Pii i ka Lewa me ka Baluna. [ARTICLE]

Pii i ka Lewa me ka Baluna.

He lele baluna ko lalo o Manana, Ewa, i ka auwina la Poaono nei, na James W. Price, he haole Amerika kaulana ma ia hana. Oiai, aole makou ilaila, ua lohe mai nae hoi ua lele oia a makahi paha o 1,500 kapuai ke kiekie, a hoohaule hou mai ma kona loulu a haule i uka o ka pali. I ka pa ana o na wawae ilalo, ua hina oia i hope a eha kona poo, aole nae i kukonukonu loa. Na ke kumu o ke kula olelo Enelani o Waiawa i uhai malalo maluna o ka lio a loaa oia i ka haule ana iho a lomilomiia ke poo. Ina ma ka aina aku ka makani, haule paha oia i ke kai a pau paha i ka haumia e na mamo a Kaahupahau ma, aka, i pakele oia, ma ke kai mai ka makani a haule ai no i kula. E hana hou ana no ka oia ma keia mua iho. Ma ka po Poakahi i hala i naue palanehe aku ai o W. E. Kealakai, ma kona home ma Kauanonoula, a hele aku la i ke ala hoi ole mai. I ka Poalua mai i nalo aku ai oia ma ka ilina o Kawaiahao. He kanaka oia i mahalo nui ia iloko o na wa i hala, oiai oia e noho ana ma ka oihana koa i ke au o na Alii i hala e aku mamua ona. Aloha wale oia!